JAN 12

Mari wí ma hùnmù tin Jesu wi cyeʔe na ge

(Mat 26:6-13; Mar 14:3-9)

1Nyiŋi ga na ki da gâ go wlɛrɛ noli Toromo srɛʔɛ fɛti wlɛʔɛ kí no ge, Jesu wɔ̀ɔ kɛri Betani kàʔà ni. Lasare wi kàʔà kiì da gi, ŋa wí da nyɛ́ móò yrígi kuu ni be. 2À pe yâ yebliʔi hro hanri mà ti hɔʔɔ Jesu kan we wa. Marite wɔ̀ɔ na hro kpin mà yáa ti teri be pè tanla. Lasare wi dá bo be ki hro lifɛɛ ní be, bee pe dáa li Jesu ní we. 3Ki nyiŋi na, Mari wɔ̀ɔ nudanʔa hùnmù kpe litri konʔo, ma pé na yeri nari ge wɔ̀ɔ bâ mi tîn Jesu wi cyeʔe na ge mà wi yujoro tyɛʔɛ mà Jesu wi cyeʔe tuʔu ge tí ni. Ki hùnmù mi nuʔu àʔa go kì bɛfu nyi. Mi dá bo naricɛnŋɛ mà po pɛgbanra na.#12:3 ma wèle wa Luk 7:37-38 ni wè. 4Jesu wi ploʔofɛɛ wà dà bo wa, à pe noo yeri Judasi Isikariyɔte. Wiì wi wi dá bì ba Jesu le wi bɛnfɛɛ pe kyɛrɛ̀ ni de. Wɔ̀ɔ yo: 5«Ki nudanʔa hùnmù mi pɛrɛ ti dí bì gban bì tungɔɔ wi yɛpolo sraʔa kɔ ge dɛ. Nyaʔa kɔsɔ na pe ìn mi pɛrɛ bí ki gbejanra tiʔibi fyomo fɛɛ na be?» 6Àʔa hín bo wi ìn da ki woʔo ga yo ge ga na wi dáa honri fyomo fɛɛ na be. Di wi daʔá yo, mɛjɛn wi dá bo nikonŋo. Wi dá bo pe kɛsu cofɔlɔ. Wɔ̀ɔ na gbejanra da yu hɛɛn pe dáa ni wa wi nî ge. 7Ki nyiŋi na, Jesu wɔ̀ɔ wí po: «Ma ki cɔ yaʔa we yeʔeke. Ki dí yala wi ki woʔo ga hanri ge sanni na kuwlɛʔɛ kí bi no, pe na ton wa fanʔa ni ge. 8Mɛjɛn fyomofɛɛ pé nyɛ naʔa ye nì su. Di domi mi ìn bi bo naʔa ye nì nyiŋi kì bɛfu na.»#12:8 ma wèle wa Lado 15:11 ni wè.

Pé ma dɛnbɛrɛ le Lasare na we

9Nyiŋi ga na Juwifiyee fafaʔabaa da gáʔà loʔo mâ yo Jesu wí nyɛ wa Betani kàʔà ni ge, à pe kɛri wa. Di pe ìn dà gɛri Jesu wiì nigbe kala na. Pe da gɛrí wa, jango bì yà Lasare wele we kpo, ŋa Jesu wi da nyɛ́ móò yrígi kuu ni be. 10Ki nyiŋi na, sraʔá farafɛɛ à peʔe hli na ticlimi mà ca kpo jango bì Lasare kpo we. 11Mɛjɛn wi kala na, Juwifiyee fafaʔabaa dáa lari pé na mà na pa Jesu na we.

Jesu wí ma je wa Jerusalɛmu kàʔà ni ge

(Mat 21:1-11; Mar 11:1-11; Luk 19:28-40)

12Ki kpɛntoʔo jɛfanʔa na ge, janma hɛɛn fafaʔabaa bee pe da gɛrí wa srɛʔɛ fɛti ma we, pe gáʔà loʔo mâ yo Jesu wí na sye wa Jerusalɛmu kàʔà ni ge, 13à pe hɛʔɛbara kon na sye mà yɔ́ɔ̀ flin mà na taʔara naʔa pin:

Woo Nyɛʔɛlɛ sonni le.

Frɛmɛ bí bo Israyɛli klo woo

pe masa naŋa ma we,

ŋa wí na pan wò fɔlɔ

Nyɛʔɛlɛ yele na le. # 12:13 ma wèle wa Ŋuʔu 118:25-26 ni wè.

14Jesu wi dá sofɛnlɛ ta mà luʔu lí na. Ki dá hanri nɛ pa ga nyɛ kí nyɛ wa nyoŋoʔo Nyɛʔɛlɛ li sɛbɛ ni we mâ yo:

15 Yèé bee Sinyo kàʔà woolo,

yò gáa fyaʔa yraʔa kà na.

Welé, yè masa naŋa wí ŋa:

Wí ma luʔu mà klɛn

sofɛnlɛ là pyɔ na na pan wa. # 12:15 ma wèle wa Sak 9:9 ni wè.

