Mwamulizo 27

Isaka yakumulugutiza Yakobo

1Lulo, Isaka yali yeza mukombi muno, sunga ne meso gakwe gali geza sigakuwona yaye. Nayo Isaka yakamucema Esawu, u mwanagwe muwaha, yakamutya, “Gwe Esawu mwanangu!” Nayo Esawu yakedika yakatya, “Ane hano baba.” 2Isaka yakamutya, “Alu mwanangu Esawu, wulanje, ane nakombipa, hamba simanyile ne lizuwa lyangu lyo kufwa yaye. 3Holeka nghukunena, wusole vitwalo vyako, wo wutya, lipongolo no wupinde wako, wubite ku mbago wukamhelembele mapelembo. 4Hanyuma wunozeze ndigwa swanu yono nyendile, wundetele nilye, nghulugutize mwanangu, lono nghali cawumi.”

5Kumbe Labeka nayo yazihulicizaga zizo zose, lono Isaka yalonganaga no mwanagwe Esawu. Holeka Esawu yali yeza kutuluka du ku wubita ku mbago ku wupelembi, 6akuno nayo Labeka yakawa kumuloloseza mwanagwe Yakobo, zose, yakutya, “Ane nimuhulika u sogo yakumulonjela u muwahawo Esawu yakutya, 7Esawu yabite yakamupelembele mapelembo, yamunozeze ndigwa swanu, yalye, yamulugutize hali Mulungu, lono u mwene sogo yakali cawumi. 8Alu mwanangu Yakobo, nghukunena, wuhulikaje zono nghukulonjela. 9Alu, wubite mbela mbela kwi'tewa lye zimhene, wundetele nyhinda nyejete, ninga wuhagule ziswanu muno muno, ho nimunozeze sogo ndigwa swanu muno muno yono mwene yayendile. 10Nagwe lu komutegulila sogo yalye, ho yakulugutize lono yakali cawumi.”

11Ninga mwene Yakobo yakamulonjela nyina yakatya, “Ninga yaya, wukumbucile vyono u muwaha wangu Esawu yena wukunzeje mu muwili wakwe wose, wono ane no mweneco niwusina. 12Yisolaga lunji baba kasaka kunyalabata, nane nokwijela nha munhu mono yakumwizwajiza. Na baho lu, mbeka nokwiletela wulijitwe, hamba si wulugutwe yaye.” 13Ninga unyina yakamutya, “Heya, si nghani yaye, u wulijitwe wako wuwe muli nene mwanangu, agwe wuhulikaje du zono nghukulonjela, wubite du'gwe wukandetele zizo zinyana ze zimhene.” 14Hodu Yakobo yakawa kubita yakawa kuzisola zizo zinyana zinyejete ze zimhene, yakawa kumuletela unyina, nayo nyina, yakawa kunozeleza ndigwa swanu muno, ndigwa yono sogwe Isaka yayendile muno. 15Hanyuma Labeka, yakawa kusola myenda miswanu ya Esawu mwanagwe muwaha, yono yali yili mu kaya, yakawa kumuvwika Yakobo u mwanagwe mudodo. 16Mu miwoko na muwutelemele we singo yakamuvwika mikunza ya zizilya zinyhinda. 17Hodu yakawa kumupela ndigwa yiyilya swanu hamonga no mukate wono yali yawuwikaniza. 18Nayo, Yakobo yakawa kwinjila kugati kono ko yuli sogwe, yakawa kumutya sogwe, “Baba.” Nayo sogwe yakedika yakatya, “Ane nili baha mwanangu, alu agwe yo gwegwe nani mwanangu?” 19Yakobo nayo yakamupitula u sogwe yakatya, “Gwe baba, ane yo nene Esawu u mwanago u mulongozi kulelwa. Nakondya kunoza nha vyono wundajilize. Holeka dedede baba, alu winuce, wikale wulye ze mapelembo gangu, wundugutize.”

