JAN 18

Sorasiyee pé ma Jesu co we

(Mat 26:47-56; Mar 14:43-50; Luk 22:47-53)

1Nyiŋi ga na Jesu wi gâ ki kaʔa yo ge kɔ ge, wiì nì, wi ploʔofɛɛ ní à pe yâ Sedron lɔkluʔu pari màʔa kon. Nagɔ wà dà bo be. Wɔ̀ɔ je wa wi nî wi ploʔofɛɛ ní be. 2Judasi ŋa wi dá bì bɔɔ le wi bɛnfɛɛ pe kyɛrɛ̀ ni de, wi dá ki deʔe cɛn ge kpo, mɛjɛn Jesu ní, wi ploʔofɛɛ ní pe dáa pè kpoʔolo wa nyiŋi fafaʔa na. 3Ki kala na, Judasi wɔ̀ɔ sorasiyee pèè kpe ní fanŋa fɛɛ bee ní sraʔá farafɛɛ ní Farisiyee pe da blɛ́n wí ni ge mà kɛri pé ni wa ki deʔe na ge. Fiklanyee ní, ní fafabwɔʔɔ kwɔrɔ ní pi dá bo pé ma. 4Jesu wi dá kì bɛfu cɛn ga kí gà ba hanri wiì na we. Ki kala na, wɔ̀ɔ flo wa pè tanla mà pe yugu mà yo: «Yé na han ca?» 5À poo po: «Wó na Jesu ca, ŋa Nasarɛti kàʔà woo we.» Jesu wɔ̀ɔ pé po: «Domi wi.»

Judasi wi dá bo be pe ní kpo yerehaʔa, ŋa wi dá bùu le wa wi bɛnfɛɛ pe kyɛrɛ̀ ni de. 6Jesu pɔɔ da gâ pe po: Mì wi ge, à pe taʔa mà hru kruʔu ma mà to tra na de. 7Wɔ̀ɔ ní mà pe yugu nɛ mà yo: «Yé na han ca?» À poo po: «Wó na Jesu ca ŋa Nasarɛti kàʔà woo we.» 8Jesu wɔ̀ɔ pé po: «Mí yo mí maʔa yo ye kan mà yo mì wi. Nàʔa po yé na mì ca ge, ye ki woo bee yaʔa be pe da sye.» 9Ki dá hanri ban jango wi kayoro ti fùnŋù, da wi dá yo mâ yo: «Bee má ma kan ná ma ge, wà nigbe ìn bunŋu.» 10Kpele là dà bo Simo Pyɛri ma we. Wɔ̀ɔ li kɔ mà sraʔá farafɔlɔ kpangbanŋa wi tungɔɔ wà kmo mà wi kaligi naakpolo kon le wi na. Pé na ki tungɔɔ yeri we Malikusi. 11Jesu wɔ̀ɔ Pyɛri po we: «Ma ma kpele le le wa li wocoʔo ni ge. Mɛ ìn ki cɛn bì yo na To wí ma ki cɔlɔʔɔ ajɔlɔ laà kan na ma mí bi jɔ wa li nî ge yo?»

Pé ma kɛri Jesu ní Ane krugu we

12Ki nyiŋi na, sorasiyee ní, pe lagwɔɔ kpangbanmaa ní, Juwifiyee pe fanŋa fɛɛ ní à pe taʔa mà Jesu co we mòo pwɔ kpo, 13mà kɛri wí ni Ane krugu kpɛn, mɛjɛn wi dá bo Kayifu wi cɔ wi to. Ki yɛlɛ na le, Kayifu wiì wi wi dá bo sraʔá farafɔlɔ kpangbanŋa we. 14Àʔa hín bo Kayifu wiì wi wi daʔá yo Juwifiyee ma be mâ yo kí ma yala naŋa nigbe bí gu hɛɛn pè bɛfu pe nolo ni le.#18:14 ma wèle wa Jan 11:49-50 ni wè.

