Yirile 28

Sáriga-wòlobèle yalere kéele

1«Mɔ si na, ki n yɛlɛ mi mɔ senyɛnw Aarɔn ní wi jáabèle yirige Isirayɛli ye níngi ni mi nùuni miyɛɛ na, koro ga pye waa sáriga-wòlori fáli kpéʔele mii ma. Gee bee n jo Aarɔn, ní wi jáabèle be lè Nadabi, ní Abihu, ní Eleyazari, ní Itamari. 2Ki n yɛlɛ mi yalere sámaga mɔ senyɛnw Aarɔn ma sáriga-wòlori fáli kéele na bi wi nìjanri ní wi kpɔ́ɔmi tɛ̀ɛn. 3Ki n yɛlɛ mi gi joo fáliw kacanbèlē myɛ ma, poro bele mii nyìn sícilimɛ pìle na lè. Pe a Aarɔn yaleri sámaga, koro ga pye wi yaʔa kɔlɔ̀ na jàngó bàā sáriga-wòlori fáli kpéʔele mii ma. 4Yaleree be yɛlɛ bi sámaga lè, toro di nyɛ dee naa: Fìcibige yáriga, ní efɔdi, ní burodɔnɔgɔ, ní burodɔnɔ-zúugo, ní nyùnbwɔʔɔ, ní sɛntiiri. Pe a burojànya sámaga mɔ senyɛnw Aarɔn ma, woro ní wi jáabèle ní, koro ga pye paa sáriga-wòlori fáli kpéʔele mii ma. 5Fáliw kacanbèlē a tɛɛ̀ ní kɔ́luruna cére fàni, ní fàninyɛɛɔn láa n fàra fàninyɛɛn-tèleo, ní lɛn fànifɛɛlɛfɛɛlɛɔ na be sára lè bi tɛ́ʔɛ fáliw kpéʔele.

Efɔdiw kéele

6«Pe a efɔdiw sámaga ní tɛɛ̀ ní n fàra kɔ́luruna cére fàni, ní fàninyɛɛɔn ní fàninyɛɛn-tèleo, ní lɛn fànifɛɛlɛfɛɛlɛɔ na be sára lè bi yɛlɛ ní kacánmi fáli pyeganma ní. 7Pé fókaannyunyo yáriya siin sámaga pe táriga efɔdiw láʔagéle siin na. 8Sɛntiiriw wi a pye efɔdiw na lè, pe a wi sámaga tìin bi pínɛ ní efɔdiw ní, si wɔ́ɔ wi báara ní yanijanri ní, ti lè tɛ́ɛw, ní kɔ́luruna céri fàni, ní fàninyɛɛnw, ní fàninyɛɛn-tèlew n fàra lɛn fànifɛɛlɛfɛɛlɛw na be sára lè. 9Mɔ a onikisi kàdɛɛngèlē siin láa bi Isirayɛli jáabèle mɛ́ɛyɛ kánʔana wòlo ge na. 10Pe mɛ́ɛyaa kɔrɔni a kánʔana wòlo kàdɛɛnzelili na, yàa kɔrɔni í kánʔana wòlo siin wóli na bi yɛlɛ ní be yɛɛzeegèle ní n kári peyɛɛ gurugo. 11Mɔ a Isirayɛli jáabèle mɛ́ɛyɛ kánʔana wòlo kàdɛɛngèle siin na bi yɛlɛ ní mɛ́ɛyi fɛ̀ɛ yáriga sámagaganma ní, mí ge lele tɛ́ɛw wéegéle ni. 12Mí kàdɛɛngèle siin táriga efɔdiw fókaannyunyo yáriya siin na, ge pye sɔ̀ngudaara kàdɛɛngèlē Isirayɛli jáabèle kéele na. Kánmi bee na Aarɔn a be mɛ́ɛyi taʔa wi fókaannyunyi siin na Yawe yɛ́ʔɛ ma yi pye sɔ̀ngudaara. 13Mɔ a weegèlē sámaga tɛɛ̀ wòʔolo, 14ní tɛɛteleo nyɔ̀ʔɔdirigéle siin, gele mɔ a mígele keyɛɛ na àmɛɛ mɛɛnnɛ nyɛ lè, mí gele bee sogi yárigee na be kàdɛɛngèle táriga lè.

