JAN 9

Jesu wí ma naŋa pwɔʔɔ ŋa pe dá he fyon ge

1Jesu wi gâ jɛ ná sye ge, wɔ̀ɔ yâ naŋa wà nya, pe dɔɔ́ he ban, wɔ̀ɔ po fyon. 2Jesu wi ploʔofɛɛ à poo yugu mà yo: «Krɛʔɛfɔlɔ, ki naŋa ŋa wiì ma kapeʔe hanri ge, dee di, wi hefɛɛ bɛ, á poó he fyon ge?» 3Jesu wɔ̀ɔ pé po: «Ki naŋa ŋa wi kapeʔe kala ban. Wi hefɛɛ woro kala ban. Pé moo he ban, jango Nyɛʔɛlɛ li ba li fanŋa tyɛnʔɛ ge hɛɛn na be, wi pwɔʔɔmo kala na le. 4Nyiŋi ga na kpɛnmɛ mí nyɛ naʔa ge, kí ma yala wo da ŋa tunŋu ko wí ma na tun ge. Yebliʔi kí bi ba gmo. Ki nyiŋi na ge, hɛn wà wóo gban bì da tunŋu ko. 5Pa mí nyɛ naʔa drunya ni we ki nyiŋi ga na ge, mí nyɛ drunya wi kpɛnmɛ.»#9:5 ma wèle wa Mat 5:14; Jan 8:12 ni wè. 6Wi gâ ki woʔo ga yo ge kɔ, wɔ̀ɔ cɛnrɛ wa tra na mà ki jɔʔɔ prin màʔa kpe màʔa frɔʔɔ wa fyon wi nyɛʔɛ na ge, 7mòo po: «Ta sye, ma ya ma nyɛʔɛ jeʔe ge wa caʔa ga ni pé na yeri Silowe ge.» Ki nyumu mi yele li kɔ̀rɔ́ wiì ŋa we, “Ŋapematun”. Ki nyiŋi na, wɔ̀ɔ kɛri mà yâ ke jeʔe. Wi gâ ke jeʔe kɔ ge, wɔ̀ɔ na nyaʔa kpo mà kɛri wi kasyɛn ma ge.

8Ki kruʔu ma, wi nibyee ní, ní hɛɛn bee ní pe dáa wi nyaʔa móò cɛn nyiŋi ga na wi dáa nyɛri hɛɛn ma be ge, à pe naʔa nyu pè ma mà yo: «Ki woo ŋa wiì ban wi dáa glɛn ná yrɛbɛ nyɛri hɛɛn ma be yo?» 9Pèè na yo: «Wiì wi.» Pèè na yo nɛ: «Wiì ban, di wí moo lɛ́.» Wiì wì tapolo wɔ̀ɔ pé po: «Bo domi wi.» 10À poo yugu mà yo: «Má maʔa po mɛlɛ má na nyaʔa ŋaŋa ni ge si?» 11Wɔ̀ɔ pé po: «Naŋa ŋa pé na yeri Jesu we, wi dá jɔʔɔ prin màʔa frɔʔɔ wa na nyɛʔɛ na ge mà yo bì yà ke jeʔe wa caʔa ga ni pé na yeri Silowe ge. À mi kɛri mà yâ ke jeʔe. Mi gâ ke jeʔe kɔ ge à mi taʔa na nyaʔa kpo.» 12À poo po: «Ki naŋa wí nyɛ hanbe?» Wɔ̀ɔ pé po: «Mi ìn wi kɛrihaʔa cɛn ge.»

Farisiyee pé ma fyon yugu wi pwɔʔɔmo kala ní

13Ŋa wi dá bo fyon we, à poo co mà kɛri wí ni Farisiyee krugu be. 14Jesu wi da gâ jɔʔɔ kpe máʔà frɔʔɔ wa wi na nyɛʔɛ na ge, á ke nyɛʔɛ ge, ki wlɛʔɛ ki dá bo Juwifiyee pe fyonriwlɛʔɛ gi. 15Wi daʔá po pomo ma na mâ na nyaʔa ge, Farisiyee à pe yɔ́ɔ̀ yuguʔu ni. Wɔ̀ɔ pé po: «Naŋa wà dà jɔʔɔ prin màʔa kpe màʔa frɔʔɔ wa na nyɛʔɛ na ge, à mi yâ ke jeʔe mà taʔa na nyaʔa kpo.»

