Sélimɛ 44

Zyozɛfu n wi senyɛnbèle sɛʔɛ n wéle

1A Zyozɛfu syɛ́ɛnri naa joo n gbàn wi kpáagi kakarigaɔ ma níì wi pye: «Syɛ́ɛnbèle naa gɔ̀nvaʔaya nyìn lìíli na, lee pe a gbǎn tugo lè, mí pe myɛ nibin nibin wáli lúrugo mi le be ma pe gɔ̀nvaʔayi ni. 2Mii yagbaali li lè wálifiiw yagbaala, mi loro le wobili gɔ̀nvaʔaga ni ní wi bilesyɔɔ-wáliw ní.» Gee Zyozɛfu joo lè, a kpáagi kakarigaɔ gi kpéʔele. 3Koro nyǐndaligi na, lǎli ni gbɛ̀ɛ́nmi cèlege lè, a be syɛ́ɛnbèle bee yaʔa a be i syée ní be jòfanibèle ní. 4Lǎli ni pe yiri kěgi ni lè pe si da kɔ́ɔ̀ léeli í, a Zyozɛfu gi joo wi kakarigaw ma níì wi pye: «Yìri maa syée syɛ́ɛnbèle bee kurugo. Mɔ ga sáà be nɛnɛ n cò, mi be pye: ‹Nyàʔá na yele kapeele tɛ́ʔɛ n kacǎnni sàra? 5Yagbaali bee ni ban mii kàfɔw gbo, ní i nyɛ̀ʔɛna kérigèle wéle ni nyuu li ni ì? Yele n kapeʔe pye dɛ.› »

6A kakarigaw taʔa be na n sáà be nɛnɛ n cò níì syɛ́ɛnri bee joo be ma. 7A be wi yari: «Wo kàfɔw, nyàʔá na mɔ dee naa nyuu? Mɔ falipyebèle a fɔ̀lɔ́ kéeli bee félege kpéʔele í. 8Wéle, wáliw wolo sáà nyaa lè wolo gɔ̀nvaʔayi ni, wolo n yìri yaà ní wi ní Kanaan tári ma n pan ní wi ní mɔ ma. Mɛ̀ɛ́ si wolo a gbǎn wálifiio wàlá tɛɛ̀ yùu mɔ kafɔw kpaʔa ni bi sɛ́ɛ? 9Yárigi ga nyaa mɔ falipyewee ma lè wolo ni, wee bee n yɛlɛ wi kùu, wolo wozanbèle si pye wolo kàfɔw púlobéle.» 10A wi be yari: «Mii n yele wojoogi lóʔo, kàjáa yárigi ga nyaa wee ma lè, wee bee a pye mii púlo, yele wozanbèle si syɔɔ.»

11A pe myɛ nibin nibin fala n be gɔ̀nvaʔayi tìrige n tɛ́ʔɛ tári na níì yi múgu. 12A kakarigaw séli yɛʔɛfɔlɛɛw wóʔo na ni fuguri ni syée fwɔɔ n sáà nan pe cɔnɔzanw wóʔo na. A yagbaali sáà nyaa Bɛnzyamɛ gɔ̀nvaʔagi ni. 13A be búroyi sulugu n láʔala peyɛɛ na, á pe myɛ níì túgori taʔa pe jòfanibèle na n lúru n jée kěgi ni.

Zyuda n kùsulugo kpéʔele Bɛnzyamɛ kéeli na

14A Zyuda ní wi senyɛnbèle kári n sáà nan Zyozɛfu kpáagi na. Wi si maa sèʔê pye yaà. A be tìgi n too tári na wi yɛʔɛ̀ ma. 15A Zyozɛfu be yari: «Nyàʔá na yele kéeli naa kpéʔele? Yele ga tɔ̀ʔɔ̂ gi cán ncan syɔɔn ga pye mii félege, wi n gbàn ni kérigèle nyaagi ni nyuu ì?» 16A Zyuda jo: «Nyàʔá wolo a gbǎn cán bi joo mii kàfɔw mɔ ma? Gìí wolo a joo? Kanmìí na wolo a gbǎn joo bi woyɛɛ fílige? Kolocɔlɔɔ n mɔ falipyebèle sìnzinmɛ kéele nyaa. Wolo wéle bele, wolo i nyɛ mɔ púlobéle n fàra wee na, wee má yagbaali nyaa lè, ni kàfɔlɔ.» 17A Zyozɛfu jo: «Mii ga yɛlɛ bi kéeli bee kpéʔele í. Wee má yagbaali nyaa lè, woro wi a pye mii púlow. Yele si na, yaa syée yɛɛ̀nyinge na yele tóow ma.»

