LUKE 13

Hɛɛn pe kruʔu wa pe kapere ma de

1Ki nyiŋi na ge, hɛɛn pèè dá bo wa. À pe báʔà yo Jesu ma we pomo ma na Pilate wi dá Galile klo woo pèè kpo, nyiŋi ga na pe dá bo na sraʔá fara Nyɛʔɛlɛ ma le. 2Wɔɔ pé po: «Pa ki Galile klo woo pe da gâ gu banmɛ ge, yé ma honri mà yo ki woo pe dá bo kapere hanrifɛɛ mâ toro Galile klo woo pe tɔɔ na be yoʔ 3Ayo dɛ. Di, yèé fanna, nà ye ìn kruʔu wa yè kapere ma de, yè bɛfu pa ye gu. 4Ná kiì ban, Silowe kàʔà ki go tiklonʔo paʔa dá do hɛɛn kɛ̂ mà kɛ̀ natanri na mâ pe kpo ge, yé maʔa honri mà yo ki woo pe dá bo kapere hanrifɛɛ mà toro hɛɛn pe tɔɔ bee na pe dá bo wa Jerusalɛmu kàʔà ni ge yo? 5Ayo dɛ. Di yèé fanna, nà ye ìn kruʔu wa yè kapere ma de, yè bɛfu pa ye gu.»

Jesu wí ma fige tibasɛʔɛ kayoʔo yo

6Ki nyiŋi na, Jesu wɔ̀ɔ ki yomɛlɛ la kmo le pe kân mà yo: «Fige tiʔi dá bo naŋa wà ma, wɔ̀ɔ kí tyɛnmu wa wi kere ni de. Wɔ̀ɔ bâ gɛri bì yà ki pibi pà ca. Di wi ìn yà yraʔa kà nya wa. 7Wɔ̀ɔ wi tungɔɔ po we: ‹Welé, yɛʔɛ tanri kpafoʔo ni, mí na pan naʔa bì baa ki tiʔi pibi pà ca. Ɛɛn di, mi ìn jé pà nya. Maʔa kon, maʔa càn. Kí bi nyaʔa no, nàʔa ko be bì ki tra da gban be banmɛ ge?› 8Wɔ̀ɔ wí po: ‹Kundiʔi, maʔa yaʔa kpɛn yɛlɛ ni le, fɔ bì ba tra plɔ de wa ki noʔo na ge bì ba nofre le wa kpo. 9Kana paʔa ba sɛ kruʔu ma ge. Ná kiì ban, pa ma nà da bìʔi can.› »

Lemloʔoŋo pwɔʔɔmo fyonriwlɛʔɛ na

10Jesu wi dáa hɛɛn krɛʔɛ be wa Juwifiyee sɛrigo kà ni fyonriwlɛʔɛ na. 11À cɛlɛ wà ma po wa, gbosyo dà bo wí ni mà yara tà wa wi na. Wɔ̀ɔ kru mà ko ban su fɔ mà bâ da yɛʔɛ́ kɛ̂ mà kɛ natanri. Wi ìn dà gban bì haʔala bì sin fyeu. 12Jesu wi gɔ́ɔ̀ nya nyiŋi ga na ge, wɔ̀ɔ wí yeri mòo po: «Cɛlɛ, má ma syɔ ma yara ma de.» 13Wɔ̀ɔ wi kyɛrɛ̀ pa de wi na kpo. Ki nyidege na ge, cɛlɛ wɔ̀ɔ haʔala mà sin mà na Nyɛʔɛlɛ kpɔʔɔ le kpo. 14Àʔa Juwifiyee sɛrigo kundiʔi bɛn we ceŋge ga na Jesu wí ma yaŋa pwɔʔɔ we fyonriwlɛʔɛ na ge. Wɔ̀ɔ kí yo janma ma me mà yo: «Kí ma yala hɛɛn pè bɛfu pe da tunŋu ko wlɛrɛ noli. Ki kala na, ye da ban ki wlɛrɛ na de, ye baa bori. Ki ìn yala ki po fyonriwlɛʔɛ na.»#13:14 ma wèle wa Nyi 20:9-10; Lado 5:13-14 ni wè.

15Wò fɔlɔ wɔ̀ɔ wí po: «Yèé noyomo syɛn syɛn yofɛɛ, yè bɛfu nigbe nigbe yé na yè niri nì, ní yè sofɛnŋɛɛ haʔala ge wa nugbara ni de mà yáa pi kanʔa, à pi na jo fyonriwlɛʔɛ na ge kɛ. 16Ki cɔ ŋa wí nyɛ Abrahamu wi kluʔu pyɔ wi, Sotanri wɔ̀ɔ wí pwɔ mòo yaʔa fɔ yɛʔɛ kɛ̂ mà kɛ natanri kpafoʔo ni. Ki ìn yala poo haʔalá wa ki apwɔbɔ na be fyonriwlɛʔɛ na ge yo?»

17Jesu wi gâ ki kayoro da yo de kɔ ge, fɛrɛ à ti ton wi bɛnfɛɛ na be. Di janma mì bɛfu à mi po lafiʔimi nì wi kakpɔʔɔlɔ hranma na me.

Mutaride tiʔi pyɔ falimi yomɛlɛ

(Mat 13:31-32; Mar 4:30-32)

18Jesu wɔ̀ɔ ní màʔa yo nɛ mà yo: «Nyɛʔɛlɛ li masaʔa kí nyɛ nɛ pa nyaʔa nyɛ? Mí biʔi tonli nyaʔa ní? 19Kí nyɛ nɛ pa mutaride tiʔi pyɔ ŋa nyɛ hɛn wí ma kpe mà yâ dòn wa wi kere ni de. Wɔ̀ɔ fín na lɛʔɛ mà bâ grɛʔɛ tiʔi. Namuru kajɛnʔɛ à ke báa glɛn wa ki kaclara na de.»

