LUKE 6

Pé ma Jesu yugu fyonriwlɛʔɛ kayoʔo ní ge

(Mat 12:1-8; Mar 2:23-28)

1Jesu wi da yáa doro syɔʔɔ kere tà ni fyonriwlɛʔɛ na ge, wi ploʔofɛɛ à pe na syɔʔɔ kèè kaʔabu na ke tuʔu na ke kun.#6:1 ma wèle wa Lado 23:26 ni wè.

2À Farisiyee pèè ma po wa mà pe po: «Nyaʔa ma po yé na ki woʔo ga hanri ge, ga ki ìn yala pé hanri fyonriwlɛʔɛ na ge?»

3Jesu wɔ̀ɔ pé po: «Ye ìn jé ga nya wa sɛbɛ ni Dafide wi dá hanri ge, nyiŋi ga na funŋu ki dɔɔ́ co, wiì nì wi nibyee ní be yo?#6:3 ma wèle wa 1Sam 21:2-7 ni wè.

4Wi da jé wa Nyɛʔɛlɛ li go nî ge mà yâ bru ŋa kpe pe dá fara sraʔá Nyɛʔɛlɛ ma le mà wà kan kpo wi nibyee ma be. À poo ka. Àʔa hín bo, ki ìn dà yala hɛn wà bí ki bru ka we kí po Nyɛʔɛlɛ li sràʔá farafɛɛ pee nigbe ban ge.»#6:4 ma wèle wa Sraʔa 24:9 ni wè.

5Wɔ̀ɔ ní mà pe po nɛ: «Hɛn Pyɔ wí nyɛ fyonriwlɛʔɛ ki fɔlɔ.»

Jesu wí ma kyɛflanʔa fɔlɔ pwɔʔɔ

(Mat 12:9-14; Mar 3:1-6)

6Fyonriwlɛʔɛ kà na nɛ, Jesu wɔ̀ɔ yâ je wa Juwifiyee sɛrigo ni ge mà yáa pe krɛʔɛ. Naŋa wà dà bo wa wi kaligyɛʔɛ ki ní flanʔa. 7Furu sɛbɛ cɛnfɛɛ ní, Farisiyee ní pèè dá bo wa na baʔahaʔa ca Jesu na we. Ki kala na, à pe noo kɔrɔsi, nàʔa po wí bi hɛn wà pwɔʔɔ fyonriwlɛʔɛ na ge. 8Di wɔ̀ɔ pe honriʔi cɛn ge mà kyɛflanʔa fɔlɔ po we: «Jɛ̀, ma yèré wa hɛɛn pe nulala ni le. Wɔ̀ɔ jɛ mà yere.» 9Jesu wɔ̀ɔ pé po: «Mí bi ye yugu: Kí ma yala hɛn wi kakmaʔa hanri fyonriwlɛʔɛ na ge, dee di, wi tipeʔe hanri. Kí ma yala wi hɛn syɔ, dee di, wi hɛn kpo?» 10Wɔ̀ɔ pè bɛfu wele mà hɔlɔ mà ná kyɛflanʔa fɔlɔ po we: «Ma kyɛʔɛ ki hàʔàlá.» Wɔ̀ɔ kí hanri ban. Wi kyɛʔɛ àʔa pwɔʔɔ kpo. 11Pe lama à mi gban pè na ceŋge. À pe na nyu pè ní mà yo: Wó bi nyaʔa hanri Jesu na we?

