Mariki 12

Ɛrɛzɛn sefalabèle be pee lè poro kàseeli

(Mat 21:33-46; Luk 20:9-19)

1 # Eza 5:1-2 A Zyezu níì séli ni nyuu be ma kàseegéle ni níì jo: «Nànwaa maa ɛrɛzɛn séʔe sámaga níì gi faan n sùlu, níì ɛrɛzɛnw tɛɛnùgugo sámaga yaà, níì kpaatɔnɔgɔ faan yaà, níì gi kàlifáa sefalabèle pèle ma páā woro lɛɛli kaangi woro ma, níì yiri n kári kùlaa ni. 2A ɛrɛzɛnw làrilaala ga baa nan a wi wi falipyewaa tun sefalabèle ma wi sa woro lɛɛli syɔɔ be ma. 3A be sáà wi cò n kpúmɔn níì wi lúrugo n tórigo wowaaɔ ní. 4A wi níì falipyewaa nikwɔɔ tun be ma, a be ní sáà wee bee kpúmɔn nyǔngi ni n kpàli, ní i wi teeri. 5A wi níì wàa nikwɔɔ tun, a be sáà wee bee kpóo. Wi maa tɔ̀nɔ n tundunbéle saʔa tun be ma, a be sáà pèle kpúmɔn, níì pèle kpóo. 6Wàa nikwɔɔ si maa sèʔê pye wi ma wi lè wi pìinidaanmaw, a wi wee bee tun be ma pe myɛ kàdoʔo ma níì jo: ‹Pe a sa fɛ̀ɛrɛ taa mii jáaw na.› 7A ɛrɛzɛn sefalabèle ga wi wéle n nyaa wi i maa, a be gi joo peyɛɛ ma níì jo: ‹Wee naa wi nyɛ wi kɔriliiw, ye tíi wo wi kpóo, kɔ́rigi si kòro wolo wóʔo.› 8A be wi cò n kpóo n wáa ɛrɛzɛn ségi kàdoʔo ma.

9Nyàʔá ɛrɛzɛn ségi fɔ́lɔ a pye? Wi a lúru pan ba sefalabèle bee kpóo, si ségi kàlifáa pèle nikwɔɔlɔ ma. 10#Ŋún 118:22-23 Yele ga kɔ́ɔ̀ syɛ́ɛnri naa wéle Kolocɔlɔɔ syɛɛnsɛbɛri ni ì? Ti n jo:

‹Kàdɛnɛgee kpaafaanbèle da cée lè,

koro ki baa pye kpáagi jɛ̀ɛ́nnɛ kadɛnɛzelige.

11Gee bee i nyɛ Kàfɔw kapyele,

li si i nyɛ wo ma kakpɔɔlɔ.› »

12A Zyefubèle yɛɛ̀kinibéle fala ni caa bi Zyezu cò, níì cán pe maa gi cán poro na wi kàseeli bee wáa, kàjáa pe maa ni fɛ̀ɛgí syɛ́ɛnmi na. A be núngo wi taana n kári.

Nyǔnyi lɔ́rɔ ti yɛlɛ taa sàrá Sezari ma lè

(Mat 22:15-22; Luk 20:20-26)

13Pe maa Farisibèle pèle ní Herodi taʔafɔbèle pèle tun Zyezu ma koro ga pye pe sa wi taa cò wi nyɔ́ɔgi syɛ́ɛnrɛ na. 14A be sáà wi pye: «Tamafɔw, wolo n gi cán mɔ i kányɛɛgi nyuu, mɔ wɔ́ɔ o syɔɔnwaa yirigi wàa ni í. Níì cán mɔ o syɛ́ɛnbèle wéle pe yɛ́ɛyi kpólolo na í, mɔ i Kolocɔlɔɔ kólogi tèé syɛ́ɛnbèle na kányɛʔɛ ni. A gi yɛlɛ lé wolo í da nyǔnyi lɔ́rɔ kaangi Sezari ma? A gi yɛlɛ lé wolo í da di kaangi láà, ba wolo í ŋɔ́n?»

15Zyezu si maa be syɛɛnjóotɛɛyi siin joolo sɔngurɔ cán, a wi be pye: «Nyàʔá na yele mii pingi ni wéle? Ye sa deniye láa yaa maa mii í ba wéle.» 16A be sáà wi láa n pan. A wi baa be yíbe níì jo: «Wìí syɔ́ɔn yɛ́ʔɛ ní wi mɛ́ɛgi gi gee wáliw na?» A be wi pye: «Sezari wii.» 17A wi be pye: «Koro na gee gi nyɛ lè Sezari wógi, ye gi kaan Sezari ma. Gee si gi nyɛ lè Kolocɔlɔɔ wógi, ye gi kaan Kolocɔlɔɔ ma.» A be i káama wi syɛɛnlurugori kéele na.