Fìcibigi yáriga kéele

15«Mɔ a fìcibige yáriga sámaga ki pye kútiiw cerile kéele na. Ki kpéʔele kacánmi fáli pyeganma na, bi yɛlɛ ní efɔdiw sámagaganma ní. Mɔ a gi sámaga ní tɛɛ̀ ní, n fàra kɔ́luruna cére fàni, ní fàninyɛɛɔn, ní fàninyɛɛn-tèleo, ní lɛn fànifɛɛlɛfɛɛlɛɔ na wee be sára lè. 16Ki kàbanyi sicɛrɛ a pye sèjira, kí pye cófaà, ki tɔnɔganmi ní gi kpɔ́ʔɔganmi a pye santimɛtiribéle toko ní kagunɔ kagunɔ. 17Ki n yɛlɛ mi kàdɛɛngèlē kóloyo sicɛrɛ táriga gi na. Kozeligi wòʔolo a pye sariduwani, ní topazi, ní emerodi. 18Koziin wógi wòʔolo si pye ɛsikaribukili, ní safiiri, ní jaman. 19Kodaanri wógi wòʔolo si pye opali, ní agati, ní amɛtiisi. 20Kosicɛrɛ wógi wòʔolo si pye kirizoliiti, ní onikisi, ní zyasipi. Kàdɛɛngèle bee a le ge tɛɛ̀ wéegèle ni.#28:17-20 Kàdɛɛngèle féleye kàlawaga wéle. 21Kàdɛɛngèle a pye Isirayɛli jáabèle mɛ́ɛyɛ na. Ke a pye kɛɛ ní siin bi yɛlɛ ní be mɛ́ɛyi ní. Syɛɛnfeleyi kɛɛ ní siin mɛ́ɛyɛ a kánʔana wòlo ke myɛ nibin nibin na mɛ́ɛyɛ fɛɛ yáriya sámagaganma na.

22Mí tɛɛteleo nyɔ̀ʔɔdirigéle sámaga fìcibigi yariga na. Mɔ a ge mígele àmɛɛ mɛɛnnɛ nyɛ lè. 23Mí tɛɛ̀ vèʔebēle siin sámaga, bele bee í pye fìcibigi yáriga láʔagéle siin na. 24Mɔ a tɛɛ̀ mɛ́ɛngèle foro fìcibigi yáriga láʔagéle veʔebéle siin ni. 25Mí sa mɛ́ɛngèle gele siin nyɔ́ɔyɔ foro fókaannyunyi yáriya siin veʔebéle siin ni, yoro yee yi nyɛ efɔdiw na lè, jàngó ficibigi yariga í kòro yɛʔɛ̀ ma. 26Mí ní tɛɛ̀ vèʔebèle pèle siin sámaga mi táriga fìcibigi yáriga jɛɛngèle gele siin na, fungomaw tɛ́ʔɛ ni gi tánga lè efɔdiw na. 27Mí ní tɛɛ̀ vèʔebèle pèle siin sámaga poro í pye efɔdiw fókaannyunyo yáriya siin na, yi yɛʔɛmaw láara ni, yi tɛɛsogigi ni, efɔdiw sɛntiiri ǹjoʔo ni. 28Pe a kɔ́luruna cére jàra mɛ́ɛnnɛ tɛ́ʔɛ bi fìcibigi yáriga pwɔɔ ki vèʔebèle na si sa gi pwɔɔ efɔdiw vèʔebēle na, koro ga pye fìcibigi yáriga í kòro efɔdiw sɛntiiri ǹjoʔo ni, ki a kɔ́ gbǎn sánʔa bi láʔa efɔdiw na í.

29Aarɔn ga ni jǐn tɛɛcǎngi ni lǎli ni lè, Isirayɛli jáabèle mɛ́ɛyɛ a pye wi zɔ̌nw na, yoro yee yi kánʔana n wòlo lè fìcibigi yáriga na, ki lè kútiiw cerile wóʔo. Gee bee a pye sɔ̀ngudaara yáriga mii Yawe yɛ́ʔɛ ma làla o làla. 30#Cór 27:21; Làlw 33:8; Ɛsid 2:63; Neh 7:65 Mɔ a Urimi ní Tumiimi le fìcibigi yáriga ni ki lè kútiiw cerile wóʔo. Aarɔn ga ni jǐn bi yére mii Yawe yɛ́ʔɛ ma lǎli ni lè, dee bee í pye wi fìcibigi na. Kánmi bee na Aarɔn a Isirayɛli ye kútiiw kéele taʔa wi zɔ̌nw na làrigèle myɛ ni.

