HLIMI 44

Josɛfu wí ma wi lɛɛ po mà pe wele

1Josɛfu wɔ̀ɔ kí yo wi go ki krɔʔɔ welefɔlɔ má we mà yo: «Ma ki hɛɛn bee pe kasyara nyi akaba nì ba pee gban bí gbe ge. Ma pe gbejanra le pe kân wa pe kasyara ni de. 2Ma na ajɔlɔ kpe la gbejanra wolo le, ma li le wa tatunŋu wi kasyaʔa nî ge, wi syɔʔɔ gbejanra ní de.»

Wi krɔʔɔ welefɔlɔ wɔ̀ɔ kí hanri nɛ pa Josɛfu wi daʔá yo ge. 3Kpɛnmɛ mi gâ do, ki jɛfanʔa na, à pe ki hɛɛn yaʔa be, à pe kɛri pe sofɛnŋɛɛ ní ge. 4Pe da gâ nyini wa kàʔà ni kɔ, mà po pe ìn je no leʔe kpɛn, Josɛfu wɔ̀ɔ wi krɔʔɔ welefɔlɔ po: «Jɛ̀, ma pà pé na. Nà ma ya pé co, ma pe po: ‹Nyaʔa ma po yé ma tipeʔe tyɛʔɛ mâ kmaʔa fwɔʔɔ tón ge? 5Na fɔlɔ, woò na jo wa ki ajɔlɔ la liì ni yo mâ na kpɛndo kaʔa cɛnni ge? Ga yé ma hanri yé maʔa hanri tipeʔe dɛ.› »

6Krɔʔɔ welefɔlɔ wɔ̀ɔ fɛ mà kɛri mà yâ pe co mà ki kayoro yo de pe kân. 7À poo po: «Nyaʔa ma kan na fɔlɔ wɔ́ɔ na nyu banmɛ ge? Ma tungɔɔ poò ki ta bì ki kala la li nyoʔo hanri. 8Ali gbejanra da wo da yâ nya wa wo kasyara ti lama ni wa Kana klo ni le wo da hrú mà pan tí ni má kan. Paʔa bo mɛlɛ wo gbàn nɛ wo ba gbejanra di yoo, ná kiì ban, tɛ yu wa ma fɔlɔ wi go nî ge? 9Nà pe yraʔa kà nya hɛn wà ma ki woo wi kù, wòó wo tɔɔ fanna wo krɛ̀ʔɛ̀ na fɔlɔ wi ŋkloolo.» 10Krɔʔɔ welefɔlɔ wɔ̀ɔ pé po: «Kayocɛnŋɛ gi, mí bi ye co kayoro ni. Nà mi yraʔa kà nya hɛn ŋa ma ki woo pa wii bí grɛʔɛ na nklo, di yèé yè tɔɔ pa ye syɔ.»

11Pè bɛfu nigbe nigbe à pe na fyala mà na pe kasyara trigi tra na de mà na ti noro nyɛri de. 12Krɔʔɔ welefɔlɔ wɔ̀ɔ na pe yrɛbɛ crɛʔɛ na pi wele màʔa hli lagwɔ na fɔ mà báʔà tanʔa tatunŋu na we. Wɔ̀ɔ bâ ajɔlɔ nya le wa Bɛnjamɛ wi kasyaʔa kiì ni. 13À pe pe drere hlugu de, pè bɛfu nigbe nigbe, mà pe tuʔuru pwɔ de wa pe sofɛnŋɛɛ na mà hru mà kɛri nɛ wa kàʔà ge.

Juda wí ma yo jango bì Bɛnjamɛ syɔ we

14Juda nì wi cɛɛn ní à pe yâ je wa Josɛfu wi go nî ge. Wi dá bo wa adi. À pe to wì tanla tra na de. 15Josɛfu wɔ̀ɔ pé po: «Nyaʔa kala li la yé ma hanri ge? Ye ìn dàʔa cɛn yo mâ yo hɛn ŋa wí nyɛ nɛ pa domi nyɛ we, fanŋa nyɛ wí ma wi gbàn wi da kpɛndo kaʔa cɛnni ge yo?» 16Juda wɔ̀ɔ wí po: «Pa mi nyaʔa yo na fɔlɔ ma we? Mí bi da nyu pomo mimii na? Pa mi gban bì tanʔa kan wo ma mɛlɛ? Nyɛʔɛlɛ lí ma ma tungɔɔ nya pé ma tipeʔe hanri. Wòó be wó ma plɛn mà krɛʔɛ ma ŋkloolo màʔa plɛn ŋa nì pe dí ajɔlɔ nya wi ma ge.» 17Ki nyiŋi na Josɛfu wɔ̀ɔ yo: «Mi ìn biʔi ta bìʔi hanri banmɛ ge. Pe di yâ ajɔlɔ nya le hɛn ŋa ma wí bi grɛʔɛ na ŋklo, di yèé yè tɔɔ be yee sye nyimi na yè to krugu we.»