Pe n Zyezu yíbe kúbèle nyán-yirile kéele na

(Mat 22:23-33; Luk 20:27-40)

18 # Kap 23:8 A Sadusebèle kári Zyezu ma, poro bele be gi nyuu lè níì jo kúbèle a nyán í, a poro baa wi yíbe níì jo: 19#Làlw 25:5 «Tamafɔw, Mowizi maa gi sɛ́bɛ n yaʔa wolo ma níì jo: Nànwaa ga kùu níì wi cɔɔ̀ yaʔa wi ga pyà taa í, fwɔɔ wi senyɛnw í céw bee láa, wi ga pyà taa, pìíw bee a pye wi senyɛnw mɛ́ʔɛ na. 20Nànbēle kɔrɔsiin si maa pye senyɛ̀nnɛ. A wozeliw cɔlɔɔ láa ní baa kùu, yòdaʔaga sìndaa ni. 21A siin wów céw bee láa ní baa kùu, wi ga wɔ́ɔ̀ pyà taa í. A taanri wów ní baa pye nya, 22a pe myɛ kɔrɔsiinw wi láa níì kùu, wi ga pyà taa wàa faala ma í. A céw náa baa kùu. 23Kúbèle cân-nyánga ga baa nan, á be nyán, nǎnbèle bee ni wìí wóo wi a pye céw? Níì cán pe myɛ kɔrɔsiinw maa wi láa n sɔ̀lɔ.» 24A Zyezu be pye: «Amɛɛ yele nyɛ lè yele ga Kolocɔlɔɔ syɛɛnsɛbɛri ní wi séew cán lè í, gee bee ban gi yele pùuni ì? 25Kàjáa kúbèle ga baa nyán, nàɔn a ní cɔlɔɔ láa í, cɔlɔɔ a ní kòro nàɔn ma í, fwɔɔ pe a pye àmɛɛ nyɛ̀ʔɛni tundunbéle nyɛ lè nyɛ̀ʔɛni ni. 26#Yir 3:6 Gee gi kúbèle nyán-yirile kéele kwɔ́ɔ lè, yele ga tɔ̀ʔɔ́ kɔ́ɔ̀ gee bee wéle Mowizi sɛ́bɛw ni wii ì? Kolocɔlɔɔ maa gi joo wi ma tiipiigi ni níì jo: ‹Mii wi nyɛ Abirahami Kolocɔlɔw, ní Izaaki Kolocɔlɔw, ní Zyakɔbi Kolocɔlɔw.› 27Kolocɔlɔɔ o nyɛ kúbèle Kolocɔlɔɔ í, niweebèle wóo wi nyɛ. Yele n tɔ̀nɔ n pùuni n léeli.»

Tundunri di kpɔ́ʔɔ n sɔ̀lɔ ti myɛ na lè

(Mat 22:34-40; Luk 10:25-28)

28 # Luk 10:25-28 Làlwaw sɛ́bɛwelewaa maa kári n sa ni be kàkabalagi lúro, a wi gi cán Zyezu n tɔ̀nɔ n sámaga n joo be ma, a wi nùuni Zyezu na n baa wi pye: «Kolocɔlɔɔ tundunrìí di nyɛ ti myɛ yɛ́ʔɛ ma?» 29#Làlw 6:4-5 A Zyezu wi yari: «Wozelidi di nyɛ dee naa:

‹Lóʔo Isirayɛli!

Kàfɔw wi lè wolo Kolocɔlɔw,

woro nibin wi nyɛ Kàfɔw.

30Ki n yɛlɛ mi mɔ Kafɔw Kolocɔlɔɔ kéeli yaʔa

li mɔ dɛ́nɛ ní mɔ zɔnw myɛ ní,

ní mɔ fúngi myɛ ní,

ní mɔ sɔngumi myɛ ní,

ní mɔ bárigaw myɛ ní.›

31 # Lev 19:18 Siin wóri si di nyɛ dee naa, a di jo:

‹Mɔ syɛɛnnyɛnw kéele yaʔa li mɔ dɛ́nɛ

àmɛɛ mɔ miyɛɛ dɛ́nɛ lè.›

Tundunraa nikwɔɔ ní o nyɛ dee naa yɛ́ʔɛ ma í.»

