YouVersion Logo
Search Icon

PITUNBEE 23

23
1Pɔli wɔ̀ɔ wi nyɛʔɛ kán ge lagwɔɔ pe kpoʔolomo woo na be mà yo: «Na woolo, na dihon wì bɛfu wí naʔa teri ná na mà yo na kahranʔa ké nyɛ singee su Nyɛʔɛlɛ li yɛʔɛ̀ na ge fɔ mà bâ no alaʔa na ge.» 2Sraʔá farafɔlɔ kpangbanŋa Ananyasi wɔ̀ɔ kí yo hɛɛn bee ma pe dá bo be Pɔli tanla we ge mà yo poo kmo wa no na ge. 3Ki nyiŋi na ge, Pɔli wɔ̀ɔ wí po: «Mo gunjlefligiʔi mà haʔa na, Nyɛʔɛlɛ lí bi ma kmo. Mo má ma klɛn naʔamɛ ge mà na na ple Nyɛʔɛlɛ li kayoro tiì nì. Di má na Nyɛʔɛlɛ li kayoro cɔʔɔ de mâ yo pe na kmó ge.»#23:3 ma wèle wa Mat 23:27-28 ni wè. 4Bee pe dá bo be Pɔli tanla we à pe yo: «Má na Nyɛʔɛlɛ li sràʔá farafɔlɔ kpangbanŋa teri we kɛ?» 5Pɔli wɔ̀ɔ yo: «Na woolo, mi ìn dìʔi cɛn bì yo sraʔá farafɔlɔ kpangbanŋa wiì wi. Mɛjɛn kí nyɛ wa nyoŋoʔo mà yo: ‹Mò gá kayopeʔe yo ma klo woo pe lagwɔ kân we.› »#23:5 ma wèle wa Nyi 22:27 ni wè.
6Pɔli pɔɔ gáʔà cɛn mâ yo ki kpoʔolomo mi namyɛʔɛ kà nyɛ Saduseyee, à kà ma po Farisiyee ge, wɔ̀ɔ na taʔara wa lagwɔɔ pe kpoʔolomo woo pe nulala ni le mà yo: «Na woolo, mì we mí nyɛ Farisi mà nì mà po Farisiyee pyɔ. Pa mí ma pa kuu pe nyɛmanyinimi kayoʔo na ge, kiì ma kan á pe na na ple ge.»#23:6 ma wèle wa Pit 26:5; Kɔl 3:5 ni wè. 7Wi gáa ki woʔo ga nyu ge, àʔa krɛʔɛ kakara Farisiyee ní Saduseyee pe kpafoʔo ni ge. À kiì ma kan janma hɛɛn pe kayoro à ti kon tì yɛ, tì yɛ. 8Mɛjɛn Saduseyee pee pé yo: Kuu pe nyɛmanyinimi wò wa. Mlɛŋɛyee wò wa. Nyìgée wò wa. Di Farisiyee pee be à pe pa ki woʔo kì bɛfu na mà yo kí nyɛ wa.#23:8 ma wèle wa Mat 22:23; Mar 12:18; Luk 20:27 ni wè. 9À taʔaraʔa kà ma jɛ gbanʔa. Farisiyee pe Furu sɛbɛ cɛnfɛɛ à pèè ma jɛ mà kakara wa ki woo ní be gbanʔa ceŋge mà gâ yo: «Wo ìn tipeʔe kala là nya ki naŋa ŋa na we. Kana nyìli là dà yo wí ni, ná kiì ban, paʔa bo mlɛŋɛ wà dà yo wí ni cɔ.»
10Pa kakara ti da gâ gbɔʔɔ ceŋge ge, sorasiyee pe lagwɔ kpangbanŋa wɔ̀ɔ fya mà yo hɛɛn pé gà Pɔli kle we bùu hlugu pè ma. Wɔ̀ɔ sorasiyee po pe yɔɔ cò be janma hɛɛn pe nulala ni le, poo le wa sorasiyee pe korohaʔa deʔe na ge.
