Sélimɛ 35

Zyakɔbi n yiri Sisyɛmi ni bi sa tɛ́ɛn Betɛli ni

1 # Sél 28:11-17 A Kolocɔlɔɔ gi joo Zyakɔbi ma níì jo: «Yìri maa lúru Betɛli ma mi sa tɛ́ɛn yaà beè, mí sáriga-wòlo-yafanʔa kpéʔele yaà beè Kolocɔlɔɔ ma, woro wee wi da wiyɛɛ dɛ̀ɛn mɔ na lè, lǎli ni mɔ da ni fé mɔ senyɛnw Ezau na lè.»

2A Zyakɔbi gi joo wi kpáagi wòolo ma n fàra bele myɛ na pe da pye ní wi ní lè níì jo: «Ye kolocɔlɔɔ-nibɔnbèle yirige yeyɛɛ níngi ni, ye yeyɛɛ jée ye mùnu, yé yele búroyi fàli. 3Wolo a yìri bi lúgu kári Betɛli ma. Mii a sa sáriga-wòlo-yafanʔa kpéʔele yaà beè Kolocɔlɔɔ ma, woro wee wi mii nyɛ́ɛrigi lóʔo lè mii wɔʔɔgi làla ni, níì pye ní mii ní tánʔani làla ni, lee mii kpéʔele lè.»

4Kolocɔlɔɔ-nibɔnbèle be pye be ma lè, a be bele bee myɛ kaan Zyakɔbi ma n fàra be líiyi vèʔebēle na. A Zyakɔbi di tɔ́n terebɛnti tíigi láara ni ki lè Sisyɛmi taana. 5A be yìri beè n kári. A Kolocɔlɔɔ fyáakpɔɔrɔ wáa kěyi syɛ̀ɛnnɛ na, yee yi be màʔa lè, pe ga fɔ̀lɔ n yiri n taʔa Zyakɔbi jáabèle na ni nɛnɛ í.

6Zyakɔbi ní bele myɛ pe da pye ní wi ní lè, a be kári fwɔɔ n sáà nan Luzi na, ki lè Betɛli, Kanaan tári ni. 7A wi sáriga-wòlo-yafanʔa faan yaà níì tɛ́ɛgi bee mɛ́ʔɛ le ni gi yiri Ɛli-Betɛli#35:7 Ɛli-Betɛli: Mɛ́ɛgi naa kɔ́rɔ i nyɛ Betɛli Kolocɔlɔw.. Níì cán nɛɛ bee Kolocɔlɔɔ da wiyɛɛ dɛ̀ɛn wi na, lǎli ni wi da ni fé bi syɔɔ wi senyɛnw ma lè.

8Debora wi da pye lè Erebeka gbóofɔw, a woro kùu, a be wi tɔ́n Betɛli tìgimi ni, syɛni tíigi láara ni, á be kòro ni tíigi bee yiri Nyatinmi Syɛni tiige.

9Lǎli ni Zyakɔbi yìri Padan-Arami ma n pan lè, a Kolocɔlɔɔ ní baa wiyɛɛ dɛ̀ɛn wi na, níì dùba taʔa wi na. 10#Sél 32:28 A Kolocɔlɔɔ gi joo wi ma níì jo: «Mɛ́ɛgi bee gi lè Zyakɔbi#35:10 Zyakɔbi Sél 25:26 ní Sél 27:36 wéle., pe a ní da gi yiri mɔ na í, fwɔɔ pe a ra mɔ yiri Isirayɛli.» Níì wi mɛ́ɛgi le kánmi bee na Isirayɛli. 11#Sél 17:4-8 A Kolocɔlɔɔ níì wi pye: «Mii wi nyɛ Kolocɔlɔɔ, wee wi lè Séew Myɛ Kàfɔlɔ. Ki n yɛlɛ kàa í da fàrá mɔ na mɔ í pye syɛɛnnɛʔɛmɛ. Syɛɛnfelegaa, ní syɛɛnfeleye saʔa a yiri mɔ ni. Fànʔafɔɔlɔ a yiri mɔ sémɛɛnni ni. 12Táree mii kaan Abirahami ní Izaaki ma lè, mii a di kaan mɔ ma, si wɔ́ɔ di kaan mɔ yodaʔayi ma naa mɔ kadoʔo ma.»

