Sélimɛ 34

Simeyɔn ní Levii n be senyɛnjew gɔ̀lɔ́ wòlo

1 # Sél 30:21 Dina wi lè calipili, lee Leya da see Zyakɔbi ma lè, cangaa loro maa yiri n kári tári bee cálipiigéle ma. 2Hamɔri wi lè Hɛvi yòdaʔagaa, ní i nyɛ tɛ́nɛmi kàfɔlɔ, a woro jáaw Sisyɛmi sáà wi nyaa, níì wi cò fànʔa na n sínɛ ní wi ní n wi kálagi. 3A wi tɔ̀nɔ n pwɔɔ Zyakɔbi jáaw Dina na ní wi fúngi myɛ ní. Pìcaaw kéele maa tɔ̀nɔ n wi dɛ́nɛ, a wi syɛɛntaanri jée pìcaaw fúngo ni. 4A Sisyɛmi gi joo wi tóow Hamɔri ma níì jo: «Ki n yɛlɛ mi pìcaaw naa nyɛ́ɛri mi kaan mii ma, mii í wi pɔri.»

5Zyakɔbi si maa gi lóʔo Sisyɛmi n woro pìíw Dina kálagi. Amɛɛ si wi jáabèle da pye sìnbirigi ni ni yaweeri nàʔá lè, wi ga yafyɛn joo í bi taa be lúru pan.

6A Sisyɛmi tóow Hamɔri yiri n kári Zyakɔbi ma bi sa joo ní wi ní. 7Zyakɔbi jáabèle si maa yìri sìnbirigi ni n pan, a pe ga baa syɛ́ɛnri bee lóʔo, a ki be bɛɛn gbanʔama, a be fúnyi tɔ̀nɔ n yìri gbanʔama. Níì cán Sisyɛmi n nɔ́nʔɔrɔ kéele kpéʔele Isirayɛli ni àmɛɛ wi sínɛ ní Zyakɔbi jáaw ní lè. Kéeli bee o nyɛ kpéʔelemɛ nyáana í. 8A Hamɔri si sáà gi joo be ma níì jo: «Yele pìíw kéele n tɔ̀nɔ n mii jáaw Sisyɛmi dɛ́nɛ ní wi fúngi myɛ ní. Mii i yele nyɛ́ɛri ye wi kaan wi ma wi pye wi cɔɔ̀. 9Ki n yɛlɛ ye gi yaʔa wo pínɛ cèpɔrigɔ na, yele í da yele calipiigèle kaangi wolo ma, wolo si wɔ́ɔ ra wolo wógèle kaangi yele ma. 10Yele a pínɛ tɛ́ɛn ní wolo ní, tári si wɔ́ɔ pye yele wóro. Ye tɛ́ɛn naa, yáā jàgiw wáa di ni, jàngó yele í lɔrɔ taa di ni.»

11A Sisyɛmi gi joo pìcaaw tóo ní wi yɛʔɛfɔbèle ma níì jo: «Ki n yɛlɛ ye fɔ̀lɔ mii na. Yárigee faala yele ga jo mii í kaan lè, mii a gi kaan. 12Ye cèpɔri-lɔ́ri tɛ̀ɛn mii na wonɛʔɛrɛ ní n fàra yakaanra saʔa na, gee yele ga joo mii í kaan lè mii a gi kaan. Ye tɛ́nɛ ye pìcaaw kaan mii ma wi pye mii cɔ́ɔ.»

13A Zyakɔbi jáabèle syɛɛnlurugori kaan Sisyɛmi ní wi tóow Hamɔri ma gbánama ni, níì cán Sisyɛmi maa poro cɔnɔw Dina kálagi. 14#Sél 17:12-14 Pe maa gi joo be ma níì be pye: «Bi wolo cɔnɔw kaan sìngɛ́nɛ nàɔn ma, gee bee a gbǎn kpéʔele í. Níì cán gee bee i nyɛ wolo faʔara kéele. 15Mɔ ga lóʔo wolo n fɔ̀lɔ yele na, mi can kéeli naa nibin li kpéʔele, loro li nyɛ, yele nǎnbèle myɛ nibin nibin n yɛlɛ bi kɛ́nɛw kpéʔele bi pye àmɛɛ wolo nyɛ lè. 16Lǎli bee ni wolo a ra wolo pìíbèle kaangi yele ma cèpɔrigɔ na, wolo si wɔ́ɔ ra yele wóbèle pɔri. Wolo si wɔ́ɔ pínɛ tɛ́ɛn ní yele ní wo pye syɛɛnfelege nibin. 17Yele si ga pye yele ga fɔ̀lɔ n lóʔo wolo ma níì kɛ́nɛw kpéʔele í, wolo a wolo calipili kɔ́ri bi kári.»

