PITUNBEE 20

Pɔli wi krɛlɛ Maseduwani klo nì Grɛsi klo ni

1Ki yopibi ba pi tunnumu pa mi da gâ gɔ nyiŋi ga na ge, Pɔli wɔ̀ɔ sɛrifɛɛ yeri be mà fanŋa kan pé ma mà sari pe na. Ki kruʔu ma, wɔ̀ɔ nyini wa mà kɛri Maseduwani klo ni le, 2mà yâ ki dere tì bɛfu nyari mà na kayofafaʔara nyu sɛrifɛɛ kan be na fanŋa kanʔa pé ma. Ki kruʔu ma, wɔ̀ɔ kɛri Grɛsi klo ni le, 3mà yâ da wa yere tanri. Nyiŋi ga na wi dáa ki ca bì je nyumu kɔrɔ kà ni bì da sye Siri klo ni le, Juwifiyee à pe dɛnbɛrɛ le wí na. Ki kala na le wɔ̀ɔ yo wí bi hru bì le Maseduwani klo ni. 4Bee pe da yɔ́ɔ̀ troʔo ge, pé bee: Sopatɛri ŋa Pirusi pyɔ we mâ po Bere kàʔà woo we ge, mà plɛn Arisitarike nì Segondusi nì we Tesalonike kàʔà woo we, ní Gayusi nì ŋa Dɛribe kàʔà woo we, ní Timote nì, ní Asi klo Tisike nì Trofime nì. 5Ki woo bee be à pe klu wò yɛ̀ʔɛ́ mà yáa wo hanni wa Trowasi kàʔà ni ge. 6Di bru ajrɛʔɛgɛ wɛgɛ fun fɛti wlɛrɛ ti kruʔu ma ge, wòó be à wo je nyumu kɔrɔ kà ni wa Filipe kàʔà ni. Àʔa na sye wo nì. Wo dá wlɛrɛ kɔgunnu ta waʔa nî mà ná no wa pe na Trowasi kàʔà ni ge. À wo ta wa wlɛrɛ nasyɛn.

Pɔli wi krɛtanʔala Trowasi kàʔà ni

7Wo dá gboʔolo canwyele li wlɛgblɛʔɛ na ge bì wò fɔlɔ wi hutanʔara li de. Pɔli wɔ̀ɔ na nyu sɛrifɛɛ ní be. Paʔa dá bo ki kpɛntoʔo na, wí bi gɛri ge, wɔ̀ɔ yo mà klon fɔ nyiŋi àʔa lɛ. 8Lambaa pe dá bo wa fafaʔabaa namuru go pyɔ ŋa ni wo dá gboʔolo ge. 9Najɛpii wà dà bo klɛnhaʔa finɛtri na, pe dá bo noo yeri Yutikusi. Nyiŋi ga na Pɔli wi da gáa nyu ná mori ge, ŋlomo à mi ki najɛ co we gbanʔa. Wɔ̀ɔ na ŋolo na tri fɔ mà gâ fara wa namuru go pyɔ tanriwoo nî we mà bâ do tra na de. À pe yɔ́ɔ̀ kpe mòo nya wí ku. 10Pɔli wɔ̀ɔ trigi mà kpɔbu mòo co mòo traʔa wi digiyɛʔɛ na ge mà yo: «Yò gáa gbele. Wí nyɛ nyuwyeʔe na.» 11Pɔli wɔ̀ɔ ní mà luʔu nɛ mà bru konlo we mà li pe ní mà nì na ca na nyu pé ni mà mo fɔ kpɛnmɛ à mi to. Ki kruʔu ma ge, wɔ̀ɔ kɛri. 12À pe pan ki najɛpii ní we nyuwyeʔe na. Àʔa pe lama fiʔi me ceŋge.

