Yirile 27

Sáriga-wòlo-yafaangi kéele

1«Mɔ a sáriga-wòlo-yafanʔa sámaga akasya tíire wóʔo. Ki tɔnɔganmi a pye mɛ́tiribéle siin ní tíla. Ki kpɔ́ʔɔganmi si wɔ́ɔ pye mɛ́tiribéle siin ní tíla. Ki tɔnɔganmi, ní gi kpɔ́ʔɔganmi a pye sèjira, ki ǹjogi tɔnɔganma si pye mɛ́tiri nibin ní tíla. 2Ki n yɛlɛ mi nyɛngéle sámaga ki jɛ̀ɛ́ngèle sicɛrɛ na mi pínɛ gi ni, mí gi tɛ́ɛyi myɛ tɔ́n ní kanyɛɛnrɛ ní. 3Ki falipye-yáriri sámaga, ti lè gi cɔ́ɔngi yaleye, ní gi cɔ́ɔngi yakoliyo, ní gi nyari-nyarili pɛ́ɛgéle, ní gi gǎngèle singànaya, ní gi naàniganw yakoliyo. Mɔ a gi yayigeleri myɛ sámaga ní kanyɛɛnrɛ ní. 4Mí kanyɛɛnrɛ cɔ̀ɔkpóloo sámaga gi na, mí kanyɛɛnrɛ vèʔeye nibin nibin sámaga cɔ̀ɔ́w jɛ̀ɛ́ngéle sicɛrɛ na. 5Mɔ a cɔ̀ɔ́w le wi séli sáriga-wòlo-yafaangi táàma bi ba nan gi níngi na fungo ma, ki nyɔɔwari láara ni. 6Mí akasya tíingéle sámaga sáriga-wòlo-yafaangi kéele na, mí kanyɛɛnrɛ tɛ́ʔɛ mi ge tɛ́ɛyi myɛ tɔ́n. 7Pe a tíingèle foro vèʔeyi ni, tíingèle a le sáriga-wòlo-yafaangi lɛ̀ʔɛgēle siin na, lǎli ni pe ga ni caa bi gi láa lè. 8Ki sámaga ní yakpakpaaya ní, ki nɔ́gi si pye wovoro-valaga ní. Ki sámagaganmi bi tɛ̀ɛn mɔ na nyanbelegi na lè, sa gi sámaga mi yɛlɛ ní kánmi bee ní.

Kàcooli sùluganma faniya kéele

9«Mɔ a kpɔ̀ʔɔrɔli fànikpaʔa kacoolo sùlu. Ki wòrogulo kàbangi sùlulo fànibēle n yɛlɛ be pye lɛn fànifɛɛlɛfɛɛlɛɔ, wee be sára lè. Kàbanzeligi bee tɔnɔganma n yɛlɛ bi pye mɛ́tiribéle togoye siin ní kpɔrigɔ. 10Pe gàángèle n yɛlɛ ge pye toko. Ke yataʔayi í pye toko, si pye kanyɛɛnrɛ. Gàángèle yacɔrɔgéle, ní ge kpèeparigèle n yɛlɛ bi pye wálifiio wòʔolo. 11Fànibèle pèle a wɔ́ɔ pye solomɔkulo kàbangi na pe tɔnɔganma a pye mɛ́tiribéle togoye siin ní kpɔrigɔ kpɔrigɔ. Pe gàángèle, ní ge kanyɛɛnri yataʔaya si pye toko toko. Gàángèle yacɔrɔgéle, ní ge kpèeparigèle n yɛlɛ bi sámaga ní wálifiio ní. 12Kàcooli yɛ́ʔɛ kpɔ́ʔɔganma canʔajeemɛ kabangi fànibēle tɔnɔganma n yɛlɛ bi pye mɛ́tiribéle toko ní kagunɔ kagunɔ, gàángèle si pye kɛɛ, ke yataʔayi í pye kɛɛ. 13Kàcooli canʔafolomɔ kabangi a pye mɛ́tiribéle toko ní kagunɔ. 14Tɛɛ̀jeeli kàbangaa fànibēle tɔnɔganma a pye mɛ́tiribéle kɔrɔsiin ní tíla. Pe gàángèle si pye taanri, ke yataʔayi í wɔ́ɔ pye taanri. 15Kàbanziin wógi fànibēle tɔnɔganma í pye mɛ́tiribéle kɔrɔsiin ní tíla, pe gàángèle si pye taanri, ke yataʔayi í pye taanri. 16Kpaaweetɔn-fàni n yɛlɛ wi pye kàcooli kpàánweele nyɔ́ɔ na. Wi tɔnɔganmi a pye mɛ́tiribéle kɛɛ. Wi n yɛlɛ bi pye kɔ́luruna cére, ní wonyɛɛɔn, ní wonyɛɛnteleo, ní lɛn fànifɛɛlɛfɛɛlɛɔ, wee be sára lè n yɛlɛ ní fànisuuri fálipyeganma ní, gàángèle si pye sicɛrɛ, ke yataʔayi i pye sicɛrɛ. 17Kàcooli sùlulo gàángéle myɛ kpèeparigéle n yɛlɛ ge pye wálifiio, ke yacɔrɔgèle í pye wálifiio, ke yataʔayi si pye kanyɛɛnrɛ. 18Kàcooli tɔnɔganma n yɛlɛ bi pye mɛ́tiribéle togoye siin ní kpɔrigɔ. Li kpɔ́ʔɔganmi si pye mɛ́tiribéle toko ní kagunɔ kàbanyi myɛ na. Tɛɛsùlugi ǹjoʔo tɔnɔganma si pye mɛ́tiribéle siin ní tíla. Lɛn fànifɛɛlɛfɛɛlɛɔ ní li yɛlɛ bi sámaga wee be sára lè, gàángèle yataʔaya si pye kanyɛɛnrɛ. 19Yayigeleri myɛ ti a pye lè kpɔ̀ʔɔrɔli fànikpaʔa fáli kéele na, ní gi cèferigèle myɛ n fàra kàcooli sùlulo cèferigéle myɛ na ti n yɛlɛ bi pye kanyɛɛnrɛ.

Fètingèle sìnmɛ kéele

20 # Lev 24:1-4 «Ki joo mi gbàn Isirayɛli ye ma mí be pye paa maa mɔ ma ní olivyelɛɛw sìnjànma ní, fètingèle kéele na, koro ga pye fètingèle í kòro bàā nyín làrigèle myɛ ni. 21Aarɔn ní wi jáabèle n yɛlɛ bi fètingèle tɛ́ʔɛ Syɛ́ɛnmi Tɛɛfaraga fànikpaʔa ni, fànipariw kàdoʔo ma wi lè séeraw kásu yɛ́ʔɛ ma, koro ga pye kaa nyín mii Yawe yɛ́ʔɛ ma bi séli cângwɔɔgi nyɔ́ɔ na bi taa sa nan nyǐngi nyɔ́ɔ na. Gee bee a kòro beè bàngwɔɔ làlwa Isirayɛli ye yìrigèle syɛ̀ɛnnɛ myɛ ma.

Currently Selected:

Yirile 27: CB10

Highlight

Copy