JAN 21

Jesu wí ma wì tyɛʔɛ wi ploʔofɛɛ nasyɛn na

1Ki kruʔu ma, Jesu wɔ̀ɔ yâ wì tyɛʔɛ nɛ wi ploʔofɛɛ na be wa nyugbɔmo ma tanla pé na yeri Tiberiyade ge. Pomo ma na ki dá hanri ge mí ma: 2Simo Pyɛri nì, Toma nì, ŋa pé na yeri kpo Piŋaa ge, ní Nataniyɛli nì ŋa Kana kàʔà woo we ga kí nyɛ wa Galile klo ni, ní Sebede pii ní, ní ploʔofɛɛ pèè ní syɛn, pe da blɛ́n mà po wa teme na. 3Simo Pyɛri wɔ̀ɔ pé po: «Mí bi gɛri bì yàá fála wa.» À poo po: «Wòó fanna, wó bi blɛn má ni bì gɛri wa kpo.» À pe jɛ mà kɛri mà yâ je nyumu kɔrɔ kà ni, di pe ìn yraʔa kà ta ki yebliʔi ni ge.#21:3 ma wèle wa Luk 5:5 ni wè. 4Kpɛnmɛ mi da gâ do kɔ ge ki jɛfantutuʔu na, Jesu wɔ̀ɔ bâ yere be lɔgogo na ge. Ploʔofɛɛ pe ìn ki cɛn bì yo Jesu wiì wi. 5Jesu wɔ̀ɔ pé po: «Na woolo, ye ìn fyɔɔ pèè ta yo?» À pòo po: «Ayo.» 6Wɔ̀ɔ pé po: «Ye fála wa le wa nyumu kɔrɔ ki kaligi namyɛlɛ na, pa ye pèè ta.» À pe li wa wa di pe ìn gban bì li kle bì li fara fyɔɔ pe nyɛʔɛmɛ kala na le.#21:6 ma wèle wa Luk 5:6 ni wè. 7Ki nyiŋi na, ploʔofɔlɔ ŋa wi dáa Jesu glanʔa we, wɔ̀ɔ Pyɛri po we: «Wò fɔlɔ wiì wi.»

Simo Pyɛri wi gáʔà loʔo wí ma mâ yo wò fɔlɔ wi ge, wɔ̀ɔ wi dreʔe kpe màʔa le, mɛjɛn wi dá bo dreʔe fun. Wɔ̀ɔ to wa nyumu ni me na sye wì krugu. 8Wi ploʔofɔnyɛɛ à pe pan nyumu kɔrɔ ni, mɛjɛn pe ìn dà bo leʔe lɔgogo nì ge. Ki kpafoʔo ki dá gban mà mɛtrinyɛʔɛ too kɔgunnu kɔ we. Pe dáa fála klele na pan lí ni, la li dá bo nyìlì fyɔɔ na be. 9Pe gâ nyini wa nyumu kɔrɔ ni ge, à pe kwɔʔɔ nya mà fyɔ nya waʔa na mà bru nya beʔe tanla nɛ. 10Jesu wɔ̀ɔ pé po: «Fyɔɔ bee yé ma fara ŋaŋa ni ge, ye pan pèè ní.» 11Ki nyiŋi na, Simo Pyɛri wɔ̀ɔ je wa nɛ nyumu kɔrɔ ni ge mà fála kle mà li yrígi finmi na. Fyɔkpandoo bee pe dá fála nyi le, à pe po too nasyɛn ní kprɔʔɔ ní fyɔɔ tanri. Ali pe fafaʔama mì bɛfu ní, fála li ìn gonʔolo. 12Jesu wɔ̀ɔ pé po: «Ye pan, wo ba lì.» Ploʔofɛɛ wà nigbe ìn fanŋa ta bùu yugu bì yo: «Mo we. Han wi má ni?» Mɛjɛn pe daʔa cɛ́n mà yo wò fɔlɔ wiì wi. 13Jesu wɔ̀ɔ fyɔ kpe ní bru ní we mà pi tiʔibi pe na.

14Jesu pɔɔ da nyɛ́ mâ nyini kuu ni be mâ na wì teri wi ploʔofɛɛ na be ge, ki woʔo àʔa po tanriwoʔo gi.