Pyɛri wí ma ce Jesu ma we

(Mat 26:69-70; Mar 14:66-68; Luk 22:55-57)

15Simo Pyɛri wɔ̀ɔ pa Jesu na we, ní ploʔofɔlɔ wà nì nɛ. Sraʔá farafɔlɔ kpangbanŋa wi dá ki ploʔofɔlɔ cɛn we, wɔ̀ɔ plɛn mà je wa Jesu ní wa sraʔá farafɔlɔ kpangbanŋa wi kasyɛn ma ge. 16Pyɛri wɔ̀ɔ yere be dala yɛʔɛ na goyɛʔɛ tanla ge. Ki kala na, ploʔofɔlɔ ŋa sraʔá farafɔlɔ kpangbanŋa wí ma cɛn ge, wɔ̀ɔ nyini mà bâ yo picɛpii ŋa nì wí na goyɛʔɛ wele ge. Wɔ̀ɔ Pyɛri yaʔa wɔ̀ɔ je. 17Ki picɛpii ŋa wí na goyɛʔɛ wele wɔ̀ɔ yo Pyɛri nì we mà yo: «Moò nyɛ ki naŋa ŋa wi ploʔofɔlɔ kpo yo?» Wɔ̀ɔ wí po: «Ayo, ho nyɛ ki woo wà dɛ.»

18Wyere pa ti dáa gun tungɔɔ ní, fanŋa fɛɛ ní pe dá kwɔʔɔ kmoli mà yere beʔe tanla mà na wari. Pyɛri fanna wɔ̀ɔ bâ yere be pè tanla mà na wari kpo.

Sraʔá farafɔlɔ kpangbanŋa wí ma Jesu yugu we

(Mat 26:59-66; Mar 14:55-64; Luk 22:66-71)

19Ki nyiŋi na, sraʔá farafɔlɔ kpangbanŋa wɔ̀ɔ Jesu yugu we wi ploʔofɛɛ ní, wi krɛʔɛmɛ nì pi kala na le. 20Jesu wɔ̀ɔ wí po: «Mi dáa na kayoro nyu de drunya hɛɛn pe yɛʔɛ̀ na mà na hɛɛn krɛʔɛ be nyiŋi kì bɛfu na wa sɛrigoro ni de ní Nyɛʔɛlɛ sràʔá go ní ge, wa deʔe ga na Juwifiyee pé na pè kpoʔolo ge. Mi ìn dà bo na kayoʔo kà nyu hrama ni. 21Nyaʔa kɔsɔ na, má na na yugu ge? Bee pe dá na kayoro loʔo de, ma pe yùgú da na mi dáa nyu ge. Ki woo pé ma ti cɛn.» 22Fanŋa fɔlɔ wà dà bo wa yerehaʔa. Jesu wi gâ ki woʔo ga yo ge, ki fanŋa fɔlɔ wɔ̀ɔ Jesu kmo kadala nì yɛʔɛ̀ na mà yo: «Kí nyɛ mɛlɛ á ma na nyu sraʔá farafɔlɔ kpangbanŋa ní we banmɛ ge?» 23Jesu wɔ̀ɔ̀ wí po: «Nàʔa po mí ma kayopeʔe yo ge, maʔa yo. Náʔa po kayokmaʔa gi, nyaʔa kɔsɔ na má ma na kmo ge?»

24Ki kala na, Ane wɔ̀ɔ wí yaʔa pwɔɔ mòo troʔo wa Kayifu ma we, ŋa wí nyɛ sraʔá farafɔlɔ kpangbanŋa we.

Pyɛri wí ma ce Jesu ma we nɛ

(Mat 26:71-75; Mar 14:69-72; Luk 22:58-62)

25Simo Pyɛri wi dá bo wa adi yerehaʔa mà na kwɔʔɔ wari. Ki nyiŋi na, bee pe dá bo wa ge à peʔe yo wí ma mà yo: «Moò nyɛ wi ploʔofɔlɔ wà kpo yo?» Wɔ̀ɔ ki ce mà yo: «Ki woo wà ban na ní.» 26Sraʔá farafɔlɔ kpangbanŋa wi tungɔɔ wà dà bo wa. Pyɛri wi dá ŋa naakpolo kon ge wi woo wà wi. Wɔ̀ɔ yo: «Mi ìn dà má nya wa wi ní nagɔ ni we yo?» 27Pyɛri wɔ̀ɔ ki fiʔiri nɛ. Gopɔlɔ wɔ̀ɔ taʔa mà kpele kpo.

