Yirile 32

ISIRAYƐLI YE N PE NI KOLOCƆLƆƆ NINGI JOOGAANNA KALAGI

Tɛɛ̀ náapiige kéele

1 # Kap 7:40 A syɛ́ɛnbèle ga gi nyaa Mowizi n mɔn sìndìgi ni nyanbelegi na, a be peyɛɛ gbóʔoro n kári Aarɔn ma n sáà wi pye: «Yìri mi kolocɔlɔbèlē sámaga wolo ma, bele bee í da kínigi wolo yɛ́ɛgi na. Níì cán nǎnw bee wi lè Mowizi, woro wee wi wolo yirige Ezyipiti tári ni lè, gee gi wi taa lè yoo, wolo ga gi cán í.»

2A Aarɔn be yari: «Tɛ́ɛw vèʔebēle be nyɛ lè yele cébèle, ní yele nànbiigèle, ní yele calipiigèle líiye na lè, ye be wòlo yaa maa naa mii ma.» 3A syɛ́ɛnbèle myɛ tɛ́ɛw vèʔebēle wòlo pe líiyi na n kári Aarɔn ma. 4#1Fàn 12:28; Kap 7:41 A wi vèʔebèle syɔɔ be ma n gbàla níì be sámaga ní falipye-yárigi ní n pye tɛɛ̀ náapiige. Lǎli bee ni a Isirayɛli syɛ́ɛnmi jo: «Wolo kolocɔlɔw wi nyɛ wee naa, wee wi wolo yirige lè Ezyipiti tári ni.» 5Lǎli ni Aarɔn gee bee nyaa lè, a wi fala n sáriga-wòlo-yafanʔa faan ki yɛʔɛ̀ ma níì yákpoli wáa n gi joo níì jo: «Nyɛ̀ʔɛna a pye fɛ́tii canʔa Yawe kpɔ̀ʔɔrɔli kéele na.» 6#1Kor 10:7 A ki ga pye nyǐndaligi na, a be sɔ̀li n yìri n sáriga-sórigoo wòlo ní wɔ́ɔ̀ pínɛnyɛnnɛgɛ sáriga wòlo. A syɛ́ɛnbèle tɛ́ɛn bi lìi si gbaa. Koro kàdoʔo ma a be yìri bàā kɔ̀nʔɔ́.

7A Yawe Mowizi pye: «Tìgi maa syée, níì cán mɔ syɛ́ɛnbèle bele mɔ yirige Ezyipiti tári ni lè, pe n peyɛɛ gálagi. 8Kólogee kéele mii da joo n gbàn be ma lè, pe n wàli kelekele n yiri gi ni. Pe n náapiige sámaga ní tɛɛ̀ ní, wee be gbàla lè, ní i gi kpɔ̀ʔɔrɔ́ níì sáriga wòlo gi ma, ní i gi nyuu níì jo: ‹Isirayɛli, mɔ kolocɔlɔw wéle wee, woro wee wi mɔ yirige lè Ezyipiti tári ni.› » 9A Yawe gi joo Mowizi ma níì jo: «Mii n gi nyaa syɛ́ɛnbèle naa tɔ̀nɔ́ i nyɛ líiweepɛɛnnɛ syɛɛnnɛ. 10Tɔ́ɔliw ni mii yaʔa sáan, mii fundanʔari a cò naà be kánmi na, mii a pe myɛ kálagi yirige yaà péw, si mɔ kpéʔele syɛɛnfele-nɛʔɛgɛ.»

