Mariki 14

Zyefubèle yɛɛ̀kinibéle n nyɔɔ kúun Zyezu na

(Mat 26:1-5; Luk 22:1-2; Zyan 11:45-53)

1 # Yir 12:1-27 Ki maa kòro canya siin Sɔ̀lɔ-mí-yaʔali séri ní levé fun búruw séri canʔa si nan. A sáriga-wòlobèle kàfɔɔlɔ ní làlwaw sɛ́bɛwelebéle i kanmaa caa bi Zyezu lɛ́ɛlɛ taa cò bi kpóo. 2Níì cán pe maa jo: «Ki ga yɛlɛ gi pye sériw làla ni í jàngó kàfulogo a kɔ́ yìri syɛ́ɛnbèle nínge ni í.»

Cewaa n nùndaanna sìnmɛ wo Zyezu nyúngi na

(Mat 26:6-13; Zyan 12:1-8)

3 # Luk 7:37-38 Lǎli ni Zyezu pye lè lìíli na Betanii ni Siimɔn kpáagi ni wi lè yaanyɛɛnmi fɔ́lɔ, a cɔlɔɔ jée ní lɔgbanra singbolo ní, loro lee ni náari lɔgbanra sinmɛ pye lè. A wi baa sìngboli nyɔ́ɔ kabi níì bi wo Zyezu ma nyǔngi ni. 4A syɛ́ɛnbèle pèle fúnyo tanʔa be na, a be i gi nyuu peyɛɛ ma níì jo: «Nyàʔá na wi nùndaanna sǐnmi naa kálagi nya? 5Pe mǎà dée gbǎn bi pára pi wáliw í nɛʔɛ bi sɔ̀lɔ selebingéle taanri na, si wáliw bee kaan foomɔfɔbèle ma.»

A be i nyuu ni céw bɛɛngi. 6Kàjáa a Zyezu jo: «Ye wi yaʔa sági. Nyàʔá na yele wári nya wi na? Kacànna wi pye mii na. 7#Làlw 15:11 Níì cán foomɔfɔbèle i nyɛ ní yele ní làla o làla, lǎlee faala ni yele ga ni caa bi kacàngēle kpéʔele be na lè, yele a gbǎn ge kpéʔele, kàjáa mii a pye ní yele ní làla o làla í. 8Gee fánʔa na wi taa lè, koro wi kpéʔele. Wi n sǐnmi naa tɛ́ʔɛ n mii céri sámaga sáni mii í kùu lè pé mii tɔ́n. 9Mii a gi joo yele ma kányɛʔɛ ni, syɛ́ɛnbèle ga ni Kolocɔlɔɔ Syɛɛnjóocǎnri nyuu dulunyanw ni tɛʔɛ o tɛʔɛ ni, gee céw naa kpéʔele lè, pe a wɔ́ɔ ra gi nyuu yaà, pe a fɛ̀ʔɛ wi na í.»

Zyudasi i làrijànna caa bi Zyezu le sáriga-wòlobèle kàfɔɔlɔ kɔ́yɔ ni

(Mat 26:14-16; Luk 22:3-6)

10Wi pìitamabèle kɛɛ ní siin ni, a be wàa nibin kári sáriga-wòlobèle kàfɔɔlɔ ma, pe i wi yiri Zyudasi Isikariyɔti, ní sáà be pye woro a wi le be kɔ́yi ni. 11Lǎli ni pe dee bee lóʔo lè, a gi tɔ̀nɔ n be dɛ́nɛ, a be fala n nyɔɔ fàli wi ma níì jo poro a wáli kaan wi ma. A Zyudasi fala ni làrijànna caa bi wi le be kɔ́yi ni.

