SAKARI 5
5
Anyaʔa noli woʔo: Danŋama sɛbɛ kayoʔo
1À mi na yɛʔɛ jrɛʔɛ ge nɛ mà wele. Mi dá sɛbɛhlɛʔɛ kloloʔo nya kí ma jɛ na lɛŋi namuru. 2Mlɛŋɛ wɔ̀ɔ ná po: «Má na nyaʔa nyaʔa?»
À muu po: «Mí na sɛbɛhlɛʔɛ kloloʔo nyaʔa ki jɛ́ na sye namuru ni. Ki tiklonmo mí bi mɛtriyee kɛ̂ kɔ we. Ki pyalama à mi po mɛtriyee kɔgunnu.» 3Wɔ̀ɔ kí yo ná kan mà yo: «Danŋama ma mí bi do klo hɛɛn pè bɛfu na ge, miì mi. Mɛjɛn kí naʔa nyu mà yo nikonmoo pè bɛfu pe pe prɔ̀ be. Bee pé na pè klan pe pe prɔ̀ kpo.
4Bajegɔ Nyɛʔɛlɛ la Sye wì bɛfu fɔlɔ à li yo: Mí ma ki danŋama yaʔa mi no deʔe kì bɛfu na. Mí bi je wa nikonmoo goro ni de, ní bee ní pé na pè klan akpolo na na yele na le. Mí bi glɛn wa pe goro ni bì ti tiri hogo bìʔi plɛn ŋglɛnrɛ tì bɛfu ní.»
Anyaʔa nasyɛn woʔo: Cɛlɛ ŋa wí nyɛ tipeme mi lɛgɛ gi ge
5Ki kruʔu ma, mlɛŋɛ ŋa wi dáa nyu ná ni wɔ̀ɔ flo nà tanla mà báʔà yo ná ma mà yo: «Ma yɛʔɛ jrɛʔɛ ge, ma ki yraʔa ga wele kí na nyini ge.» 6À muu yugu mà yo: «Nyaʔa gi?»
Wɔ̀ɔ yo nɛ: «Ki woʔo ga kí nyɛ klo li klomo kaʔa kè bɛfu wi.»
7Ki kruʔu ma, mi dá tonlimo timoŋo atonŋo nya kí jɛ namuru ni. Cɛlɛ wà dà bo wa klɛnhaʔa tonlimo alele lama ni me. 8Mlɛŋɛ wɔ̀ɔ yo: «Ki cɔ ŋa wí na klomo teri. Ye ki cɔ frɛnʔɛ we wa tonlimo alele ni tonlimo maʔala timogbleʔe nì ge. 9Ki nyiŋi na, à mi na yɛʔɛ jrɛʔɛ mà wele, à cɛɛ syɛn ma nyini. Tiflɛʔɛ ki dáa jrɛʔɛ wa pe kamara noʔo na mà na funnu. Pe kamara ti dá bo nɛ pa fyɔyroʔo woro nyɛ de.»
À pe bâ tonlimo alele kpe mà kɛri lí ni namuru ní tra ní pi kpafoʔo ni ge. 10Ki kruʔu ma, mlɛŋɛ ŋa wi dáa nyu ná ni, à miʔi yo wí kan mà yo: «Pé na sye ki tonlimo alele ní le hanbe?»
11Mlɛŋɛ wɔ̀ɔ ná po: «Pé na sye bì ya go fan wí kan wa Sineyari klo ni. Ki go nàʔa fan bi gɔ nyiŋi ga na, ki tonlimo yraʔa paʔa ya go wa ban.»#5:11 ma wèle wa Hli 11:2 ni wè.
Currently Selected:
SAKARI 5: NLK10
Highlight
Share
Copy
Want to have your highlights saved across all your devices? Sign up or sign in
Bible Society of Côte d'Ivoire