11 # Cór 14:13-19 A Mowizi si Yawe wi Kolocɔlɔw nyɛ́ɛri gbanʔama níì jo: «Ee Yawe, mɔ syɛ́ɛnbèle bele mɔ yirige Ezyipiti tári ni lè ní séekpɔɔɔ, ní fànnɛʔɛgɛ kɔ́lɔ ní lè, nyàʔá na gi yɛlɛ mɔ fundanʔari í cò naà be kánmi na? 12Nyàʔá na gi yɛlɛ Ezyipiti ye í kɔ́ gi taa bàā nyuu si jo: ‹Pe kálagila kéele na wi be yirige yaà koro ga pye bi sa be kpóo nyanbeleyi kúlo ni, bi be kálagi kwɔ́ɔ péw tásaligi na?› Ki n yɛlɛ mi mɔ fundanʔari gbànma yaʔa, mɔ syɛ́ɛnbèle yaʔa sìngalagi ni. 13#Sél 17:8; 22:16-17 Sɔ̀ngi mi taa mɔ falipyebèle na pe lè Abirahami, ní Izaaki, ní Isirayɛli. Mɔ maa kàli be ma miyɛɛ na níì jo: ‹Mii a yele yòdaʔayi nɛʔɛ yi pye àmɛɛ nyɛ̀ʔɛni ŋɔripiigéle nyɛ lè. Táree myɛ kéele na mii joo lè, mii a di kaan be ma di pye be worò làla o làla.› » 14Kapeegee Yawe da joo wi a kpéʔele wi syɛ́ɛnbèle na lè, a wi gi kpéʔeleli yaʔa.

15A Mowizi lúru n tìgi nyanbelegi na. Séeraw kàlagorigēle siin si i nyɛ wi kɔ́gi ni. Sɛ́bɛri maa pye ge kàbanyi myɛ siin na, sɛ́bɛraa n pye kàbangee na, a tàa wɔ́ɔ̀ pye kàbangee na. 16Kàlagorigèle bee maa pye Kolocɔlɔɔ tiimaa fáli. Kolocɔlɔɔ tiimaa sɛ́bɛrɛ ti da pye sɛ́bɛri bee, a wi di kánʔana n wòlo kàlagorigèle na. 17A Zyozuwe ga syɛ́ɛnmi yákpogéle lóʔo àmɛɛ bi fúlo lè, a wi Mowizi pye: «Kapɛɛnnɛ tìnmɛ i nyɛ tɛɛkòrogi ni.» 18A Mowizi wi yari: «Fàndaara yákpolo ban í, fànnaa-sìndaara sùpile si wɔ́ɔ ban í. Ŋúnuyo ŋuumɔ mii lúro.»

19A wi ga nùuni tɛɛkòrogi na, a wi náapiigi, ní yɔ́ɔfɔbèle ní yɔ́ɔli nyaa. A wi fundanʔari cò naà, a wi kɔlɔ̀ láʔa kàlagorigèle na n ge wáa n jabagi nyanbelegi tìgimɛ ni. 20Náapiigi pe da sámaga lè, a wi fala n naà tɛ́ʔɛ n gi sórigo, níì gi purɔ n le lɔ̀ʔɔ ni, níì Isirayɛli ye myɛ kɔ́ri a be gi gbaa. 21A Mowizi gi joo Aarɔn ma níì wi pye: «Nyàʔá syɛ́ɛnmi naa pye mɔ na á mɔ kapeekpɔɔgi naa taʔa bi na?» 22A Aarɔn wi yari: «Ni kàfɔlɔ, mɔ fúngi ga yɛlɛ bi tanʔa sɔ̀lɔ í. Mɔ tiimaa n syɛ́ɛnbèle naa cán, kapeʔe pyele sɔngurɔ di nyɛ be ni. 23Pe n baa mii pye: ‹Ki n yɛlɛ mi kolocɔlɔbèlē sámaga, bele pe a wolo yɛ́ɛgi kíni lè. Níì cán nǎnw bee wi lè Mowizi, woro wee wi wolo yirige lè Ezyipiti tári ni, gee gi wi taa lè yoo, wolo ga gi cán í.› 24A mii si be pye: ‹Bele má tɛ́ɛw nyɛ lè, ki n yɛlɛ pe wi wòlo.› A be si wi wòlo n kaan mii ma, a mii wi wáa náagi ni, a wi yiri náapiigi naa.»