Zyezu n Sɔ̀lɔ-mí-yaʔali séri lìile lìi ní wi pìitamabèle ní

(Mat 26:17-25; Luk 22:7-14,21-23; Zyan 13:21-30)

12Levé fun búruw séri cânzelige na, lǎlee ni pe sériw bàpiigéle kúu lè, a wi pìitamabèle wi pye: «Sán mɔ caa wolo í kári sa Sɔ̀lɔ-mí-yaʔali séri lìile sámaga mɔ ma mɔ í lìi?» 13A wi wi pìitamabèle pèle siin tun níì be pye: «Yaa syée ye sa jée kěgi ni, yele a sa nànwaa fàrá nyaa wi lɔ̀ʔɔ kasànna tugo, ye taʔa wi na. 14Wi ga sáà jée kpáagee ni lè, ye kpáagi fɔ́lɔ pye: ‹Tamafɔw n jo, sán woro kpáagi nyɛ, gee ni woro a ba Sɔ̀lɔ-mí-yaʔali séri lìile lìi ní woro pìitamabèle ní lè?› 15Wi a kpaataʔaga tɛ̀ɛn yele na. Pe n gi sámaga n kwɔ́ɔ níì yáriri tɛ́ʔɛ yaà. Nɛɛ bee yele a Sɔ̀lɔ-mí-yaʔali séri lìile sámaga wolo ma.» 16A pìitamabèle bee kári n sáà jée kěgi ni, a be gi nyaa àmɛɛ wi da gi joo poro ma lè, a be Sɔ̀lɔ-mí-yaʔali séri lìile sámaga yaà.

17Cângwɔɔgi nyɔ́ɔ na a wi pan ní wi pìitamabèle kɛɛ ní siin ní. 18#Ŋún 41:9 Lǎli ni be tɛ́ɛn ni líi lè, a Zyezu be pye: «Mii a gi joo yele ma kányɛʔɛ ni, wàa i naa yele ni ni líi ní mii ní, woro wi a mii cǒ kaan.» 19A be fala n yɛ́ɛyi tanʔa ní i wi yíbe nibin nibin, wee n jo: «Mii wi lé?» Wee n jo: «Mii wi lé?»

20A wi be pye: «Yele kɛɛ ní siinw ni, yele wàa nibin wii, wee wi kɔ́gi nii ní mii ní pɛ́ɛli ni lè. 21Syɔɔn-pya tɔ̀nɔ́ i syée àmɛɛ ki da sɛ́bɛ lè wi kéeli na. Kàjáa wɔʔɔlɔ a pye nǎnw bee na, wee wi a Syɔɔn-pya cǒ kaan lè! Ki da caà yɛlɛ pe dée nǎnw bee see í.»

Lìizanni kéele

(Mat 26:26-30; Luk 22:14-20; 1Kor 11:23-25)

22Lǎli ni be pye lìíli na lè a Zyezu búruw láa níì bariga kaan Kolocɔlɔɔ ma, níì wi kabagi n lɛɛ be na níì jo: «Ye syɔɔ, wee naa wi nyɛ mii céri.» 23Koro kàdoʔo ma a wi yagbaala láa níì bariga kaan Kolocɔlɔɔ ma, níì li kaan be ma, a pe myɛ gbaa li ni. 24#Yir 24:8; Zyer 31:31-34 Níì be pye: «Wee naa wi nyɛ mii sìsyaanw, joogaanni sìsyaan, wee wi a wo lè syɛ̀ɛnnɛ saʔa kéele na. 25Mii a gi joo yele ma kányɛʔɛ ni, nlaʔa níjanʔa na mii a ní ɛrɛzɛn tírire yasanra lɔ́ʔɔ gbaa nyáana í bi taa cángi í ba nan gee ni mii a ní gi gbaa lè kavɔn Kolocɔlɔɔ fǎngi ni.» 26Koro kàdoʔo ma a pe ga ŋùu n kwɔ́ɔ, a be yiri n kári Olivye tíiri nyanbelege ma.

