Malika 15

1Neke baho vilavage nulwa milavo neke valundanage navatekedzi avakomi navandzagila ikisina nululundano londa ulwa vahiga-nôngwa neke valonganage baho. Neke baho vamuvopage Jesu neke vamusogodzage neke vakamugotolage kwa Pilata. Mat. 27, 1. 2; Luk. 22, 66; 23, 1; Joh. 18, 28.

2-19: Mat. 27, 11-30; Luk. 23, 2-25; Joh. 18, 26-19, 16.

2Neke baho Pilata amuvudzage atigilage: vwi mutwa va va-Juda uveve? Neke umwene apilusage atigilage: ndevye ulilongile, je nene.

3Neke baho avatekedzi avavina neke vamufilage indzolofu hela.

4Neke baho Pilata avwilage kangi ukumuvudza neke atigilage: usipilusa kinu? Usikudzipulika dzonda, dze vidzova? 14, 61.

5Neke umwene Jesu atanage ukupilusa nambi limwi, akole mukudzuma na ju Pilata.

6Neke mbêpali pakyâka lwali lwîmbo ulwa kuvāvulila jumwinga uva pamuńololo, je vamuhagulaga va vene.

7Neke lino ali pwali jumwi uva pamuńololo, je vatigilaga je Balaba ilitavwa, je vamwibatye pamwinga navajagwe, avagalwike, vamuvulige numunu, pe vagalwike.

8Neke baho avanu ikipuga kyonda neke vinukage neke vahelelage baho pa-Pilata neke vatigilage: ungatwavulila jumwi umunu, ndevye vwigita mbêpali!

9Neke umwene Pilata apilusage atigilage: vona mwitigila ndivâvulilage ju mutwa va va-Juda?

10Pakuva adzelye ukuta avatekedzi avavina dzivatumile dzi sinwa, dze vamusutulye ukwangu.

11Neke avene avatekedzi avavina vavafundage avanu vatigilage: mutigilage utwâvulilage ju Balaba.

12Neke umwene Pilata avwilage ukupilusa neke atigilage: ndimugitage ndavuli umutwa va va-Juda uju, mungandongela?!

13Neke baho avene vavwilage ukukola yonda vatigilage: umutovelage pakipindulihidzo!

14Neke umwene Pilata atigilage: ahokile nôngwa jiki? Neke baho avene vongeledzage ukukola neke vatigilage: umutovelage pakipindulihidzo.

15Neke baho umwene Pilata atigilage ndivakyage avanu neke baho avavulilage ju Balaba neke umwene Jesu amusutulage kuvańa-kumutova nulufîmbo neke atovelelwage pakipindulihidzo.

16Neke baho avasilikali vamuhelelage nave kwipala lya lilînga neke vamukongolelage ikipuga kyonda kya vajanavo.

17Neke vamufwalidzage isopeka ja mulangalanga neke vativage ingêla ja mifwa neke je vamufwalidzage pamutwe.

18Neke vakole ukumuhungila vatigilage: adze, ve mutwa va va-Juda!

19Neke vamutovage nuludete pamutwe neke vamufuńilage namati kumîho neke vafugamage pasi neke vahongedzage ukwakwe.

20-41: Mat. 27, 31-56; Luk. 23, 26-49; Joh. 19, 16-30.

20Neke pe vamujovelidze neke baho vafulage isopeka ja mulangalanga jila neke kangi vamufwikage igyakwe imyênda. Neke baho vamuhelelage nave pakumutovela pakipindulihidzo.

21Neke vamugagilidzage umunu jumwinga, je ali ilitavwa je Simono uva mu-Kilene, udadavo va Alesanda na Lufu, ahumile kuvulime vwakwe, atigye ndidzumbanidzage. Neke vamwaṅanidzage hela pakumugagilidza, pakuta umuńamulile ikipindulihidzo kyakwe. Lom. 16, 13.

22Neke vakafikage nave baho, pe vitigila pe pa Gologata, kwe kuta paluṅala;

23neke vatigilagetu mu-ńwesage uvutoṅoni, vwe vahandzidze numuhandzu gwi mila. Neke umwene akanage ukuguńwa.

24Neke vamutovelage pakipindulihidzo. Neke baho vasolanilage imyênda ukuta utunga ikwinula ikinu ikitunga kila.

