Mwamulizo 28

1Ale, Isaka yakamucema Yakobo, yakamulugutiza, yakamulajiliza, yakamutya, “Mwanangu Yakobo, wulecele lukulu kutola mucekulu wo wose Mukanani. 2Langa nhondo wubite ku Padani-alamu, ku kaya yo kukuyo Betuyeli, kuko ko wukamutole mucekulu, muli wana wa Labani u lumbulye wo nyina yako. 3Nayo u Muwaha Mulungu, Mudaha vyose, yakulugutize, ho lulelo lwako lwinjipe muno, no konjelezeka, ho wuwe mhuga mbaha ye wanhu. 4Mulungu yakulugutize gwegwe, hamonga no lulelo lwako, nha vyono yamulugutiza kukuyo Abulahamu, nagwe ho wuyihale yisi yiyino, yono wikaye mumu nha wuli mujenzi, yisi yono Mulungu yamupela Abulahamu!” 5Isaka yakawa kumutuma Yakobo yabite ku Padani-alamu. Nayo Yakobo yakawa kutuluka, yakawa kubita kuko kuli Labani u mwana wa Betuyeli Muwalami u lumbulye lya Labeka, u nyina ya Yakobo na Esawu.

Esawu yakutola u mucekulu we kadatu

6Nayo Esawu, yali yakondya kumanya vyono, sogo yawo Isaka yakondya kumulugutiza Yakobo, na vyono alu yakumutuma yabite yakatole kuko ku Padani-alamu, na kanyhi na vyono lono yamulugutiziza, yamutya vyono yalecele lukulu kutola mucekulu mu wana we Wakanani. 7Kanyhi yakamanya nha vyono, Yakobo yawahulika walezi wakwe, yakabita ku Padani-alamu. 8Holeka Esawu yakamanya nha vyono kumbe u sogwe, siyakwendezwa ne wacekulu we Cikanani. 9Holeka, hamonga na wawalya wacekulu wanji, yakawa kubita kanyhi kwa Ishumayeli u mwana wa Abulahamu, yakawa kumutola Mahalati u mwana wa Ishumayeli u lumbulye lya Nebayoti.

Indoto ya Yakobo yono yalota ku Beteli

10Yakobo yakawa kutuluka ku wulawa ku Belisheba, yakubita ku Halani. 11Nayo yali yeza kufika hanhu hanji, na vyono lizuwa lyali lyaswa, yikawa yimunojeye yagone baho. Ale, yakasola libwe, yakeciwiza ku mutwe wakwe, yakawa kugona. 12Na lono yali yali mu nhongo, yakalota ndoto, na mu wulote wakwe, yakawona ngazi 'simye mono'nze, ne cisonje cayo cificile ko ku wulanga. Ne wamalayika wo Mulungu wakolaga mu ngazi yiyo, wakubita kucanyha no kutima hasi. 13No Muwaha Mulungu nayo, yali yemile mu ngazi yiyo. Nayo Muwaha Mulungu, yakamulonjela Yakobo yakatya, “Ane yo nene u Muwaha Mulungu, u Mulungu wo sogo Abulahamu, u Mulungu wa Isaka. Ne yisi yiyino yono wugonile, ane nokupela gwegwe hamonga no lulelo lwako. 14No lulelo lwako, wowa wenji muno nho muhangha wa mono'nze, nagwe kotandala mose, kumwezi, kucilima, kusumuka, na kutakama. Na muli gwegwe no lulelo lwako, i zinghungugo zose mo zolugutizizwa. 15Ane nowa nili hamonga nagwe, nokukamisa ko kose kono wukubita, nokugomola kanyhi mono yisi yiyi. Nane sinokulecela lukulu, sunga kolo nakondya kufisiliza u wihuwizo wono nghwihuwizize.”

16Nayo Yakobo yali yeza kusinhuka mu zinhongo, yakatya, “Mbeka u Muwaha Mulungu yali bahano, nane si nali manyile yaye!” 17Baho Yakobo yakenjilwa ne woga wuwaha muno, yakatya, “Ka, i hanhu hano, hakogofya kotya cici! Ane nghuwona, aha, yo Nyumba yo Mulungu, kanyhi lye'lango lya ku wulanga.” 18Yakobo yakawa kwilawa kwinuka hakali mitondo muno muno, yakawa kulisola libwe lililya lyono yali yehegame ku mutwe wakwe, yakawa kulisimya nhe sumbili. Hanyuma yakawa kulisiwanula ko kulijidila mafuta. 19Yakawa kuhacemela hanhu baho, litagwa Beteli. Ninga ilitagwa lilongozi lye hanhu baho, hacemwaga Luzu. 20Nayo Yakobo yakawika cipingo yakatya, “Hono agwe go Mulungu wuwe wuli hamonga nane, no kunghamisa mu muhinzo wangu, na kanyhi hono wumhele ne vivwalo ne zindigwa, 21kanyhi sunga wungomole mholile kuli baba. 22Ale, agwe go Muwaha Mulungu, gwegwe yo kowa wuli Mulungu wangu. Ne libwe lilino lyono nilisimizye bahano nhe sumbili, yowa yo nyumba yako go Mulungu. Nane nokupela monga kwe 'kumi ya muli vyose vyono komhela gwegwe.”

Currently Selected:

Mwamulizo 28: LLKWW

Highlight

Copy