20Ninga Isaka nayo, yakamuwuza yakatya, “Alu mwanangu, ho kusuma nhawule kupelemba mbela mbela nha vivi?” Nayo Yakobo yakamupitula, yakatya, “U Muwaha Mulungu wako yo yamhelile wusume wuwo.” 21Hodu Isaka yakawa kumutya Yakobo, “Ale sejelela ahano mwanangu, nghwalabate, ho manye hono mbeka yo gwegwe mwanangu Esawu, hamba ng'o.” 22Ale, Yakobo yakawa kusejelela hali sogwe Isaka, nayo Isaka yakawa kumwalabata, yakawa kumutya, “Mwanangu, lizi, lyo lizi lya Yakobo, ninga i miwoko yo miwoko ya Esawu.” 23Hamba si yasuma kumumanya, vyono i miwoko yakwe, yali yina wukunzeje nha vyono yinha miwoko ya Esawu muwahawe, holeka hobaho yakawa kumulugutiza. 24Ninga hamba nhavivyo, yakamuwuza kanyhi yakumutya, “Alu mwene, yo gwegwe mbeka mwanangu Esawu?” Nayo yakatya, “Heya baba, yo nene.” 25Hodu u sogwe yakawa kumutya, “Ale nhenjelaje mwanangu ze mapelembo gako, nilye, nghulugutize.” Nayo Yakobo yakawa kumutenjela sogwe, yakalya, yakamutegulila ne divayi, yakaying'wa. 26Hodu Isaka yaza kukondya kulya, yakawa kumulonjela Yakobo yakatya, “Ale mwanangu, wusejelele behi nane, wunonele.” 27Yakobo yakawa kusejelela hali sogwe, yakamunonela. Nayo sogwe yali yeza kuyihulika mhunjile ye vivwalo vyakwe, yakawa kumulugutiza, yakutya,

“Lanje ta, mhunjile swanu yo mwanangu, yihwanile mhunjile yo mugunda wono u Muwaha Mulungu yawulugutiza!

28Ale, Mulungu yakupele vye buhe ya ku wulanga,

yakupele ne'si yo moso mwinji,

no winji wo wuhemba ne divayi.

29Ne makungugo gakwitumamile,

ne wanhu wose wakufugamile.

Wuweze mutemi muli wanduguzo,

ne wana wo nyina yako nawo wakufugamile.

Na muli wose mono kokulijita, nayo yalijitwe,

na muli wose mono yakukulugutiza, nayo yalugutizwe!”

Nayo Esawu yakumunena Sogwe yamulugutize

30Nayo Isaka yali yeza kukondya kumulugutiza Yakobo, nayo Yakobo yali yeza kulawila du kulawa kuli sogwe, ho baho nayo Esawu yakawa kufika, yakulawa ku wupelembi. 31Nayo Esawu, yakawa kunozeleza ndigwa swanu muno nhavivyo, nayo yakawa kumutegulila sogwe Isaka, yakawa kumutya, “Baba, ale winukaje wikale, wulye mapelembo gangu ho wundugutize, yo nene Esawu no mwanago muwaha!” 32Nayo Isaka yali yeza kuzihulika zizo, yakatinuka muno, yakamuwuza yakatya, “Alu gwegwe nani?” Nayo Esawu yakatya, “Ane yo nene Esawu, u mwanago muwaha.” 33Oo! Nayo Isaka yali yeza ku zihulika zizo, yakacicima wucicime wuwaha muno, yakatya, “Alu yo nani yuyulya, mono yapelembile no kundetela mapelembo gakwe, alu nane nghondya kulya lono agwe wali wukali sinaza? Nane namulugutiza nakondya, nayo heya mbeka yakondya kulugutizwa!”

