JAN 8
8
Pé ma cɛlɛ wà co nagbere na
1Jesu wɔ̀ɔ kɛri mà yâ luʔu angolo là na, pé na li yeri olife tiri angolo. 2Ki jɛfantutuʔu na ge, wɔ̀ɔ hru mà pan Nyɛʔɛlɛ li sràʔá go ni ge. Hɛɛn pè bɛfu à pe kɛri wì krugu. Wɔ̀ɔ yâ glɛn mà na pe krɛʔɛ. 3Pe dá naŋa wà cɔ co naŋa wà nì. Ki nyiŋi na, Furu sɛbɛ cɛnfɛɛ pèè ní, Farisiyee pèè ní, à pe ki cɔ co mà kɛri wí ni Jesu krugu we mà yɔ́ɔ̀ yrigí be hɛɛn pe nulala ni le, 4mà Jesu po we: «Krɛʔɛfɔlɔ, pé ma ki cɔ ŋa co we naŋa nì, à pe po pé na pè taʔa. 5Mɛjɛn Mowisi wi mɛɛ daʔa yo wa Nyɛʔɛlɛ furu kayoro sɛbɛ ni we mà yo, nà wo ki cɔ wà ta bùu co ge, woo wa ŋglɛnrɛ ní woo kpo. Di mo má yo mɛlɛ?»#8:5 ma wèle wa Sraʔa 20:10; Lado 22:22-24 ni wè.
6Pe dá ki woʔo ga yo ge jango bì Jesu po bùu wele, bì gban bì jafa wà lehaʔa ta. Di Jesu wɔ̀ɔ taʔa mà kpɔbu mà na nyoŋo tra na wi kabɛlɛ nì le. 7À pe ko be noo yugu wɔ̀ɔ gâ glɛn mà sin mà pe po: «Hɛn ŋa nyɛ naʔa ye ni kapeʔe fun, ki woo wi klù wi ŋglɛnʔɛ kà kpe, wuu wa,» 8mà kpɔbu nɛ na nyoŋo tra na de. 9Pe gâ ki woʔo ga loʔo ge, àʔa hli lagwɔɔ peè na. À pe na lari nigbe nigbe fɔ mà bâ gɔ mà cɛlɛ yaʔa we be yerehaʔa dedege na Jesu wiì nigbe ní. 10Jesu wɔ̀ɔ klɛn mà sin mòo po: «Cɛlɛ, bee pé na kiti kon má na pé nyɛ hanbe? Wɛ̀ ìn kala là hanri má na yo?» 11Cɛlɛ wɔ̀ɔ yo: «Ayo, kundiʔi wɛ̀ ìn kala la hanri ná na.» Jesu wɔ̀ɔ wí po: «Mi ìn bi kala là hanri má na kpo. Ta sye. Mà kpe alaʔa na, mò je ga ní bì kapeʔe kà hanri adi.]»
Jesu wí nyɛ drunya wi kpɛnmɛ
12Ki nyiŋi na, Jesu wɔ̀ɔ ki hli mà na nyu hɛɛn ní be nɛ mà yo: «Mí nyɛ drunya wi kpɛnmɛ. Nà hɛn ŋa bi ba ná na, wòo da danri yeblimi ni adi, di pɔɔ kpɛnmɛ ma ta mí nyɛ nyuwyeʔe ge.»#8:12 ma wèle wa Mat 5:14; Jan 9:5 ni wè. 13Farisiyee à poo po: «Kayoʔo ga má na nyu ge, má naʔa nyu ma na. Kí nyɛ fanŋa fun.»#8:13 ma wèle wa Jan 5:31 ni wè. 14Jesu wɔ̀ɔ pé po: «Ayo, nà mi jaa ki kayoʔo nyu domi na na, ki kayoʔo kí nyɛ fanŋa nì, mɛjɛn mí ma na jɛhaʔa cɛn ge mà na kɛrihaʔa cɛn ge kpo. Di yèé ye ìn na jɛhaʔa cɛn ge. Ye ìn nì bì na kɛrihaʔa cɛn ge kpo. 15Yé na kiti kon na yala ki drunya ŋa wi pomo ní me. Ho na kiti kon hɛn na. 16Ali nà mi ja kiti kon hɛɛn na, ki kiti wi na po fanŋa nì. Mɛjɛn mì nigbe ban mí na kiti kon we, di To ŋa wi da ná tun ge, wí nyɛ ná ni. 17Kí nyɛ wa nyoŋoʔo yè funru kayoro sɛbɛ ni we mà yo: Nàʔa po hɛɛn syɛn na kayotege nyu kayoʔo kà na, ki kayoʔo ki na po fanŋa nì.
