YOHANE 17

Uombo m’baha wakwe Yesu

1Viteto ivyo Yesu evitetie; akavusha meso kurereha uko wanga, akati, “Vava, saa yakenja kufika. Mkaze Mwanao, nesa Mwana wako naye akukaze we. 2Sa vuntu wemunkie nzinya he vyose vyena mwiri, nesa vose wevamunkie avainke nkalamo ya kae na kae. 3Na nkalamo ya kae na kae ni ii: Vakumanye we Mrungu eremmwe wa idi, ne Yesu Kristo ula wemtumie. 4Mi nakukaza he si ii, nakenja ila ndima weninkie iti niironge. 5Na iki, Vava, unikaze mi hamwe nawe, he ngazo ila nekina nayo hamwe nawe si ii yesinaoka. 6Izina lako nalimanyisha he vantu vala wevainkie he si ii, neki vako, ukavaninka mi, na kiteto chako vakigura. 7Iki vamanya iti vyose weninkie vifuma hako. 8Ambu viteto weninkie navo navainka; navo vakavighuhia, vakamanya cha kididi iti nifumie hako, vakaitikija iti we niwe wenitumie. 9Mi nivaombia avo; siiombia si ii, esire vala wevaninkie, ambu avo ni vako. 10Vala vose e vangu ni vako, na vala e vako ni vangu; nami nakazwa hevo.

11Neri mi siho wa he si ii, mira ava vo veho he si ii, nami niza hako. Vava ezerire, uvarinde he izina lako vala wevaninkie; nesa vaoke mmwe sa vuntu uswi tweikee. 12Hala nena navo nevaindie he izina lako welininkie, nikavarera; neri tehena mmwe wavo etekie, esire ula mwana wa kuteka nesa iandiko likoloke. 13Na iki niza hako; na ivi viteto niviteta he si ii, nesa vakete kuizihirwa kwangu kwekoloke hevo. 14Mi nevainkie kiteto chako; na ii si ikavavihiwa; kila vo esi va si ii, sa vuntu nami nesi wa si ii. 15Mi siomba iti uvavushe he si ii; mira uvarinde he ula mvivi. 16Vo esi va si ii, sa vuntu nami nesi wa si ii. 17Uvazerije na ila idi; kiteto chako nicho idi. 18Sa vuntu wenitumie he si ii, nami nevatumie avo he si ii. 19He vuntu vwavo nikuzerija mwenye, nesa navo vazerijwe he idi.

20Neri si avo du nevaombia; mira hata vala veneniitikija vuntu vwa kiteto chavo. 21Vose vaoke mmwe; sa vuntu we, Vava, weho hemi nami hewe; vo navo vaikae he uswi; nesa si ii iidime kuitikija iti niwe wenitumie. 22Nami ila ngazo weninkie, nami navainka; nesa vaoke mmwe sa vuntu na uswi twe mmwe. 23Mi hevo, nawe hemi, nesa vaoke vekoloke he vumwe; nesa si ii imanye iti niwe wenitumie, ukavakunda vo sa vuntu wenikundie mi. 24Vava, avo weninkie nienda vaikae nami hantu hose neho, nesa vaveiwe kurereha ngazo yangu weninkie; ambu wenikundie too msingi wa si ii wesinavikwa. 25Vava mwenye kitea, si ii teikumanyije; mira mi nekumanyije, na avo vamanya iti niwe wenitumie. 26Nami nevamanyishe izina lako, kangi ninezikalimanyisha; nesa lula lukundo wenikundie mi luikae hevo, nami niikae hevo.”

Currently Selected:

YOHANE 17: CHSUNT67

Highlight

Copy