Sélimɛ 50

Zyakɔbi kùúgi lele kéele

1A Zyozɛfu fala n too n cíbele wi tóow yɛ́ɛcɔɔlɔ na ni nyaan ní i wi syɔɔnri syɔɔnri. 2Koro kàdoʔo ma a Zyozɛfu gi joo n gbàn wi falipyebèle bele ma be nyɛ lè lɔ̀ʔɔtɔrɔbèle, níì jo pe woro tóow kúcere sámaga ní nùndaanni yáriga ní. A lɔ̀ʔɔtɔrɔbèle Isirayɛli céri sámaga ní nùndaanni yáriga ní. 3A be canya togoye siin pye fáliw bee na. Níì cán cányi bee kánma pe da ni kwóo kúceri sámagala na. A Ezyipiti ye wi kùúgi nyɛnigɛ kpéʔele canya togoye taanri ní kpɔrigɔ fúngo ni.

4A Zyakɔbi kùúgi nyɛnigɛ canya ga foro, a Zyozɛfu joo ní Faraɔnw tɛ́ʔɛ wòolo ní níì be pye: «Kapye mii kéeli n yele dɛ́nɛ, ye sa joo ní Faraɔnw ní mii ma ye wi pye: 5#Sél 47:29-31 ‹Mii tóow maa mii kɔ́ri a mii kàli sáni wi kùu lè níì jo: Mii a kùu, ki si n yɛlɛ mi sa mii tɔ́n nyángi ni, gee mii túgu n yaʔa niyɛɛ ma Kanaan tári ni lè.› Koro na mii i caa bi kári yaà sa mii tóow tɔ́n si lúru pan.»

6A Faraɔnw wi yari: «Da syée mi sa mɔ tóow tɔ́n mi yɛlɛ ní gi ní àmɛɛ wi mɔ kɔ́ri a mɔ kàli wi ma lè.» 7A Zyozɛfu fala n láa ni syée wi tóow tɛɛ̀tɔ́ngɔ ni. A Faraɔnw falipyebèlē myɛ pínɛ n kári ní wi ní, n fàra Faraɔnw tɛ́ʔɛ wólɛɛbéle, ní Ezyipiti tári wolɛɛbèlē myɛ na. 8A Zyozɛfu kpáagi wòolo myɛ kári, n fàra wi yɛʔɛfɔbèle ní wi tóow kpaʔa wòolo na. Be pìíbèle, ní be yaweeyiligèle, ní be yaweekpologèle yagana pe da yaʔa yaà Gosyɛn tɛ́nɛmi ni. 9A wòtorobéle fɔɔlɔ ní syɔɔnyɔ fɔ̀ɔlɔ wɔ́ɔ̀ pínɛ n kári ní Zyozɛfu ní, a be tɔ̀nɔ n pye syɛɛnnɛʔɛmɛ.

10A pe ga sáà nan Atadi kàsyɔɔgi na ki lè Zyuridɛnw jelige na, a be kùúgi nyɛnigɛ kpéʔele yaà beè n nyɛni gbanʔama. A Zyozɛfu wi tóow kùugo nyɛnigɛ kpéʔele canya kɔrɔsiin fúngo ni. 11A Kanaan tári syɛ̀ɛnnɛ ga kùúgi bee nyɛnigɛ nyaa Atadi kàsyɔɔgi na, a be jo: «Wéle, kùúgi naa kéele n kpɔ́ʔɔ Ezyipiti ye ma dɛ!»

Koro na be tɛ́ɛgi bee mɛ́ʔɛ le ni gi yiri Abɛli-Misirayimi#50:11 Abɛli-Misirayimi: Mɔ ga lóʔo Abɛli-Misirayimi, Heburu-syɛ́ɛnrɛ dii, ti kɔ́rɔw wi nyɛ Ezyipiti ye kùu káyaagi.. Tɛ́ɛgi bee i nyɛ Zyuridɛnw jelige na.

12A Zyakɔbi jáabèle gi kpéʔele n yɛlɛ ní gi ní, gee be tóow da joo n gbàn be ma lè. 13#Kap 7:16 A wi jáabèle wi láa n kári Kanaan tári ma n sáà tɔ́n Makpela ségi nyanbeweʔe ni, ségee Abirahami da syɔɔ lè Efurɔn ma wi lè Hɛti ye wów. A gee bee pye kútɔndɛʔɛ Mamire taana.