18Mí na na kayotaʔa kiì nyu. Na To, ŋa wí ma na tun ge, wiì fanna, wɔ̀ɔ na na kayoʔo nyu ge kpo.» 19Kiì kala na, pe dɔɔ́ po: «Ma To wí nyɛ hanbe?» Wɔ̀ɔ pé po: «Ye ìn na cɛn kanyɛmɛ na. Ye ìn na To cɛn we kpo. Nàʔa po ye di na cɛn kanyɛmɛ na, ye dí bì na To cɛn we kpo.»
20Jesu wi dá ki woʔo ga yo ge, nyiŋi ga na wi dáa hɛɛn krɛʔɛ be wa Nyɛʔɛlɛ li sràʔá go ni ge, wa deʔe ga na pé na gbejanra kanʔa de. Di hɛn wɛ̀ ìn wi co ki nyiŋi na ge, mɛjɛn wi nyiŋi ki dá bo ki ìn je dyɛʔɛ kpɛn.
Mí na sye deʔe ga na, yòo gban bì no wa
21Wɔ̀ɔ pé po nɛ: «Mí bi gɛri. Nà mi kɛri, pa ye gà ba na ca bì de bì ba nì bì gu wa nɛ yè kapere ni de. Mí na sye deʔe ga na, yòo gban bì no wa.» 22Ki kala na, Juwifiyee lagwɔɔ à pe yo: «Kí po wí bi wì kpo yo, wɔ́ɔ yo deʔe ga na wiì wí na sye, wòó wòo gban bí no wa ge?» 23Wɔ̀ɔ pé po: «Yèé yé ma jɛ naʔa noʔoma drunya ni di domi mí ma jɛ namuru woo ni. Yé nyɛ ki drunya ŋa wi woolo, di domi ho nyɛ ki drunya ŋa wi woo. 24Kiì kɔsɔ na, mí maʔa yo ye kan mâ yo: Yé bi ba gu wa yè kapere ni de. Yé bi ba gu wa ti nî nàʔa po yoò baʔa na bí yo: ‹Minyɛ ŋa mì mí nyɛ ge.› » 25Ki nyiŋi na, à pe noo po: «Má nyɛ nyaʔa?» Jesu wɔ̀ɔ pé po: «Mà kpe ki hlinyiŋi na, mí nyɛ hɛn ŋa ge, kiì gi mí na nyu ye ma ge. 26Mí bi gban bì kiti kon ye na kafafaʔa gaa ní. Di ŋa wí ma na tun ge wí nyɛ kanyɛmɛ fɔlɔ. Ga mí ma loʔo wí ma ge mí na kiì nyu dron drunya hɛɛn ma be.»
27Pe ìn dàʔa cɛn bì yo wí na wi To kayoʔo nyu pé kan, ŋa wí nyɛ wa namuru ni de. 28Jesu wɔ̀ɔ pé po: «Nà ye gá ba Hɛn Pyɔ jrɛʔɛ buu yrigí wa tipraʔa na nyiŋi ga na ge, ki nyiŋi na, pa ye nàʔa cɛn bì yo: ‹Minyɛ wi ná ni.› Mɛjɛn ho na yraʔa kà hanri na fandaʔa nì ge. Na To wí ma na krɛʔɛ ga nì kiì gi mí na nyu ge. 29Ŋa wí ma na tun ge, wí nyɛ ná ni. Wi ìn na yaʔa nà yɛ nigbe, mɛjɛn mí na wi nadanma kaʔa hanri nyiŋi kì bɛfu na.» 30Pɔɔ da gáa ki kayoro da nyu de, à hɛɛn fafaʔabaa ma pa wí na.
