JAN 19

1Ki nyiŋi na, Pilate wɔ̀ɔ Jesu kan we, à poo kmo aple nì. 2Sorasiyee à pe huru jala tín mà li kán wa Jesu wi yugu na ge mà kpasyonyɛrɛ drekpɔʔɔ le wí na. 3À pe na pan mà baa wi syeri naʔa pi: «Nyɛʔɛlɛ li kà pa wa ma ma mo ŋa má nyɛ Juwifiyee pe masa naŋa we.» À pe ní mà noo kmo kadaʔala ní wa yɛʔɛ̀ na.

4Pilate wɔ̀ɔ ní mà nyini finmi na me nɛ mà bâ pe po: «Yè wèlé, mí buu yrígi naʔa ye ma finmi na me, jango yeʔe cɛn mi ìn klomo mà nya wí na.» 5Ki nyiŋi na, Jesu wɔ̀ɔ nyini finmi na. Huru jala à li po wí na kaanla mà plɛn kpasyonyɛrɛ drekpɔʔɔ ní ge. Pilate wɔ̀ɔ pé po: «Naŋa wí ŋa.» 6Sraʔá farafɛɛ kpandoo ní, fanŋa fɛɛ ní pe gɔ́ɔ̀ nya nyiŋi ga na ge, à pe na taʔara naʔa pin. «Moo kan tipraʔa na, moo kan tipraʔa na.» Di Pilate wɔ̀ɔ pé po: «Yèé yee sye wí ni, ye yɔɔ kan tipraʔa na, mɛjɛn domi ìn klomo mà nya wí na.» 7Juwifiyee à poo po: «Furu kayoʔo kà nyɛ wa wo ma. Bì yala ki kayoʔo ní ge, kí ma yala wi kù, mɛjɛn wí ma wì krɛʔɛ Nyɛʔɛlɛ Pyɔ.»

8Pilate wi gâ ki kayoro loʔo nyiŋi ga na ge, wɔ̀ɔ fya ceŋge mà toro kplɛʔɛ na ge, 9mà hru mà je wa wi korohaʔa na ge mà yâ Jesu po we: «Má ma jɛ hanbe?» Di Jesu wi ìn kayoʔo kà yo wí kan. 10Ki kala na, Pilate wɔ̀ɔ wí po: «Mɛ ìn bi yo ná ni boo? Mɛ ìn ki cɛn bì yo fanŋa nyɛ ná ma bì ma wa yo? Fanŋa nyɛ ná ma kpo bì ma kán wa tipraʔa na ge kpo. Mɛ ìn ki cɛn yo?» 11Jesu wɔ̀ɔ wí po: «Ma fanŋa wo na na nà ki ìn dì bo kí ma jɛ wa Nyɛʔɛlɛ liì ma má bâ gan má ma ge. Ki kala na, ŋa wí ma na le wa ma kyɛrɛ̀ ni de, ki woo wi kapeʔe kí ma kpɔʔɔ mà toro ma woʔo na ge.» 12Mà kpe ki nyiŋi na, Pilate wɔ̀ɔ na pomo mà ca jango bì Jesu wa we, di Juwifiyee à pe na taʔara mà yo: «Nà ma ki naŋa ŋa wa we mòo bo Sesare wi nagoro adi. Hɛn o hɛn ŋa wí na wì yeri masa naŋa, ki na po wí na can Sesare nì we.»

13Nyiŋi ga na. Pilate wi gâ ki kayoro loʔo de, wɔ̀ɔ Jesu yrigi we finmi na, wiì wɔ̀ɔ yâ glɛn wa aconʔo ga na wí na klɛn ná kiti kon we. Pé na ki deʔe yeri ge “Dalasi” mà nì naʔa yeri nɛ Ebruyee hɛnrɛ ni de “Gabata”. 14Pe dáa Toromo srɛʔɛ fɛti yrɛbɛ hanri ki wlɛʔɛ na ge. Àʔa po yaa kí ma gban kɔ. Pilate wɔ̀ɔ Juwifiyee po be: «Yè masa naŋa wí ŋa.» 15À pe taʔara mà yo: «Wi kpo, wi kpo, ma yɔɔ kan tipraʔa na.» Pilate wɔ̀ɔ pé po: «Domi bì yà yè masa naŋa kàn we tipraʔa na yo?» Sraʔá farafɛɛ kpandoo à poo po: «Masa naŋa wà wò nyɛ wo ma adi nà ki ìn bo Sesare wiì nigbe wi ge.» 16Ki nyiŋi na, Pilate wɔ̀ɔ wí kan pé ma, jango pe yɔɔ kan tipraʔa na.