18Lǎli bee ni a Zyuda nùuni wi na níì jo: «Ni kàfɔlɔ, mii wi lè mɔ falipyew, nyɔɔ mii na, mí gi yaʔa mii í syɛɛnraa joo mɔ ma, mɔ fúngi si a kɔ́ tanʔa mii kurugo í. Ncan mɔ i nyɛ sèjira ní Faraɔnw ní. 19Ni kàfɔlɔ, wolo wo nyɛ lè mɔ falipyebèle, mɔ maa wolo yíbe níì jo: ‹A tofɔlɔ ní cɔnɔvɔlɔ i yaà lé yele ma?› 20A wolo mɔ yari, ni kàfɔlɔ: ‹Wolo tóow i yaà, wi n tɔ̀nɔ n lɛɛ. Ní wɔ́ɔ̀ mɔ pye cɔnɔvɔlɔ i yaà. Wolo tóow n wee bee see wi lɛɛgwɔɔri làla ni. Pìíw bee yɛʔɛfɔlɔ si n kùu, á woro nibin kòro wi nɔ́ɔw seemɛ ni. Wi kéeli n tɔ̀nɔ n tofɔw dɛ́nɛ.› 21#Sél 42:15 A mɔ si gi joo wolo ma wo nyɛ lè mɔ falipyebèle níì jo: ‹Yaa maa ní wi ní mii ma nɛɛ naa koro ga pye mii tiimaa nyapile í ba taʔa wi na.› 22A wolo mɔ yari, ni kàfɔlɔ: ‹Nìgɔcaripili a gbǎn láʔa li tóow na í. Li ga láʔa wi na, wi a kùu.› 23#Sél 43:3-5 A mɔ si gi joo wolo ma wo nyɛ lè mɔ falipyebèle níì jo: ‹Yele cɔnɔw ga pye wi ga pínɛ n pan ní yele ní í, mii a ní kɔ́ yele yɛ́ɛyi nyaa í.› 24Lǎli ni si wolo lúru n nan mɔ falipyew na lè wi lè wolo tóow, syɛ́ɛnree mɔ joo lè, a wolo sáà di joo wi ma, ni kàfɔlɔ. 25A wolo tóow si níì wolo pye: ‹Yaa syée ye sa yaliire cɛɛri syɔɔ wo kéeli na.› 26A wolo si wi yari: ‹Wolo a gbǎn kári í. Fwɔɔ wolo cɔnɔw ga ni syée ní wolo ní, wolo a náa gbǎn kári. Níì cán wolo a ní gbǎn nǎnw bee yɛ́ʔɛ nyaa í, kapye wolo cɔnɔw o nyɛ ní wolo ní í.› 27Wolo tóow wi lè mɔ falipyew, a wi wolo pye: ‹Yele n gi cán pìibēle siin mii céw Arasyɛli see mii ma. 28Pe wàa nibin si n yiri mii taana n kári, a mii tɔ̀nɔ n jo kàkabalaga o nyɛ gi ni í, yaweegaa gi wi cò n sulugu sulugu. Mii si ga wɔ́ɔ níì wi nyaa nyáana í, 29yele si ga níì wee naa syɔɔ mii ma n kári, yarigaa ga sáà wi taa kólogi na, yele a tɔ̀nɔ́ mii ǹjoofiiretɔw lége kúsegi ni ní wɔʔɔgɔ ní.›

30Tɔ́ɔliw ni mii ga lúru n sáà nan mii tóow na, wi lè mɔ falipyew, nìgɔcaripili ga pye li o nyɛ ní wolo ní í, bi gi taa wi fúngi maa tɔ̀nɔ n pwɔɔ pìíw wóʔo na, 31wi ga sáà gi nyaa pìíw o nyɛ ní wolo ní í, wi a tɔ̀nɔ́ kùu. Mɔ falipyebèle be lè wolo, wolo a gi kaan wolo tóow ǹjoofiiretɔɔ í jée kúsegi ni ní wɔʔɔgɔ ní, wi lè mɔ falipyew. 32N fàra gee bee na, mɔ falipyew wi lè mii, mii n niyɛɛ nyúngi fàli pìíw wóʔo na mii tóow ma níì wi pye: ‹Mii ga pye mii ga lúru n pan ní pìíw ní í, ki n yɛlɛ mi mii córo kolomɔ fɔ́lɔ làla o làla.› 33Tɔ́ɔliw ni, mii i mɔ nyɛ́ɛri, mi gi yaʔa mɔ falipyew wi lè mii, mii í kòro naa pìíw sìndɛʔɛ ni bi pye mɔ púlo, ni kàfɔlɔ. Mí pìíw yaʔa waa syée ní wi senyɛnbèle bele ní. 34Níì cán kanmìí na mii a gbǎn kári sɛ́ɛ mii tóow ma nìgɔcaripili kàdoʔo na? Ee! Ki ga yɛlɛ mii í tɔ̀nɔ́ mii tóow wɔʔɔgɔ yɛ́ʔɛ nyaa í.»

Currently Selected:

Sélimɛ 44: CB10

Highlight

Copy