LUKE 18

Kucɔ ní kiti konfɔlɔ kayoʔo

1Ki kruʔu ma, wɔ̀ɔ yomɛlɛ kmo pé kan jango bìʔi tyɛʔɛ pé na peʔe cɛn pe yo: Kí ma yala pe da Nyɛʔɛlɛ nyɛri le nyiŋi kì bɛfu na. Pò ga de ki hranma ní me. 2Wɔ̀ɔ yo: «Kiti konfɔlɔ wà dà bo wa kàʔà kà ni. Wi ìn dàá fyaʔa Nyɛʔɛlɛ na le. Wi ìn dàá hɛn wà honri kpo. 3Kucɔ wà dà bo wa ki kàʔà ni ge kpo. Wɔ̀ɔ na sye ki kiti konfɔlɔ krugu we nyifafaʔa na mà yáa ki nyu wí ma mà yo: ‹Ma tanʔa kan ná ma, ma na syɔ na bɛnfɔlɔ ma we.› 4Àʔa nyiŋi fafaʔa kɔ, wi ìn ki ta bìʔi hanri. Ki kruʔu ma, wɔ̀ɔ báʔà honri mà yo: ‹Ali nàʔa ja bo ho na fyaʔa Nyɛʔɛlɛ na le, ho ní bì da hɛn wà honri ge, 5ɛɛn di, pa ki kucɔ ŋa wí na na yɛʔɛ̀ gbanni wɛʔɛ, mí bi tanʔa kan wí ma, jango wò gáa ban bì baa na teʔe adi.› » 6Wò fɔlɔ wɔ̀ɔ ní màʔa yo pé ma nɛ mà yo: «Ye nì ye kiti konfɔlɔ kloŋo wi kayoro loʔo da wi dá yo ge. 7Nyɛʔɛlɛ fanna, loò na tanʔa kanʔa bee ma lí ma fara ge mâ po pé na li yeri yaagbanʔa yebliʔi, mâ yo li pe haʔa ge yo? Pa li mo pe haʔama nì me yo? 8Kanyɛmɛ na, pa li fyala bì tanʔa kan pé ma. Kiì nì kì bɛfu ní, Hɛn Pyɔ nòo gá ban, pɔɔ ba pama ta naʔa tra na de yo?»

Farisiyee naŋa ní, ní misari syɔfɔlɔ nì

9Hɛɛn bee pé ma pe honriʔi pa pee pè na ge náʔa honri mâ yo pé nyɛ sinbee ge, áʔa po pe na pe tɔɔ faʔara be ge, Jesu wi dá ki yomɛlɛ la kmo le pee kan be kpo mà yo: 10«Wlɛʔɛ kà na, nabii syɛn da gɛrí Nyɛʔɛlɛ sraʔá go ni bì yà li nyɛri. Wà dà bo Farisiyee naŋa. Wi tɔ wɔ̀ɔ po misari syɔfɔlɔ. 11Farisiyee naŋa wɔ̀ɔ jɛ mà yere na nyɛri wa wi lama ni me mà yo: ‹Nyɛʔɛlɛ, mí na ma syeri, mɛjɛn mì nì, hɛɛn pe tɔɔ ní be woò nyɛ teme na, bee pé nyɛ nikonmoo mâ po kloboo ge, bee pé nyɛ cɛkpee be. Ali mí na ma syeri nɛ ga na ho nyɛ nɛ pa ki misari syɔfɔlɔ ŋa nyɛ we. 12Canwyeʔe kè bɛfu na, mí na su cun we cohara syɛn syɛn. Yrɛbɛ pì bɛfu ba mí na taʔa ge, mí na nigbe nigbe lari wa kɛ̂ kɛ̂ wì bɛfu na noo kanʔa má ma.› 13Di misari syɔfɔlɔ, wɔ̀ɔ yere deleʔege na. Wi ìn ki ta bì wi yugu jrɛʔɛ ge namuru bì da wele. Di wɔ̀ɔ na wì nori kabɛlɛ na le mà yo: ‹Nyɛʔɛlɛ, na nyugara ti wa má na, mɛjɛn mí nyɛ kapere hanrifɔlɔ.› 14Kanyɛmɛ na, Nyɛʔɛlɛ li dá sinmi kan ki naŋa wiì ma, wɔ̀ɔ kɛri wi kasyɛn ma ge. Farisiyee naŋa ban. Mɛjɛn hɛn o hɛn ŋa wí na wì kpɔʔɔ ge, Nyɛʔɛlɛ pa li bɔɔ cɛrɛ. Di ŋa wí bi da wì cɛrɛ ge, pa li bɔɔ kpɔʔɔ.»#18:14 ma wèle wa Mat 23:12; Luk 14:11 ni wè.