34Nayo Esawu yali yeza kuzihulika zinghani zizo ko sogwe, hodu yakawa kwangula cililo co wusungu, yakalila muno muno. Hanyuma yakamulonjela sogwe yakatya, “Gwe baba, nghukunena dedede, wundugutizaje nane ye!” 35Ninga Isaka yakamutya, “Wayiko mwanangu, u mwanakwenyu Yakobo kanyiziza ko wusugu, nayo lu, yakondya kuwusola u wulugutwe wako.” 36Esawu nayo yakamutya u sogwe, “Hee! Kumbe, holeka mbeka ayu yakucemwa Yakobo! Alu wawona, yakondya kusolela vilejeho vyangu kali kejete. Halulongozi yakasolela zo wulongola wangu wo kulelwa, na alu kanyhi yakondya kusolela no wulugutwe wangu.” Ale baho Esawu yakamuwuza kanyhi u sogwe, yakatya, “Alu baba, ane ma, siwumbiciye wulugutizwe wunji nane?” 37Nayo sogwe Isaka yakamupitula yakatya, “Ane nakondya kumunoza Yakobo yawe mutwawo, kanyhi nimupela i wanduguze wose wawe wetumami wakwe. Kanyhi nimupela sunga no wuhemba ne divayi. Alu ho nghunozeze nhawule ta, nagwe mwanangu?” 38Nayo Esawu yakamulonjela u sogwe, yakatya, “Alu mwene baba, wali wina wulugute wumonga du? Nghukunena dedede 'gwe baba wundugutizaje na nene ye!” Ale, baho Esawu yakangula kanyhi cililo, yakalila muno muno kwe 'zi yiwaha muno.

39Baho u sogwe Isaka nayo yakamupitula yakamutya,

“U wikalo wako wowa kutali ne'si yono yina moso,

Kanyhi kowa kutali ne buhe yose ya ku wulanga.

40Nagwe kokwikala mumi ko mumaje wako,

nagwe komwitumamila u mwanakwenyu,

ninga kolo wukwisukula mu miwoko yakwe,

ale kowa wewusa mu wutemye wakwe.”

41Hodu ku wulawilila baho, Esawu yakawa kumusula muno muno Yakobo u mwanakwawe, ku soko yo wulugutwe wono Yakobo yali yakondya kupegwa no sogo yawo. Nayo Esawu yakehwesa yakatya, “Ninga mwene i vilo vyo kumulilila sogo yetu nha vyasejelela muno. Ale, nane baho ho nomuwulajila u mwanakwetu Yakobo.” 42Ninga kumbe Labeka yakawa yalonjelwa zinghani zizo zo mwanagwe muwaha Esawu. Holeka yakawa kumutuma munhu yamucemele Yakobo u mwanagwe mudodo, nayo yali yeza kuza, yakamulonjela yakamutya, “Gwe mwanangu Yakobo, ale wilanjililaje muno kuli muwahawo Esawu, hambi nha yakusaka yakuwulaje. 43Holeka mwanangu Yakobo, wuhulice zono nghulonga, alu nghukunena, wumuwucilaje bahano muwahawo, wutizize ko lumbu lyangu Labani ku Halani. 44Wubite wukekalane nayo kwa vilo vicefu, sunga kolo likuwo lyo muwahawo lyawuka. 45Nayo muwahawo kolo yeza kusemwa zose zono wamutendela, ale notuma munhu yaze yakugomole. Alo socici fwilwe nanye wanangu wose vyono muli wejete mwi'zuwa limonga?”

Yakobo yakutumwa yabite kuli Labani

46Nayo Labeka yakamulonjela Isaka yakamutya, “Gwe Isaka, ane no muyago, sina hamba nyemo mu mikalile yangu, ku soko ya wa wano Wahiti, i wagolece wa Esawu. Wukwihwesa hono Yakobo yatole yumonga wa muli wawano wacekulu Wahiti, i mikalile yangu yowa yina cambuzici?”

Currently Selected:

Mwamulizo 27: LLKWW

Highlight

Copy