PITUNBEE 22

1«Na woo ní na tee ní, ŋaŋa ni ge, mí bi na woʔo yo ge ye ma.» 2Yeʔe lòʔó ná ma. Pa pe gɔ́ɔ̀ nya wí na nyu pé ni Juwifiyee hɛnrɛ ni de, à pe pyeri mà toro kplɛʔɛ woʔo na ge. Pɔli wɔ̀ɔ yo:

3«Do mì we mí nyɛ Juwifiyee woo. Pe da ná he wa Tarisi kàʔà kiì ni Silisi klo ni le. Di mí ma lɛ naʔa Jerusalɛmu kàʔà kiì ni. Gamalyɛli#22:3 Gamalyɛli Wi dá bo Juwifiyée pe krɛʔɛfɔlɔ kpangbanŋa wà wi. Wɔ̀ɔ ní mà po nɛ pe kpoʔolomo woo wà, ma pe na yeri Sanhedrɛn ge. Wiì wi wi da Pɔli krɛʔɛ. wi dá bo na krɛʔɛfɔlɔ mà na ploʔo kmaʔa wò tokpɔɔ pe kayoro ní de. Na dihon wì bɛfu wi da glɛ́n mà Nyɛʔɛlɛ liì kan nɛ pa yèé yè bɛfu yè dihon wí nyɛ lí kan pomo ma na alaʔa nî ge.#22:3 ma wèle wa Pit 5:34-39 ni wè. 4Mi dá bo na ki kloʔò ga ki hɛɛn cɔlɔ be ceŋge fɔ mà na pèè kpun na ki nabii ní cɛɛ pun be na pe wa kaso nî.#22:4-5 ma wèle wa Pit 8:3; 26:9-11 ni wè. 5Sraʔá farafɛɛ pe lagwɔɔ ní, ní lagwɔɔ pe kpoʔolomo woo pè bɛfu ní pé nyɛ ki cɛnmɛ ni mâ yo ga mí na nyu kayocɛnŋɛ gi ge. Ali pee pe da ná kan sɛbɛɛ ní wò woo Juwifiyee bee kan pé nyɛ wa Damasi kàʔà ni ge. À mi kɛri wa ki kàʔà ni ge bì yàá ki kloʔò ga ki woo pun be bì da ban pé ni naʔa Jerusalɛmu kàʔà ni ge, jango pe baa pe cɔlɔ.

Pɔli wí ma wi pama kayoʔo yo

6Nyiŋi ga na mi da gáa sye kloʔò ni ge mâ na nori wa Damasi kàʔà tanla ge, ki ní yaagbanʔa na, na kacɛnlɛ à paʔama kpangbanma mà ma jɛ wa namuru ni de mà bâ na kɛli. 7À mi to tra na de mà ákpolo là loʔo. À li ná po: ‹Sɔli, Sɔli, nyaʔa ma po má na na cɔlɔ ge?› 8Do mì à mi yo: ‹Han wi má ni, na fɔlɔ?› Ki woo wɔ̀ɔ ná po: ‹Mì wi Jesu Nasarɛti kàʔà woo we, ŋa mo má na cɔlɔ ge.› 9Bee pe dá bo ná ni ge, à pe ki paʔama nya me, di ŋa wi dáa nyu ná ni ge, pe ìn wi kayoyoʔo loʔo ge. 10Ki nyiŋi na, à mi yo: ‹Na fɔlɔ, bì nyaʔa po sin?› Wò fɔlɔ wɔ̀ɔ ná po: ‹Ma jɛ̀ maa sye Damasi kàʔà ni ge. Nyɛʔɛlɛ lí ma cori má ga hanri ge, pé yà kì bɛfu yo wa ma kân.› 11Paʔama pa mi da gâ na funŋu, mi ìn da nyaʔa adi ge, na plɛnfɛɛ à pe ná co kyɛʔɛ na mà yâ je wa na ní Damasi kàʔà ni ge.

12Naŋa wà dà bo wa ki kàʔà ni pe dáa wi yeri Ananyasi. Wi dá bo na Nyɛʔɛlɛ fyaʔa le ceŋge mà na li kayoro tanri de kmaʔa. Damasi kàʔà Juwifiyee pè bɛfu pe dá bo na wi yegmala yeri. 13Wɔ̀ɔ pan be na deʔe na ge mà bâ yere be nà tanla màʔa yo ná ma mà yo: ‹Sɔli, na woo, ma nyɛʔɛ ke nyɛ̀ʔɛ́ má na.› Ki nyidege na ge, na nyɛʔɛ à ke nyɛʔɛ ná na. À muu nya. 14Wɔ̀ɔ yo: ‹Wò tee pe Nyɛʔɛlɛ le lí ma ma fara mà yo ma li nadanma cɛn me ma li Lesinŋi nya we ma wi notaʔa kayoro tà loʔo. 15Mɛjɛn má bi ba wi kaʔa jari ge hɛɛn pè bɛfu pe yɛʔɛ̀ na gee má ma nya mâ loʔo ge. 16Ki tɔ na ge, má na nyaʔa hanni adi? Jɛ̀ ma mà kân pe ma batise. Ma kapere ti jèʔé ti làʔá má na. Ma da wò fɔlɔ wi yele yeri le.›

