Sélimɛ 33

Zyakɔbi ní Ezau n peyɛɛ vàra

1A Zyakɔbi wi yɛ́ɛgi yìrige n wéle n Ezau nyaa wi i maa ní nǎnbèle saala siin ní. A wi fala n pìíbèle tíla tíla n kaan Leya, ní Arasyɛli, ní falipyecebèle siin ma. 2Wi maa falipyecebèle ní be pìíbèle kínige yɛʔɛ̀ ma, níì Leya ní wi pìíbèle taʔa bele bee na, ní náà Arasyɛli ní Zyozɛfu yaʔa a be pye pe myɛ kàdoʔo ma. 3A woro tiimaa kíni yɛʔɛ̀ ma ni kpùmɔnɔ́ tári na n baa taa tɔlɔyɔ kɔrɔsiin, fwɔɔ n taa n sáà nùuni wi senyɛnw na. 4A Ezau fàn n wi fàra, ní baa wi wáa n mígi yátiigi ni, níì wi syɔɔnri syɔɔnri. A be i nyaan. 5A Ezau ga wi yɛ́ɛgi yìrige n wéle n cébèle ní pìíbèle nyaa, a wi Zyakɔbi yíbe níì jo: «Bɛ̀lɛ́ be nyɛ bele ní mɔ ní?» A Zyakɔbi wi yari: «Pìíbèle bele Kolocɔlɔɔ kaan mɔ falipyew ma lè, poro bɛɛ.»

6A falipyecebèle nùuni yaà ní be pìíbèle ní n sáà tìgi n kpùmɔnɔ. 7A Leya ní wi pìíbèle wɔ́ɔ̀ nùuni wi na n sáà tìgi n kpùmɔnɔ. Koro kàdoʔo ma a Zyozɛfu ní Arasyɛli nùuni wi na n sáà tìgi n kpùmɔnɔ. 8A Ezau jo: «Kabiyi bee myɛ ní mii fàra lè, nyàʔá mɔ caa bi kpéʔele ní yoro ní?» A Zyakɔbi jo: «Dee bee i nyɛ jàngó mɔ í fɔ̀lɔ mii na, ni kàfɔlɔ.» 9A Ezau jo: «Yanɛʔɛrɛ i nyɛ mii ma n kwɔ́ɔ, ni senyɛnnɛ, ki n yɛlɛ mi kòro ní mɔ wóri ní.» 10A Zyakɔbi jo: «Eʔe, mii i mɔ nyɛ́ɛri, kapye mɔ n fɔ̀lɔ mii na, ki n yɛlɛ mi mii kpɔ́ʔɔri syɔɔ, níì cán àmɛɛ mii ní mɔ baa woyɛɛ nyaa lè, ki n pye mii ma àmɛɛ syɔɔn Kolocɔlɔɔ yɛ́ɛgi nyaa lè, á mɔ mii fàra ní fundaanra ní. 11Koro na kpɔ́ʔɔri mii tórigo mɔ ma lè, mii i mɔ nyɛ́ɛri, ki n yɛlɛ mi di syɔɔ. Níì cán Kolocɔlɔɔ n nyɔɔ mii na, a yáriri myɛ i nyɛ mii ma, dee màko wi nyɛ mii na lè.»

A Zyakɔbi wári Ezau na, a wi kɔ́ɔ̀ di syɔɔ. 12A Ezau Zyakɔbi pye: «Kàwáa wo kólogi láa wo pínɛ waa syée. Mii a kíni mɔ yɛ́ɛgi na.» 13A Zyakɔbi wi yari: «Ni kàfɔlɔ, mɔ n gi cán pìíbèle fànʔa ga nɛʔɛ í, á yaweeyiligēle ní yaweekpologèlē si i nyɛ ní mii ní dee di pìibēle kaangi pe i ŋɔri lè, syɔɔn ga di ŋàʔana a di canʔa nibin tánʔana kpéʔele yaweeyiligèle myɛ a kùu. 14Ni kàfɔlɔ, ki n yɛlɛ mi kíni maa syée mɔ falipyew yɛ́ʔɛ na wi lè mii, mii a ra táanri da syée yaweeri kurugo yɛrirɛ bi yɛlɛ ní yaweeri, ní pìíbèle tánʔaganma ní bi taa sa nan mɔ na Seyiiri tári na, ni kàfɔlɔ.»

15A Ezau jo: «Mi gi yaʔa mii í mii syɛ́ɛnbèle pèle tíla yaʔa naa ní mɔ ní.» A Zyakɔbi wi yari: «Nyàʔá na mɔ a náa koro kpéʔele? Ki n yɛlɛ mɔ í tɛ́nɛ fɔ̀lɔ mii na, ni kàfɔlɔ.» 16A Ezau Seyiiri kólogi láa cángi bee wonijanga n lúru n kári. 17Zyakɔbi si na, á woro taʔa n fala n sáà nan Sukɔti na níì kpaʔa faan yaà, ní wɔ́ɔ̀ kpáagéle kpúmɔn yaà yaweeri ma. Koro na be tɛ́ɛgi bee mɛ́ʔɛ le ni gi yiri Sukɔti#33:17 Sukɔti: Mɔ ga lóʔo Sukɔti, gee bee n jo kpáagèle..

Zyakɔbi n tɛ́ɛn Sisyɛmi taana

18Zyakɔbi yìri yaà lè Padan-Arami ma, a wi baa nan Sisyɛmi kěgi na wonyiɔn ní, ki lè Kanaan tári ni. A wi bùguro kpúmɔn n tɛ́ɛn kěgi bee taana. 19#Zyoz 24:32; Zyan 4:5 Tɛ́ɛgee ni wi bùguri kpúmɔn lè, a wi tɛ́ɛgi bee tára syɔɔ Sisyɛmi tóow Hamɔri yòdaʔayi ma, wálifiio támabéle dabata na. 20A wi sáriga-wòlo-yafanʔa kpéʔele yaà tɛ́ɛgi bee ni níì gi mɛ́ɛgi le ni gi yiri Ɛli-Elowe-Isirayɛli#33:20 Ɛli-Elowe-Isirayɛli: Mɔ ga lóʔo Ɛli-Elowe-Isirayɛli, gee bee n jo, Kolocɔlɔɔ wi lè Isirayɛli Kolocɔlɔw..

Currently Selected:

Sélimɛ 33: CB10

Highlight

Copy