Kanyɛmɛ mí bi ye hanri ye ko yè kan?
31Ki nyiŋi na, Jesu wɔ̀ɔ kí yo Juwifiyee bee ma pe pá wí na ge mà yo: «Nà ye da na krɛʔɛmɛ kpɔʔɔ me, pa ye bo na ploʔofɛɛ kanyɛmɛ na, 32bì kanyɛmɛ cɛn me kpo. Kanyɛmɛ pa mi ye yuru syɔ de.» 33À poo po: «Wòó wó nyɛ Abrahamu kluʔu pii. Wo ìn je glu bì bo hɛn wà ŋkloo pinni pinni. Mo má biʔi po mɛlɛ bí yo wò yuru pa ti syɔ ge?» 34Jesu wɔ̀ɔ pé po: «Mí naʔa nyu ye ma kanyɛmɛ na, hɛn ŋa wí bi go bì da kapere hanri ki woo wí nyɛ kapere ti ŋklomo ni. 35Ŋklo wòo gban bì go wa su ŋa go nî wi dɔɔ́ syɔ ge. Di Pyɔ wi wi hîn na kori wa su wi To go nî ge.» 36Jesu wɔ̀ɔ pé po: «Pyɔ nòo yo yè yuru ti syɔ, pa ye syɔ kanyɛmɛ na. 37Mí maʔa cɛn mà yo yé nyɛ Abrahamu kluʔu pii. Di, kiì nì kì bɛfu ní, à ye naʔa ca bì na kpo, mɛjɛn kayoro da mí na nyu ge, toò na klɛnhaʔa taʔa wa yè lama ni me. 38Na To wí ma kaʔa gee tyɛʔɛ ná na ge, mí na kee nyu. Di yè to wí ma kaʔa gee yo ye ma ge, yé na kee hanri.»
39À poo po: «Wò to wiì wi ŋa Abrahamu nì we.» Jesu wɔ̀ɔ pé po: «Nàʔa po ye dí bo Abrahamu pii ge wi dáa kaʔa gee hanri, paʔa bo ye dí bo na kee tegee hanri. 40Di ŋaŋa ni ge, ali nàʔa ja bo mí ma kayocɛnrɛ yo ye ma, da mí ma loʔo Nyɛʔɛlɛ ma le, yé naʔa ca bì na kpo. Abrahamu wi ìn jé ki woʔo ki nyoʔo kà hanri. 41Yè To wí na kaʔa gee hanri ge, yé na ki kategee kee hanri.» À poo po: «Lecɔʔɔŋo pii ban wòó ní be. Wó nyɛ To nigbe pii bɛ wo nì. Wiì wi ŋa Nyɛʔɛlɛ ní le.» 42Jesu wɔ̀ɔ pé po: «Nàʔa po Nyɛʔɛlɛ li dí bo yè To ge, mi dí bì da ye glanʔa. Mɛjɛn mi dá jɛ wa Nyɛʔɛlɛ liì ma mà pan mà bâ bo naʔa ye nì. Mi ìn dà ban na fandaʔa panma na, di liì li li da ná tun ge. 43Nyaʔa ma po yòo gban bí ga kɔ̀rɔ́ cɛn mí na nyu ge? Mɛjɛn ye ìn jori bì da na kayoro nuru de. 44Yè To wiì wi ŋa Sotanri ní we. À ye cori bì da ga hanri kí noo glanʔa ge. Wí na hɛɛn kpun mà kpe ki hlinyiŋi na. Woò na pa kanyɛmɛ na me, mɛjɛn woò nyɛ kanyɛmɛ fɔlɔ. Nòo da flɛn nyiŋi ga na ge, wi naa wi ladama kayoro tiì nyu, mɛjɛn wí nyɛ akpoflɛɛn mà po ákpoʔo kè bɛfu hlifɔlɔ. 45Di pa mi gáa kanyɛmɛ nyu ye kan ge, à kiì mà kan ye ìn ba na kayoro na de. 46Han nyɛ naʔa ye ni ŋa wí bi gban bìʔi tyɛʔɛ hɛɛn na be, peʔe cɛn pé yo mí na kapeʔe hanri ge? Di nàʔa po mí na kanyɛmɛ nyu ye ma ge, nyaʔa ma kan yoò na pa na kayoro na de? 47Ŋa wí nyɛ Nyɛʔɛlɛ li woo we, wí na nuru Nyɛʔɛlɛ li kayoro ma de. Di yèé yoò nyɛ Nyɛʔɛlɛ li woolo. Kiì kɔsɔ na, yoò na nuru Nyɛʔɛlɛ li kayoro ma de.»