18Ki nyiŋi na Juda wɔ̀ɔ flo wa wì tanla mòo po: «Na fɔlɔ, ki yaʔa. Ma ma tungɔɔ yaʔa wi kayoʔo kà yo na fɔlɔ ma we. Mò gá lama gban ma tungɔɔ ní, mɛjɛn má nyɛ nɛ pa Farahon nyɛ we. 19Na fɔlɔ wi dá wi tungɔɔ yugu be mà yo: ‹Yè to wí nyɛ wa yo, ná kiì ban conlo wà nyɛ ye ma yo?› 20À woʔo yo na fɔlɔ ma mà yo wò to wí ma lɛ ceŋge. Wò conlo tatunŋu wí nyɛ wa ŋa wò to wi lɛmɛ pyɔ we. Wò conlo wi lɛɛ wi dá gu. Wi no wi dá pii bee he, wiì nigbe ma koro kpo wí na wi to glanʔa we ceŋge. 21Mo ma daʔá yo mà yo: ‹Ye pan wí ni ná kan bì bɔɔ nya na nyɛʔɛ ní ge.› 22À woʔo yo na fɔlɔ kan mà yo ki nabiple la lòo gban bì jɛ be li to tanla we. Ná li jɛ be wì tanla li to pɔɔ gu. 23À maʔa yo ma tungɔɔ ma be mà yo: ‹Yè conlo nà wi ìn blɛn yè nì bì ban, mì nì yèé ní be wo yɛrɛ tò ga ba tì na.› 24Wo ga gɛ̀ri wò to krugu ŋa ma tungɔɔ we ŋa wí nyɛ na to we. À wo yâ na fɔlɔ wi kayoro tì bɛfu yo wí kan. 25Wò to wɔ̀ɔ yo: ‹Ye hrù ye kɛri ye ya akaba pà syɔ nɛ cɛnri.› 26À wo yo: ‹Wòo gban bì hru wa, di nàʔa po wò conlo tatunŋu wí nyɛ wo nì, pa wo hru wa, mɛjɛn kì ìn yala wo yɛrɛ ti ya ba ti na ki naŋa nì we, nà ki ìn bo wò conlo tatunŋu wí nyɛ wo nì ge.› 27Wò to ŋa wí nyɛ ma tungɔɔ we, wɔ̀ɔ wo po: ‹Yé maʔa cɛn mà yo na cɔ wi dá he ná kan nabipiʔi syɛn. 28À nigbe ma jɛ nɛ na deʔe na mà kɛri. Mí naʔa honri yraʔa kà bi bo kí moo kpe mòo konʔolo wi na, mɛjɛn mà kpe ki nyiŋi na mi ìn joo nya fɔ mà bâ no ŋaŋa na. 29Nà ye ní bi ŋa co bì gɛri wí ni, nà yraʔa kà bi yɔɔ ta tipeʔe, pa ye na kân bì gu na yufiʔi nì bì gɛri kayaga nì wa kuu kaʔa ni ge.›

30Ŋaŋa ni, nà mi hru bì gɛri ma tungɔɔ krugu ŋa na to we, nabiple nà li ìn bo ná ni, pe nyuwyeʔe kí ma pwɔ ki na pomo ma na, 31nòo yaʔa nya nabiple la loò nyɛ ná ní, pɔɔ gu. Paʔa bo ma tungɔɔ pé ma kan ma tungɔɔ wɔ̀ɔ ku wi yufiʔi nì mà kɛri kuu kaʔa ni kayaga nì. 32Mɛjɛn ma tungɔɔ wi dá ki woʔo ga yo màʔa pa wì na pyɔ wi namyɛʔɛ na ge. Wɔ̀ɔ kí yo wi to ma mà yo: ‹Nà mi ìn ban wí ni má kan, bì bo ma ma tipeʔe hanrifɔlɔ su, na to.› 33Ki tɔ na, mí na ma fɛn: Domi ŋa ma tungɔɔ bi go naʔa pyɔ wi nolo ni nɛ pa na fɔlɔ wi ŋklo nyɛ we, jango nabiple li hrù li plɛ̀n li kɛri li lɛɛ ní be. 34Pa miʔi po mɛlɛ bì hru bì gɛri na to krugu, kí po ki pyɔ ŋa woò nyɛ ná ni ge? E, ki ìn yala na nyɛʔɛ ke cɔlɔʔɔ ga nya kpo kí bi na to ta we ge.»

Currently Selected:

HLIMI 44: NLK10

Highlight

Copy