14A Zyozɛfu ga wi tóow tɔ́n n kwɔ́ɔ, a wi lúru n kári Ezyipiti ma, woro ní wi senyɛnbèle ní, n fàra bele myɛ na pe da pínɛ n kári ní wi ní lè wi tóow tɛɛ̀tɔ́ngɔ ni.

Zyakɔbi kùúli kàdoʔo ma kéele

15Lǎli ni Zyozɛfu senyɛnbéle gi nyaa lè ncan poro tóow n kùu n kwɔ́ɔ, a be jo: «Dɔ̀ʔɔ́ Zyozɛfu a ba yìri wolo kurugo bi kapeeli gɔ̀lɔ́ wòlo wolo na, lee wolo kpéʔele wi na lè.» 16Lǎli bee ni a be tun Zyozɛfu ma n gi joo wi ma níì jo: «Sáni mɔ tóow í kùu lè, wi maa syɛ́ɛnri naa joo n gbàn níì jo: 17‹Ye sa Zyozɛfu pye mii n jo: Ki n yɛlɛ mi mɔ senyɛnbèle kakologo ní be kapeeli kùsulugo syɔɔ. Níì cán pe n tɔ̀nɔ n kapeʔe pye mɔ na.› Koro na tɔ́ɔliw ni doò, ki n yɛlɛ mi mɔ tóow Kolocɔlɔɔ falipyebèle kapeʔe kusulugo syɔɔ.» Lǎli ni pe joo ní Zyozɛfu ní kánmi bee na lè, a wi nyɛni. 18A wi yɛʔɛfɔbèle tiimaa pan n baa too wi taana níì wi pye: «Wolo wéle bele, wolo i nyɛ mɔ púlobéle.» 19A Zyozɛfu si be pye: «Yele a kɔ́ ra fɛ̀ɛgí í. A mii i nyɛ lé Kolocɔlɔɔ sìndɛɛgi ni? 20Yele maa gi tímana bi kapeʔe kpéʔele mii na, a Kolocɔlɔɔ si gee bee kàriga n pye kacànna, bi yɛlɛ ní gi ní àmɛɛ gi nyɛ lè níjanʔa koro ga pye bi syɛɛnnɛʔɛmɛ syɔɔ kùu ma. 21Koro na tɔ́ɔliw ni ki ga yɛlɛ yaa fɛ̀ɛgí í. Mii a ra yele màkow myɛ nyɔɔgi n fàra yele pìíbèle wóo na.» A wi be kpɛʔɛlɛ n be fúnyi tìrige.

22A Zyozɛfu tɛ́ɛn Ezyipiti ni, woro ní wi tóow kpaʔa wòolo ní. Wi sìíw yɛ̀ʔɛlɛ nyɔ́ɔ n pye dabata ní kpɔrigɔ. 23Zyozɛfu n Efirayimi pìíbèle pìinyanbiiye pìibēle nyaa. Manase pìíw wi lè Makiiri, a woro pìíbèle wɔ́ɔ baa see wi nyɛnɛ na.

24A Zyozɛfu gi joo wi senyɛnbèle ma níì be pye: «Mii a kùu, kàjáa Kolocɔlɔɔ a tɔ̀nɔ́ pan ba yele wéle si yele yirige tári naa ni. Táree nyɔ́ɔ wi fàli Abirahami, ní Izaaki, ní Zyakɔbi ma ní kàliya ní lè, wi a sa yele lége di ni.» 25#Yir 13:19; Zyoz 24:32; Heb 11:22 A Zyozɛfu Isirayɛli pìíbèle kɔ́ri pe kàli woro ma níì jo: «Kolocɔlɔɔ a tɔ̀nɔ́ pan ba yele wéle. Ki si n yɛlɛ yele ga ni syée ye mii kaceleyi láa nɛɛ naa yaa syée.»

26A Zyozɛfu ga taa yɛ̀ʔɛlɛ dabata ní kpɔrigɔ, a wi kùu. A be wi kúceri sámaga ní nùndaanni yáriga ní, níì wi le kútɔn-kásu ni yaà Ezyipiti ni.

Currently Selected:

Sélimɛ 50: CB10

Highlight

Copy