16Wi ploʔofɛɛ pe ìn dà ki woʔo ga ki kɔ̀rɔ́ cɛn we ki nyiŋi na ge. Di Jesu wi da gâ wi kmara ta Nyɛʔɛlɛ ma nyiŋi ga na ge, à pe lama to ki woʔo ga nì ki da nyoŋó wa Nyɛʔɛlɛ li sɛbɛ ni wi kala na le ní ga nì pe dá hanri wí na ge. 17Jesu pɔɔ da gâ Lasare yeri we wa fanʔa ni móò nyɛ́ móò yrígi kuu ni be ge, hɛɛn bee pe dá bo wa Jesu ní we, à pe na ki kayoro nyu de. 18Janma pa mi da gáʔà loʔo mâ yo wí ma ki kafonlo hanri le, à mi jɛ mà kɛri bì yɔ̀ɔ flin. 19Ki nyiŋi na, Farisiyee à pe naʔa nyu pè ma mà yo: «Yé maʔa nya, wó ma ga hanri, kí nyɛ waʔafe. Yèʔè welé, drunya wì bɛfu wí na sye wì krugu.»

Grɛsi klo woo pèè na Jesu ca we

20Grɛsi klo woo pèè dá bo wa hɛɛn bee ni pe da gɛrí wa ki srɛʔɛ fɛti ma bi yá Nyɛʔɛlɛ kpɔʔɔ le. 21Pe gaâ no wa Filipe na, ŋa Bɛtisayida kàʔà ga woo kí nyɛ wa Galile klo ni le, à poo po: «Kundiʔi, wó ma cori ma Jesu tyɛʔɛ we wo na.» 22Filipe wɔ̀ɔ taʔa mà kɛri mà yáʔà yo Andre ma we. À pe plɛn mà kɛri mà yáʔà yo Jesu ma we. 23Jesu wɔ̀ɔ pé po: «Nyiŋi kí ma tyɛʔɛ Hɛn Pyɔ wí bi wi kmara ta de. 24Mí biʔi yo ye ma kanyɛmɛ na, nadebyɔ ŋa pe în don wa tra ni de, nà wi ìn bi gu, wi na kò nigbe. Ɛɛn di, nòo ku kɔ ge, wi na pibi fafaʔa yrigi. 25Ŋa wi nyuwyeʔe kí nyɛ wí ma yraʔa kà, pɔɔ baʔa punŋu. Ɛɛn di, ŋa wi nyuwyeʔe koò nyɛ wí ma yraʔa kà naʔa ki drunya ŋa ni we, wi nyuwyeʔe paʔa go wi ma su. Wi nyuwyeʔe bajegɔ ta.#12:25 ma wèle wa Mat 10:39; 16:25; Mar 8:35; Luk 9:24; 17:33 ni wè. 26Hɛn o hɛn wí ma cori bì da na tunŋu ko ge, kí ma yala wi pà ná na. Mɛjɛn nà mi po deʔe ga na, na tungɔɔ pɔɔ bo be kpo. Nà ŋa bí da na tunŋu ko ge, na To pɔɔ ki woo kpɔʔɔ we.»

Jesu wí na wi kùʔù kayoʔo nyu

27Wɔ̀ɔ pé po nɛ: «Ŋaŋa ni, na lama mí ma wlele ná na. Bì nyaʔa yo? Bìʔi yo yo bì yo: Na To, ma na syɔ ga ma kí bi no ná na ki nyiŋi ga na ge?Ayo, mi dá ban naʔa drunya ni we jango bì ba jɔlɔ ki nyiŋi kiì na. 28Na To, ma ma kmara tyɛʔɛ de hɛɛn na be.» Ki nyiŋi na, wɔ̀ɔ ákpolo là loʔo wa namuru ni de. À li yo: «Mi klú mà na kmara tyɛʔɛ de pe na. Mí bi nì bìʔi hanri nɛ.»

29Janma mi dá bo wì tanla mà ki àkpolo loʔo le. Wa janma ni me, à pèè ma yo: «E, nyɛʔɛlɛ lí na tunnu.» À pèè ma yo nɛ: «Mlɛŋɛ wà ma yo wí ni.» 30Jesu wɔ̀ɔ pé po: «Ákpolo la yé ma loʔo ge li ìn yo domi kɔsɔ na, di lí ma yo yèé kala na. 31Ŋaŋa ni ge, Nyɛʔɛlɛ lí bi kiti kon drunya hɛɛn na be. Ŋaŋa teŋe ni we, lí bi ki drunya wi kundiʔi prɔ we. 32Mi fanna, nà pe ga ná jrɛʔɛ bi na yrigí ki drunya ŋa ni we, pa mi da hɛɛn pè bɛfu kle, pee ban nà krugu.» 33Wi dá ki woʔo ga yo ge, jango bìʔi tyɛʔɛ pé na peʔe cɛn wí bi ba gu pomo ma na ge. 34Ki nyiŋi na, janma à muu po: «Pé maʔa yo wo kan wa Nyɛʔɛlɛ li furu sɛbɛ ni we mà yo Nyɛʔɛlɛ li wofràa wí bi ba go nyuwyeʔe na su. Àʔa hín bo mɛlɛ mo á ma yo pé bi ba Hɛn Pyɔ jrɛʔɛ buu yrigí ge? Hɛn Pyɔ wí nyɛ hanni si?»#12:34 ma wèle wa Ŋuʔu 110:4; Esa 9:6; Esek 37:25; Dan 7:14 ni wè.

