Sélimɛ 49

Zyakɔbi n wi jáabèle nyɛ̀ʔɛnaw kéele joo

1A Zyakɔbi wi jáabèle yeri níì be pye: «Ye kpóʔoro naa mii ma. Gee ki a ba pye yele na lè nyɛ̀ʔɛna, mii a ba gi joo tɛ̀ɛn yele na.

2Ye kpóʔoro naa ye ba lóʔo,

Zyakɔbi jáabèle.

Ye yele líiyi cáan ye yele tóow Isirayɛli syɛ́ɛnri lóʔo.

3Wurubɛn, mɔ wi nyɛ lè mii pìilɛɛw,

mii bárigaw ní mii fǎngi yaselige gi nyɛ mɔ.

Mɔ n sɔ̀lɔ pe myɛ na kpɔ́ɔmi kàbaan na,

n wɔ́ɔ̀ sɔ̀lɔ be na séew kàbaan na.

4Mɔ i nyɛ àmɛɛ lɔ̀ʔɔ nyɛ lè,

gee gi tugu ni yìrigí lè,

mɔ a gbǎn yɛʔɛmaw taa í.

Níì cán mɔ n lúgu mɔ tóow yasinɛgɛ na.

Mɔ n tɔ̀nɔ n mii yasinɛgi nɔ́nʔɔ àmɛɛ mɔ lúgu gi na lè.

5Simeyɔn ní Levii i nyɛ senyɛ̀nnɛ.

Pe ŋɔséebèle i nyɛ yapeeye.

6Mii fúngi a kɔ́ pínɛ ní be ní pe làra-mí-jooli kpóʔorolo ni í.

Mii sɔ̀nguri a kɔ́ pínɛ ní be syɛɛnkpoʔolomi ni í.

Níì cán pe fundanʔaratɔw n nànbēle kpóo.

Pe n náapɛʔɛlɛ kadoʔo ma

kápangboloyo cɛnɛ

pe líiweepɛɛnni báriga ni.

7Pe fundanʔari n yɛlɛ ti dánga àmɛɛ di pee lè,

pe fundanʔagbɔɔri í dánga àmɛɛ di gbàn lè.

Mii a be wàli bi láʔa peyɛɛ na Zyakɔbi ni.

Mii a be cariga bi màʔa Isirayɛli ni.

8Zyuda, mɔ mɔ senyɛnbèle a ba ra kpɔ́ʔɔgi.

Mɔ a ba mɔ kɔ́gi taʔa mɔ nigoobèle kànyáabéle na.

Mɔ senyɛnbèle a ba ra tíri da tuun bàā be yɛ́ɛyi cíbele mɔ taana.

9 # Cór 24:9; Tɛ̀ɛn 5:5 Zyuda i nyɛ càarabɔ-yɛlɛɔ.

Dóō, mɔ n yìri kpóoli tɛ́ʔɛ ma n lúru ni maa.

Wi n yégunri cáan,

wi n tìgi n sínɛ

àmɛɛ càarabɔlɔ nyɛ lè,

ní àmɛɛ càarajaa nyɛ lè.

Wìí syɔ́ɔn wi a wi yìrige?

10Fǎngi kàgbeele a tée yiri Zyuda narigi ni í.

Kùndigiri sàbinnɛ a wɔ́ɔ yiri wi tɔ́lɔyi lariga ni í.

Fwɔɔ bi taa li Kàfɔw í pan.

Woro wee má syɛɛnfeleyi a ba yiyɛɛ gaan lè.

11Wi i wi jòfaniw pwoo ɛrɛzɛn tírigi na,

ní i wi jòfanicaagi pyà pwoo ɛrɛzɛn tíricǎngi na.

Wi i wi búrogi jé dùvɛɛnw ni,

ní i wi burogbɔɔgi jé ɛrɛzɛnw sìsyaan ni.

12Dùvɛɛnw n wi nyapiigèle nyɛ́nɛgɛ,

á nɔ́nɔw wi gǎngèle fílige.

13Zabulɔn a tɛ́ɛn sólomi lòkpɔʔɔ nyɔ́ɔ na.

Wi a pye bàtobèle tɛɛ̀yérege nyɔ́ɔ na

wi láʔagologi a kári fwɔɔ sa nan Siidɔn nyɔ́ɔgi na.

14Isakari i nyɛ jòfanikpɔʔɔ,

gee gi sínɛ jásaabéle siin nínge ni lè.

15Wi maa gi nyaa ŋɔ́ndaali tɛ́ʔɛ n tɔ̀nɔ n nyɔɔ.

Níì tári nyaa a di tɔ̀nɔ n tɛ́nɛ.

Wi i wi fókaannyungi nii túgori láara ni.

Wi n pye puloo ni pɔ́rɔtɔɔri kpéʔele.

16Dan a ba ra kútiiw kúunri wi syɛ́ɛnbèle na

àmɛɛ Isirayɛli syɛɛnfeleyi wozanya nyɛ lè.

17Dan a pye wàbiga kologo nyɔ́ɔ na,

wi a pye màátɔn kobile ni,

bàā syɔ́ɔnyi nɔngi yédeleegèle na

fwɔɔ bi syɔɔnfǎnw láʔa cáan wi too bi càli.