Sáriga-wòlo-yalezanri kéele

31«Búrogee na efɔdiw a ra nii bàā taari lè, mɔ a ki myɛw sámaga kɔ́luruna cére na. 32Ki yátiigi kúun níngi ni, mí gi taʔala cama ni mi gi màʔa àmɛɛ saliga búrogo nyɛ lè, koro ga pye ki a kɔ́ sulu í. 33Mí girenadi sámaga ki nyɔ́ɔgi na mi gi màʔa, tàa a pye kɔ́luruna cére na, tàa si pye wonyɛɛnrɛ, dee si pye wonyɛɛntelere. Mí tɛɛ̀ wèegēle le ti myɛ nibin nibin lariya ni mi gi màʔa. 34Tɛɛ̀ wèele nibin, ní girenadi nibin, tɛɛ̀ wèele nibin, ní girenadi nibin, bi buronyɔɔw màʔa kpàra, 35Aarɔn a búrogi le bàā fáliw kpéʔele. Wi ga ni jǐn tɛɛcǎngi ni lǎli ni lè, Yawe yɛ́ʔɛ ma wàlá wi ga ni yirigi gi ni lǎli ni lè, wèégèle tìnmɛ a ra lúro koro ga pye wi a kɔ́ kùu í.

36Ki n yɛlɛ mi tɛɛteleo yafabi-fabiga sámaga, mí sɛ́bɛrɛ kánʔana mi wòlo gi na, àmɛɛ be mɛ́ʔɛ fɛɛ yáriga sɛ́bɛrɛ kánʔana ni wóo lè. Sɛ́bɛri bee a jo: ‹Yaʔa wojaɔn ní Yawe ma.› 37Mí gi pwɔɔ mi táriga nyùnbwɔɔgi na yɛʔɛ̀ ma ní kɔ́luruna cére jàra mɛ́ɛnnɛ ní. 38Ki a pye Aarɔn gbáali na. Yakaanjǎnree Isirayɛli ye a ra yaari kɔlɔ̀ na Kolocɔlɔɔ ma lè, Aarɔn a wi nyúngi le be kolomi túgoro láara ni dee bee kéele na. Ki a pye wi gbáali na Yawe yɛ́ʔɛ ma làla o làla jàngó wi fɔ̀lɔ be na.

39Mɔ a burodɔnɔgɔ sámaga ní lɛn fànifɛɛlɛfɛɛlɛɔ ní. Mí wɔ́ɔ nyùnbwɔʔɔ sámaga ní lɛn fànifɛɛlɛfɛɛlɛɔ ní, mí wɔ́ɔ sɛntiiri sámaga n yɛlɛ ní fànisuuri fáli pyeganma ní. 40Mí wɔ́ɔ burodɔnɔyɔ sámaga Aarɔn jáabèle ma, mí wɔ́ɔ sɛntiiribéle ní nyùndɔnyɔ sámaga be ma, bi be tɛɛ̀yéregi, ní be kpɔ́ɔmi tɛ̀ɛn.

41Mí yáriri bee le mɔ senyɛnw Aarɔn, ní wi jáabèle na pínɛmɛ, mí sǐnmi wo be na bi be lége fáliw ni bi be sámaga yaʔa paa sáriga-wòlori fáli kpéʔele mii ma. 42Ki n yɛlɛ mi lɛn fàni kùrusibéle sámaga be ma bi be níboribèle tɔ́n, bi séli sárigèle na bi sa nan ceekpologèle na. 43Aarɔn ní wi jáabèle a ra dee bee nii bàā jǐn syɛ́ɛnmi tɛɛ̀faraga fànikpaʔa ni, wàlá lǎli ni pe ga ni jà nùuni sáriga-wòlo-yafaangi na lè bi fáliw kpéʔele tɛɛcǎngi ni. Kánmi bee na kolomɔ a nan be na í, jàngó pe a kɔ́ kùu í. Wee bee wi nyɛ bàngwɔɔ làlwaw, wee wi sɛ́bɛ lè Aarɔn ní wi yòdaʔayi kéele na yi a ba kòro naa wi kàdoʔo ma lè.

Currently Selected:

Yirile 28: CB10

Highlight

Copy