Bru ajrɛʔɛgɛ wɛgɛ yomɛlɛ

(Mat 13:33)

20Wɔ̀ɔ ní mà yo nɛ: «Mí bi gban bì Nyɛʔɛlɛ li masaʔa tonli ge nyaʔa ní? 21Kí nyɛ nɛ pa bru ajrɛʔɛgɛ wɛgɛ ga nyɛ cɛlɛ wà ma kpe máʔà le wa ciloyee fonɛrɛ mà kɛ kɔgunnu ca ni ge. Àʔa craʔa mà kì bɛfu nyi.»

Jesu wí ma goyɛtatugu kayoʔo yo

(Mat 7:13-14,21-23)

22Jesu wi dáa kyɛkpandoro ní kàpleʔe nyari ge na hɔlɔ nigbe nigbe mà na hɛɛn krɛʔɛ be na sye Jerusalɛmu namyɛlɛ na. 23À hɛn wà ma yɔ́ɔ̀ po: «Kundiʔi, bee pé na syo ge, ki woo pé bi bo hɛɛn cɛnri yo?» Jesu wɔ̀ɔ pé po: 24«Ye da yè kpanŋi, ye da jin wa goyɛtatugu na, mɛjɛn kanyɛmɛ na, hɛɛn fafaʔabaa bi baa ki ca bì je wa, ɛɛn di, pòo gban bìʔi hanri.

25Go fɔlɔ nòo gá ba jɛ bí goyɛʔɛ tón nyiŋi ga na ge bí ye yaʔa yerehaʔa wa dala na le, nà ye gá baa goyɛʔɛ kmo ge bí yo: ‹Wò fɔlɔ, ki nyɛ̀ʔɛ́ wo kan,› pɔɔ ye po: ‹Mi ìn ye jɛhaʔa cɛn ge.› 26Ki nyiŋi na, pa yeʔe hli bì daʔa nyu bì yo: ‹Wo dáa blɛn na li na jo má ni. Mo à ma na hɛɛn krɛʔɛ be wa wò kàʔà lama kloro ni de.› 27Pɔɔ ki yo ye ma nɛ bì yo: ‹Mi ìn yè jɛhaʔa cɛn ge. Yè jɛ̀ nɛ nà tanla, yèé bee yè bɛfu yé nyɛ kakloʔo hanrifɛɛ be.›#13:27 ma wèle wa Ŋuʔu 6:9 ni wè. 28Nà ye gá Abrahamu nì, Isake nì, Jakɔbe nì, ní Nyɛʔɛlɛ leyoo pè bɛfu nya wa Nyɛʔɛlɛ li masaʔa ni ge, kí po pé ma yèé wa be dala na ge, ki nyiŋi na, pa ye da gbele bì da ganʔa kun ge.#13:28-29 ma wèle wa Mat 8:11-12; 22:13; 25:30 ni wè. 29Ki nyiŋi na, hɛɛn pèè bi jɛ drunya namyɛʔɛ kè bɛfu na bì ba glɛn da li wa Nyɛʔɛlɛ li masaʔa ni ge. 30Yeʔe wèlé, kruʔu ma hɛɛn pèè bi ba bo yɛkluu, yɛkluu pèè bí ba bo kruʔu ma woolo.»#13:30 ma wèle wa Mat 19:30; 20:16; Mar 10:31 ni wè.

Jesu wí ma lahromo ta Jerusalɛmu kala na le

(Mat 23:37-39)

31Ki nyidege na ge, à Farisiyee pèè ma pan mà bâ Jesu po we: «Kí ma yala ma jɛ̀ naʔamɛ ge, maa sye deʔe kà na, mɛjɛn Erɔde wí naʔa ca bì ma kpo.» 32Wɔ̀ɔ pé po: «Yee sye, ye yaʔa yo ki peʔe ga ma ge, yeʔe po: ‹Mí nyɛ naʔa na gbosuu prɔ mà na yabaa pori alaʔa nî, ní kpɛndo ní we, kpɛndo kruʔu ma, bì na tunŋu kì bɛfu kɔ.› 33Kiì nì kì bɛfu ní, kí nyɛ jiji wi fɔ bì da danri alaʔa nî ge, ní kpɛndo ní mà plɛn kpɛndo kruʔu ma ní we. Mɛjɛn ki ìn yala pe Nyɛʔɛlɛ leyoo wà kpo deʔe kà na fɔ mà laʔa Jerusalɛmu kàʔà na ge.

34E Jerusalɛmu kàʔà woolo, yèé bee yé na Nyɛʔɛlɛ li leyoo kpun be mâ na li pitunbee wa be ŋglɛnrɛ ní ge. Nyiŋi fafaʔa na, mi dáa ki ca bì ye kpoʔolo nɛ pa gono wi hîn gopiʔi kpoʔolo ge wa wi kanmara noʔo na ge. Di ye ìn ki ta. 35Welé, Nyɛʔɛlɛ li ìn bi ba wele yè go na ge adi. Kanyɛmɛ na, ye ìn bi gà ná nya adi fɔ nyiŋi ga na yé bi baʔa yo bì yo: ‹Nyimi bí bo ŋa ma wí na pan wò fɔlɔ wi yele na le.› »#13:35 ma wèle wa Ŋuʔu 118:26; Jer 22:5 ni wè.

Currently Selected:

LUKE 13: NLK10

Highlight

Copy