PITUNBEE 19
19
Pɔli Efɛse kàʔà ni
1Nyiŋi ga na Apolɔsi wi dá bo wa Korɛnte kàʔà ni ge, Pɔli wɔ̀ɔ Asi klo pari le mà li kon mà kɛri Efɛse kàʔà ni ge. Wɔ̀ɔ yâ sɛrifɛɛ pèè nya wa. 2Wɔ̀ɔ pé po: «Nyiŋi ga na ye da bá Jesu na we, à ye Nyɛʔɛlɛ li Nyìli ta le yo?» À poo po: «Wòó wò in je jáʔa loʔo bì yo Nyɛʔɛlɛ li Nyìli tama nyɛ wa.» 3Wɔ̀ɔ pé po: «Ye dá batɛmu wiwii ta sin?» À poo po: «Jan batɛmu wi.» 4Pɔli wɔ̀ɔ yo: «Bee pe dáa kruʔu wa pe kapere ma de ge, Jan wi dáa pe batise mà naʔa nyu hɛɛn ma be mà yo ŋa wí na pan wa wi kruʔu ma ge, pe pà ki woo na we. Àʔa po wí na Jesu pin.»#19:4 ma wèle wa Mat 3:11; Mar 1:4,7-8; Luk 3:4,16; Jan 1:26-27 ni wè. 5Pe gâ ki woʔo ga loʔo ge kɔ ge, à pe pè kân, à pe pé batise wò fɔlɔ Jesu wi yele na le. 6Pɔli wɔ̀ɔ wi kyɛrɛ̀ pa de pe na. Nyɛʔɛlɛ li Nyìli à li je pé ni. À pe na hɛnrɛ tà nyu tì yɛ mà na Nyɛʔɛlɛ li kayoro da nyu li dáa deri pé na ge. 7Ki hɛɛn pè bɛfu ge pe dá hɛɛn kɛ̂ mà kɛ syɛn nyoʔo kɔ ge.
8Ki kruʔu ma ge, Pɔli wɔ̀ɔ je wa Juwifiyee pe sɛrigo ni mà na nyu pé ni fyara fun mà ta wa yere tanri. Wɔ̀ɔ na Nyɛʔɛlɛ li masaʔa kaʔa teri ge pé na mà naʔa ca bì pe lama krɛʔɛ me pe na. 9Di hɛɛn pèè dá pe dihonyee syeʔele be. Pe ìn baʔa na. Di à pe na kayopere nyu na wa wò fɔlɔ wi kloʔò ma ge janma mi yɛʔɛ̀ ma ge. Ki kala na Pɔli wɔ̀ɔ sɛrifɛɛ co be mà jɛ be pe ní ki woo tanla be mà yáa nyu hɛɛn ní be wa Tiranusi wi krɛʔɛhaʔa na ge wlɛʔɛ kì bɛfu na. 10Wɔ̀ɔ na ki woʔo ga hanri ge mà taʔa na yɛʔɛ́ syɛn, fɔ Juwifiyee ní, ní klòʔo ke tɔɔ ke woo ní be bee pè bɛfu pe dá bo wa Asi klo ni le à pe wò fɔlɔ wi kayoʔo loʔo ge.
