Zakaliya 9
9
U wuling'anizwe we zinghungugo zono zipilime Yelusalemi
1Ayi yo nghani yono yikulawa kuli Muwaha Mulungu. Muwaha Mulungu yakalavya lilajilizo lyo wulipicizwe we yisi ya Hadelaki, ne likaya lya Damesiki. Ninga wulipicizwe wuwo si wowa so zimhuga ze Waisilayeli du, langa hamonga ne likaya lya Siliya, likaya lyo Muwaha Mulungu. 2Na Hamati yono yili behi na Hedelaki, hamonga ne makaya ga Tulo na Sidoni, hamba gawe gena mahala menji. 3Nayo Tulo, yezenjela magomawakali gono galipilime likaya, no kukonghola fweza nyinji, hamonga na zahabu nyinji, kotya matope ga mu nzila. 4Ninga lanje ta! U Muwaha Mulungu komuwusiza lukulu vivyo vyose. Nayo kolozigumila zi sawo zakwe mwi'lenga, ne likaya nalyo, lyoloticimizizwa lukulu.
5Ne likaya lya Ashikeloni lyoloziwona zizi nalyo lyolokogopa. Nhavivyo ne likaya lya Gaza, lyoloziwona zizi, nalyo lyolowona wusungu wuwaha muno. Nayo Ekiloni hamonga no witumbilo wayo wose, nayo yolobenanjizwa. Nayo Gaza yolowula mutemi, Ashikeloni yololekwa mu wuciwa wuwaha muno. 6Ne wanhu macotala, wolokwikala hamonga ku Ashidodi. Nayo Muwaha Mulungu yakutya, “Nowanyetya wawa i Wafilisiti wewoni. 7Siwoloyilila lukulu kanyhi nyama yono yina ne sakami yayo, hamba kulya ndigwa yo yose yono yili mwiko kuyilya. Nawo wose wono wolosigala, wolojendelela kuwa wanhu wangu, nawo nolowehwaniciza ne mhuga ya mu lulelo lwe nyumba ya Yuda. Nayo Ekiloni yose, wolowa wanhu wangu kotya Wayebusi. 8Nane noyilanjilila yisi yiyi, kanyhi nowika ne wasilikale wono woyidima ho wanji walece kukola mumo. Kanyhi hamba sinowakombola walugu hamonga ne wewonezi, ho wawewonele wanhu wangu. Hambi nha nakondya kuwona vyono, i wanhu wangu wakugazwa muno.”
U mutemi wo mulamu mono cikumulanjilila
9Musecelele, musecelele nye nyo
wanhu wa ku Sayuni!
Muzoze muno muno so nyemo,
anye nyo wanhu a Yelusalemi!
Mulanje ta!
Mutemi wenyu yakumuzizenyi 'nye!
Yakuza yena nyemo mbaha ne mhonelo,
kanyhi mupolo,
yakuza yali mucanyha ye ndogowe,
nyana ye ndogowe.
10Muwaha Mulungu yakutya,
“Nogawusa ne matuka go wulugu,
gono gakulawa ku Isilayeli,
niziwuse ne zifwalasi
zono zolawa ku Yelusalemi,
hamonga no wupinde
wono wukwitumamilwa mu wulugu,
vyose vyokongomezwa.
No mutemi wenyu,
koleta mulamu kuli zinghungugo zose.
Kanyhi kotema ku wulawilila kwi'lenga sunga
ko kwi'lenga na ku wulawilila kwi 'kolongo lya Efulata,
sunga ko kundumo ye yisi.”
Kuwagomola kanyhi wanhu wo Mulungu
11U Muwaha Mulungu yakutya,
“Kusoko ye cilagane cangu na nyenye,
cono cawikwa
mu nzila ye sakami ye makumbiko.
Holeka nane nowawopolela wafungwa
no kuwawusa mwi'kombo
lyono lisina malenga,
likombo lyo wuhamywe.
12Ale muwuye anye wose nyo wahamywa
mono alu mweza mwina witumbilo,
muwuye ku wikalo wenyu wono wina mulamu.
Alu nghumulonjelenyi vyono,
nomupelenyi wulugutwe kali kejete
ku soko magaziko genyu.
13Nomwitumamila Yuda yawe kotya
wo wupinde wo musilikale,
na Isilayeli yawe kotya zo songa.
Nowetumamila wanhu wa
ku Sayuni wawe kotya wo mumaje,
wehome ne wanhu wo Wugiliki.”
14Nayo Muwaha ho kokwilajila
mu wanhu wakwe koguma zi songa zakwe,
nazo zobita kotya limuli.
U Muwaha Mulungu yo kotowa ne ndulele.
Nayo kojenda ne mbeho
ye civulavumbi kuwulawilila ku takama ye yisi.
15Kanyhi u Muwaha Mulungu
we mihanga yo kowakamisa ne wanhu wakwe,
nawo wowongomeza ne walugu wawo.
Kanyhi wolowa kuzoza kuko
ku wulugu kotya nhe wagalo 'jimbi
kanyhi wolopegwa vilungo
vyo kuyimwaga sakami ye walugu wawo;
sakami yiyo yolohuluma kotya sakami
ya ha wukumbicilo,
yono yimwajigwe ku wulawa
mu bakuli ha cikumbicilo.
16Hobaho lizuwa lilyo lilaza kuwa lyafika,
u Muwaha Mulungu
ho kolowaponya wanhu wakwe,
nha vyono umudimi kaponyaga litewa lyakwe,
lono lyamanyhilwa ne lilimu.
Nawo wolong'alala mu yisi yakwe,
kotya nha vibwe vyo wihambo,
vya mu mukumbo wo wutemi.
17Lanjenyi ta,
yisi yiyo yolowa swanu wule?
I wahinza ne wazelelo,
wolowa kuwiluka wali vilungo,
so wuhemba ne divayi vyono vili mumo.
Currently Selected:
Zakaliya 9: LLKWW
Highlight
Share
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