Pé ma Jesu kán we tipraʔa na

(Mat 27:32-44; Mar 15:21-32; Luk 23:26-43)

À pe Jesu co we mà na sye wí ni. 17Wɔ̀ɔ tipraʔa tugu ge wì yɛ mà kɛriʔi ni wa deʔe ga na pé na yeri “yugrɔʔɔ deʔe ge” mà nì naʔa yeri nɛ Ebruyee hɛnrɛ ni de “Gɔligota”.

18À pe yɔ́ɔ̀ kán tipraʔa na mà hɛɛn syɛn kán be wì tanla. À wà ma po wi namyɛlɛ la na. Wi tɔ wɔ̀ɔ po be wi namyɛlɛ li tɔ na le. Jesu wɔ̀ɔ ko be pe nulala ni le.

19Pilate wɔ̀ɔ sɛbɛ wà nyoŋo mà yɔ́ɔ̀ pa wa tipraʔa na ge. Ki sɛbɛ wɔ̀ɔ naʔa nyu mà yo: JESU, NASARƐTI KÀʔÀ WOO, ŊA WÍ NYƐ JUWIFIYEE PE MASA NAŊA WE. 20Juwifiyee fafaʔabaa dá ki sɛbɛ yo we, mɛjɛn pe dá Jesu kán we tipraʔa na deʔe ga na ki ìn dà bo leʔe kàʔà ni ge. Pe dá ki sɛbɛ nyoŋo we Ebruyee hɛnrɛ ni, Hrɔmu kàʔà woro ní, ní Grɛkiyee woro ní de kpo. 21Ki kala na, Juwifiyee pe sràʔá farafɛɛ kpandoo à pe yâ Pilate po we: «Ki ìn dì yala maʔa nyòŋó ma yo: ‹Juwifiyee pe masa naŋa.› Maʔa nyòŋó ma yo: ‹Ki naŋa ŋa wiì maʔa yo mà yo: Wiì wí nyɛ Juwifiyee pe masa naŋa.› » 22Pilate wɔ̀ɔ pé po: «Ga mí ma nyoŋo kɔ ge, kiì bi go be.»

23Nyiŋi ga na sorasiyee pe da gâ Jesu kán we wa tipraʔa na kɔ ge, à pe wi drere tiʔibi de dere ticɛrɛ. Sorasiyee à pe tí kpe nigbe nigbe. À pe ní mà wi drekpɔʔɔ kpe ge. Ki dreʔe ki dá bo lyɔlihaʔa fun mà kpe wa namuru ni de fɔ mà bâ no wa ki noʔo na ge. 24Ki kala na, pe daʔá yo pè ma mà yo: «Ki ìn yala wo ki woʔo ga hlugu ge. Ye pan, wo nyaʔala le, jango woʔo yaʔa hɛn nigbe ma.» Ki woʔo ki dá hanri ban jango Nyɛʔɛlɛ kayoro ti fùnŋù da ti da nyoŋó mâ yo:

Pé ma na kpasyoro tiʔibi de pe na

mà nyaʔala le na drekpɔʔɔ na ge. # 19:24 ma wèle wa Ŋuʔu 22:19 ni wè.

Ga sorasiyee pe dá hanri ge, kiì gi.

25Jesu wi no wi da yeré be tipraʔa tanla ge, ní Jesu wi no wi conlo wà nì, ní Mari ŋa Klopasi cɔ we, ní Mari ní ŋa Magidala kàʔà woo we. 26Jesu pɔɔ da gâ wi no nya we mâ wi ploʔofɔlɔ nya we be yerehaʔa ŋa wí noo glanʔa ge, wɔ̀ɔ wi no po we: «Na no, ma pyɔ wí ŋa,» 27mà naʔa yo ploʔofɔlɔ ma we mà yo: «Ma no wiì ŋa we.» Mà kpe ki nyiŋi na ge ploʔofɔlɔ wɔ̀ɔ wí co mà kɛri wí ni mà yɔ́ɔ̀ lege wa wiì wi gotaʔa ni ge.

Jesu wí ma ku

(Mat 27:45-56; Mar 15:33-41; Luk 23:44-49)

28Ki kruʔu ma, Jesu pɔɔ da gáʔà cɛn mâ yo kaʔa kè bɛfu ké ma hanri kɔ ge, jango Nyɛʔɛlɛ li kayoro da ti da nyoŋó ti gbàn ti fùnŋù ge, wɔ̀ɔ yo: «Nyujɔʔɔ kí ma na co.»#19:28 ma wèle wa Ŋuru 22:16; 69:22 ni wè.