Zyezu n jo Pyɛri a woro cée

(Mat 26:31-35; Luk 22:31-34; Zyan 13:36-38)

27 # Zak 13:7 A Zyezu be pye: «Yele myɛ a mii cée, níì cán ki maa sɛ́bɛ níì jo: ‹Mii a bànaʔaw kpúmɔn kpóo, bǎbèle si càri.› 28#Mat 28:16 Mii si ga baa nyán, mii a kári Galile ma yele yɛ́ʔɛ na.» 29A Pyɛri wi pye: «Alí bele myɛ ga mɔ cée, mii a tée mɔ cée í.» 30A Zyezu wi yari: «Mii a gi joo mɔ ma kányɛʔɛ ni, àlí yébiligi naa tiimaa ni sáni gòpɔ́seliw í nyɛni lè, siin wów í ba nyɛni, mɔ a mii cée tɔlɔyɔ taanri.» 31Koro ní ki myɛ ní, a Pyɛri sèʔé i gi nyuu gbanʔama níì jo: «Alí ki ga yére mii í kùu ní mɔ ní, koro ki a tɔ́ɔ pye, mii a tée mɔ cée í.» A pe myɛ wɔ́ɔ̀ gi joo nya.

Zyezu n nyɛ́ɛri Zyɛtisemane ni

(Mat 26:36-46; Luk 22:39-46)

32A be sáà nan tɛɛgaa na pe i gi yiri Zyɛtisemane. A wi wi pìitamabèle pye: «Ye tɛ́ɛn nɛɛ naa, mii si kári bi sa nyɛ́ɛri.»

33Níì Pyɛri, ní Zyaki, ní Zyan kɔ́ri n kári, a funjurugori ní fun-yáagi tɔ̀nɔ n sáà jée wi ni gbanʔama. 34A wi be pye: «Mii fúngi n curugo mii na n sɔ̀lɔ, fwɔɔ n baa nan kùúw na. Ye kòro nɛɛ naa nyɛ̀nɛ na.»

35A wi ga sɛ̀ʔɛrɛ yɛʔɛ̀ ma cɛɛri, a wi sáà tìgi n too tári na ní i nyɛ́ɛri jàngó kapye ki a gbǎn kpéʔele woro í syɔɔ lǎli bee kéele ma. 36Wi maa jo: «Mii Tóow Abaa, keelaa faala ga mɔ jáa í, yagbaagi naa léeli mii na, kàjáa ki ga yɛlɛ mii nyɛ́nɛ kéeli í kpéʔele í, fwɔɔ mɔ nyɛ́nɛ wóli.»

37A wi lúru n pan n baa be nyaa pe i ŋúnɔ, a wi Pyɛri pye: «Siimɔn, ba mɔ ŋúnɔ lé wii? Mɔ a gbǎn kòro nyɛ̀nɛ na bi lɛ́ɛri nibin kwɔ́ɔ ì? 38Ki n yɛlɛ ye kòro nyɛ̀nɛ na yaa Kolocɔlɔɔ nyɛ́ɛri, koro ga pye yarigaa a kɔ́ yele kárima bi lége kapeele ni í. Ki láagi i nyɛ syɔɔn pili na, kàjáa wi céri fànʔa n cɛ́rɛ.»

39A wi níì kári n sa ni nyɛ́ɛri, níì syɛɛnnijanri joo. 40A wi ga níì lúru n pan, a wi baa be nyaa pe i ŋúnɔ. Níì cán ŋúnɔmi maa be jáa gbanʔama. Pe ga níì pye bi gbǎn yarigaa cán bi joo wi ma í.

41A wi kári níì lúru n pan tɔdaanri wógi na n baa be pye: «Yaa ŋúnɔ tɔ́ɔliw ni, ye ŋɔ́n ye daa. Ki n kwɔ́ɔ. Wéle, lǎli n nan, lee ni pe a Syɔɔn-pya le kapeebyebèle kɔ́yɔ ni lè. 42Ye yìri wo kári. Wéle, wee wi a mii cǒ kaan lè, wi n nùuni naa n kwɔ́ɔ.»

