Mataji 16

1-12: Mal. 8, 11-21.

1Neke baho vahegēlelage ava-Fwalisaja nava-Sadukaja vatigye tumugemyage, neke baho vatigilage: utuhufihidzage ikilóle kimwi ikya kukyâńa ikya kukukagulila uveve. 12, 38.

2Neke umwene apilusage atigilage: pakya mihe mwitigila: kwikya kilavu, pakuva kuduṅupye kukyâńa. Luk. 12, 54-56.

3Kangi pamilavo mwitigila: neṅuli jitońa, pakuva kukyâńa kuduṅupye kuhangile namafuluka. Ńe vades’ ańe, imigendele gya kukyâńa mugigelanidze neke ikimańilo, kya kugimańila imyâka igidzelike, mwilemwa. 11, 4.

4Avanu avalino ava, avahaluka avadumula-vutolane ava, visakula ikilóle. Vasikivona nambi kimwinga ikilóle ki kila kyene, ikyali kwa Jona umuvidzi, kye vikukivona kikyo. Neke baho avalekage baho neke umwene ahelelage. 12, 39. 40.

5Neke baho avańigendwa vakwe, pe vilovokela imwambu jila neke vasemwe pakutegula uvugali.

6Neke Jesu atigilage: mulolage vunofu, mwilembage uvuhâfu vwa va-Fwalisaja nava-Sadukaja. Luk. 12, 1.

7Neke avene vahodzage mwileme vatigilage: vona ilonga, pakuva tusińamwe uvugali.

8Neke Jesu, pe aluvwene ulu, neke atigilage: ńe vańa-lufuvo ulukefw’ ańe, mwikwiganisa, lwe musitegwe uvugali? 6, 30.

9Mwave na li lino, lusina lutema uluhala, muli ndesi? mulusemilwe nulwa vugali imbulungwa dzihanu, dze valyaga avanu avańa-mbilima dzihanu (5000), nifihivi, fye valundahidze utuvuluvulu, twe valagadzaga, ukuta fyali vutunga? 14, 17-21.

10Mulusemilwe nulwa vugali imbulungwa dzili mufúṅàti, dze valyaga avanu avańa-mbilima dzitaji (4000) nifihivi, fye mwalundahidzaga utuvuluvulu, ukuta fyali vutunga? 15, 34-38.

11Musikulufika kiki, ukuta sindilonga idza vugali, pe nditigila mwilembage uvuhāfu vwa va-Fwalisaja nava-Sadukaja?

12Neke baho valufikage, ulwa kuta asipava uluhâfu lwa vugali, ipava ulwiganidzo, lwe vikwiganidza ava-Fwalisaja nava-Sadukaja.

13-20: Mal. 8, 27-30; Luk. 9, 18-21.

13Neke baho Jesu, pe adzifike mu-ńi ja mu-Kesaleja-Filipi, neke baho avavudzage avańigendwa vakwe neke atigilage: avanu, pe vakundonga nde mwâna va munu, vikunigila ndi nani?

14Neke avene vatigilage: avangi vakukutigila: vwi Johana umudzabisi, avangi vikukutigila: vwi Elija, avangi vikukutigila: vwi Jelemija, avangi vikukutigila, mańi ene vuli je muvidzi ujungi hela. 14, 2; 17, 10.

15Neke atigilage: lino uńeńe mukunigila: ndi nani?

16Neke baho amwandage Simono Petele neke atigilage: vwi Kilisiti uveve, vwi muswamuve va Nguluvi umûmi. Joh. 6, 69.

17Neke Jesu apilusage neke atigilage: uli kitendileme, ve Simono, ve mwa-Jona, pakuva ulwene ulu fisikuvilatulye nińama ja muvili nidanda jako, hamu, akuvilatulye ju dâda uva kukyâńa. Gal. 1, 15. 16.

18Lino najune ndikukuvula nditigila: uveve, ve Petele (–vwi lutālâvwe) neke unene palutālâvwe ulu pe ndiladzenga ulukombēso lwangu neke nimilyango gya kuvulungu gilalemwa pakululefya. Joh. 1, 42; Ef. 2, 20.

19Ndikukupelaga nifidi-ndulilo ifya kudindulila nifya kudindila kuvutwa vwa kukyâńa, fye vwavike uveve pasi apa, filavedza fyavike na ku kukyâńa fye ukufyavula uveve pasi apa, filavedza fyavwike na ku kukyâńa. 18, 18.

20Neke avadzidzage avańigendwa vakwe ukuta: mutane ukulonga kwe jungi ukuta: unene nde Kilisiti. 17, 9.

21-28: Mal. 8, 31-9, 1; Luk. 9, 22-27.

21Neke baho Jesu amulage ukuvavula avańigendwa vakwe neke atigilage: nde muńa-kuhele-la unene mu-Jelusaleme, kwe vidzikŏla mukumu-musa navandzagila navatekedzi avavina navakagulihâte, kwe kwene kwe ndiladzivulagilwa, neke pakigono kya vudatu, apo ndiladzulubuka kangi. 12, 40; Joh. 2, 19.

22Neke baho Petele neke amutyegage nave neke akŏle mukumukabusa neke atigilage: Nguluvi akutange, ve mutw’ ave, ukuta dze dzitane ukukugwila uveve.

23Neke baho Jesu amusedukilage Petele neke atigilage: udzumbile kwen’ embele, ve Setanw’ ave, vwisakula ukundza-mbudza, pakuva usihodza idza kwa Nguluvi uveve, vwihodza idza kuvanu dzene.

24Neke baho Jesu atigilage: je isakula ukuta āninilage unene, pavagye ijadze jumwene, fye akelye, neke itwikage ikipindulihidzo kyakwe neke baho ăninilage ukwangu. 10, 38. 39.

25Ndivwene je itigila: ndinanyage umutima gwangu, ujo alataga umutima gwakwe; neke je agutagye apangu umutima gwakwe, ujo alaguponya.

26Ndivwene umunu, nde asavage jonda ińi, jikumuvumbulila kiki, ngana ambuhidze mumo umutima gwakwe? Alatola lifungu liki umunu ilya kukombohedza umutima gwakwe?

27Pakuva umwâna va munu ikŏla mukwadza mundolo dza dadye navańa-mwandza vakwe, baho pe alavahombela avanu najula akakwe aka pami-gendele, gye agendye. Lom. 2, 6.

28Ndakyene unene ndi-kuvavūla nditigila: uńeńe je mwimile apa, avangi vasilakugedza ukufwa, pe vasina vambona nde mwâna va munu ukwadzila muvutwa vwa kukyâńa. 10, 23.

Currently Selected:

Mataji 16: II

Highlight

Copy