Jesu wí ma pitunbee kɛ̂ mà kɛ syɛn fara

(Mat 10:1-4; Mar 3:13-19)

12Ki nyiŋi na, Jesu wɔ̀ɔ kɛri angolo na bì yà Nyɛʔɛlɛ nyɛri le. Wɔ̀ɔ yâ li nyɛri mà kpɛnmɛ to me. 13Kpɛnmɛ mi gâ do kɔ ge, wɔ̀ɔ wi ploʔofɛɛ yeri be mà bâ kɛ̂ mà kɛ syɛn fara pé ni mà na pe yeri pitunbee. 14Pé bee: Simo ŋa Jesu wi dáa yeri Pyɛri ge, mà plɛn wi conlo Andre nì, ní Jake nì, Jan nì, Filipe nì, Baritelemi nì, 15Matye nì, Toma nì, nì Jake nì ŋa Alife pyɔ we, ní Simo nì ŋa pé na yeri Kloklanfɔlɔ we, 16ní Judasi ŋa Jake pyɔ we, ní Judasi Isikariyɔte nì, ŋa wi da Jesu kan wi bɛnfɛɛ ma be.

Jesu wí na janma krɛʔɛ me na yabaa pori

(Mat 4:23-25)

17Wɔ̀ɔ jɛ mà trigi wi pitunbee ní be mà yâ yere deʔe kà na tidlɛʔɛ. Wi ploʔofɛɛ fafaʔabaa pe dá bo wa mà plɛn janma ní me. Hɛɛn pèè dá jɛ Jude klo klɛnmɛ mì bɛfu ni mà plɛn Jerusalɛmu kàʔà nì, ní Tire nì, ní Sidon klɛnmɛ ma nì mí nyɛ wa nyugbɔmo tanla me. 18Pe dá ban jango bì ba wi kayoro loʔo de, wi nì wi pe pwɔʔɔ pe yara ma de. Bee fanna, pe dáa jɔlɔ wa gbosuu pe fanŋa ni ge, à pe na pan mà baa bori. 19Hɛɛn pè bɛfu à pe naʔa ca bì da màʔá wí na, mɛjɛn sye wà dàá nyini wí ni mà na pè bɛfu pori.

Jesu wí ma frɛmɛ ní cɔlɔʔɔ kayoʔo yo

(Mat 5:1-12)

20Wɔ̀ɔ nyɛʔɛ kán ge wi ploʔofɛɛ na be mà yo:

«Yèé bee yé nyɛ fyomo fɛɛ, yé nyɛ frɛmɛ ní, mɛjɛn Nyɛʔɛlɛ li masaʔa ki klɛ́n mà yèé kan.

21Funŋu kí na yèé bee ya ŋaŋa ni ge, yé nyɛ frɛmɛ ní, mɛjɛn yé bi ba din.

Yèé bee yé na kpele ŋaŋa ni ge, yé nyɛ frɛmɛ ní, mɛjɛn yé bi baa dyɛʔɛ.

22Hɛɛn nà pe ye cɛ bì da ye prɔ bì da ye teri bì da yè yele cɔʔɔ le nɛbo apeʔe gi Hɛn Pyɔ wi kala na le, paʔa bo yé nyɛ frɛmɛ ní.#6:22 ma wèle wa 1Pyɛ 4:14 ni wè.

23Ee, ye po lafiʔimi nì, ye da yo ki lafiʔimi mi kala na le, mɛjɛn tonro kpangbanŋa nyɛ wa ye ma namuru ni de. Ki podeme miì na, pe tokpɔɔ pe dáa Nyɛʔɛlɛ li leyoo cɔlɔ be.#6:23 ma wèle wa 2Masa 36:16; Pit 7:52 ni wè.

24Ɛɛn di, tipeʔe bi ba yèé bee ta yé nyɛ masaa be, mɛjɛn yé ma yè frɛmɛ ta me kɔ.

25Tipeʔe bi ba yèé bee ta yé ma li mâ tìn ŋaŋa ni ge, mɛjɛn funŋu kí bi baa ye ya.

Tipeʔe bi ba yèé bee ta yé na tyɛʔɛ ŋaŋa ni ge, mɛjɛn yè yɛrɛ tí bi ba bɛn ye na, ye da gbèlé.