Pɔli wi krɛlɛ Mile kàʔà ni

13Wòó be wo da glú Pɔli wi yɛʔɛ̀ nyumu kɔrɔ ni ge mà kɛri Asɔsi kàʔà ni, deʔe ga na wo dá bì yà Pɔli kpe we ge, mɛjɛn wiì wi daʔá yo ban mà yo wí bi gɛri tra na. 14Wɔ̀ɔ yâ wo ton wa Asɔsi kàʔà ni ge, à woo kpe nyumu kɔrɔ ni mà kɛri Mitilɛnni kàʔà ni ge. 15À wo jɛ be mà na sye nɛ nyumu kɔrɔ ni ge. Ki kpɛntoʔo na, à wo no wa Kyɔse klo tanla le. Ki kpɛntoʔo ki tɔ na ge, à wo no wa Samosi klo tanla le. Ki kpɛnmɛ mi gâ do nɛ ge, à wo yâ je Mile kàʔà ni ge. 16Pɔli wi dá yo wí bi doro Efɛse kàʔà na ge, jango nyiŋi kò ga doró bùu yaʔa wa Asi klo ni le, mɛjɛn wi dá bo na fyala mà naʔa ca Pantekote wlɛʔɛ ki yɔɔ ton wa Jerusalɛmu kàʔà kiì ni, nàʔa po kí biʔi ta ge.

Pɔli wi kayotanʔaŋa Efɛse kàʔà sɛrifɛɛ lagwɔɔ ní

17Nyiŋi ga na wi dá bo wa Mile kàʔà ni ge, Pɔli wɔ̀ɔ hɛɛn tun wa Efɛse kàʔà ni ge mà yo pe ya sɛrigo lagwɔɔ yeri be wa. 18Pe gâ ban ge, Pɔli wɔ̀ɔ kí yo pé ma mà yo: «Mà kpe wlɛgblɛʔɛ ga na mi da jé naʔa Asi klo ni le ge, yé maʔa cɛn mí na tanri ye ni pomo ma na nyiŋi kì bɛfu na ge. 19Mi dá bo na tunŋu ko wò fɔlɔ kan we nyɛtunmu nì mà na nà cɛrɛ ceŋge yɛgbanra kaʔa gee ni ke dá bo na na taʔa Juwifiyee pe dɛnbɛrɛ kaʔa na ge. 20Yé maʔa cɛn mà yo kayoro da tí bi gban bí ye haʔa ge, mi ìn dà kà yaʔa bayoʔo ye kan. Di à mi na ti jari ye ma na ye ploʔo hɛɛn pè bɛfu pe yɛʔɛ̀ na ge mà na ye ploʔo kpo wa yè goro ni de nigbe nigbe, 21naʔa sari Juwifiyee na be ní klòʔo ke tɔɔ ke hɛɛn ní be naʔa pin pe kruʔu wa pe kapere ma de, pe yɛʔɛ̀ kan Nyɛʔɛlɛ ma le, pe pà wò fɔlɔ Jesu na we. 22Ŋaŋa ni ge, do mì mí na sye Jerusalɛmu kàʔà ni ge nɛ pa Nyɛʔɛlɛ li Nyìli lí na na kle ge. Kaʔa gee ké yà ná ta wa ge, mi ìn ke cɛn. 23Di ga mí ma cɛn ge, kí ga: Nyɛʔɛlɛ li Nyìli lí naʔa nyu naʔa sari ná na kàʔà kì bɛfu ni ga mí na jin ge mà yo pwɔmo ní, ní cɔlɔʔɔ ní ge pí na na hanni wa yɛʔɛ̀ ge. 24Di kiì nì kì bɛfu ní, ho na na nyuwyeʔe cun ge yraʔa kà. Mí ma cori bì gban bì ga funŋu wò fɔlɔ Jesu wí mà na tun ge bì nì bì wi tunŋu kɔ ge bìʔi funŋu ga wí ma kan ná ma ge mâ yo bì dá Nyɛʔɛlɛ li kmama kayotanʔa nyu ge bí daʔa teri hɛɛn na be ge.#20:24 ma wèle wa 2Tim 4:7 ni wè.