Jesu wí ma yo Pyɛri nì we

15Pe gâ li mâ kɔ nyiŋi ga na ge, Jesu wɔ̀ɔ Simo Pyɛri po we: «Simo mo ŋa Jan pyɔ we, mí na ma glanʔa mà toro pomo ma na mí na bee glanʔa be yo?» Wɔ̀ɔ wí po: «Ee, na fɔlɔ, mo má maʔa cɛn mà yo má na na glanʔa.» Wɔ̀ɔ wí po: «Maa na mbapleʔe kanʔa ge ke da lí,» 16mà nì mòo yugu syɛnwoʔo na mà yo: «Simo, mo ŋa Jan pyɔ we, mí na ma glanʔa yo?» Wɔ̀ɔ yo: «Ee, na fɔlɔ, mo má maʔa cɛn mà yo má na na glanʔa.» Jesu wɔ̀ɔ wí po: «Ma da na mbara naʔa de.» 17Wɔ̀ɔ wi yugu tanriwoʔo na ge mà yo: «Simo, mo ŋa Jan pyɔ we, mí na ma glanʔa yo?» Àʔa Pyɛri wi wre kpo de wi na ga na Jesu wi da gɔ́ɔ̀ yugu tanriwoʔo na ge, mâ yo: «Mí na ma glanʔa yo ge.» Wɔ̀ɔ wí po: «Na fɔlɔ, má ma kaʔa kè bɛfu cɛn. Mo má maʔa cɛn mà yo má na na glanʔa.» Jesu wɔ̀ɔ wí po: «Ma da na mbara kanʔa ti da lí. 18Mí biʔi yo má ma kanyɛmɛ na, bì yo: Ma najɛrɛ nyiŋi na, ma dá bo na ma anuʔulu pun le ma na mà yɛ mà na sye ma nadanma deʔe na. Di nà ma gá ba lɛ ge, pa ma ba ma kyɛrɛ̀ haʔala de wà kan, wi ma anuʔulu pwɔ le ma na wi ma troʔo wa deʔe ga na mɛ ìn jori bì gɛri ge.» 19Wi dá ki woʔo ga yo Pyɛri kan we, jango bìʔi tyɛʔɛ wí na, wí bi ba gu pomo ma na. Wɔ̀ɔ wí po: Ma pà ná na.

Jesu wí ma ploʔofɔlɔ ŋa kayoʔo yo wí noo glanʔa ge

20Pyɛri wi gâ wa mâ krɛʔɛ ge, wɔ̀ɔ ploʔofɔlɔ nya wí na pan pè krugu ŋa wi dáa Jesu glanʔa we. Wiì wi ŋa wi da glɛ́n mâ kleʔe Jesu na yebliʔi ga ni pe dáa li ge. Wiì wi wi dá yo: «Wò fɔlɔ, han wi wí bi ma le ma bɛnfɛɛ pe kyɛrɛ̀ ni de?»#21:20 ma wèle wa Jan 13:25 ni wè. 21Pyɛri pɔɔ gɔ́ɔ̀ nya, wɔ̀ɔ Jesu yugu we mà yo: «Na fɔlɔ, ŋa wɛɛ? Nyaʔa bi ba wiì ta we?» 22Jesu wɔ̀ɔ wí po: «Ali nà mi ja yo wi kò be nyuwyeʔe na fɔ wi no wa na hrubannyiŋi na, má na nyaʔa ca wa ki woʔo ni ge? Mo ma pà ná na dron.» 23À kiì ma kan ki kayoʔo àʔa craʔa wa sɛrifɛɛ pe nulala ni le mà yo ki ploʔofɔlɔ wi ìn bi gà gu. Di Jesu wi ìn dàʔa yo ban bì yo wi ìn bi gà gu. Di wi daʔá yo mà yo: «Ali nà mi yo wiì wi kò be nyuwyeʔe na fɔ wi no wa na hrubannyiŋi na ge, má na nyaʔa ca wa ki woʔo ni ge?»

24Ki ploʔofɔlɔ wiì nyɛ ki kaʔa ke cɛn fɔlɔ. Wiì mɛɛ ke nyoŋo. À woʔo cɛn mà yo ga wí ma yo ge, kí nyɛ kayocɛnŋɛ.

Kayotanʔaŋa

25Jesu wi dá kaʔa kèè hanri nɛ fafaʔagaa. Nàʔa po ki kaʔa kè bɛfu nigbe nigbe pe da ke nyoŋó ge, mí naʔa honri mà yo ki sɛbɛɛ pe ìn dà bí yala naʔa drunya ní we.

Currently Selected:

JAN 21: NLK10

Highlight

Copy