HLIMI 38

Juda nì Tamari nì

1Ki nyiŋi na, Juda wɔ̀ɔ jɛ ma wi to wi najɛɛ pe tɔɔ yaʔa be we ki deʔe na mà kɛri Adulamu kàʔà naŋa wà krugu ŋa pé na yeri Ira. 2Be ki deʔe na Juda wɔ̀ɔ yâ Kana klo woo naŋa wa picɛ nya ŋa pé na yeri Syuwa. Wɔ̀ɔ wí kpe wi cɔ mà ko wi ní teme na. 3Wɔ̀ɔ acɛnlɛ ta mà nabii he mà noo yeri Ɛri. 4Wɔ̀ɔ acɛnlɛ là ta nɛ mà nabii wà he mà noo yeri Ona. 5Wɔ̀ɔ bâ nabii wà he nɛ mà noo yeri Syela. Ki pyɔ wi henyiŋi na Juda wi dá bo wa deʔe ga na pé na yeri Kesibe ge.

6Juda wɔ̀ɔ bâ cɛlɛ wa ca wi pikplɛɛ Ɛri kan we. Ki cɔ à pe noo yeri Tamari. 7Juda wi pikplɛɛ Ɛri wi dá bo hɛnpee Bajegɔ Nyɛʔɛlɛ li yɛʔɛ̀ na ge. À luu kpo. 8Ki kala na Juda wɔ̀ɔ kí yo Ona ma mà yo: «Ma ma lɛ cɔ kpe we, mɛjɛn má nyɛ wi pɔlɔ conlo, ma kluʔu he ma lɛ kan we.»

9Ona pɔɔ daʔa cɛ́n mà yo ki kluʔu ki ìn bi baa jun wi woʔo, ki kala na, nà pe kpoʔolo teme na wi lɛ cɔ ní we, wi na bâ wi nama fara kí na wo tra na, jango wò gá kluʔu kà he wi lɛ kan we. 10Ga wi dáa hanri ki dá Bajegɔ Nyɛʔɛlɛ bɛn le. À li wiì kpo we kpo. 11Ki kala na Juda wɔ̀ɔ kí yo wi najɛ cɔ Tamari ma we mà yo: «Maa sye ma to go ni, ma ya glɛn wa nɛ pa kucɔ nyɛ fɔ na pyɔ Syela wi ba lɛ.»

Wi dáa ki nyu ban, mɛjɛn wi dáa fyaʔa mà yo wí gà gu wi ma nɛ pa wi lɛɛ nyɛ be. Tamari wɔ̀ɔ yâ go wa wi to go nî ge.

12Nyiŋi kà da gâ doro kɔ, Syuwa wi picɛ wɔ̀ɔ ku, ŋa Juda wi cɔ we. Pe gá Juda fɛn, wi lama à mi fiʔi nyiŋi ga na, wɔ̀ɔ jɛ mà kɛri bì yà wi mbara yujoro konlofɛɛ wele, wiì nì wi nagoro Ira nì ŋa Adulamu kàʔà woo we wa Timina ni. 13À pe yáʔà yo Tamari ma mà yo: Welé, ma pɔlɔ to wí na sye Timina ni bì yà wi mbara ti yujoro konlo de 14Ki nyiŋi na wɔ̀ɔ wi kucara kpasyoro haʔala de wì na mà kpasyofiri kpe mà wì fo tí ni mà kɛri mà yâ glɛn wa Enayimu goyɛʔɛ na, ga ki dá bo wa Timina klòʔò na ge. Mɛjɛn wi daʔá nya Syela wí ma lɛ, di pe ìn wi kân wí ma wi krɛ̀ʔɛ̀ wi pɔlɔ. 15Juda wi da gɔ́ɔ̀ nya, wɔ̀ɔ kí nya nɛɛ cɛɛ bee pé na lefama hanri pee wà wi, mɛjɛn wi dá wi yɛʔɛ̀ tòn ge. 16Wɔ̀ɔ flo wa wì tanla kloʔò na mòo po: «Maʔa yaʔa bì go ma ní.» Mɛjɛn wi ìn dàʔa cɛn bì yo wi najɛ cɔ wiì wi. Wɔ̀ɔ wí po: «Má bi nyaʔa kan ná ma bí go na ní ge?» 17Juda wɔ̀ɔ wí po: «Mí bi na ŋkaple là fara wa na ŋkaa ni be bì li troʔo naʔa má ma.»