Jesu wí ma Nyɛʔɛlɛ wa mà pii kan be

(Mat 19:13-15; Mar 10:13-16)

15Hɛɛn pèè dáa ban wí kan pii ní jango wi ba màʔà pe na. Ploʔofɛɛ pe gâ pe nya ge, à pe na taʔara pé na. 16Di Jesu wɔ̀ɔ pii yeri be mà yo: «Ye pii yaʔa be pee ban nà krugu. Yò gáa pe prɔ, mɛjɛn Nyɛʔɛlɛ li masaʔa ki klɛ́n mà pe nyoʔo kiì kan. 17Mí biʔi yo ye ma kanyɛmɛ na, hɛn ŋa wi ìn bi Nyɛʔɛlɛ li masaʔa kayoro co de nɛ pa pyɔ nyɛ we, ki woo wòo gban bì jeʔe ni.»

Masa naŋa

(Mat 19:16-30; Mar 10:17-31)

18 Juwifiyee lagwɔɔ wà dà Jesu yugu we mà yo: «Krɛʔɛfɔkmaa, mí bi nyaʔa hanri jango bí nyuwyeʔe bajegɔ ta we?» 19Jesu wɔ̀ɔ wí po: «Nyaʔa ma po má na na yeri kmaa ge. Mɛjɛn hɛn wà wò naʔa kmaa fɔ mà laʔa Nyɛʔɛlɛ liì nigbe na. 20Má ma Nyɛʔɛlɛ furu kayoro cɛn de tí na ga nyu ge: ‹Mò gá cɛkpere po. Mò gá hɛn kpo. Mò gá yu mò gá jafa le ma nibo na. Ma to nì, ma no nì maa pe kpɔʔɔ.› »#18:20 ma wèle wa Nyi 20:12-16; Lado 5:16-20 ni wè.

21Naŋa wɔ̀ɔ yo: «Mí na ki kayoro tì bɛfu kpɔʔɔ mà kpe na najɛrɛ nyiŋi na ge.» 22Jesu wi gâ ki woʔo ga loʔo ge, wɔ̀ɔ wí po: «Ki kó má ma kala nigbe. Maa sye, ma ya ma kyɛʔɛ yrɛbɛ pì bɛfu pɛrɛ, ma ki gbejanra tiʔibi de fyomo fɛɛ kan be. Pa ma masaʔa kà ta wa namuru ni de. Ki kruʔu ma, maa ban, ma ba bà ná na.» 23Wi gâ ki kayoro da loʔo de, wɔ̀ɔ yɛʔɛ̀ pɛn ge ceŋge, mɛjɛn wi masaʔa ki dá bo fafaʔa kpre. 24Jesu wi gâ wi yɛpɛnʔɛ nya ge, wɔ̀ɔ yo: «Masaa pe jeme mí nyɛ gbanma wa Nyɛʔɛlɛ li masaʔa ni ge ceŋge. 25Ali nyoʔomɛ wí nyɛ jedaan wa mihɛnri wyele ni le mà toro masa naŋa wi jeme na wa Nyɛʔɛlɛ li masaʔa ni ge.» 26Bee pe daʔa loʔó ge, à pe yo: «Han bi gban bì syɔ?» 27Wɔ̀ɔ pé po: «Nyɛʔɛlɛ lí na gbanni kaʔa gee ní ké na hɛɛn jin be.»