11Ki kpɛntoʔo yebliʔi ni ge, wò fɔlɔ wɔ̀ɔ pan Pɔli krugu mà bɔ́ɔ̀ po: «Dihon le mà nî, mɛjɛn má ma yo na namyɛʔɛ na ge naʔa Jerusalɛmu kàʔà ni pomo ma na ge, kí ma yala ma ya ki nyoʔo hanri wa Hrɔmu kàʔà ni ge kpo.»
Juwifiyee pé naʔa ca bì Pɔli kpo we
12Ki kpɛntoʔo na ge, Juwifiyee à pèè ma pè nya mà dɛnbɛrɛ kon mà klanʔa na mà yo nà pe ìn jé Pɔli kpo we ge, pe ìn bi li, pe ìn bi jɔ. 13Ki dɛnbɛrɛ konfɛɛ pe dá wɛ hɛɛn too syɛn na we. 14Ki woo à pe kɛri sraʔá farafɔlɔ kpangbanŋa ní, ní kpoʔolomo lagwɔɔ krugu be mà yáʔà yo pé ma mà yo: «Wó ma klanʔa na gbanʔa mà yo: Nà wo ìn jé Pɔli kpo we ge, wo ìn bi li. 15Ki tɔ na ge, yèé ní lagwɔɔ pe kpoʔolomo woo pe tɔɔ ní be ye yaʔa yo sorasiyee pe lagwɔ ma we, yoo po wi pan Pɔli nì we ye kan. Ki kò nɛɛ yé bi ba wi kala hanri le bì li cɛn kmaʔa bì doro kplɛʔɛ na ge. Sanni wí bi no naʔa ye na ge, wòó be, paʔa bo wó ma kondo mà yaʔa kɔ, pà woo kpo.»
16À Pɔli wi jɔ pyɔ ma ki dɛnbɛrɛ kayoʔo ga loʔo ge. Wɔ̀ɔ kɛri sorasiyee pe korohaʔa deʔe na ge mà yâ je wa màʔa yo Pɔli kan we. 17Pɔli wɔ̀ɔ sorasiyee lagwɔ wà yeri mà bâ ki woo po we: «Ki najɛpii ŋa we wí ma cori wí bi kayoʔo kà yo sorasiyee pe lagwɔ kpangbanŋa ma we. Ta sye wa wi ní wì krugu.» 18Ki woo wɔ̀ɔ kɛri wí ni sorasiyee pe lagwɔ kpangbanŋa krugu we mà yɔ́ɔ̀ po: «Kaso fɔlɔ Pɔli we, wí ma na yeri mà na po bì ban ki najɛpii ŋa nì we ma kân. Kayoʔo kà nyɛ wa wi ma. Wí biʔi yo má kan.» 19Sorasiyee pe lagwɔ kpangbanŋa wɔ̀ɔ ki najɛpii co kyɛʔɛ na mà nyini wí ni namyɛlɛ na mòo yugu mà yo: «Má ma cori má bi nyaʔa yo ná kan?»
20Wɔ̀ɔ wí po: «Juwifiyee pé ma yo mà flinʔi na mà yo pé bi ba ma nyɛri bì yo, kpɛndo ni we, ma kɛri Pɔli nì we lagwɔɔ pe kpoʔolomo woo pe deʔe na ge. Pé maʔa hanri pa maʔa nya nɛɛ pé yà wi kala hanri le bì li cɛn kmaʔa bì doro kplɛʔɛ na ge. 21Di mò ga loʔó pé ma, mɛjɛn pe hɛɛn pèè bi ba bo wa hrahaʔa kloʔò tanla bì da Pɔli hanni we wa jango bùu kpo. Ki hɛɛnpé ma wɛ hɛɛn too syɛn na we. Pé ma klanʔa na mà yo, nà pe ìn jé Pɔli kpo we, pe ìn bi li, pe ìn bi jɔ. Ki tɔ na ge, pé ma pè kondo mà yaʔa mà na ma kayoyoʔo kiì hanni dron.»
22Sorasiyee pe lagwɔ kpangbanŋa wɔ̀ɔ najɛpii po we: «Mò gá kà yo hɛn wà ma bí yo má ma ki kayoʔo ga yo na kân ge. Ki kruʔu ma, wɔ̀ɔ najɛpii po wii sye.»