Cɛlɛ wɔ̀ɔ wí po: «Ma jɛnlɛ kan ná ma, sanni má bi li troʔo ná kan ge.» 18Wɔ̀ɔ wí po: «Pa mi nyaʔa jɛnlɛ kan má ma?»

Cɛlɛ wɔ̀ɔ wí po: «Ma ma yele yraʔa kan ná ma ní ki maʔala nì, ní ma kangandanʔala ní le.»

Wɔ̀ɔ pí kan wí ma. Ki kruʔu ma wi gâ go wi ní,cɛlɛ wɔ̀ɔ acɛnlɛ ta wí ma. 19Ki kruʔu ma, cɛlɛ wɔ̀ɔ jɛ mà kɛri mà yâ wi kpasyofiri haʔala de wi na mà wi kucara woro tiì pwɔ wì na. 20Juda wɔ̀ɔ yâ ŋkaple kan wi nagoro Adulamu kàʔà woo ma we, jango wi ya yrɛbɛ ba kpe wi dá gan cɛlɛ ma wi nofele konnyiŋi na ge. Di ki woo wi ìn yà cɛlɛ nya be. 21Wɔ̀ɔ ki deʔe hɛɛn yugu be mà yo: «Ki cɛlefaʔa ga kí na kori naʔamɛ Enayimu ni kloʔò na, kí ma le hanbe si?» À poo po: «Cɛlefaʔa kɛ̀ ìn dì glu bì da gori naʔamɛ ge.»

22Wɔ̀ɔ hru mà kɛri Juda krugu mà yɔ́ɔ̀ po: «Mi ìn yɔ̀ɔ nya wa. Ali ki deʔe hɛɛn pé ma na po: Cɛlefaʔa kɛ̀ ìn dì glu bì da gori naʔamɛ ge.»

23Juda wɔ̀ɔ yo: «Ga kí nyɛ wí ma ki kò wì ma. Wò gáa wò cɛrɛ. Welé, mí ma ŋkaple troʔo wa wi ma, di mì ìn yɔ̀ɔ nya wa.»

24Yere tanri da gâ doro kɔ, à pe báʔà yo Juda kan mà yo: «Ma najɛ cɔ Tamari wí ma lefama hanri. Ali ki lefama mi hranma kruʔu ma wí ma acɛnlɛ ta.» Ki nyiŋi na Juda wɔ̀ɔ yo: «Yoo cò, ye nyini wí ni, ye yɔɔ hògó.»

25Pa pe da gɔ́ɔ̀ co na nyini wí ni, wɔ̀ɔ tunmu troʔo wi pɔlɔ to kan mà yo pe yɔɔ po: «Naŋa ŋa yrɛbɛ bi ba be, mí ma acɛnlɛ ta wiì ma. Mí na ma fɛn, maʔa cɛn hɛn yele yraʔa gi ga, ní ki maʔala nì, ní kanganla ní le.»

26Juda wɔ̀ɔ ki yrɛbɛ cɛn be mà yo: «Wí nyɛ sinŋi mà toro mì na we, mɛjɛn mi ìn wi kân na najɛ Syela ma we.»

Wi ìn gà ní bì go wi ní adi.

27Wi henyiŋi ki da gâ dyɛʔɛ kɔ, à peʔe nya piŋaa bɛ pé nyɛ wa wi lama ni me. 28Pe henyiŋi na, pyɔ à wà ma klu mà wi kyɛʔɛ yrigi. Cɛɛ hefɔlɔ wɔ̀ɔ jese nyɛɛ pwɔ pyɔ wi kyɛʔɛ na mà yo: «Ki woo ŋa wiì bi glu bì nyini.»

29Di wɔ̀ɔ gâ wi kyɛʔɛ nuŋuʔu mà wi nibo yaʔa, wɔ̀ɔ nyini. Cɛɛ hefɔlɔ wɔ̀ɔ yo: «Nyaʔa konlo li ma ma fara ge!»

À pe wi yele kan mà noo yeri Pɛrɛsi. 30Ki kruʔu ma à pe na wi tɔ he ŋa wi dá bo jese nyɛɛ nì pwɔɔ kyɛʔɛ na. À pe yele kan wí na mà noo yeri Sera.

Currently Selected:

HLIMI 38: NLK10

Highlight

Copy