HLIMI 43

Jakɔbe wí ma yereʔe na bì Bɛnjamɛ yaʔa wi kɛri

1Funŋu ki dáa beʔe na sye wa Kana klo ni le. 2Nyiŋi ga na pe da gâ akaba ka, á pi kɔ ba pe dá jɛ wa Ejipite klo ni le, Jakɔbe wɔ̀ɔ kí yo wi pii ma be mà yo: «Ye hrù wa nɛ ye ya akaba pà syɔ.»

3Juda wɔ̀ɔ yo: «Ki naŋa wi daʔá yo gbanʔa wo kan mà yo wò gá wò nya wí ni adi kí po wò conlo woò nyɛ wo nì ge. 4Ki kala na nàʔa po má biʔi ta bí wò conlo plɛn wo nì, pa wo gɛri bì yà akaba pà syɔ. 5Di nàʔa po mɛ ìn biʔi ta bùu plɛn wo nì, wòó wòo gɛri wa, mɛjɛn ki naŋa wi daʔá yo wo kan mà yo: ‹Wòó ní wiì nì wò je gá wò nya kí po wò conlo woò nyɛ wo nì ge.› » 6Israyɛli wɔ̀ɔ pé po: «Nyaʔa ma kan á ye ki tipeʔe ga hanri na na máʔà yo ki naŋa ma mâ yo yè conlo wà nyɛ naʔamɛ ge?» 7À poo po: «Ki naŋa wi dá wo yugu gbanʔa ceŋge wò pomo ní me ní wò heme woo pe pomo ní me mà yo: ‹Yè to wí nyɛ nyuwyeʔe na adi yo? Yè conlo wa nyɛ wa nɛ yo?› À wo krumahru kan ki yugumu mì bɛfu ma. Wo dá bìʔi cɛn mɛlɛ bí yo wí bi wo po: ‹Ye pan yè conlo ní we ge?› »

8Juda wɔ̀ɔ kí yo wi to Israyɛli ma we mà yo: «Ma pyɔ plɛn na ní, jango wo jɛ̀ wo kɛri wo nyuwyeʔe ta wò gá gu, mo ní wòó ní ní wo pii ní be. 9Mì wi mí ma na no kan bi dɔɔ kɔrɔsi ge. Ma baa wi yugu wa mì kyɛʔɛ ni. Nà mi ìn hru bì ban wí ni mà tanla, nà mi ìn ban wí ni ma bɔɔ nya nɛ, ki kapeʔe fwɔʔɔ ki kò na na su. 10Ali wó ma mo, ná kiì ban, ki dí bi bo wó ma kɛri kɛrihama syɛn mà hru mà pan.» 11Pe to Israyɛli wɔ̀ɔ pé po: «Paʔa gá bo banmɛ ge, yeʔe hanri ban. Ye klo li akmama pà kpe, ye kɛri pí ni ki naŋa kan we: Bome cɛnri nì, hrɛnʔɛ cɛnri ní adrajante nì, ní ladanumu nì, ní pisitase nì, ní amade pibi nì ba pí ma pe ge. 12Gbejanra da ti di glú mâ po ye ma ye ti nyoʔo syɛn kpe. Ye ti haʔa wa da na pe dí le wa yè kasyara ni de. Kana paʔa gban bì bo pe dá bunŋu mâ ti le wa ge. 13Ye yè conlo co ye hrù ye kɛri wa ki naŋa krugu we. 14Nyɛʔɛlɛ la Sye wì bɛfu fɔlɔ we liʔi hanri jango ki naŋa wi nyugara ta ye na wi Simenyo nì, ní Bɛnjamɛ yaʔa pe plɛ̀n ye nì pe pan. Na pii nà pe punŋu na ma ge, kòo bo na lafiʔimi. Ki in yala ki hanri ban.»

Josɛfu nì wi lɛɛ ní pé ma pè nya nɛ syɛnwoʔo na

15Ki nabii à pe jɛ mà nadanma yrɛbɛ kpe, ní gbejanra da nì pe dá le wa pe kasyara ni ti nyoʔo syɛn ní mà Bɛnjamɛ co mà kɛri Ejipite klo ni mà yâ pè tyɛʔɛ Josɛfu na we. 16Josɛfu wi gâ Bɛnjamɛ nya we, wɔ̀ɔ kí yo wi krɔʔɔ cofɔlɔ ma mà yo: «Ma ki nabii bee le be wa go ni, ma ajoʔo kà kpo mɛjɛn wó bi ba yaagbanʔa hro li pe ní teme na.»