29Alege kà dà bo be, àʔa po nyìŋì yraʔa ga nì pé na yeri finɛgri ge. À pe gbari le wa ki finɛgri ni we mòo pwɔ wa isɔpe tiʔi kaclaʔa na mòo pa wa Jesu wi nò na ge. 30Finɛgri wi gâ màʔà wa wi nò na kɔ ge, Jesu wɔ̀ɔ yo: «Kì bɛ kí ma funŋu kɔ.» Ki kruʔu ma, wɔ̀ɔ wi yugu cunnu ge mà ku.

Sorasi naŋa wà ma Jesu sun mòo fru

31Ki dá bo wlɛʔɛ ga ni ki kpɛnmɛ mí bi do ki po fyonriwlɛʔɛ gi ge. Juwifiyee pe ìn dà jori ki kuu pe kò wa tipraʔa na fyonriwlɛʔɛ na ge, mɛjɛn ki fyonriwlɛʔɛ ga ki dá bo pé ma wlɛgbɔʔɔ ceŋge. Ki kala na, à pe yâ Pilate nyɛri we jango pe ki woo pe cyeʔe kaʔabu ge, pe pe trìgì wa tipraʔa na ge. 32Ki kala na, sorasiyee à pe pan mà bâ kplɛɛ wi ceʔe kaʔabu ge mà syɛnwoo wi woʔo kaʔabu ge kpo bee pe da gán wa tipraʔa na Jesu ní we. 33Pe bâ no Jesu na nyiŋi ga na ge, à poo nya wi dí gu kɔ, à pe wi cyeʔe yaʔa ge pe ìn ke kaʔabu. 34À sorasi naŋa wà ma Jesu sun colo ní wi namyɛlɛ na le mòo fru. Disyan nì, ní nyumu ní à pi taʔa na nyini wí ni kpo. 35Ŋa wí daʔá nya ge, wɔ̀ɔ ki kayoʔo yo ge. Ga wi dá yo ge, àʔa po cɛnŋɛ. Ki woo wí maʔa cɛn mà yo wí ma kayocɛnŋɛ yo jango yèé fanna ye gbàn ye pà Jesu na we. 36Mɛjɛn ki kaʔa kè bɛfu ke dá hanri ban, jango Nyɛʔɛlɛ kayoro da ti da nyoŋó ge ti fùnŋù mà yo: Wi kacleʔe kà nigbe ìn bi ga.#19:36 ma wèle wa Nyi 12:46; Ton 9:12; Ŋuʔu 34:21 ni wè.

37Nyɛʔɛlɛ kayoro à tà maʔa yo nɛ mà yo: Pé ma ŋa nya pe da sún mâ fru ge.#19:37 ma wèle wa Sak 12:10; Tyɛ 1:7 ni wè.

Pé ma Jesu le we fanʔa ni

(Mat 27:57-61; Mar 15:42-47; Luk 23:50-56)

38Ki kaʔa kè bɛfu ke da gâ hanri kɔ ge, ki kruʔu ma, Josɛfu ŋa, Arimate kàʔà woo we wɔ̀ɔ kɛri mà yâ Jesu wi wre nyɛri Pilate ma we. Mɛjɛn wi dá bo Jesu wi ploʔofɔlɔ wa hrama ni ga na wi dáa fyaʔa Juwifiyee pe lagwɔɔ na be. Pilate wɔ̀ɔ kí ta. Josɛfu wɔ̀ɔ kɛri mà yâ Jesu wi wre kpe de. 39Nikodɛmu wɔ̀ɔ pan kpo, ŋa wi da glu mâ kɛri Jesu krugu we yebliʔi ni ge. Wi dá ban nudanʔa fwo nì ŋa pe dá hanri tiri da nì pé na kà yeri miri na ki tɔ yere alowe ge. Ki tiluʔumu mi dá ciloyee fonɛrɛ mà kɛ kɛ̂ kɔ we.#19:39 ma wèle wa Jan 3:1-2 ni wè. 40À pe Jesu wi wre kpe de ma ya ki nudanʔa fwo wo we wi na ma noo pwɔ kpasyoro ni nɛ pa Juwifiyee pe hîn na pe kuu tonni be. 41Nagɔ wà dà bo wa deʔe ga na pe da Jesu kan tipraʔa na ge. À fanfonŋo ma po wa ki nagɔ ni we. Àʔa po pe ìn jé kpó wà le waʔa nî. 42Paʔa da gâ bo ki kpɛnmɛ nà mi to, paʔa bo fyonriwlɛʔɛ gi ge, áʔa ní mâ po fanʔa ki ìn dà bo leʔe ge, ki kala na, à pe Jesu kpe mà yɔ́ɔ̀ le.

Currently Selected:

JAN 19: NLK10

Highlight

Copy