18Ee Yawe, syɔɔli mɔ kaangi lè,

loro li nyɛ mii sɔ̀ngumi tɛɛtaʔaga.

19Gee si gi Gadi kéeli kwɔ́ɔ lè,

kapɛɛnkpumɔnbéle kabiga a tǐn pan ba too wi na,

wi si a tǐn yìri bi be kɔ́ri láa.

20Azɛɛri yaliiri a ra nɛʔɛgi.

Fànʔafɔlɔ yaliicànra a ra taagi wi ma.

21Nɛfitalii i nyɛ àmɛɛ sɔ̀ɔ nyɛ lè,

wee be yaʔa wiyɛɛ ma lè.

Wi i pìicànbēle sii#49:21 pìicànbēle sii: Syɛ́ɛnri naa a wɔ́ɔ gbǎn jo, wi i syɛɛntaanri nyuu..

22Zyozɛfu i nyɛ tiisanga káganfolovɔngɔ,

tiisanga káganfolovɔngɔ,

gee gi nyɛ lè pùnweele nyɔ́ɔ na,

káganyi n yìri gungo ǹjoʔo ni.

23Sedeyi fɔ̀ɔlɔ n wi ŋɔ́n,

pe n wi ŋɔɔn.

Pe n pye wi kàsiitun-nyɛ̀nnɛ.

24Kàjáa wi sedegi n sèʔê kòro ki kanlɛɛmi na.

Fǎngee gi pye wi kɔ́yi ni lè,

gee bee n taa

Zyakɔbi Séekpɔɔw Fɔ́lɔ kɔ́yɔ báriga ni.

Kánmi bee na wi baa pye bànaʔaw,

wi lè Isirayɛli fálagi.

25Mɔ tóow Kolocɔlɔɔ bárigaw ni,

woro wee wi nyɛ lè mɔ dɛɛmɛfɔw,

Séew Myɛ Kàfɔlɔ báriga ni,

woro wee wi a dùbaw taʔa mɔ na lè

dùbawee wi yìrigí lè nyɛ̀ʔɛni ma,

ní dùbawee wi yirigi lè weekpɔɔ-cùrugi ni,

yíregèle na be ŋɔri lè koro dùbaw,

ní nafɔlɔ láagi dùba.

26Dùbawee mɔ tóow kaangi lè,

wi n sɔ̀lɔ mii seefɔbèle wóo na,

fwɔɔ n sáà nan bàngwɔɔ dǎndamayi ǹjoyo na.

Wi n yɛlɛ wi pye Zyozɛfu nyúngi ni.

Wi nyùnlibiw ni,

woro wee wi nyɛ lè wi yɛʔɛfɔbèle fànʔafɔbile.

27Bɛnzyamɛ i nyɛ solomikaʔa,

gee gi káari sulugu ni cáan lè.

Ki ga pye nyǐngi nyɔ́ɔ na,

káaree wi cò lè,

wi n ni dee bee káa.

Ki ga pye cângwɔɔgi nyɔ́ɔ na,

pe n yáriri lɛɛ,

dee be taa kapɛɛnni na lè.»

28Poro myɛw be nyɛ Isirayɛli syɛɛnfeleyi kɛɛ ní siin. Syɛ́ɛnri bee si be tóow joo be ma lǎli ni wi da ni dùbaw kpéʔele be ma lè. Wi n dùbaw kpéʔele pe myɛ nibin nibin ma feleye feleye n yɛlɛ ní be kánmi ní.

Zyakɔbi kùúw kéele

29Koro kàdoʔo ma a wi gi joo n gbàn be ma níì jo: «Mii a kùu bi fàra mii tóolɛɛbèle na. Ki si n yɛlɛ ye sa mii tɔ́n mii tóolɛɛbèle taana, Efurɔn wi lè Hɛti ye wów, woro ségi nyanbeweʔe ni, 30#Sél 23:3-20 nyanbeweegi ni ki nyɛ lè Makpela ni, Mamire taana Kanaan tári ni. Abirahami wi da nyanbeweegi bee ní ségi syɔɔ Efurɔn ma, wi lè Hɛti ye wów, n gi pye woro kútɔndɛʔɛ. 31#Sél 25:9-10; 35:29 Nɛɛ bee be Abirahami tɔ́n n fàra wi céw Sara na, ní wɔ́ɔ baa Izaaki ní wi céw Erebeka tɔ́n yaà. A mii wɔ́ɔ baa Leya tɔ́n yaà. 32Ségi ní nyanbeweegi gi yaà gi ni lè, pe n gee bee syɔɔ wáli na Hɛti ye ma.»

33 # Kap 7:15 Lǎli ni Zyakɔbi kwɔ́ɔ syɛ́ɛnri na wi joo n gbàn wi jáabèle ma lè, a wi wi tɔ́lɔyi lúrugo n taʔa yasinɛgi na, á pǐli yiri wi ni. A wi kùu n fàra wi toolɛɛbèle na.

Currently Selected:

Sélimɛ 49: CB10

Highlight

Copy