35Jesu wɔ̀ɔ pé po: «Kpɛnmɛ mí nyɛ naʔa ye nì bì nyiŋi cɛnri kɔ. Kpɛnmɛ pa mi gâ bo naʔa ye nì, kí ma yala ye da danrí mí na, jango yebliʔi kò ga gmo ye na. Mɛjɛn hɛn ŋa wí na tanri yeblimi ni, wí jé da wi kɛrihaʔa cɛnni ge. 36aPa kpɛnmɛ kanfɔlɔ wí nyɛ naʔa ye nì ŋaŋa ni ge, kí ma yala ye pà wí na, jango ye po kpɛnmɛ mi pii.»

Juwifiyee pe ìn ba Jɛsu na we

36bJesu wi gâ ki kayoro da yo de kɔ, wɔ̀ɔ kɛri leʔe mà yâ hra pe na. 37Ali mà jâ bo wi dá kafonŋoo fafaʔagaa hanri pe yɛʔɛ̀ na, kiì nì kì bɛfu ní, pe ìn ba wí na. 38Ki dá hanri ban, jango Nyɛʔɛlɛ leyoo Esayi wi kayoro ti fùnŋù. Tí da:

Wò fɔlɔ,

han ma pa wò kayoro na, de?

Ma da ma fanŋa tyɛʔɛ ge han na? # 12:38 ma wèle wa Esa 53:1 ni wè.

39Ga ki dá gan pe ìn ba tí na ge, Esayi wi daʔá yo deʔe kà na kì yɛ mà yo:

40 Nyɛʔɛlɛ lí maʔa hanri,

à pe fyon,

jango pò gáa nyaʔa

pe nyɛʔɛ ní ge.

À li ní mà pe honriʔi

ton ge pe na,

jango pò gáa kaʔa cɛnni

wa pe honriʔi ni ge.

À li yo: Mi daʔá hanri ban

jango pò gá yɛʔɛ̀ kan ná ma,

bì pe pwɔʔɔ. # 12:40-41 ma wèle wa Esa 6:9-10 ni wè.

41Esayi wi dá ki woʔo ga yo ge, mɛjɛn wi da glú mà Jesu wi kmara nya de mà na wi kayoʔo yo ge.

42Di, kiì nì kì bɛfu ní, à Juwifiyee pe kundiʔiyee fafaʔabaa mà pa wí na. Ɛɛn di, pe ìn ki ta bìʔi yo hɛn wà kan, mɛjɛn pe dáa fyaʔa Farisiyee na be mà yo ki woo pé gà pé prɔ wa Juwifiyee pe sɛrigo ni ge. 43Mɛjɛn pe dáa ki ca hɛɛn pe da pe sonni, sanni Nyɛʔɛlɛ lí da pe sonni ge.

Kiti konmo Jesu wi kayoro fanŋa ni

44Jesu wɔ̀ɔ taʔara mà yo: «Hɛn o hɛn ŋa wí bi ba ná na, paʔa bo wi ìn ba mì na dron, di wí ma pa ŋa na wí ma na tun ge. 45Ŋa wí ma na nya ge, wí ma ŋa nya kpo wi ná tun ge. 46Mì mí nyɛ nɛ pa kpɛnmɛ nyɛ me. À mi pan naʔa drunya ni we, jango hɛn o hɛn ŋa wí bi ba ná na ki woo wò gá go wa yeblimi ni me adi. 47Domi mi ìn bi da kiti kon hɛn ŋa na wí na na kayoro nuru de, áʔa hín bo woò na ti kpɔʔɔ ge. Mɛjɛn mi ìn dà ban bì baa kiti kon drunya hɛɛn na be, di mi dá ban bì ba pe syɔ. 48Hɛn ŋa wí ma ce ná ma mâ po wi ìn ba na kayoro na de, yraʔa kà nyɛ wa ga kí bi ba kiti kon wí na ge. Kiì ga: Kayoro da nì mi dá yo ge, tí bi ba kiti kon wí na drunya wi kɔnyiŋi na ge. 49Mɛjɛn kayoro da mí na nyu ge ho na ti nyu na fandaʔa kiì ni. Di na To ŋa wí ma na tun ge wiì naʔa nyu ga kí ma yala bì da nyu bí daʔa jari ge.

50Mí maʔa cɛn mà yo ga wí yo kí hanri ge, kiì gi kí na hɛɛn kanʔa á pe na nyuwyeʔe bajegɔ taʔa we. Kiì kɔsɔ na ga mí na nyu ge mí naʔa nyu mà yala ga nì na To wi dá yo ná kan ge.»

Currently Selected:

JAN 12: NLK10

Highlight

Copy