SAKARI 6
6
Anyaʔa natanri woʔo: Syongida kɔrɔrɔ ticɛrɛ kayoʔo
1Mi dá na yɛʔɛ jrɛʔɛ ge nɛ mà wele mà syongida kɔrɔrɔ ticɛrɛ nya tí jɛ wa angoro syɛn kpafoʔo ni. Ki angoro ti dá bo kanyɛrɛ woro. 2Syon kɔrɔkplɛʔɛ na syongidayee bee pe dá bo wa à pe po nyɛlɛ. Syon kɔrɔ syɛnwoʔo na syongidayee bee pe dá bo wa pwɔlɔ à pe po wɔlɔ.#6:2 ma wèle wa Tyɛ 6:4-5 ni wè. 3Syon kɔrɔ tanri woʔo ki syongidayee pe dá bo fiili. Ticɛrɛ woʔo ki syongidayee pe dá bo nyɛlɛ mà po honʔobee kpo.#6:3 ma wèle wa Tyɛ 6:2 ni wè. 4Ki kruʔu ma, à miʔi yo mlɛŋɛ ma ŋa wi dá bo ná ni ge mà yo: «Na fɔlɔ, ki syon kɔrɔrɔ da ti kɔrɔ wí nyɛ nyaʔa ní?»
5Mlɛŋɛ wɔ̀ɔ ná po: «Namuru ti namyɛʔɛ ticɛrɛ tiflɛʔɛ gi ga kí ma jɛ wa ki korohaʔa na ge wa tra tì bɛfu na Bajegɔ Nyɛʔɛlɛ li yɛʔɛ ma ge.#6:5 ma wèle wa Tyɛ 7:1 ni wè.
6Syongida wɔɔlɔ pe dá bo pwɔlɔ syon kɔrɔ ga na ki dáa sye wa yaa prama kamolo kloʔo namyɛlɛ na. Bee pe da bo fiili peè fanna à pe na sye wa ban kpo. Nyɛlɛ à pe na sye yaa prama kaligi kloʔo namyɛlɛ na.» 7Bee pe dá bo nyɛlɛ be, peè à pe na sye mà yaa nyari wa tra namyɛʔɛlɛ kè bɛfu na. Bajegɔ Nyɛʔɛlɛ li daʔá yo pé kan mà yo: «Ye kɛri ye ya tra namyɛʔɛlɛ kè bɛfu nyari.»
À peʔe hli mà na tra dere tì bɛfu nyari. 8Ki kruʔu ma, mlɛŋɛ wɔ̀ɔ ná yeri mà báʔà yo ná kan mà yo: «Wele, bee pé na sye wa yaa prama kamolo kloʔo namyɛlɛ na, ki woo pé na sye bì ya na naʔa fiʔi ge wa ki kloʔolo ni ge.»
Josuwe wi anyaʔa kayoro ti tanʔahaʔa
9Bajegɔ Nyɛʔɛlɛ li dá yo ná ni nɛ ki syɛn woʔo na ge mà yo: 10«Ɛlidayi nì, Tobiya nì, ní Jedaga nì pé ma pan ŋkobii pe nadanma yrɛbɛ ba nì ba pe dá jɛ wa Babilɔni ni mo ma pi syɔ. Mo tapolo, ma kɛri Sofoni najɛ Josyasi go ni. Ki nabii pe jɛ wa Babilɔni ni mà no naʔamɛ ge. 11Ma ki wɛrifiʔi nì, ní ki tɛ syɔ pe ma ma pi hanri masaʔa jala, ma li kan Yosadaki najɛ ŋa sraʔa farafɛɛ kundiʔi Josuwe wi yugu na ge. 12Maʔa yo pé kan ma pe po Bajegɔ Nyɛʔɛlɛ la Sye wì bɛfu fɔlɔ lí yo:
‹Naŋa ŋa pé na yeri Tiʔikaclaʔa ge,
wiì ŋa we.
Wí nyɛ deʔe ga na,
wí bi wɛfonro nyini wa
bì Bajegɔ Nyɛʔɛlɛ li sraʔa go
fan ge wa.#6:12 ma wèle wa Jer 23:5; 33:15; Sak 3:8 ni wè.
13Wiì wi wí bi ba
Bajegɔ Nyɛʔɛlɛ li sraʔa go
fan ge.
Wí bi ba feri masaʔa
kpangbanŋa kmara ni.
Wí bi ba glɛn wa
wi masaʔa aconʔo na ge
nɛ pa masanaŋa nyɛ we
wa bì glɛn masaʔa aconʔo
kà na nɛ pa sraʔa farafɔlɔ
nyɛ we.
Pé bi baa ki tunru syɛn ko
frɛmɛ funŋumu na.
14Masaʔa jala lí bi ba go wa Bajegɔ Nyɛʔɛlɛ li sraʔa go ni bì bo ladomo yraʔa Elɛmu nì, Tobiya nì, Jedaya nì, ní Sofoni najɛ hɛn kala na le.› »
15Deleʔege hɛɛn pé na pan mà báa Bajegɔ Nyɛʔɛlɛ li sraʔa go ki fanma tunŋu ko. Ki nyiŋi na, pa yeʔe cɛn bì yo Bajegɔ Nyɛʔɛlɛ la Sye wì bɛfu fɔlɔ wiì ma na tun ye ma.
Nà ye wò Fɔlɔ yè Nyɛʔɛlɛ li kayoʔo kpɔʔɔ ge, ki kaʔa ke bɛfu pà ke funŋu.
Currently Selected:
SAKARI 6: NLK10
Highlight
Share
Copy
Want to have your highlights saved across all your devices? Sign up or sign in
Bible Society of Côte d'Ivoire