32 # Làlw 4:35 A làlwaw sɛ́bɛweleo wi pye: «Mɔ n tɔ̀nɔ n kányɛʔɛ joo Tamafɔw. Kolocɔlɔɔ i nyɛ nibin, wàa o yaà í, kapye woro nibin ban í. 33#Oz 6:6 Ní syɔɔn ga Kolocɔlɔɔ kéeli yaʔa a li wi dɛ́nɛ ní wi fúngi myɛ ní, ní wi sɔ̀ngumi myɛ ní, ní wi bárigaw myɛ ní, ní wɔ́ɔ̀ wi syɛɛnnyɛnw kéele yaʔa a li wi dɛ́nɛ àmɛɛ wi tiimaa wiyɛɛ dɛ́nɛ lè, gee bee gi sɔ̀lɔ sáriga-sórigow myɛ na n fàra sáriga-wòlori wozanra myɛ na.»

34A Zyezu ga gi nyaa àmɛɛ wi sámaga n joo ní sícilimɛ ní lè, a wi wi pye: «Mɔ ga léeli Kolocɔlɔɔ fǎngi na í.»

Syɔɔn faala ga níì soro bi Zyezu yíbe keelaa na í.

Kirisi ní Davidi

(Mat 22:41-46; Luk 20:41-44)

35Lǎli ni Zyezu da ni syɛ́ɛnbèle tama lè kpɔ̀ʔɔrɔli kpaʔa ni, a wi be yíbe níì jo: «Nyàʔá na làlwaw sɛ́bɛwelebéle gi nyuu níì jo Kirisi i nyɛ Davidi jáa? 36#Ŋún 110:1 Bi gi taa Davidi tiimaa maa gi joo Pìicǎnni báriga ni níì jo:

‹Kàfɔw n gi joo mii Kàfɔw ma níì jo:

Ba tɛ́ɛn mii kàliige ma

fwɔɔ bi taa mii í mɔ nigoobèle cáan,

mɔ si mɔ tɔ́lɔyi taʔa be na.›

37Davidi tiimaa maa Kirisi yeri Kàfɔw. Mɛ̀ɛ́ si wi a gbǎn ní pye wi jaà bi sɛ́ɛ?»

Zyezu n jo syɛ́ɛnmi í da piyɛɛ kɔ̀rɔsíi làlwaw sɛ́bɛwelebéle na

(Mat 23:1-36; Luk 20:45-47)

Syɛ́ɛnmi maa ni Zyezu syɛ́ɛnri lúro ní fundaanra ní.

38A wi i gi nyuu be ma wi tamani ni níì jo: «Yaa yeyɛɛ kɔ̀rɔsíi làlwaw sɛ́bɛwelebéle na, ki n be dɛ́nɛ bàā burogboloyi nii da nyaari, ní wɔ́ɔ i caa syɛ́ɛnbèle í da poro syáanri syɛɛnkpoʔolomi tɛ́ɛyɛ ni. 39Pe i sɔ̀ngí poro í da tɛ̀ɛ́n kòrikpoloyi na sérikpaayi ni, ní wɔ́ɔ i caa bàā tɛ̀ɛ́n kpɔ́ɔmi tɛ́ɛyɛ ni sáā sériw lìile líi, 40ní i lɔgucebèle kɔ́lɔ yárira nɔ̀ʔɔrɔ́ ni líi, ní i Kolocɔlɔɔ nyɛ́ɛri ni mɔngi jàngó bi peyɛɛ dɛ̀ɛn syɛ́ɛnbèle na syɛɛnsinbéle. Bele bee kútii a ba kpɔ́ʔɔ sɔ̀lɔ.»

Lɔgucewaa yakanʔa kéele

(Luk 21:1-4)

41Koro kàdoʔo ma a Zyezu tɛ́ɛn n yɛ́ɛgi le wálile-kásuw ni, ní i syɛ́ɛnmi wéle àmɛɛ bi wáliw nii lè wi ni. Lɔ́ri fɔ̀ɔlɔ saʔa maa ni wálinɛʔɛɔ nii yaà. 42A lɔgucewaa pan n baa támapiigéle siin le yaà. Wi maa pye foomɔfɔlɔ. Ke myɛ bìnɛw i nyɛ tàngáaw tíla félege. 43A Zyezu wi pìitamabèle yeri níì be pye: «Mii a gi joo yele ma kányɛʔɛ ni, nyɔ́ɔgee lɔguca-foomɔfɔw naa le lè kásuw ni, ki n nɛʔɛ n sɔ̀lɔ bele myɛ wóʔo na be le lè wi ni. 44Níì cán poro myɛ n wàa wòlo be wonɛʔɛw ni n le yaà, kàjáa céw naa, wi fóomi ní ki myɛ ní, wi n wi wów myɛ le yaà, lìile lɔ́rɔ ga níì kòro wi ma í.»

Currently Selected:

Mariki 12: CB10

Highlight

Copy