Zyezu cǒli kéele

(Mat 26:47-56; Luk 22:47-53; Zyan 18:3-12)

43Lǎli ni Zyezu sèʔê pye ni nyuu lè, a Zyudasi kàri n nan, wi lè kɛɛ ní siinw ni, wi maa pan ní syɛ̀ɛnnɛ saʔa ní, ŋɔséebéle ní kàgbeegēle si i nyɛ be ma, sáriga-wòlobèle kàfɔɔlɔ ní làlwaw sɛ́bɛwelebéle ní wolɛɛbèle pe da be tun. 44Wee si wi nyɛ lè wi levɔw nigoobèle kɔ́yɔ ni, woro maa joo n tɛ̀ɛn be na níì be pye: «Yele ga sáà mii nyaa a mii wee syɔɔnri lè, woro wii. Ye wi cò yaa syée ní wi ní, yáā wi kɔ̀rɔsíi.» 45Lǎli ni wi pan lè ní be ní, a wi fala n nùuni Zyezu na níì wi pye: «Tamafɔw.» Níì wi syɔɔnri syɔɔnri. 46A syɛ́ɛnbèle bee fala n kpóʔoro Zyezu na n wi cò. 47Bele be pye ní Zyezu ní lè, a poro wàa wi ŋɔséew kɔ́n n sáriga-wòlobèle kàfɔgbɔɔɔ falipyeo kpúmɔn n líigi láʔa wi na. 48A Zyezu be pye: «A yele pan lé ba mii cò ní ŋɔséebéle, ní kàgbeegēle ní, àmɛɛ mɔ lóʔo lè kàyuuo mii nyɛ? 49#Luk 19:47; 21:37 Mii maa pye yele níngi ni canʔa o canʔa ni syɛ́ɛnbèle tama kpɔ̀ʔɔrɔli kpaʔa ni, yele ga taa si mii cò í. Kàjáa gee naa myɛ n kpéʔele koro ga pye gee ki da sɛ́bɛ lè Kolocɔlɔɔ syɛɛnsɛbɛri ni, gi foro.»

50A wi pìitamabèle myɛ fàn níì wi yaʔa. 51Nìgɔcariwaa maa taʔa wi na níì làgo yagana wáa wiyɛɛ na, a be wi cò. 52A wi làgow yaʔa be ma ní i fé ni syée níbori.

Pe n baa Zyezu yérige kútiijoobèle yɛ́ʔɛ ma

(Mat 26:57-68; Luk 22:54-55,63-71; Zyan 18:13-14,19-24)

53A be Zyezu kɔ́ri n kári sáriga-wòlobèle kàfɔgbɔɔɔma, beè lè sáriga-wòlobèle kàfɔɔlɔ myɛ, ní wolɛɛbèle, ní làlwaw sɛ́bɛwelebéle peyɛɛ gbóʔoro lè. 54A Pyɛri taʔa wi na léelige ni syée wi kurugo fwɔɔ n taa n sáà jée sáriga-wòlobèle kàfɔgbɔɔɔ kàcoolo ni, n sáà tɛ́ɛn ni naà waari ní nìgwɔɔbèle ní.

55Sáriga-wòlobèle kàfɔɔlɔ ní Sanedirɛnw myɛ maa ni keelaa caa bi joo taʔa Zyezu na, koro ga pye poro í wi taa kpóo, pe si ga làa taa í. 56A syɛ̀ɛnnɛ saʔa tɔ̀nɔ n jànvaa kérigèle kèle joo n taʔa wi na, koro ní ki myɛ ní pe kajoogèle da pye sèjira í. 57Pèle maa pye yaà, a poro yìri n yére, níì finɛ n taʔa wi na níì jo: 58#Zyan 2:19 «Wolo tiimaa maa gi lóʔo wi ma a wi jo: ‹Mii a kpɔ̀ʔɔrɔlɔ kpáagi naa cáan, gee syɛ́ɛnbèle faan lè ní be kɔ́yi ní, si kàa nikwɔɔ faan canya taanri nínge ni, gee gi lè syɔɔn kɔ́lɔ a gi faan í.› » 59Alí koro ní ki myɛ ní, pe séeraw ga sèʔê pye sèjira í.