Pilate wí ma kiti kon Jesu na we

(Mat 27:1-2,11-14; Mar 15:1-5; Luk 23:1-5)

28Juwifiyee pe lagwɔɔ à pe jɛ be Jesu ní we Kayifu deʔe na mà kɛri wí ni klo fɔlɔ deʔe na ge. Ki dá bo jɛfantutuʔu na. Pe ìn jè wa klo fɔlɔ wi deʔe na ge jango pò gá gran Nyɛʔɛlɛ li yɛʔɛ̀ na, mɛjɛn pe dá jori bì Toromo srɛʔɛ fɛti hro li de. 29Ki nyiŋi na, Pilate, ŋa klo fɔlɔ we, wɔ̀ɔ nyini be finmi na mà pe yugu mà yo: «Yé ma pan bì ba nyaʔa kiti tyɛnlɛ kon naʔamɛ ge?» 30À peʔe yo mà yo: «Nà ki ìn dì bo ki naŋa ŋa wí nyɛ kapere hanrifɔlɔ ge, wo ìn dì bî bɔɔ kân má ma.» 31Ki nyiŋi na, Pilate wɔ̀ɔ pé po: «Yee sye wí ni, ye kiti kon wí na ye yala yè furu kayoro ní de.» Juwifiyee à poo po: «Ki ìn yala wo hɛn wà kpo.» 32Ki woʔo ga ki dá hanri ban, jango ga Jesu wi dá yo wi kùʔù pomo na me, ki woʔo ki fùnŋù.#18:32 ma wèle wa Jan 3:14; 12:32 ni wè. 33Pilate wɔ̀ɔ ní mà hru mà je wa nɛ wi go nî ge, mà yâ Jesu yeri we mà bɔ́ɔ̀ yugu mà yo: «Mo wi má nyɛ Juwifiyee pe masa naŋa we yo?» 34Jesu wɔ̀ɔ wí po: «Má maʔa cɛn mà yɛ dee di, hɛɛn pèè ma na kayoʔo yo ma kân?» 35Pilate wɔ̀ɔ wí po: «Juwifi wà wi ná ni yo? Ma klo woo ní, ní sraʔá farafɛɛ kpandoo ní pee ma ma kân ná ma. Ma dá nyaʔa hanri?» 36Jesu wɔ̀ɔ wí po: «Na masaʔa koò nyɛ drunya woʔo. Nàʔa po ki dí bo drunya woʔo ge, na tungɔɔ pe dí bì mlaʔa kmo jango bìʔi ce hɛn wà wò ga ná le wa Juwifiyee pe kyɛrɛ̀ ni de. Di na masaʔa koò nyɛ drunya woʔo.» 37Pilate wɔ̀ɔ wi yugu mà yo: «Nàʔa po ban, má nyɛ masa naŋa yo?» Jesu wɔ̀ɔ wí po: «Mo maʔa yo mâ yo mí nyɛ masa naŋa ge. Pe da ná he yugu ga na ge, ní na panma ní naʔa drunya ni we kiì gi ga: Bì baa kanyɛmɛ kayoro nyu.» Pilate wɔ̀ɔ wí po: «Nyaʔa gi kanyɛmɛ me?»

Pilate wí ma Jesu kan we kùʔù ma

(Mat 27:15-31; Mar 15:6-20; Luk 23:13-25)

38Jesu wi gáʔà yo kɔ, Pilate wɔ̀ɔ jɛ mà kɛri wa Juwifiyee krugu be mà yâ pe po: «Mi ìn klomo mà nya wí na. 39Di kalɛlɛ la lí nyɛ wa ye ma fan ye li hanri, jango bi hɛn wà wa ye kan Toromo srɛʔɛ fɛti na we. Yé ma cori bì Juwifiyee pe masa naŋa wiì wa ye kan dee?» 40À pe taʔara gbanʔa mà yo: «Wiì ban, Barabasi wi.» Àʔa hín bo Barabasi wi dá bo nikonŋo mà na yu fanŋa na.

Currently Selected:

JAN 18: NLK10

Highlight

Copy