Mariki 11

Zyezu i jǐn Zyerusalɛmi ni

(Mat 21:1-11; Luk 19:28-40; Zyan 12:12-19)

1Lǎli ni be nùuni lè Zyerusalɛmi na n nan Bɛtifazye ní Betanii na yi lè Olivye tíiri nyanbelege taana, a wi wi pìitamabèle pèle siin tun, 2níì be pye: «Yaa syée kěgi yaa ma ki lè yele yɛ́ʔɛ ma ye sa jée gi ni. Yele ga sa ni jǐn terire, yele a jòfanipile nyaa wobwɔɔlɔ ní, lee li nyɛ lè syɔɔn ga kɔ́ɔ̀ lúgu li na í, ye li sánʔa yaa maa. 3Wàa ga yele pye: ‹Nyàʔá na yele gee naa kpéʔele?› Ye wi pye: ‹Kàfɔw wi li caa. Wi ga sáà kwɔ́ɔ, wi a li tórigo naa tɔ́ɔliw ni.› »

4A be kári n zǐn sáà jòfanipili nyaa wobwɔɔlɔ ní kpàánweelaa taana kàlari-kólogi ni, a be li sánʔa. 5Pèle maa pye yaà woyérebéle ní, a poro be pye: «Ba mɛ̀ɛ́ gi nyɛ yele si i jòfanipili sánʔana?»

6A be gi joo be ma àmɛɛ Zyezu da gi joo poro ma lè. A syɛ́ɛnbèle bee fɔ̀lɔ. 7A be kári ní jòfanipili ní Zyezu ma ní sáà be búroyi taʔala li na, á wi tɛ́ɛn li na. 8A syɛ̀ɛnnɛ saʔa i be búroyi cáan kólogi ni, pèle si i wári kúunri séyi ni n ba ni cáan gi ni. 9#Ŋún 118:25-26 A wi yɛʔɛ̀ ma wóbèle ní kàdoʔo ma wóbèle i yákpogèle wáa níì jo:

«Hozanna Kolocɔlɔɔ í dùbaw kpéʔele wee ma

wi maa lè Kàfɔw mɛ́ʔɛ na.

10Wolo tóow Davidi fǎngi gi maa lè,

Kolocɔlɔɔ í gi nyɔɔ.

Kpɔ̀ʔɔrɔli í pye wi ma,

wee wi nyɛ lè nyɛ̀ʔɛni tɛɛ̀leeliye ni!»

11A Zyezu ga nan Zyerusalɛmi na, a wi sáà jée kpɔ̀ʔɔrɔli kpaʔa kàcoolo ni, níì yáriri myɛ wéle n màʔa, ní náà kári Betanii ma cângwɔɔgi nyɔɔ na ní pìitamabèle kɛɛ ní siin ní.

Zyezu n děsyaantiige dánga

(Mat 21:18-19)

12Ki nyǐndaligi na a be yiri Betanii ni, kateegi si maa pye Zyezu na. 13A wi ga děsyaantiige wéle n nyaa léelige ní wara ní, a wi kári sa gi wéle kapye woro a yasanra nyaa gi ni. A wi ga sáà nan gi na, wi ga yafyɛn nyaa gi ni í kapye wári yagana ban í, níì cán děsyaangi làrizanna da kɔ́ɔ̀ nan í. 14A wi tíigi pye: «Ki ga yɛlɛ syɔɔn í ní mɔ yasanga lìi nyáana í!» Gee wi joo lè, a wi pìitamabèle gi lóʔo.

Zyezu i nyɛ kpɔ̀ʔɔrɔli kpaʔa ni

(Mat 21:12-17; Luk 19:45-48; Zyan 2:13-22)

15A pe ga nan Zyerusalɛmi na, a Zyezu sáà jée kpɔ̀ʔɔrɔli kpaʔa ni, níì fala ni yapárabèle ní yasyɔɔbèle nɛnɛ ni yirigi gi ni, níì wálifalibèle tàbalibéle ŋɔrigɔ n cáan cáan n fàra kàtopárabèle kòrigēle na. 16Wi ga fɔ̀lɔ syɔɔn faala í jée foro ní yapáraga ní kpɔ̀ʔɔrɔli kpaʔa ni í. 17#Eza 56:7; Zyer 7:11 A wi be tama níì jo: «Ki maa sɛ́bɛ níì jo: ‹Pe a ra mii kpáagi yiri Kolocɔlɔɔ nyɛ́ɛrigɛ kpaʔa, gee ki a pye lè syɛɛnfeleyi myɛ wóʔo.› Kàjáa yele n baa gi kàriga kàyuubēle tɛɛkòrogo.»