Sefa pii
11Nyɛʔɛlɛ li dáa kafongbɔʔɔ hanri wa Pɔli wi kyɛrɛ̀ ni de. 12Ali ki dá bo bwɔʔɔ gɛ yoo kpasyoro di yoo, nà kà bí màʔà Pɔli wi wre na de ge, pe na yáa ki pà yabaa na be, pe yara ti na nyini pé ni. Gbosuu fanna à pe na nyini hɛɛn ni be kpo. 13Juwifiyee bee pe dáa gbosuu prɔ be, pe dáa nyari na hɔlɔ dee dee. À pèè naʔa ca pé ni pé bi da gbosuu prɔ hɛɛn ni be wò fɔlɔ Jesu wi yele na le. À pe naʔa pin: «Jesu ŋa Pɔli wí na wi kayoro jari de ge, wó naʔa nyu ye ma wi yele na le, ye nyini pé ni.» 14Juwifiyee naŋa wà dà bo wa pe dáa wi yeri Sefa. Wi dá bo sraʔá farafɛɛ pe lagwɔɔ wà wi wí ni. Najɛɛ nasyɛn dà bo wí ma. Ki najɛɛ pee bɛ bee pe dá bo na ki woʔo ga hanri ge. 15Gbosyo wɔ̀ɔ pé po: «Mí ma Jesu cɛn we màʔa cɛn hɛn ŋa wi Pɔli nì we ge, di yèé be han bee bɛ yèé ni be?» 16Gbosyo wi dá bo naŋa ŋa ni ge, ki naŋa wɔ̀ɔ to pé na. Wi fanŋa àʔa wɛ pe woʔo na ge. Wɔ̀ɔ klara tyɛʔɛ pé na mà pè bɛfu ja, fɔ à pe fɛ mà nyini wa ki go nî ge waʔafeele drere fun. 17Juwifiyee ní klòʔo ke tɔɔ ke hɛɛn ní be pè bɛfu bee pe dá bo wa Efɛse kàʔà ni ge, à peʔe cɛn. Fyara à ti pè bɛfu co. À pe na wò fɔlɔ Jesu wi yele kpɔʔɔ le. 18Hɛɛn bee pe da bá Jesu na we, ki woo à pe fafaʔa mà pan mà báa pe kapopere tanli de na ti teri hɛɛn na be. 19À lekaala fafaʔa ma pan pe sɛbɛɛ ní be mà bâ pe kpoʔolo na pe hori hɛɛn pè bɛfu pe yɛʔɛ na ge. Pe dá ki sɛbɛɛ pe pɛrɛ tonli de. À ti saamo pii too noli nyoʔo kɔ ge. 20Ki pomo na me, wò fɔlɔ wi kayoro à ti na jari na sye fanŋa nì sye ní.
Efɛse kàʔà woo pe fɛfaʔa ní pe taʔaraʔa ní
21Ki kaʔa ke gâ hanri kɔ ge, Pɔli wɔ̀ɔ ki honri wa wi lama ni me mà yo wí bi Maseduwani klo nì Akayi klo pari le bì ke kon bì gɛri Jerusalɛmu kàʔà ni ge. Wɔ̀ɔ yo: «Nà mi ga jé wa kɔ ge, kí ma yala bì nya Hrɔmu kàʔà nì ge kpo.» 22Wɔ̀ɔ wi haʔafɛɛ syɛn troʔo wa Maseduwani klo ni le, pe yegee ké gee: Timote nì, Erasite nì. Wiì tapolo we, wɔ̀ɔ ko wa Asi klo ni le mà nyiŋi kà kɔ wa nɛ.
23Ki nyiŋi na ge, à kakpɔlɔ là ma hɛɛn pe honriri wlele de pe na wò fɔlɔ wi kloʔò ki namyɛlɛ na le. 24Waafiʔi kmofɔlɔ wà dà bo wa pe dáa wi yeri Demetriyusi. Wi dá bo na waafiʔi kmo naʔa hanri nɛ pa pe nyɛʔɛlɛ la pe dáa yeri Aritemisi#19:24-28 Aritemisi: Ki da bo Asi klo woo pe nyɛʔɛlɛ, à li po cɛlɛ. Pe daa li kpoʔɔ fanfan ni we wa. ge li go nyɛ ge. Wɔ̀ɔ na tonro kpangbanŋa taʔa wa wi tungɔɔ kan be. 25Wɔ̀ɔ wi tungɔɔ kpoʔolo be mà plɛn hɛɛn bee ní pe dáa ki tundege ko ge, mà pe po: «Na woolo, yé maʔa cɛn mà yo wó na tonro taʔa wa ki tunŋu ga kiì ni. 26Yé naʔa nyaʔa naʔa nuru ga ki Pɔli ŋa wí na hanri ge. Wí naʔa nyu mà yo nyɛʔɛŋɛɛ gee hɛɛn pé na hanri pe kyɛrɛ̀ nì de, nyɛʔɛŋɛɛ ban. Wí ma hɛnfafaʔa yuru cɔʔɔ mà pe punŋu. Ki nà ná go nɛɛ pe yo Efɛse kàʔà kiì nigbe ni, di wa Asi klo lì bɛfu ni. 27Wó na fyaʔa wò tunŋu kò gá ba faʔara wo ma. Kiì nigbe ban dron, di wó naʔa fyaʔa kpo mà yo wò nyɛʔɛlɛ la cɛlɛ Aritemisi le li kpɔʔɔhaʔa go kò gá ba grɛʔɛ nɛɛ yraʔa kà banʔa ní. Wò nyɛʔɛlɛ li kpɔʔɔmo pa mi jɛrɛ, liì la Asi klo lì bɛfu ní, ní drunya wì bɛfu ní pé na kpɔʔɔ ge.»
