YOHANE 13

Yesu evaoja varateri vakwe maghu

1Ingeri msi m’baha wa Pasaka wesinafika, Yesu ekimanya iti saa yakwe yafika, eyo enefumia he si ii kutonga he Vavee, naye kila evakundie vantu vakwe he si ii, akavakunda mhaka mginto. 2He igheri la kijo cha chahemagheri; Shetani naye akenja kumgera Yuda, mwana Simioni Iskarioti, ngoro ya kumrengeha; 3Yesu ekimanya iti Vava emunkie vyose he mikono yakwe, na iti efumie ha Mrungu, kangi etonga ha Mrungu, 4akavuka he kijo; akavika suke jakwe na mondo, akaghuha mhaluma, akakudoka he kikwidi. 5Ekikenja akagera mpombe he bakuli, akavoka kuvaoja varateri maghu, akaahanguja na ula mhaluma ekudokie. 6Huvo akaza he Simoni Petro. Uu akamti, “Mfumwa, We unioje mi maghu?” 7Yesu akagharusha, akamti, “Cho neketa we tukakimanye iki; mira unezakimanya uko nyuma.” 8Petro akamti, “We tukanioje maghu neri.” Yesu akamti, “Nekisakuoja, tuna sanga nami.” 9Simioni Petro akamti, “Mfumwa, si maghu du, mira hata mikono yangu na mtwi wangu.” 10Yesu akamti, “Ye ekenjije kukuoja, tekimvaie wa esire kuoja maghu, ambu eelile mwiri wose; na unywi mwaela, mira si vose. 11Ambu ekimanyije ula eneramrengeha, nicho chashigha ekiti, “Si vose mweelile.”

12Niho ekikenja kuvaoja maghu, na kughuha suke jakwe, na kuikaa si kangi, akavati, “H’ii! mwatwarija ivyo namuketia? 13Unywi muniitanga Mcheji, na Mfumwa; na huvwo nivwo, ambu nivwo vuntu neikee. 14Huvo, ukinakiche mi ne Mfumwa na Mcheji, nemuojije maghu, huvo kimutara kuojana maghu venye na venye. 15Ambu namuinka fwanyanyi; nesa sa vuntu nemuketiie, na unywi mureketa huvo. 16Kididi, kididi, nimutio, Mzoro si m’baha kumvecha mzima wakwe, neri mzatumwa si m’baha kumvecha ula emtumie. 17Mwekimanya ivyo, muvarela vwedi mwekiviketa. 18Siteta mburi yenyu vose; nemanyije vala nevasaghure; mira ni iti iandiko likoloshwe: ‘Ula elie kijo changu anivishijija kihaga chakwe.’ 19Too iki nimuvwira vyesinaoka, nesa vyekineoka, muidime kuitikija kuti nimi Ye. 20Kididi, kididi, nimutio, “Ye emghuhia mntu wowose nenemtuma, enighuhia mi; na ula enighuhia mi emghuhia ula enitumie.”

Yesu emanyisha mrenge iti ni ani

(Mat. 26:20-25; Mrk. 14:17-21; Luk. 22:21-23)

21Yesu ekikenja kuteta huvo, akasononoya he ngoro, akakonesha ekiti, “Kididi, kididi, nimutio, Mmwe wenyu enenirengeha.” 22Varateri vakarerehana vekitatanya, iti emlanga ani. 23Hekina mmwe wa varateri vakwe, ekiighamie he mpafu yakwe Yesu, eye ula Yesu ekimkundishe. 24Niho Simioni Petro akamkonya na mkono, akamti, “Vwija, emlanga ani?” 25Ingeri ye ekuighamije huvo hafuhi na mpafu yakwe Yesu, akamti, “Mfumwa, ni ani?” 26Niho Yesu akagharusha, “Ni ula nenemtovejija itoghi na kumunka.” Akatoveja itoghi, akamunka Yuda, mwana Simoni Iskarioti. 27Ekikenja lila itoghi Shetani akamwingia. Niho Yesu akamti, “Vyo weronga, vironge fia.” 28He vala veikae hala he kijo tehena emanyije neri cheshigha ekimvwira huvo. 29Ambu va kumwe vedunganye, kila Yuda eye ekitika mfuko, usiche Yesu emtie, “Zora kila tweenda he ii mbao; kana iti ainke vaakiva kintu. 30Niho uo ekinakenje kula lila itoghi, akafuma hala indi. Naho neki kio.

Iazero ishaa: Mukundane

31Niho uo ekinafume, Yesu akati, “Iki Mwana wa Mntu akazwa, Mrungu naye akazwa heye. 32Kakicha Mrungu akazwa heye, Mrungu naye enemkaza heye, kangi enemkaza hala indi. 33Unywi vana vadori, heshele kakenda kadori nerena unywi; munenienda; na sa vuntu nevavwirire Vayuda iti, ‘Hantu mi netonga temuidima kuza;’ nirehuvo, munivwira na unywi. 34Nimuinka iazero ishaa, Mukundane. Sa vuntu mi nemukundie unywi, na unywi kundanani huvo. 35Huvo vantu vose venemanya iti mu varateri vangu mwekikundana unywi venye na venye.

Vuroti vwa kukana kwakwe Petro

(Mat. 26:31-35; Mrk. 14:27-31; Luk. 22:31-34)

36Simoni Petro akamti, “Mfumwa, utonga hi?” Yesu akagharusha, “Hantu netonga tuveiwa kuniratera iki; mira uneniratera uko nyuma.” 37Petro akamti, “Mfumwa, hanini mi nesiidima kukuratera iki? Mi nineinkija kuho kwangu vuntu vwako.” 38Yesu akagharusha, “H’ii! We uneinkija kuho kwako vuntu vwangu? Kididi, kididi, nikutio, Nkuruvi teikaambe wesinanikana kantu katatu.”

Currently Selected:

YOHANE 13: CHSUNT67

Highlight

Copy