26Tipeʔe bi ba yèé bee ta hɛɛn pè bɛfu pé na yè yedanla yeri le, mɛjɛn pe tokpɔɔ pe dáa kayotere nyu leyoo bee kala na pe ìn dàá kanyɛmɛ nyu ge.

Wò bɛnfɛɛ pe da wo glanʔa

(Mat 5:38-48; 7:12a)

27Di yèé bee yé na nuru ná ma ge, mí biʔi yo ye ma bì yo: Yè bɛnfɛɛ pe da ye glanʔa, ye da kakmaʔa hanri bee kan pé ma ye cɛ ge. 28Bee pé na ye danŋa ge, ye da Nyɛʔɛlɛ wa ye da pe kanʔa. Bee pé na ye cɔlɔ ge, ye da Nyɛʔɛlɛ nyɛri le pa kân. 29Nà hɛn wà bi ma kmó kaca na, ma ki tɔ kan ge wi ma. Nà hɛn wà bí ma drekpɔʔɔ syɔ ge ma ma fanŋa na, mò gaʔa ce tatugu na ge. 30Nà hɛn wà bí yraʔa kà nyɛri má ma ge, maʔa kan wí ma. Nà hɛn wà bí ma kyɛʔɛ yrɛbɛ syɔ ma ma fanŋa na ge, mò ga pi nyɛri wí ma adi. 31Yraʔa kì bɛfu ga yé cori hɛɛn pé da hanri ye kan ge, yèé fanna, ye daʔa hanri pé kan kpo.#6:31 ma wèle wa Mat 7:12 ni wè.

32Nàʔa po yé na bee glanʔa, pee na ye glanʔa ge, pa ye nyaʔa tonro ta? Ali kapere hanrifɛɛ pé na bee glanʔa ge, ki woo pé na pè glanʔa kpo. 33Nà ye da kakmaʔa hanri bee na pé na kakmaʔa hanri ye na kpo ge, pa ye nyaʔa tonro ta? Ali kapere hanrifɛɛ pé na ki woʔo ga hanri ge kpo. 34Nà ye da fwɔrɔ ni hɛɛn bee na yé naʔa honri mâ yo yé bi yraʔa kà ta pé ma ge, pa ye nyaʔa tonro ta? Ali kapere hanrifɛɛ pé na fwɔrɔ ni pè na jango pe ba pe woʔo ki nyoʔo ta ge nɛ. 35Di kí ma yala yè bɛnfɛɛ pe da ye glanʔa, ye da kakmaʔa hanri, ye da fwɔrɔ wa, yò gáa honri ti nyoʔo tama na me. Ki pomo na me, pa ye ba tonro kpangbanŋa ta bì bo Nyɛgbɔfiʔi pii. Mɛjɛn Nyɛʔɛlɛ liì li lí na kmaʔa hanri bee na poò na li syeri ge ní hɛnpee ní be. 36Kí ma yala ye po nyugara tafɛɛ nɛ pa yè To wí nyɛ nyugara tafɔlɔ pomo ma na ge.

Yò gáa hɛɛn pe tɔɔ hanʔa be

(Mat 7:1-5)

37Yò gáa kiti kon hɛn wà na. Nàʔa po ban, Nyɛʔɛlɛ lòo ba kiti kon ye na. Yò gáa klomo kanʔa hɛn wà ma. Nàʔa po ban, Nyɛʔɛlɛ lòo ba klomo kan ye ma. Ye da hɛɛn pe kapere yari de pe kân. Nyɛʔɛlɛ pa li da yè woro yari de ye kan. 38Ye da hɛɛn kanʔa. Nyɛʔɛlɛ pa li da ye kanʔa. Lí bi ba alege nyi yrɛbɛ ní, bì pi heri, bì pi kpoʔoro bìʔi nyi nɛ fɔ pi wò bì pi kân ye ma. Mɛjɛn yé na tonli hɛɛn kan alele la ni ge, Nyɛʔɛlɛ lí bi ba yè woʔo tonli ge wa ki alele liì ni.»

