MATYE 4

Sotanri wí ma Jesu po mòo wele

(Mar 1:12-13; Luk 4:1-13)

1Ki kruʔu ma, Nyɛʔɛlɛ li Nyìli à li Jesu kpe mà kɛri wí ni sinbriʔi ni, jango Sotanri wi yɔɔ po, wuu wèlé. 2Wɔ̀ɔ yâ su co mà ta yaagbanra too syɛn, yebliri too syɛn, funŋu àʔa ná da mà noo ya.

3Sotanri wɔ̀ɔ pan wì krugu mà bɔ́ɔ̀ po: «Nàʔa po má nyɛ Nyɛʔɛlɛ Pyɔ ge, maʔa yo ki ŋglɛnrɛ da ma de ma yo ti krɛ̀ʔɛ̀ bru.» 4Jesu wɔ̀ɔ wí po: «Kí nyɛ wa nyoŋoʔo Nyɛʔɛlɛ li sɛbɛ ni we mà yo: Hɛnwyee wòo gban bì nyuwyeʔe ta hro tiì nigbe ní, di pɔɔ ki ta kayoro tì bɛfu fanŋa ni da Nyɛʔɛlɛ lí na nyu ge.»#4:4 ma wèle wa Lado 8:3 ni wè.

5Ki kruʔu ma, Sotanri wɔ̀ɔ wí kpe mà kɛri wí ni Jerusalɛmu kàkmàʔà nî mà yâ luʔu wa wi ní Nyɛʔɛlɛ li sràʔá go ki njolo na le, 6mòo po: «Nàʔa po má nyɛ Nyɛʔɛlɛ Pyɔ ge, ma ye, ma to. Mɛjɛn kí nyɛ wa nyoŋoʔo Nyɛʔɛlɛ li sɛbɛ ni we mà yo:

Pa liʔi yo li mlɛŋɛyee ma be ma kala na.

Pa pe ma tɔʔɔ pe kyɛrɛ̀ nì de,

jango ma klɔʔɔ kà wò ga jri ŋglɛnʔɛ kà na.» # 4:6 ma wèle wa Ŋuʔu 91:11-12 ni wè.

7Di Jesu wɔ̀ɔ wí po: «Kí nyɛ wa nyoŋoʔo nɛ mà yo: Mò gáa ma fɔlɔ Nyɛʔɛlɛ pin le bì da li wele.»#4:7 ma wèle wa Lado 6:16 ni wè.

8Sotanri wɔ̀ɔ ní mòo kpe mà kɛri wí ni wa angogbɔʔɔ kà yugu na ga kí nyɛ tiklonʔo ceŋge mà yâ drunya klo fɛrɛ tì bɛfu tyɛʔɛ wí na ní ti kmara nì de, 9Mòo po: «Nà ma kunbiʔi kán nà tanla bì da na kpɔʔɔ ge, pa mi ki yrɛbɛ pì bɛfu kan má ma.»

10Jesu wɔ̀ɔ wí po: «Sotanri, jɛ̀ nɛ nà tanla. Mɛjɛn kí nyɛ wa nyoŋoʔo mà yo: Kí ma yala ma da kunbiʔi kanni ma fɔlɔ Nyɛʔɛlɛ tanla le, maa liì nigbe kpɔʔɔ.»#4:10 ma wèle wa Lado 6:13 ni wè.

11Ki nyiŋi na, Sotanri wɔ̀ɔ wí yaʔa be. Mlɛŋɛyee à pèè ma pan mà báa hanri Jesu kan we.

Jesu wí ma wi tunŋu hli ge wa Galile klo ni

(Mar 1:14-15; Luk 4:14-15)

12Jesu wi gáʔà loʔo mâ yo pé ma Jan le wa kaso nî we, wɔ̀ɔ kɛri wa Galile klo ni le.#4:12 ma wèle wa Mat 14:3; Mar 6:17; Luk 3:19-20 ni wè. 13Wi ìn dà go wa Nasarɛti kàʔà ni ge, di wɔ̀ɔ pan mà bâ go wa Kapɛrinamu kàʔà ni. Ki dá bo nyugbɔmo tanla wa Sabulon nì, ní Nɛfitali nì pi klɛnmɛ ni me.#4:13 ma wèle wa Jan 2:12 ni wè. 14Wi daʔá hanri, jango ki kayoro ti fùnŋù, da Nyɛʔɛlɛ leyoo Esayi wi dá yo ge, 15nyiŋi ga na wi dáa nyu hɛɛn bee kala na mâ yo:

Pé nyɛ wa Sabulon nì,

ní Nɛfitali nì pi klɛnmɛ ni me.