28Ki hɛɛn pe gâ ki kayoro loʔo de ge, pe lama à mi gban pè na. À pe na taʔara gbanʔa naʔa pin: «Efɛse kàʔà woo pe nyɛʔɛlɛ Aritemisi le lí nyɛ kpangbanla.» 29Kàʔà hɛɛn pè bɛfu à pe taʔara mà jɛ na fe lademe ní mà yâ Pɔli wi koblɛɛn Maseduwani klo woo Gayusi nì Arisitarike co we mà na fe na sye pé ni wa kàʔà kpoʔolohaʔa na ge. 30Pɔli wi dá jori bì wì tyɛʔɛ janma na me. Di sɛrifɛɛ pe ìn ki ta. 31Ali Asi klo li lagwɔɔ bee pe dá bo wi nagroboo be ge, à pe hɛɛn tun wí ma mà yo pe yɔɔ fɛn poo po wò ga gɛri wa ki kpoʔolomo deʔe ga na ge. 32Hɛɛn pèè dá bo na taʔara namyɛʔɛ kà na. À pèè na taʔara namyɛʔɛ kà na nɛ, mɛjɛn ki kpoʔolomo mi dá bo wleleme. À hɛɛn pe fonʔo mà po wa, pe dá gboʔolo kala la na ge pe ìn ki cɛn. 33Di hɛɛn pèè dá bo wa janma ni me. Ki woo à pe ki kala nyɛli le Alɛkisandre kan we, ŋa Juwifiyee pe da glú hɛɛn pe yɛʔɛ̀ ma ge. Wɔ̀ɔ wi kyɛrɛ̀ jrɛʔɛ de mà naʔa ca wí bi Juwifiyee pe woʔo yo ge pe kân hɛɛn ma be. 34Di pe gáʔà cɛn mâ yo wí nyɛ Juwifiyee woo ge, pè bɛfu à pe na taʔara na kayotege kiì pa teme na mà lɛri pii syɛn nyoʔo kɔ ge. Pe dáa ki pin: «Efɛse kàʔà woo pe nyɛʔɛlɛ Aritemisi le lí nyɛ kpangbanla.»
35Ki nyiŋi na, kàʔà ki sɛbɛ nyoŋofɔlɔ wɔ̀ɔ janma yrigí me mà yo: «Efɛse kàʔà woolo, han nyɛ naʔa wi ìn ki cɛn bí yo Efɛse kàʔà kí nyɛ nyɛʔɛlɛ kpangbanla Aritemisi li go ki welefɔlɔ ní li lɛgɛ ga nì ki dá jɛ wa namuru ni mâ to naʔa tra na de? 36Pa hɛn wà wóo gban bí kakara le wa ki woʔo ga ni ge, kí ma yala ye pyèrì. Ki ìn yala ye fyala ye kala là po. 37Yé ma pan ki hɛɛn bee ní be. Àʔa hín bo pe ìn yrɛbɛ yu wa wò nyɛʔɛlɛ li go nî ge. Poò mɛɛ na li yele cɔʔɔ le. 38Ki kala na le, nàʔa po hɛn wà ma kala là hanri Demetriyusi nì wi tungɔɔ na be, kayoro konwlɛrɛ tí nyɛ wa. Kayoro konfɛɛ fanna à pe po wa. Pe pè yeri wa ban. 39Di nàʔa po kà nyɛ wa ye ma kì yɛ ge, hɛɛn pe kpoʔolonyiŋi na ge, paʔa gà ba yo. 40Ali mí naʔa fyaʔa wò klo lagwɔɔ pò gaʔá nya nɛɛ wó na can pé ni wò alaʔa kpoʔolomo ma mi kala na le, mɛjɛn ki janma ma mi jâ gboʔolo naʔamɛ ge, mí nyɛ yugu fun.»
41Wi gâ ki kayoro da yo de kɔ ge, wɔ̀ɔ kpoʔolomo hɛɛn po be pe cànmù.
Currently Selected:
PITUNBEE 19: NLK10
Highlight
Share
Copy
Want to have your highlights saved across all your devices? Sign up or sign in
Bible Society of Côte d'Ivoire