17Ki naŋa wɔ̀ɔ kí hanri nɛ pa Josɛfu wi dá yo wiʔi hanri ge. Wɔ̀ɔ ki hɛɛn co mà kɛri pé ni Josɛfu wi go nî ge. 18Nyiŋi ga na pe da gâ pe co mâ kɛri pé ni wa Josɛfu wi go nî ge, à pe fya ceŋge mà naʔa nyu pè ma mà yo gbejanra da pe dá le wa wò kasyara ni kplɛʔɛ na, tiì kala li pé ma wo co na sye wo nì ge. Pé naʔa ca pé bi yà do wo na bì fyala bì wo co, wo krɛ̀ʔɛ̀ pe ŋkloolo bì wò sofɛnŋɛɛ plɛn kpo. 19À pe flo wa Josɛfu wi krɔʔɔ welefɔlɔ tanla we be goyɛʔɛ na mà yâ yo wí ni, 20mà yáa wi fɛn mà yo: «Maʔa yaʔa, wò fɔlɔ. Wo da glú mà pan naʔa fan mà bâ akaba syɔ. 21Nyiŋi ga na wo da gâ hru mâ kɛri wò deʔe na ge, ki yebliʔi ni wo ya wò kasyara nyɛʔɛ, wò bɛfu nigbe nigbe à wo gbejanra nya de wa ti no na nɛ pa wo dá akaba syɔ pomo ma na ge. Di wó ma hru mà pan tí ni nɛ. 22Wó ma pan gbejanra tà nì nɛ bì ba akaba pà syɔ. Wo ìn dàʔa cɛn hɛn ŋa wi wi dá gbejanra le wa wo kasyara ti noro ni de.» 23Wɔ̀ɔ pé po: «Ye yè lama fiʔi me. Yò gáa fyaʔa. Yè Nyɛʔɛlɛ liì li la yè to wi Nyɛʔɛlɛ le liì ma ki krɔʔɔ ga kan ye ma wa yè kasyara ni de. Yè gbejanra ti dá je ná na.»

Wɔ̀ɔ Simenyo yriri mà pan wí ni pé kan. 24Ki naŋa wɔ̀ɔ pé co mà je pé ni wa Josɛfu wi go nî mà nyumu kan pé ma, à pe pe cyeʔe jeʔe ge. Wi da ní mà nya ní wɛbɛ pà kan pe sofɛnŋɛɛ ma, à ke li kpo. 25Pe dáa pe nadanma yrɛbɛ hanri na pi kondo mà na Josɛfu wi pannyiŋi hanni yaagbanʔa na ge, mɛjɛn pe daʔa loʔó mà yo pé bi ba blɛn bì li wi ní teme na. 26Nyiŋi ga na Josɛfu wi gâ ba je wa go ni ge, nadanma yrɛbɛ ba pi dá bo pé ma wa pe kyɛrɛ̀ ni à pe pí kan wí ma mà na kunbiʔi kanni be wì tanla tra na de. 27Wɔ̀ɔ pe yugu pe wre gbanma kala ní le mà yo: «Ye da yè to ŋa kayoʔo yo ná kan mâ yo wí ma lɛ ceŋge, wí gbanŋa yo? Wí nyɛ nyuwyeʔe na adi yo?» 28À poo po: «Ma tungɔɔ ŋa wí nyɛ wò to we, wí nyɛ gbanŋa. Wí nyɛ nyuwyeʔe na kpo.»

À pe kpɔbu mà kunbiʔi kán wì tanla. 29Josɛfu wɔ̀ɔ wi yɛʔɛ̀ jrɛʔɛ ma Bɛnjamɛ nya ŋa wi conlo we, wɔ̀ɔ pé po: «Yè conlo ŋa ye dá wi kayoʔo yo na kân wiwi ŋa we yo?»

Wɔ̀ɔ yo nɛ: «Nyɛʔɛlɛ li ma haʔa, na pyɔ.» 30Josɛfu wɔ̀ɔ ki kon wreʔe, mɛjɛn wi conlo wi glanʔama mi dá bo wa wi dihon na ceŋge. Wɔ̀ɔ cori wí bi gbele. Wɔ̀ɔ je wa wi gopyɔ ni mà yáa gbele wa. 31Wi gâ wi yɛʔɛ̀ jeʔe kɔ, wɔ̀ɔ nyini mà bâ wì kpanŋi ma pyeri mà yo: «Yee hro kanʔa de.» 32À pe wi woro kan wi ma wì yɛ mà pe woro kan pe ma pè yɛ mà Ejipite klo woo bee pe dáa li pé ni pe woro kan pe ma pè yɛ, mɛjɛn Ejipite klo woo pe ìn dà bî gban bì blɛn bi li Ebruyee ní be teme na. Ki dá bo pee ma be furu kala li. 33Josɛfu wi lɛɛ ní wi cɛɛn ní pe da glɛ́n wa wi yɛʔɛ̀ ma mà tanli pè na mà yala pe lɛmɛ pomo ní. Pe dáa pè wele. Ki woʔo ga àʔa pé fo. 34Hro da ti dá bo wa Josɛfu wi tabali na wɔ̀ɔ tà tiʔibi pè na. Di Bɛnjamɛ wi woro ti dá wɛ pe tɔɔ woro na de wɛhama kɔgunnu. Pe dá jɔ fɔ pè bɛfu pe lama à mi fiʔi pé na.

Currently Selected:

HLIMI 43: NLK10

Highlight

Copy