Isirayɛli ye kpúmɔnni kéele

25A Mowizi gi nyaa kánmee na syɛ́ɛnbèle jée kanyaʔamiri ni lè, ní wɔ́ɔ̀ gi cán Aarɔn wi da be yaʔa a be jée kanyaʔamiri bee ni n peyɛɛ gbéʔele yafaʔagéle pe kàsiitun-nyɛ́nbèle ma. 26A Mowizi yére tɛɛkòrogi kpàánweele nyɔ́ɔ na níì jo: «Syɔ́ɔnwee ga pye lè Yawe wóo, waa maa nɛɛ naa mii ma.»

A Levii jáabèle myɛ peyɛɛ gbóʔoro wi ma. 27A wi be pye: «Wéle, Yawe Isirayɛli ye Kolocɔlɔw n jo, yele myɛ nibin nibin n yɛlɛ bi yele ŋɔséebèle le bi cáan cèsiinyunyi na, ye tɛɛkòrogi fàn ye foro bi láa kpàánweelee ma sa nan lee na bi yele senyɛnbèle ní yele tàannyɛnbèle, ní yele syɛ́ɛnbèle kpóo.»

28A Levii jáabèle gi kpéʔele àmɛɛ Mowizi gi joo n gbàn lè. A nànbēle selebinnɛ ní saala kagunɔ félege kùu cángi bee syɛ́ɛnmi ni. 29A Mowizi gi joo níì jo: «Yele n yeyɛɛ gaan Yawe fáliw ma níjanʔa, àmɛɛ gi nyɛ lè yele ga yeyɛɛ gábala bi yele pìíbèle kpóo í, pe lè nǎnbèle, n fàra yele senyɛnnǎnbèle na. Koro na ki n yɛlɛ Yawe í wi dùbaw taʔa yele na cángi naa ni.»

Mowizi n Kolocɔlɔɔ nyɛ́ɛri gbanʔama wi Isirayɛli ye kùsulugi syɔɔ

30Koro nyǐndaligi na, a Mowizi gi joo syɛ́ɛnbèle ma níì jo: «Yele n tɔ̀nɔ n kapeekpɔʔɔ kpéʔele. Mii si a lúgu tɔ́ɔliw ni bi kári Yawe ma, dɔ̀ʔɔ́ mii a sa gbǎn yele kapeeli kùsulugo nyɛ́ɛri taa.»

31A Mowizi lúru n kári Yawe ma n sáà wi pye: «Syɛ́ɛnbèle naa n tɔ̀nɔ n kapeekpɔʔɔ kpéʔele. Pe n tɛɛ̀ kolocɔlɔɔ sámaga n pye peyɛɛ wóo. 32#Ŋún 69:29; Tɛ̀ɛn 3:5 Mii si i mɔ nyɛ́ɛri mi be kùsulugi syɔɔ. Koro ga jáa mi mii mɛ́ɛgi kpóo mi yirige sìíw sɛ́bɛ ni, wee mɔ sɛ́bɛ lè.» 33A Yawe Mowizi yari: «Syɔ́ɔnwee wi kapeeli pye mii na lè, woro mɛ́ɛgi mii a kpóo yirige mii sɛ́bɛw ni. 34Da syée tɔ́ɔliw ni mi sa syɛ́ɛnbèle kɔ́ri maa syée tɛ́ɛgee ma mii tɛ̀ɛn mɔ na lè. Wéle, mii nyɛ̀ʔɛni tunduɔn a ra táanri mɔ yɛ́ɛgi na. Gee si mii a ba kpéʔele lè, koro gi nyɛ cangaa mii a keele tɛ́ʔɛ be na be kapeeli kéele na.»

35A Yawe syɛ́ɛnmi kpúmɔn àmɛɛ pi da náapiigi bee kpéʔele lè, gee Aarɔn da sámaga lè.

Currently Selected:

Yirile 32: CB10

Highlight

Copy