Pɔli wí ma wi tunmu klòʔo ke tɔɔ hɛɛn ma kayoʔo yo

17Mi gâ hru mâ kɛri Jerusalɛmu kàʔà ni ge, nyiŋi ga na mi gâ bo wa sraʔá go ni mâ na Nyɛʔɛlɛ nyɛri le, à mi gâ bo nɛɛ mí na ŋolo. 18À mi wò fɔlɔ nya we. Wɔ̀ɔ kí yo ná ma mà yo: ‹Ma fyala ma nyini wa Jerusalɛmu kàʔà ni ge, mɛjɛn ki kàʔà hɛɛn pe ìn bi yere ma kayoro da na má bi yo na namyɛʔɛ na ge.› 19À mi yo: ‹Na fɔlɔ, pee tapoboo be pé maʔa cɛn kmaʔa mâ yo bee pé ma pa má na wa Juwifiyee pe sɛrigoro tì bɛfu ni ge, mì mi dáa pe wa kaso nî mâ na pe kmo ge. 20Nyiŋi ga na pe dá Ecɛnni kpo we ŋa wi dáa nyu hɛɛn ní be ma namyɛʔɛ na ge, mì tapolo we mi dá bo be kpo. Mi da yeré wi kpomo na me. À mi na wi kpofɛɛ pe kpasyoro wele de pe kân.›#22:20 ma wèle wa Pit 7:58 ni wè. 21Di wò fɔlɔ wɔ̀ɔ ná po: ‹Ta sye, mɛjɛn do mì we mí bi ma tun wa leʔe klòʔo ke tɔɔ ke hɛɛn ma be.› »

Pɔli nì sorasiyee pe lagwɔɔ kpangbanŋa ní

22Hɛɛn à pe na nuru Pɔli ma we fɔ mà bâ no ki kayoʔo ga na ge. Ki kruʔu ma, à pe taʔara gbanʔa mà yo: «Ki woo ŋa wi nyoʔo ge, kí ma yala wi nyini naʔa drunya ni we. Ki ìn yala wi kò nyuwyeʔe na.» 23Pa pe gáa daʔara gbanʔa mâ na pe drere fara de ná ti wa mâ na taplɔʔɔ nyraʔa ge wa namuru ni de, 24sorasiyee pe lagwɔ kpangbanŋa wɔ̀ɔ wi sorasiyee po be pe Pɔli le we wa pe korohaʔa deʔe na ge, poo yùgú aple nì, jango wiì sorasiyee pe lagwɔ we wi ga cɛn kmaʔa kí ma kan hɛɛn á pe na taʔara Pɔli na we banmɛ ge.

25Nyiŋi ga na pe dáa wi pun jango buu kmó aple nì le ge, Pɔli wɔ̀ɔ yo sorasiyee lagwɔ ŋa nì wi dá bo be yerehaʔa ge mòo po: «Pé ma ye kan ki sye ní we yo mâ yo ye da Hrɔmu woo wà kmo aple nì kí po ye ìn jé kiti kon kpɛn ki woo na we yo?»

26Ki sorasiyee lagwɔ wi gâ ki woʔo ga loʔo ge, wɔ̀ɔ yáʔà yo sorasiyee pe lagwɔ kpangbanŋa ma we mà yo: «Má na cɛn má bi nyaʔa hanri banmɛ ge sin? Mɛjɛn ki naŋa ŋa we wí nyɛ Hrɔmu woo wí wí ni.» 27Sorasiyee pe lagwɔ kpangbanŋa wɔ̀ɔ pan mà bâ Pɔli po we: «Ki yo ná kan. Hrɔmu woo wi má ni yo?» Pɔli wɔ̀ɔ yo: «Ee.» 28Sorasiyee pe lagwɔ kpangbanŋa wɔ̀ɔ wí po: «Do mì we, sanni mí bi grɛʔɛ Hrɔmu woo ge, mi dá ki yele la syɔ le gbejanfafaʔara nì.» Pɔli wɔ̀ɔ hín yo: «Di do mì we mi dá na wolo ta le na henyiŋi na.»

29Ki nyidege na ge, hɛɛn bee pe dá bì Pɔli yugu aple nì le, à pe laʔa wí na sorasiyee pe lagwɔ kpangbanŋa pɔɔ gáʔà cɛn mâ yo Pɔli wí nyɛ Hrɔmu woo ge, áʔa po wiì wí mòo kân á poo pwɔ ge, fyara à tuu co.

Pɔli wi woyoʔo Juwifiyee lagwɔɔ pe yɛʔɛ̀ na

30Ki kpɛntoʔo na ge, pɔɔ da gâ jori bí ga cɛn kmaʔa kí ma kan Juwifiyee á pe bàʔá Pɔli na we ge, wɔ̀ɔ wi haʔala mà sraʔá farafɛɛ pe lagwɔɔ ní lagwɔɔ pe kpoʔolomo woo po be pe pè kpoʔolo. Ki nyiŋi na ge, wɔ̀ɔ kɛri Pɔli nì we mà yɔ́ɔ̀ yrigí be ki hɛɛn pe nulala ni le.

Currently Selected:

PITUNBEE 22: NLK10

Highlight

Copy