Yirile 31

Tɛɛcǎngi falipyebèlē kéele

1A Yawe gi joo Mowizi ma níì jo: 2«Wéle, mii n Besaleyɛli yeri wi mɛ́ɛgi na n yirige Zyuda syɛɛnfelegi ni, wi lè Urii jáaw, ní i nyɛ Huri pìinyanbiige. 3Mii n wi nyìn Kolocɔlɔɔ pǐli na, n sícilimɛ, ní cánna ní yákirii kaan wi ma, koro ga pye wi fáliw féleye myɛ pyeganma cán. 4Koro ga pye wi gbǎn ra tɛ́ɛw, ní wálifiiw, ní kanyɛɛnri fáliw pyeganvɔnmɔ sélegi, 5bàā kàdɛɛngèle tangi gele be táragi lè, si wɔ́ɔ ra tíiri tangi sáā fáliw féleye myɛ kpéʔele. 6Wéle, mii n wɔ́ɔ̀ Ahisamaki jáaw Oholiyabi fàra wi na wi pye wi dɛ̀ɛmɛfɔlɔ, Oholiyabi wi lè Dan syɛɛnfelegi wówaa. Mii n sícilimɛ le fáliw kacanbèlē myɛ fúnyo ni, koro ga pye gee myɛ mii jo n gbàn mɔ ma lè pe gi kpéʔele. 7Koro gi nyɛ Syɛ́ɛnmi Tɛɛfaraga fànikpaʔa, ní Séeraw kásu, ní kapeegèle kùsulugo tɛ́ʔɛ ki a pye lè wi ǹjogi ni, ní fànikpaagi yayigelere myɛw, 8ní tàbaliw, ní wi yayigeleri, ní tɛɛtelew fètindaʔala ní li yayigeleri myɛw, ní nùndaanni yárira sórigolo sáriga-wòlo-yafanʔa, 9ní sáriga-sórigow sáriga-wòlo-yafanʔa ní gi yayigeleri myɛw, n fàra jéemununi pɛɛkpɔʔɔ ní gi nɔ́gi na, 10ní tɛɛcǎngi falipye-buroyo, Aarɔn wi lè sáriga-wòlow, woro ní wi jáabèle falipye-buroyo, yee pe a ra nii bàā sáriga-wòlori fáli kpéʔele lè, 11ní kàlifaali sìnmɛ, ní nùndaanni yáriga ki a pye lè tɛɛcǎngi kéele na. Pe a ti myɛ kpéʔele foro àmɛɛ mii gi joo n gbàn mɔ ma lè.»

Cândɛnɛgi yaʔala kéele

12A Yawe gi joo Mowizi ma níì jo: 13«Ki joo Isirayɛli ye ma mí be pye: ‹Ki n yɛlɛ yele í tɔ̀nɔ́ mii cândɛnɛyi yaʔa. Gee bee a pye fɛ̀ɛ mii ní yele níngi ni yele yìrigèle myɛ syɛ̀ɛnnɛ ma, wee báriga ni pe a gi cán lè bi cán mii wi nyɛ Yawe, wee wi yele sámagi ni yaari wiyɛɛ ma lè. 14Koro na yele yɛlɛ bi cândɛnɛgi yaʔa, níì cán ki a pye yacanga yele ma. Wee wi ga cândɛnɛgi kálagi lè, pe a wee bee kpóo. Syɔ́ɔnwee wi ga faliwaa faala kpéʔele lè gi ni, wee bee a kwɔ́ɔ yirige wi syɛ́ɛnbèle nínge ni. 15#Yir 20:8-11; 23:12; 34:21; 35:2; Lev 23:3; Làlw 5:12-14 Fáliw a ra kpéʔele canya kɔrɔni fúngo ni, kàjáa canya kɔrɔsiin wógi a pye cândɛnɛgɛ, bi pye ŋɔ́ndaala canʔa, gee ki a yaʔa kɔlɔ̀ na Yawe ma lè. Syɔ́ɔnwee wi ga faliwaa kpéʔele lè cândɛnɛgi canʔa ni, pe a wee bee kpóo. 16Isirayɛli ye n yɛlɛ bi cândɛnɛgi yaʔa, pe n yɛlɛ bàā cândɛnɛgi kéele kpɔ́ʔɔgi da syée yaà pe yìrigèle myɛ syɛ̀ɛnnɛ nínge ni. Gee bee a kòro bàngwɔɔ joogaanna. 17#Yir 20:11 Gee bee a kòro fɛ̀ɛ mii ní Isirayɛli ye níngi ni bàā syée yaà làla o làla. Níì cán Yawe n nyɛ̀ʔɛgèle ní tári sámaga canya kɔrɔni fúngo ni, a ki ga pye canya kɔrɔsiin wógi na, a wi fáliw yérige níì ŋɔ́n n daa.› »

18Lǎli ni Yawe joo n kwɔ́ɔ ní Mowizi ní lè Sinayii nyanbelegi na, a wi Séeraw kàlagorigēle siin kaan wi ma, kàdɛnɛyɛ kàlagorigèle gele na Kolocɔlɔɔ da sɛ́bɛri sɛ́bɛ ní wi tiimaa kabeli ní lè.

Currently Selected:

Yirile 31: CB10

Highlight

Copy