28Pyɛri wɔ̀ɔ wí po: «Welé, wòó wó ma wò kyɛʔɛ yrɛbɛ yaʔa be mà pa má na.» 29Wɔ̀ɔ pé po: «Mí biʔi yo ye ma kanyɛmɛ na, hɛn wì bɛfu ŋa wí bi wi go yaʔa, ní wi cɔ nì, wi heme woo ní, wi hefɛɛ ní, ní wi pii ní be, Nyɛʔɛlɛ li masaʔa kala na, 30ki woo pɔɔ fafaʔa ta ŋaŋa ni ge bì doro yrɛbɛ ba na wi dá yaʔa ge bì ba nyuwyeʔe bajegɔ ta kpɛndo ni we.»

Jesu wí ma wi kùʔù kayoʔo yo ge nɛ

(Mat 20:17-19; Mar 10:32-34)

31Jesu wɔ̀ɔ wi hɛɛn kɛ̂ mà kɛ syɛn yeri we mà kɛri pé ni namyɛlɛ na mà yâ pe po: «Yè wèlé, wó na sye Jerusalɛmu kàʔà ni ge. Kì bɛfu ga Nyɛʔɛlɛ leyoo pe da nyoŋó Hɛn Pyɔ wi kala na le kí bi yà funŋu wa.

32Pé bi yɔ̀ɔ le klòʔo ke tɔɔ hɛɛn pe kyɛrɛ̀ ni de. Ki woo pé yàá pè kle wí na bì dɔɔ teri bì da cɛnrɛ wa wí na. 33Pa poo kmo aple nì bì noo kpo. Wlɛrɛ tanriwoʔo na, pɔɔ nyɛ̀ bì nyíni.»

34Di pe ìn ki kaʔa là nigbe kɔrɔ́ cɛn. Mɛjɛn ki kayoro ti dá hra pe na. Da wi dá yo pé kan, pe ìn ti cɛn.

Jesu wí ma fyon pwɔʔɔ

(Mat 20:29-34; Mar 10:46-52)

35Pɔɔ da gáa sye mâ yáa nori wa Jeriko kàʔà na ge, fyon wà dà bo wa klɛnhaʔa kloʔò na ge na nyɛri. 36Hɛɛn pa pe da gáa doro fafaʔabaa ná taʔara, wɔ́ɔ ki loʔo ge, wɔ̀ɔ pe yugu mà yo: Nyaʔa ma po wa? 37À poo po: Jesu ŋa Nasarɛti kàʔà woo we, wí na toro naʔa. 38Wɔ̀ɔ taʔara gbanʔa mà yo: «Jesu, mo ŋa Dafide pyɔ we, na nyugara ti wa má na.» 39Hɛɛn bee pe dá bo wa yɛʔɛ̀ ge, à pe na taʔara wí na mà yo wi pyèrì. Wɔ̀ɔ náa daʔara gbanʔa ki tɔ na ge mà yo: «Dafide pyɔ, na nyugara ti wa má na.» 40Jesu wɔ̀ɔ yere mà yo pee ban wí ni wí kan. Wi gâ ba no wí na ge, Jesu wɔ̀ɔ wí po: 41«Má ma cori bì nyaʔa hanri má kan?» Wɔ̀ɔ yo: «Na fɔlɔ, mí ma cori bì da nyaʔa nɛ.» 42Jesu wɔ̀ɔ wí po: «Ma da nyaʔa. Ma pama mí ma ma pwɔʔɔ.» 43Wɔ̀ɔ taʔa na nyaʔa kpo mà pa Jesu na we mà na Nyɛʔɛlɛ kpɔʔɔ le. Hɛɛn bee pe daʔá nya ge, pè bɛfu à pe na Nyɛʔɛlɛ sonni le.

Currently Selected:

LUKE 18: NLK10

Highlight

Copy