18A sáriga-wòlobèle kàfɔɔlɔ ní làlwaw sɛ́bɛwelebéle ga gee bee lóʔo, a be i kanmaa caa àmɛɛ poro a gi pye sɛ́ɛ lè si wi taa kpóo. Pe si maa ni fɛ̀ɛgí wi na níì cán syɛ́ɛnbèle myɛ maa ni káama wi tamani na.

19A ki ga pye cângwɔɔgi nyɔ́ɔ na, a woro ní wi pìitamabèle yiri kěgi ni n kári.

Zyezu ní děsyaantiigi gi waʔa lè

(Mat 21:20-22)

20Ki nyǐndaligi nyɛ̀ʔɛ nyɔ́ɔ na a pe ga lúru ni sɔ̀lɔ́, a be děsyaantiigi nyaa a gi waʔa ní gi nǐnri myɛ ní. 21A Pyɛri sɔ̀ngi n taa, a wi Zyezu pye: «Tamafɔw, wéle, děsyaantiigi mɔ da dánga lè, ki n waʔa.»

22A Zyezu be pye: «Ki n yɛlɛ ye tága Kolocɔlɔɔ na. 23#Mat 17:20; 1Kor 13:2 Mii a tɔ̀nɔ́ gi joo yele ma kányɛʔɛ ni, syɔ́ɔnwee wi ga nyanbelegi naa pye lè: ‹Yìri nɛɛ bee mi sa too sólomi lòkpɔʔɔ ni,› wi ga pye wi o wiyɛɛ gábala wi fúngi ni í, níì tága gi na ncan gee woro joo lè ki a kpéʔele, ki a wɔ́ɔ kpéʔele wi ma. 24Koro na mii a gi joo yele ma, gee myɛ yele nyuu lè Kolocɔlɔɔ nyɛ́ɛrigi ni, ye tága gi na ki i nyɛ yele wóʔo yele a gi taa. 25#Mat 6:14-15 Yele ga yìri n yére ní i nyɛ́ɛri lǎlee ni lè, kérigèle kèle ga pye yele fúnyi ni syɛ́ɛnbèle pèle kurugo, ki n yɛlɛ ye be kùsulugi syɔɔ. Koro ga pye yele Tóow wi lè nyɛ̀ʔɛni na, wi a wɔ́ɔ ra yele kapeegèle kùsulugo syoo. [ 26Yele ga pye yele o syɛ́ɛnbèle kapeegéle kusulugo syoo í, yele Tóow wi lè nyɛ̀ʔɛni na, wi a wɔ́ɔ ra yele wógèle kùsulugo syoo í.]»

Sán Zyezu fǎngi yìri?

(Mat 21:23-27; Luk 20:1-8)

27A pe ga ní sáà nan Zyerusalɛmi na, a Zyezu sáà jée ni nyaari kpɔ̀ʔɔrɔli kpaʔa ni. A sáriga-wòlobèle kàfɔɔlɔ, ní làlwaw sɛ́bɛwelebéle, ní wolɛɛbèle kári wi ma n sáà wi pye: 28«Wìí wi jo mɔ í ba ra kérigèle naa kpéʔele? Ba wìí wi fǎngi bee kaan mɔ ma mɔ í ba ra ge kpéʔele?»

29A Zyezu be pye: «Mii a yele yíbe yíbege nibin na, yele ga gi syɛɛnlurugori kaan mii ma, mii a wɔ́ɔ gi tɛ̀ɛn yele na fǎngee báriga ni mii kérigèle naa kpéʔele lè. 30Batɛmiw Zyan da ni kpéʔele lè, nyɛ̀ʔɛni na lé wi yìri láà ba fwɔɔ syɛ́ɛnbèle ma wi yìri? Ye gi joo mii ma.» 31A be i peyɛɛ gábala gi na níì jo: «Wolo ga jo nyɛ̀ʔɛni na wi yìri, wi a jo: Nyàʔá si na yele da tága wi na í? 32Wolo si ga zǐn jo syɛ́ɛnbèle má wi yìri, áa…» A be fyáa syɛ́ɛnmi na, níì cán syɛ́ɛnbèle myɛ maa tága gi na ncan Zyan maa tɔ̀nɔ n pye kanyaajooo. 33Lǎli bee ni a be Zyezu yari: «Wolo ga cán í.» A Zyezu be pye: «Fǎngee báriga ni mii kérigèle naa kpéʔele lè, mii a wɔ́ɔ gi tɛɛtaagi tɛ̀ɛn yele na í.»

Currently Selected:

Mariki 11: CB10

Highlight

Copy