16Ki nyiŋi na, Farisiyee à pèè ma naʔa nyu mà yo: «Ki naŋa ŋa wi ìn jɛ Nyɛʔɛlɛ ma dɛ, mɛjɛn wí na fyonriwlɛʔɛ cɔʔɔ ge.» Di à pèè ma yo: «Kapere hanrifɔlɔ pɔɔ bo mɛlɛ bí gban bí da ki kafonŋoo gee ke nyoʔo hanri ge?» Pe honriri à ti taʔa mà konʔolo ti na kpo.

17Ki kruʔu ma Farisiyee, à pe ní mà naŋa yugu we nɛ ŋa wi dá bo fyon ge mà yo: «Pɔɔ ma ma nyɛʔɛ nyɛʔɛ ge má na ge, má na nyaʔa honri wi namyɛʔɛ na ge?» Wɔ̀ɔ pé po: «Mí naʔa honri mà yo wí nyɛ Nyɛʔɛlɛ leyoo.» 18Àʔa hín bo Juwifiyee pe lagwɔɔ pe ìn dà baʔa na bì yo ki naŋa wi dá bo fyon mà nà gâ ba da ná nyaʔa ge fɔ mà bâ no nyiŋi ga na pe dá wi hefɛɛ yeri be, 19mà bâ pe yugu mà yo: «Yè pyɔ wiì wi ŋa we yo? Yé maʔa yo cɛnŋɛ gi yo mà yo ye dɔɔ́ he fyon ge? Wí maʔa po mɛlɛ mâ na nyaʔa ŋaŋa ni ge?» 20Wi hefɛɛ à pe yo: «Wó maʔa cɛn mà yo wò pyɔ wi, mà nì màʔa cɛn mà yo wo dɔɔ́ he fyon. 21Di ga kí ma hanri wí na, wɔ́ɔ na nyaʔa ŋaŋa ni ge, wo ìn ki cɛn. Ŋa wí moo kân wɔ́ɔ na nyaʔa ge, wo ìn ki woo cɛn we kpo. Pyɔ ban wi ní. Wiì tapolo wí bi wi woʔo yo ge ye kan.» 22Wi hefɛɛ pe dá ki woʔo ga yo ge, mɛjɛn pe dáa fyaʔa Juwifiyee lagwɔɔ na be. Mɛjɛn Juwifiyee pe dá yo mà flinʔi na mà yo, nà hɛn wà bí yo Jesu wí nyɛ Nyɛʔɛlɛ li wofràa ge, pa pe ki woo prɔ bùu yrígi wa pe sɛrigo ni ge. 23Kiì kala na, wi hefɛɛ pe dá yo: «Woò nyɛ pyɔ, yoo yùgú ge.»

24Ki nyiŋi na, Farisiyee à pe ní mà ki naŋa yeri we nɛ, ŋa wi dá bo fyon we mà bɔ́ɔ̀ po: «Ma kayocɛnŋɛ yo Nyɛʔɛlɛ li yɛʔɛ̀ na ge.Wó maʔa cɛn kanyɛmɛ na mà yo ki naŋa ŋa wí nyɛ kapere hanrifɔlɔ.» 25Wɔ̀ɔ pé po: «Ali nòo ja bo kapere hanrifɔlɔ yoo, mi ìn bi gban bì ki woʔo ga cɛn ge. Mí ma kala nigbe cɛn waʔa nî, lí la: Mi dá bo fyon, ɛɛn di, ŋaŋa ni ge, mí na nyaʔa.» 26Ki nyiŋi na, à poo po nɛ: «Wí ma nyaʔa hanri má na? Wi di jáʔà po mɛlɛ kpabu mâ ma nyɛʔɛ nyɛʔɛ ge má na ge?» 27Wɔ̀ɔ pé po: «Mi di glú màʔa yo ye kan kɔ. Ye ìn ki ta bìʔi loʔo ná ma. Nyaʔa kɔsɔ na yé ma cori bìʔi yo ye ma nɛ ge? Kana yèé fanna yé ma cori bì bo wi ploʔofɛɛ pèè yo?»

