HLIMI 39

Josɛfu wí nyɛ wa Ejipite klo woo naŋa Potifari deʔe na

1À pe Josɛfu co mà kɛri wí ni Ejipite klo ni. Ejipite klo woo naŋa ŋa pé na yeri Potifari wi dá bo Farahon wi honribaa wi kaso go welefɛɛ pe lagwɔ we wɔ̀ɔ yɔ́ɔ̀ syɔ Isimayɛli kluʔu woo ma bee pe da gɛrí wí ni ge. 2Bajegɔ Nyɛʔɛlɛ li dá bo wí ni. Yrɛbɛ à pi na noʔo wi kyɛʔɛ na. Wi dáa gori wa wi kafɔlɔ Ejipite klo woo naŋa wi go kiì ni. 3Wi kafɔlɔ wɔ̀ɔ ki cɛn mâ yo Bajegɔ Nyɛʔɛlɛ lí nyɛ wí ni. Yraʔa kì bɛfu ga wí bi da hanri ki na no wi kyɛʔɛ na. 4Josɛfu wi kafɔlɔ wɔ̀ɔ kmaʔa hanri wí na mà wi go ki kundiʔiri kan de wì ma mòo tɛnŋɛ wi masaʔa ki yugu na wi kyɛʔɛ yrɛbɛ pi bɛfu ní 5Potifari wi da gɔ́ɔ̀ tɛnŋɛ wi go ki yugu na ní wi kyɛʔɛ yrɛbɛ pì bɛfu ní, Bajegɔ Nyɛʔɛlɛ à li frɛmɛ pa ki Ejipite klo woo naŋa wi go na mà na wi kyɛʔɛ yrɛbɛ nyɛʔɛ be ceŋge, go wobo ní, ní wi kere wobo ní be. 6Wi kyɛʔɛ yrɛbɛ pì bɛfu wi da pí kan Josɛfu wiì ma. Wi ìn dàá yraʔa kà hanri fɔ mà gâ laʔa wi hro limi na.

Josɛfu nì, ní wi kundiʔi wi cɔ nì

Àʔa hin bo Josɛfu wi dá bo najɛkmaʔa ceŋge. 7Ki kaʔa ke kruʔu ma, Josɛfu wi kafɔlɔ wi cɔ wɔ̀ɔ wi nyɛʔɛ kan wí na mòo wele mà yo: «Ta ban ma ba syɛn ná ni.» 8Wɔ̀ɔ kí ce màʔa yo wi kafɔlɔ wi cɔ ma mà yo: «Welé, domi pa mì gâ bo naʔa kɔ go ni ge, na kafɔlɔ woò na yraʔa kà hanri adi. Wí ma wi kyɛʔɛ yrɛbɛ pì bɛfu le na kyɛʔɛ ni. 9Hɛn wà wo naʔa ki go ga ni bì bo wi kpɔʔɔ mà toro domi na we. Woò na ceʔe ná ma yraʔa kà na fɔ mo nigbe, mɛjɛn má nyɛ wi cɔ. Paʔa bo mɛlɛ bí gban bí ki tipeʔe ga ki nyoʔo hanri bí kapeʔe hanri Nyɛʔɛlɛ na le?»

10Cɛlɛ wi dáa ki kayoʔo nyu Josɛfu nì we su wlɛrɛ tì bɛfu na, di Josɛfu wi ìn loʔo wí ma ga wi dáa nyu ge. Wi ìn ki ta bì go wi ní teme na bùu ta cɛlɛ.

11Wlɛʔɛ kà na wɔ̀ɔ bâ je wa go ni jango bì wi tunŋu kɔ ge. Go hɛɛn wà nigbe ìn dà bo wa. 12Cɛlɛ wɔ̀ɔ wí co dreʔe na mòo po: «Ma syɛ̀n ná ni!» Josɛfu wɔ̀ɔ dreʔe fara màʔa yaʔa wa cɛlɛ wi kyɛʔɛ ni mà fɛ mà nyini dala na. 13Cɛlɛ wi gáʔà nya wí fɛ mâ dreʔe yaʔa wa wì ma kyɛʔɛ ni mâ nyini dala na le, 14Wɔ̀ɔ wi go woo yeri be mà báʔà yo pé kan mà yo: «Ye wèlé, wí ma pan wo kan Ebruyee woo wà nì, wi baa hre wo nì. Wí pan mà yo wí bi syɛn ná ni. À miʔi hli mà na taʔara gbanʔa ceŋge. 15Nyiŋi ga na wi gáʔà nya mí ma na akpolo jrɛʔɛ namuru ni mà na taʔara gbanʔa, wɔ̀ɔ fɛ mà wi drere yaʔa be nà tanla mà nyini dala na.»

16Wi dá Josɛfu wi drere tyɛʔɛ wì tanla fɔ wi kafɔlɔ wi pannyiŋi na wa go ni. 17Ki kruʔu ma wɔ̀ɔ kí yo wí ma mà yo: «Ma ŋklo ŋa Ebruyee woo wi dí ban nà krugu mà yo wí bi da hre ná ni. 18Pa mi gâ na akpolo jrɛʔɛ mâ taʔara gbanʔa, wɔ̀ɔ fɛ mà wi drere yaʔa be nà tanla mà nyini dala na.»

19Ki kruʔu ma pɔɔ gâ ki kayoro loʔo wi cɔ ma we, wiì ŋa wi daʔá yo ma yo: Welé ga ma ŋklo wi hanri ná na kiì ga ge. 20Josɛfu wi kafɔlɔ wi lama à mi gban wi na ceŋge. Wɔ̀ɔ wi wa wa kaso nî wa deʔe ga na klo fɔlɔ wi kasofɛɛ pe dáa gori tonmoo ge.

Pé ma Josɛfu le kaso nî

Josɛfu wɔ̀ɔ ko wa kaso nî. 21Bajegɔ Nyɛʔɛlɛ li dá bo Josɛfu nì, à liʔi hanri, wɔ̀ɔ na kaso lagwɔ glanʔa ceŋge. 22Kaso go lagwɔ wɔ̀ɔ wi tɛnŋɛ wi po kaso fɛɛ pè bɛfu pe lagwɔ. Bee pe dá bo wa kaso ni we, yraʔa kì bɛfu ga pe dáa hanri, à pe naʔa nyu wiì kan. 23Kaso go lagwɔ wi ìn daa kɔrɔsi cun yraʔa kà fyɛn na ba pi dá bo wa Josɛfu wi kyɛʔɛ ni ge, mɛjɛn Bajegɔ Nyɛʔɛlɛ li dá bo wí ni. À li na kì bɛfu noʔo wí kan ga wi dáa hanri ge.

Currently Selected:

HLIMI 39: NLK10

Highlight

Copy