Pɔli wi troʔomo klo fɔlɔ Felikisi ma
23Ki nyiŋi na ge, sorasiyee pe lagwɔ kpangbanŋa wɔ̀ɔ sorasiyee lagwɔɔ pèè yeri hɛɛn syɛn mà yo: «Ye sorasiyee saakere fara pe kondó pe yaʔa ní syongida luʔufɛɛ too tanri ní kprɔʔɔ nì, ní cogoo wafɛɛ saakere ní, jango hɛɛn syɛnnyiŋi na pe kɛri Sesare kàʔà ni ge. 24Wɔ̀ɔ yo: Ye syongidayee pèè hanri ye yaʔa Pɔli kan we kpo, wi luʔu pé na, jango ye gbàn ye kɛri wí ni nyimi na klo fɔlɔ Felikisi krugu we.» 25Wɔ̀ɔ sɛbɛ wà nyoŋo mà yo:
26Klo fɔlɔ kmaa Felikisi, mì Klode Lisyasi we, mí na ma syeri. 27Juwifiyee pe dá ki naŋa ŋa co we. Wɔ̀ɔ na cɛn bì gu wa pe kyɛrɛ̀ ni de. Di pa mi gáʔà cɛn mâ yo Hrɔmu woo wi wí ni ge, à mi kɛri sorasiyee ní be mà yɔ́ɔ̀ syɔ pé ma. 28Pe dáa gon wí ni kala la na ge pa mi dá jori bì li kɔ̀rɔ́ cɛn we kmaʔa, à mi kɛri wí ni lagwɔɔ pe kpoʔolomo woo pe deʔe na ge. 29À mi yáʔà nya pé na kon wí ni pe kalɛʔɛ kakara namyɛʔɛ kà na. Di kala la li în gan pé na hɛn kpo ge, ná kiì ban, móò le kaso nî ge, à miʔi nya wi ìn là hanri. 30Ki ga bâ yo ná kan mâ yo Juwifiyee pèè ma dɛnbɛrɛ le wí na ge, ki nyidege na ge, à mi in wi troʔo wa ma ma màʔa yo bee ma pé ma baʔa wi na ge mà yo pe da sye pe ya ki kayoʔo yo ge ma yɛʔɛ̀ na ga na pe na bàʔa a wi na ge.
31Sorasiyee à pe kɛri Pɔli nì we yebliʔi ni fɔ Antipatrise kàʔà ni ge nɛ pa ki dá yo pé kan pomo ma na ge. 32Ki kpɛntoʔo na ge, sorasiyee bee pe dá bo na tanri tra na de, à pe syongida luʔufɛɛ pee yaʔa, à pe kɛri Pɔli nì we. Pee tra fɛɛ be, à pe hru mà kɛri pe korohaʔa na ge. 33Syongida fɛɛ pe yâ je wa Sesare kàʔà ni ge, à pe sɛbɛ kan klo fɔlɔ ma we mà Pɔli tyɛʔɛ wì na. 34Klo fɔlɔ wi gâ ki sɛbɛ yo nyiŋi ga na ge, wɔ̀ɔ Pɔli yugu klo la woo wí wí ni ge. Pɔɔ gáʔà loʔo mâ yo Silisi klo woo wí ge, wɔ̀ɔ wí po: 35«Bee pé ma baʔa ma na, nà pe gá ban nyiŋi ga na ge, pa mi ba loʔo má ma.» Ki kruʔu ma, wɔ̀ɔ yo pe yɔɔ yaʔa wa Erɔde wi masaʔa go nî ge, pe da welé wí na.

Currently Selected:

PITUNBEE 23: NLK10

Highlight

Share

Copy

None

Want to have your highlights saved across all your devices? Sign up or sign in