28À poo tyɛʔɛlɛ mà yo: «Mo wi má nyɛ ki woo ŋa wi ploʔofɔlɔ we. Di wòó wó nyɛ Mowisi ploʔofɛɛ. 29Wó maʔa cɛn mà yo Nyɛʔɛlɛ li dá yo Mowisi nì we. Di wo ìn ja ki naŋa ŋa wi jɛhaʔa cɛn ge.» 30Fyon wɔ̀ɔ pé po: «Kala la lí ma na fo ge lí la: Wí ma na nyɛʔɛ nyɛʔɛ ge ná na. Ɛɛn di, yèé ye ìn wi jɛhaʔa cɛn ge. 31Wò bɛfu wó maʔa cɛn mà yo Nyɛʔɛlɛ loò na nuru kapere hanrifɛɛ ma be. Di hɛn ŋa wí na Nyɛʔɛlɛ kpɔʔɔ le, mâ na li nadanma kaʔa hanri ge, li naa nuru ki woo ma we. 32Mà kpe drunya wi hlinyiŋi na, wo ìn jeʔe loʔo bì yo pé ma pyɔ wà he fyon, à hɛn wà mà gban mà ki hɛn wi nyɛʔɛ nyɛʔɛ ge wí na. 33Nàʔa po ki naŋa ŋa wi ìn dì jɛ wa Nyɛʔɛlɛ liì ma ge, wi ìn dì bí gban bì yrafyɛn hanri.» 34À poo po: «Mo má nyɛ kapere hanrifɔlɔ mà kpe ma henyiŋi na ge. Má naʔa ca bì da wo krɛʔɛ yo?» Mòo prɔ mòo yrígi wa Juwifiyee sɛrigo ni ge.

Hɛɛn pe nyìgée fyonro

35Jesu pɔɔ da gáʔà loʔo mâ yo pé moo prɔ ge, wɔ̀ɔ yáa wi ca. Wi gaâ wi nya nyiŋi ga na ge, wɔ̀ɔ wí po: «Má ma pa Hɛn Pyɔ na we yo?» 36Naŋa wɔ̀ɔ wí po: «Kundiʔi, han wi Hɛn Pyɔ we? Moo tyɛʔɛ ná na, jango bì ba wí na.» 37Jesu wɔ̀ɔ wí po: «Má moo nya kɔ. Ŋa wí na nyu má ni ŋaŋa ni ge wiì wi.» 38Naŋa wɔ̀ɔ yo: «Na Fɔlɔ, mí ma pa, mà taʔa mà kunbiʔi kan wì tanla.»

39Ki nyiŋi na, Jesu wɔ̀ɔ yo: «Mí ma pan naʔa ki drunya ŋa ni we hɛɛn pe kiti wiì kala na, jango bee pé nyɛ fyoon be ge, pe da nyaʔa, di bee pé na nyaʔa ge pe ba grɛ̀ʔɛ̀ fyoon.»

40Farisiyee bee pe dá bo be wi ní ma ki woʔo ga loʔo ge, à poo po: «Má naʔa honri mà yo wòó fanna, wó nyɛ fyoon yo?» 41Jesu wɔ̀ɔ pé po: «Nàʔa po ye dí bo fyoon ge, Nyɛʔɛlɛ li ìn dì bí da ye cun kapere hanrifɛɛ. Ɛɛn di, pa yé yo yé na nyaʔa ge, lí na ye cun kapere hanrifɛɛ su.

Currently Selected:

JAN 9: NLK10

Highlight

Copy