60A sáriga-wòlobèle kàfɔgbɔɔɔ yìri n yére be níngi ni, níì Zyezu yíbe níì jo: «Mɔ ga yarigaa taa bi joo wii ì? Nyàʔá séerafɔbèle naa nyuu ni taari mɔ na?» 61A wi pyèri, wi ga yafyɛn joo í. A sáriga-wòlobèle kàfɔgbɔɔɔ níì wi yíbe níì jo: «Mɔ lé wi nyɛ Kirisi wee wi lè dùbaw myɛ Kàfɔlɔ jáa?» 62#Dan 7:13 A Zyezu jo: «Ɛɛn, mii wii.» Ní wɔ́ɔ̀ jo: «Yele si a kɔ́ Syɔɔn-pya nyaa wodɛ́ɛɔn ní, séew myɛ fɔ́lɔ Kolocɔlɔɔ kàliige ma, si kɔ́ wi nyaa waa maa fàfaanyi ni.»

63A sáriga-wòlobèle kàfɔgbɔɔɔ búroyi sulugu wiyɛɛ na níì jo: «Séerafɔwìí si wolo a ní da caa? 64#Lev 24:16 Yele n Kolocɔlɔɔ mɛ́ɛkalagi-syɛ́ɛnri lóʔo wi nyɔ́ɔgi na. Mɛ̀ɛ́ si yele jo wo wi pye?» A pe myɛ jo wi n yɛlɛ be wi kpóo. 65A pèle fala n séli ni tɛ́ɛri wáa wi na, níì wi yɛ́ɛgi tɔ́n ní i wi kpúmɔn ní kágungèle ní níì jo: «Mi mɔ kpúmɔnfɔw mɛ́ʔɛ tɛ̀ɛn wolo na.» A kpɔ̀ʔɔrɔli kpaʔa kpaàwelebéle wi kɔ́ri ni syée ní i wi kpúmɔn ní kadaagèle ní.

Pyɛri n Zyezu cée

(Mat 26:69-75; Luk 22:56-62; Zyan 18:15-18,25-27)

66Lǎli ni Pyɛri pye kàcooli ni táàma lè, a sáriga-wòlobèle kàfɔgbɔɔɔ falipyecewaa pan 67n baa Pyɛri nyaa wi i náagi waari, a wi i wi wéle, ní kɔ́ɔ̀ jo: «Mɔ maa wɔ́ɔ̀ pye ní Zyezu ní wi lè Nazarɛti ye wów.» 68A wi gi kábala níì jo: «Gee mɔ nyuu lè mii ga gi cán í, mii ga caa wɔ́ɔ̀ gi kɔ́rɔw cán í.»

Níì fala n núngo be taana n sáà jée nìkpaangi ni. [A gòpɔ́w fala n nyɛni.] 69A falipyecew ní sáà wi nyaa syɛ́ɛnbèle pèle taana, a wi bele bee pye: «Nǎnw naa yele nyaa lè wee, wi pìitamawaa wii.» 70A Pyɛri níì gi kábala. Bele be pye yaà lè, a cɛɛri ga pye a poro níì Pyɛri pye: «Kányɛʔɛ gii, mɔ tɔ̀nɔ́ i nyɛ bele bee wàa, níì cán mɔ wɔ́ɔ i nyɛ Galile tári wówaa.» 71A Pyɛri fala ni joobeemi nyuu, ní i kɛ̀ɛ́ níì jo: «Nǎnw bee kéele yele nyuu lè, mii ga wi cán í.»

72Lǎli bee ni a gòpɔ́siin wów nyɛni. A Pyɛri fala n Zyezu syɛ́ɛnri sɔ̀ngi n taa àmɛɛ wi da gi joo lè woro ma níì jo: «Sáni gòpɔ́seliw í nyɛni lè siin wów í ba nyɛni, mɔ a mii cée tɔlɔyɔ taanri.» A wi ga gee bee sɔ̀ngi n taa a wi fala ni nyaan.

Currently Selected:

Mariki 14: CB10

Highlight

Copy