25Yè bɛfu yèé bee mí ma nyari yè nulala ni le mâ Nyɛʔɛlɛ li masaʔa kayoro jari de ye ma, ŋaŋa ni ge, mí maʔa cɛn mà yo wɛ ìn bí gà ná nya adi ye ni. 26Ki kala na mí naʔa nyu naʔa sari ye na alaʔa nî ge mà yo nà ye ìn syɔ, yè basyɔmo kala loò danʔa ná na, 27mɛjɛn mí ma Nyɛʔɛlɛ li nadanma mì bɛfu yo ye kan kɔ. Mi ìn kala là hra ye na. 28Ye da yè kɔrɔsi. Ye da mbara daʔa kì bɛfu kɔrɔsi, ga Nyɛʔɛlɛ li Nyìli lí ma ye hanri ki welefɛɛ ge mâ yo: Yé da Nyɛʔɛlɛ li sɛrigo naʔa ge ga liì Nyɛʔɛlɛ lí ma syɔ li Pitaʔa ki disyan nì ge. 29Do mì we mí maʔa cɛn mà yo nà mi kɛri kɔ ge, pa syanwyeʔe kèè bí ba je naʔa yè nulala ni le tihroʔo bì do mbadaʔa na ge. 30Hɛɛn pèè bi gà ba nyini naʔa yèé tapoboo yè nulala ni le bì da fanlaʔa kayoro nyu hɛɛn ma be, jango bì pe wa bì pe krɛʔɛ pe po pee pe ploʔofɛɛ. 31Ki kala na le, ye kò nyɛmɛɛ. Ye da lama tunʔu ni yé yo mà kpe yɛʔɛ́ tanri kpafoʔo ni, yè bɛfu nigbe nigbe mi dáa ye kaliʔi ni su yaagbanʔa yebliʔi fɔ nyɛtunmu mi naa nyini ná ma.

32Ki tɔ na ge, mí bi ye le Nyɛʔɛlɛ li kyɛrɛ̀ ni de ní li kmama kayoro ma de, da tí bi gban bí kà haʔa wa ye ma ge bi ní bí krɔʔɔ kan ge ye ma hɛɛn pè bɛfu bee ni pe klɛ́n mâ Nyɛʔɛlɛ kan le ge. 33Na nyɛlɛ ìn gori hɛn wà gbejanra nì, hɛn wà tɛ ní, ní hɛn wà kpasyoro na. 34Yèé tapoboo be yé maʔa cɛn mà yo mì we mi dá bo na tunŋu ko na kyɛtaʔa nì ge mà na na cromo kaʔa ko ge mà plɛn na plɛnfɛɛ pe woʔo ní ge kpo. 35Mí ma kaʔa kè bɛfu ke hranma tyɛʔɛ me ye na kɔ mà yo kí ma yala ye da tunŋu ko gbanʔa banmɛ ge. Ye da yabaa hari be. Ye da lama tun wò fɔlɔ Jesu wi kayoʔo ní ge, ga wiì tapolo wi dá yo ge mâ yo: ‹Lafiʔimi mí nyɛ ŋa ma wí na kanʔa ge mà toro ŋa na pé na kanʔa wí ma ge.› »

36Pɔli wi gâ ki kayoʔo ga yo ge kɔ ge, wɔ̀ɔ kunbiʔi kán. Wiì nì ki woo pè bɛfu ní à pe Nyɛʔɛlɛ nyɛri le. 37Pè bɛfu à pe na kpele gbanʔa mà noo cun atiʔi ni ge noo fyon. 38Pɔɔ da pé po pe ìn bì je gɔ́ɔ̀ nya adi ge, à kiì ma pe ya mà yâ doro. Ki kruʔu ma, à pe yɔ́ɔ̀ troʔo fɔ mà yâ no wa nyumu kɔrɔ tanla ge.

Currently Selected:

PITUNBEE 20: NLK10

Highlight

Copy