25Neke ukwene ukumutovela pakipindulihidzo vamutovye pasala ja vudatu.

26Neke na dzi nôngwa, dze vamuvalile, neke vandikage pakyâńa pakipindulihidzo, vatigilaga: uju je mutwa va va-Juda.

27Neke vavatovelage pamwinga pafipindulihidzo navagonadâsi vavili, ujungi kwivoko lyakwe ilya ndyo, ujungi kulya ṅigi.

28(Kwali kwe kuta luvonekage ulwa pahâte ulwitigila: vamuhandzidze nayańa-kupunya.)

29Neke lino vonda, avadzumbanidzaga, neke vamuligage, vajudzage na gi mitwe neke vatigilage: iti! je udzelye ukumamula ikyânga kya tembele, kangi vwidzenga ijingi imya ifigono fidatu. 14, 58.

30Ka lino uli na kiki ukwipoka vwijena, uli na kiki ukwika pakipindulihidzo?

31Neke avatekedzi avavina vahange navakagulihâte ukumujejesa neke vatigilage: avangi akiku-vapoka, ukwipoka ju mwene ilemwa.

32U-Kilisiti uju, umutwa va Jisilahele uju, angika lino pakipindulihidzo neke tumuvone neke tufuvwage. Neke navo, avatovelilwe pamwinga pakipindulihidzo, navo neke vamuhigage ndesi dzidzo. Mat. 16, 1. 4.

33Neke baho pasala ja mutanda, neke baho ikîsi kigwidzage ińi jonda neke jifikage pasala ja igôndza.

34Neke baho pasala ja igôndza neke baho Jesu akutage ilidzwi ilikomi neke atigilage: Eli, Eli, lama sebetani; pakuganula kwe kutigila: ve Nguluvi vangu, ve Nguluvi vangu, undekile kiki?

35Neke lino avangi, avimile baho, pe valupulike ulu, neke vatigilage: pulika! akumukemela Elija.

36Neke baho ujungi ańilage kisatu neke inage akênda muvugimbi vwa vutoṅoni neke amuńwesage. Neke atigilage: muleke tândi, tulole, nde ikwadza mukumwisa u-Elija.

37Neke umwene Jesu akutage ilidzwi ilikomi neke baho gudzimage.

38Neke baho nilibupa, lye vapingike mukyânga kya tembele, neke lidemukage ukuhuma pakyâńa neke lyapukilage pasi, neke gahambukage gavili.

39Neke lino umuńa-kipuga kya vasilikali, je valoleṅanaga nu-Jesu, avye amuvwene imifwile-vo, neke baho atigilage: ndakyene umunu uju je muswamuve va Nguluvi.

40Neke lino pe vali avakiṅinavo neke valolelage patali. Vali na Malija va mu-Magadala na Malija, uṅinavo va va-Jakovo umudebe na Jose neke nu-Salome. Luk. 8, 2. 3.

41Ve vene, avamuninilye, pe ali mu-Galilaja, avamulimilaga namalimo, navangi hela avolofu, ve fīnuṅise, pe ihelela ku-Jelusaleme.

42-47: Mat. 27, 57-61; Luk. 23, 50-55; Joh. 19, 38-42.

42Neke lino vuvye vuhwe pakya mihe, pakigono kya kwivujapa, pakya kuviluka kya ńwabaha

43neke baho adzage Josefe va mu-Alimatija, umundzagila umutambu-le, nave je avudzindilaga uvutwa vwa Nguluvi, neke isangamikage hela neke ingilage pa-Pilata neke aguńilikage umuvili gwa Jesu.

44Neke umwene Pilata adzumagelwe afwe. Neke baho amukemelage umuńa-kipuga kya vasilikali neke amuvudzage, nde afwe katali.

45Neke pe apulike kwa muńa-kipuga, neke baho agutavulage umufimba gwa Jesu kwa Josefe.

46Neke umwene agugulage umwênda umuvalafu neke amutumbukulage pakipindulihidzo neke amunyengage nimyênda gyakwe neke amuvikage mumombwe jakwe imya, je vajavile mwitālâvwe; neke pamulyango gwa mombwe abiluhidzage iliganga.

47Neke avene ava-Malija va mu-Magadala na Malija uṅina va Jose neke valolelage, pe vamuvikaga.

Currently Selected:

Malika 15: II

Highlight

Copy