Sanni pé bi Abrahamu he we, Jesu wi dá bo wa kɔ
48Ki nyiŋi na, Juwifiyee à poo po: «Jaʔa wó ma kayocɛnŋɛ yo mâ yo má nyɛ Samari klo woo ge, mâ yo nɛ gbosyo nyɛ má ni ge.» 49Jesu wɔ̀ɔ pé po: «Gbosyo wò nyɛ ná ni. Mí na na To kpɔʔɔ we, di yèé yoò na na kpɔʔɔ. 50Ho na na kpɔʔɔmo ca. Wà nyɛ wa wí na mi ca bì ba mi kan ná ma. Wiì wi wí na kiti sinŋi kon we. 51Mí biʔi yo ye ma kanyɛmɛ na, ŋa wí bi da na kayoro kpɔʔɔ de ki woo wòo ba gu fyeu.» 52Juwifiyee à poo po: «Wo ná màʔa cɛn kmaʔa san mà yo gbosyo nyɛ má ni. Abrahamu wɔ̀ɔ ku. Nyɛʔɛlɛ leyoo à pe ku pè bɛfu ge. Di mo à ma ná yo: ‹Hɛn ŋa wí bi da ma kayoro kpɔʔɔ de ki woo wòo gà gu fyeu.› 53Mo má ma kpɔʔɔ mà toro wò To Abrahamu na we yo? Wi dá gu. Nyɛʔɛlɛ li leyoo fanna à pe ku kpo. Mo ma tyɛnlɛ lí nyɛ mɛlɛ si?»
54Jesu wɔ̀ɔ pé po: «Nàʔa po mi dí bo na nà kpɔʔɔ ge, paʔa bo mí na nà kpɔʔɔ waʔafe na. Na To wiì wi wí na na kpɔʔɔ ge, ŋa yèé yé naʔa nyu mâ yo wí nyɛ yè Nyɛʔɛlɛ ge. 55Di, kiì nì kì bɛfu ní, ye ìn joo cɛn. Domi mí moo cɛn. Nàʔa po mí yo mi ìn wi cɛn ge, pa mi blɛn bì bo akpoflɛɛn kpo nɛ pa yèé nyɛ be. Di mí moo cɛn mà na wi kayoro kpɔʔɔ de. 56Ki da glán yè to Abrahamu ni we ceŋge, áʔa po wí bi na panwlɛʔɛ nya ge. Wi gáʔà nya kɔ ge, àʔa po wí ma lafiʔimi nì ceŋge.»
57Juwifiyee à poo po: «Mo ŋa mɛ ìn jé ja yɛʔɛ too syɛn ní kprɔʔɔ ta we kpɛn, má maʔa po mɛlɛ mâ Abrahamu nya we.» 58Jesu wɔ̀ɔ pé po: «Mí biʔi yo ye ma kanyɛmɛ na, sanni pé bi Abrahamu he we, àʔa po mí nyɛ wa.»
59Ki nyiŋi na, à pe ŋglɛnrɛ kpe jango bùu wa tí ni. Di Jesu wɔ̀ɔ wì hra pe na mà nyini wa Nyɛʔɛlɛ li sràʔá go ni ge.
Currently Selected:
JAN 8: NLK10
Highlight
Share
Copy
Want to have your highlights saved across all your devices? Sign up or sign in
Bible Society of Côte d'Ivoire