18A be syɛ́ɛnri tɔ̀nɔ n Hamɔri, ní wi jáaw Sisyɛmi dɛ́nɛ. 19A nìgɔcariw fala n gee bee kpéʔele. Wi ga ní caà yére ni làlaa sige í, níì cán Zyakɔbi jáaw kéele maa pye wi fúngi ni gbanʔama. Wi si maa pye mɛ́ʔɛ fɔ́lɔ wi tóow kpaʔa ni n sɔ̀lɔ pe myɛ na. 20A Hamɔri ní wi jáaw Sisyɛmi kári pe kěgi kpàánweele ma n sáà joo ní be kěgi nànbēle ní níì jo: 21«Bɛ̀ɛlɛ yagana nǎnbèle naa caa li pye wolo ní poro níngi ni. Ki n yɛlɛ be tɛ́ɛn tári ni sáā jàgiw wáa di ni. Tári n tɔ̀nɔ n kpɔ́ʔɔ n yɛlɛ be ma. Wolo a ra be calipiigèle lée wolo càbala, si wɔ́ɔ ra wolo calipiigèle kaangi be ma. 22Kàjáa wolo nǎnbèle myɛ nibin nibin ga pye wo ga kɛ́nɛw kpéʔele àmɛɛ be tiimaw nyɛ lè í, pe a fɔ̀lɔ́ tɛ́ɛn ní wolo ní jàngó wo pye syɛɛnfelege nibin í. 23Wolo ga tɛ́nɛ̀ fɔ̀lɔ pe nyɛnɛ wógi na, pe a pan ba tɛ́ɛn ní wolo ní. Lǎli bee ni pe yaweeri ní be kɔlɔ̀ yáriri myɛ a ba pye wolo wóro ì?»

24Bele myɛ be yiri yaà kěgi kpàánweele ma lè, a be fɔ̀lɔ Hamɔri ní wi jáaw Sisyɛmi syɛ́ɛnri na. Nǎnbèle myɛ be yiri yaà kěgi kpàánweele ma lè a be kɛ́nɛw kpéʔele. 25A ki ga pye candaanri wógi na, lǎli ni syɛ́ɛnbèle myɛ pye wɔʔɔgi na lè, Zyakɔbi pìíbèle bele siin be lè Simeyɔn ní Levii, be pye lè Dina yɛʔɛfɔbèle, a poro be ŋɔséebèle láa n sáà jée kěgi ni n gi yaʔa wàa ga sàmi í n nǎnbèle myɛ kpóo. 26A be wɔ́ɔ̀ Hamɔri ní wi jáaw Sisyɛmi kpóo níì be cɔnɔw Dina kɔ́ri n yirige Sisyɛmi kpáagi ni n kári.

27A Zyakɔbi jáabèle sáà kúbèle ní kěgi lɔ́rɔ myɛ fuguri, níì cán pe maa poro cɔnɔw kálagi. 28A pe be yaweeyiligèle cò n fàra be yaweekpologèle, ní be jòfanibèle na, ní kěgi fúngo yárira myɛ ní n fàra séyi wóro na. 29Pe maa be lɔ́ri myɛ koli, ní wɔ́ɔ̀ be pìíbèle ní be cébèle cò n kári n fàra yáriri myɛ na di pye kpáayi ni lè.

30A Zyakɔbi gi joo wi pìíbèle ma, be lè Simeyɔn ní Levii, níì jo: «Yele n tɔ̀nɔ n funjurugoro wáa mii na, ní wɔ́ɔ̀ gi kaan mii kéeli í tári naa syɛ̀ɛnnɛ bɛɛn, be lè Kanaan ye, ní Perezi ye. Pe a kpóʔoro pan ba kapɛɛnni kpúmɔn ní mii ní bi mii ní mii kpáagi wòolo kálagi, níì cán mii syɛ́ɛnbèle ga nɛʔɛ í.» 31A pe be tóow yari: «A ki da yɛlɛ lé pe wolo cɔnɔw kpéʔele àmɛɛ nànjaacɔɔ̀ nyɛ lè?»

Currently Selected:

Sélimɛ 34: CB10

Highlight

Copy