Kí nyɛ wa nyugbɔmo klòʔó tanla ge,

wa Jurudɛn lɔʔɔ namyɛlɛ na le,

ní Galile klo nì le.

Ki deʔe na bee poò nyɛ Juwifiyee pé na koro wa kpo. # 4:15-16 ma wèle wa Esa 8:23 - 9:1 ni wè.

16 Hɛɛn bee pé nyɛ wa yeblimi ni,

pé ma kpɛnmɛ kpangbanma nya.

Ee, kpɛnmɛ mí ma paʔa wa

bee ma pé nyɛ wa kuu kaʔa

ki dewɔʔɔ na ge.

17Mà kpe ki nyini na ge, Jesu wɔ̀ɔ ki hli naʔa jari mà yo: «Ye kruʔu wa yè kapere ma de, mɛjɛn Nyɛʔɛlɛ masaʔa kí na nori.»#4:17 ma wèle wa Mat 3:2 ni wè.

Jesu wí ma fyɔcaa ticɛrɛ yeri

(Mar 1:16-20; Luk 5:1-11)

18Wlɛʔɛ kà na, Jesu wi dáa nyari wa Galile nyugbɔmo tanla me. Wɔ̀ɔ fyɔcaa syɛn nya: Simo ŋa pé na yeri Pyɛri we, ní wi conlo Andre nì. Pe dáa pe faʔa wa ge wa nyugbɔmo ni me. 19Wɔ̀ɔ pé po: «Ye pà ná na. Mí bi yà ye wa ye da hɛɛn ca nɛ pa yé na fyɔɔ ca pomo ma na ge.» 20À pe jɛ kpo mà pe faʔa yaʔa ge be mà pa wí na.

21Wi gâ hɛnʔɛrɛ wa yɛʔɛ̀ ge, wɔ̀ɔ ní mà nabii syɛn nya nɛ: Jake ŋa Sebede pyɔ we, ní wi conlo Jan nì we. Pe dá bo wa nyumu kɔrɔ ni pe to Sebede nì we mà na pe faʔa hanri ge. Jesu wɔ̀ɔ pé yeri. 22À pe jɛ kpo mà nyumu kɔrɔ yaʔa ge be ní pe to nì we mà pa wí na.

Jesu wí na hɛɛn krɛʔɛ be wa angolo yugu na

23Jesu wɔ̀ɔ kɛri mà yâ Galile klo lì bɛfu nyari mà na hɛɛn krɛʔɛ wa pe sɛrigoro ni de na Nyɛʔɛlɛ li masaʔa kayotanʔa jari ge pe kan. Wɔ̀ɔ ní na pe yabaa pori yajɛnʔɛ kè bɛfu ma.#4:23 ma wèle wa Mat 9:35 ni wè. 24À pe wi yele jari le wa Siri klo lì bɛfu ni. Hɛɛn à pe na pe yabaa pè bɛfu troʔo wa wì krugu, bee pe dá bo yajɛnʔɛ kè bɛfu ní, ní bee ní pe dáa jɔlɔ ceŋge pe yara kala na le: Gbosuu fɛɛ bɛ yoo, togulu fɛɛ bɛ yoo, lemloʔomoo bɛ yo. Jesu wɔ̀ɔ na pe pori. 25À hɛɛn fafaʔabaa ma jɛ wa Galile klo ni le, ní Dekapɔli klɛnmɛ ní, ní Jerusalɛmu kàʔà nì, ní Jude klo nì, ní Jurudɛn lɔʔɔ kruʔuma klɛnmɛ ni me mà pa wí na.

Currently Selected:

MATYE 4: NLK10

Highlight

Copy