13Koro kàdoʔo ma tɛ́ɛgee ni Kolocɔlɔɔ joo ní Zyakɔbi ní lè, a Kolocɔlɔɔ núngo tɛ́ɛgi bee ni n lúgu ǹjogi ni n léeli wi na. 14#Sél 28:18-19 Tɛ́ɛgee ni Kolocɔlɔɔ joo ní Zyakɔbi ní lè, a wi kàdɛnɛgɛ gàánna yérige yaà beè, lee na wi sáriga-yólogoo ní sìnmɛ wo lè. 15Tɛ́ɛgee ni Kolocɔlɔɔ joo ní Zyakɔbi ní lè, a Zyakɔbi tɛ́ɛgi bee mɛ́ʔɛ le ni gi yiri Betɛli.

Bɛnzyamɛ seeli ní Arasyɛli kùúw kéele

16A be yiri Betɛli ni ni syée yɛʔɛ̀ ma. A Arasyɛli pìiwaa see. Tɛ́ɛgi bee, ní Efirata níngi si maa sèʔê léeli n yɛlɛ. Pìíw seeganma si maa tɔ̀nɔ n gbàn. 17Lǎli ni Arasyɛli pye seeli na lè ní i wɔʔɔ, a fícɛricow wi pye: «Mɔ a kɔ́ ra fɛ̀ɛgí í, nànbilaa mɔ níì taa.» 18N Arasyɛli yaʔa kúkoliw na, sáni wi ŋɔngari í yiri wi ni lè, a wi pìíw mɛ́ʔɛ le n jo paa wi yiri Bɛn-Onii#35:18 Bɛn-Onii: Bɛn-Onii kɔ́rɔw wi nyɛ wɔʔɔli pyà.. A tofɔw si wi mɛ́ɛgi le n jo paa wi yiri Bɛnzyamɛ#35:18 Bɛnzyamɛ: Bɛnzyamɛ kɔ́rɔw wi nyɛ jaafɔw wi tɛ́ɛn kàliige ma lè.. 19A Arasyɛli kùu, a be wi tɔ́n Efirata kólogi nyɔ́ɔ na. Efirata wi lè Bɛtilehɛmi. 20A Zyakɔbi gàánna yérige wi nyángi na. Gàánni bee li nyɛ Arasyɛli kùúgi gàánna àlí n baa nan níjanʔa na.

21A Isirayɛli taʔa n fala yɛʔɛ̀ ma n sáà wi fànikpaayi kóri Migidali-Edɛɛri màʔami na. 22#Sél 49:4 N Isirayɛli yaʔa tɛ́nɛmi bee ni, a Wurubɛn kári n sáà sínɛ ní Biiliha ní, wi da pye lè wi tóow cefàra-mí-láawaa. A wi tóow Isirayɛli kéeli bee lóʔo.

Zyakɔbi jáabèle maa pye nànbiigéle kɛɛ ní siin. 23Pìíbèle Leya see wi ma lè, poro be nyɛ, Wurubɛn, wi pye lè Zyakɔbi pìilɛɛw, ní Simeyɔn, ní Levii, ní Zyuda, ní Isakari, ní Zabulɔn. 24Bele Arasyɛli see wi ma lè, poro si i nyɛ Zyozɛfu ní Bɛnzyamɛ. 25Arasyɛli falipyecew Biiliha wóbèle si i nyɛ Dan ní Nɛfitalii. 26Leya falipyecew Zilipa wóbèle si i nyɛ Gadi ní Azɛɛri. Poro be nyɛ Zyakɔbi jáabèle, bele wi see Padan-Arami ni lè.

Izaaki kùúw kéele

27 # Sél 13:18 A Zyakɔbi lúru n pan wi tóow Izaaki ma, Mamire ma, Kiiriyati-Haariba taana, gi lè Heburɔn, beè Abirahami ní Izaaki da sáà tɛ́ɛn lè. 28Izaaki maa taa yɛ̀ʔɛlɛ togoye kpanjɛrɛ. 29A Izaaki pǐli yiri, a wi kùu n fàra wi toolɛɛbèle na be kùu lè. Wi maa tɔ̀nɔ n lɛɛ n tín ní náà kùu. Wi jáabèle be lè Ezau ní Zyakɔbi, a poro wi tɔ́n.

Currently Selected:

Sélimɛ 35: CB10

Highlight

Copy