39Wɔ̀ɔ ní mà yomɛlɛ là kmo pé kan mà yo: «Fyon wòo gban bì wi fyonnyɛ kanglanʔa co ge. Nàʔa po ban, pè syɛnmu pa pe blɛn bì do wa tindɛʔɛ kà ni.#6:39 ma wèle wa Mat 15:14 ni wè. 40Mɛjɛn pyɔ ŋa pé na krɛʔɛ, wòo gban bì gbɔʔɔ bì doro wi krɛʔɛfɔlɔ na we. Di pyɔ ŋa pé na krɛʔɛ ge, nòo gá gban kɔ, wi na bá bo nɛ pa ŋa nyɛ wi dɔɔ́ krɛʔɛ ge.#6:40 ma wèle wa Mat 10:24-25; Jan 13:16; 15:20 ni wè.

41Nyaʔa kɔsɔ na, má na kɛkrɛple wele wa ma nibo wi nyɛlɛ ni, áʔa hín bo kanglangbɔʔɔ nyɛ wa ma wolo ni le? 42Dee di, má bi ma nibo po we: ‹Na nibo, yeré, bì kɛkrɛple fara le wa ma nyɛlɛ ni le,› kí po kanglangbɔʔɔ nyɛ wa mo ma wolo ni le, moò na ki woʔo wele ge yo? Noyomo syɛn syɛn fɔlɔ wi má ni. Ma kanglangbɔʔɔ fara ge wa ma nyɛlɛ ni le kpɛn, jango ma gbàn ma kɛkrɛple nya le kmaʔa la lí nyɛ wa ma nibo wi nyɛlɛ ni le, ma li fàrà.

Pé na tiri cɛnni ti pibi na

(Mat 7:16-20; 12:33-35)

43Mɛjɛn tikmaʔa koò na pibi tipebe seri. Titipeʔe koò na pikmaba seri kpo. 44Pé na tiri cɛnni ti pibi piì na. Poò na fige pibi co wa huru tiʔi na ge. Poò na hrɛsɛn pibi co wa hufiʔi tiʔi na ge. 45Hɛnkmaa wi naa akmaba yrigi wa wi lama krɔkmaʔa ni ge. Hɛnpee wi naa apebe yrigi wa wi lama krɔpeʔe ni ge. Mɛjɛn yraʔa ga kí ma hɛnwyee wi lama nyi me, wi nò ki naa ki nyu.

Goro syɛn kayoʔo

(Mat 7:24-27)

46Nyaʔa kala na, yé na na yeri wò fɔlɔ, wò fɔlɔ, áʔa hín bo yoò na na kayoro kpɔʔɔ de? 47Hɛn ŋa wí na pan nà krugu mà báa na kayoro nuru de ná ti kpɔʔɔ ge, mí bi ki woo wi lɛgɛ tyɛʔɛ ge ye na. 48Wí nyɛ nɛ pa naŋa ŋa nyɛ wí naʔa ca bì go fan. Wɔ̀ɔ tindɛʔɛ tru ticuʔugu fɔ àʔa yâ no wa ŋglɛnʔɛ na mà go ki noʔoma hli ki ŋglɛnʔɛ kiì na. Nyiŋi ga na caple li gáa fó, nyumu á mi yâ go cinni ge, mi ìn gban bìʔi kpoʔoro, mɛjɛn wi daʔá fan kmaʔa. 49Di ŋa wí na na kayoro nuru de, na wi ìn da ti kpɔʔɔ ge, wí nyɛ nɛ pa naŋa ŋa nyɛ wí ma go fan tra na, noʔoma fun. Nyumu mi gáa go cinni ge, àʔa taʔa mà to kpo. Ki go ki tolo à li po tipele ceŋge.»

Currently Selected:

LUKE 6: NLK10

Highlight

Copy