Yirile 23

Fànʔafunvɔbèle kpɔ́ʔɔlɔ kéele

1 # Yir 20:16; Lev 19:11-12; Làlw 5:20 «Mɔ a kɔ́ jànvaa syɛɛnjóoro láa bàā nyuu da máari í. Mɔ a kɔ́ pínɛ ní syɛɛnpeeo ní bi jànvaa séera kpéʔele bi wi dɛ̀ɛmɛ í. 2Mɔ a kɔ́ taʔa syɛɛnnɛʔɛmi na si kapeʔe kpéʔele í. Mɔ a kɔ́ mɔ séeraw fàli syɛɛnnɛʔɛmi kéele na bi kútiiw kálagi í. 3#Lev 19:15 Mɔ a kɔ́ pwɔɔ syɔɔnwaa fóomɔ na si wi kútiiw tɛ́nɛ wi na í.

4 # Làlw 22:1-4 Mɔ nígoo nɔ̀ɔ, wàlá wi jòfani ga pùuni, á mɔ wi nyaa, ki n yɛlɛ mi wi kɔ́ri mi ba kaan wi ma. 5Wee mɔ kéeli bɛɛn lè mɔ ga wi jòfani nyaa a wi too wi túgori láara ni, ki ga yɛlɛ mɔ í sɔ̀lɔ́ fala si wi yaʔa í, ki n yɛlɛ mi wi dɛ̀ɛmɛ ye di láʔa wi na.

6 # Lev 19:15; Làlw 16:19 Mɔ a kɔ́ tànʔa syɔɔ fɔ̀ngɔ fɔ́lɔ ma wi kútii joolo ni í, ki ga yɛlɛ mɔ í ba wi kútiiw kálagi í. 7Mɔ a kɔ́ yére jànvaa syɛɛnjóoro ni í. Mɔ a kɔ́ tɛɛlɛ fun syɔ́ɔn, wàlá syɛɛnsiɔn kpóo í. Níì cán mii a tée syɛɛnpeeo córo bi jo wi n sín í. 8Mɔ a kɔ́ ra námara kpɔ́ʔɔrɔ syoo í, níì cán námara kpɔ́ʔɔri i kanyaabèle kàragí fúunbéle. Ti i syɛɛnsinbèle syɛ́ɛnrɛ fɛ̀ɛ́.

9 # Yir 22:21; Lev 19:33-34; Làlw 24:17-18; 27:19 Mɔ a kɔ́ mɔ fangi gbàn nibɔnw na wi baa tɛ́ɛn ní yele ní lè í, ncan yele n nibɔnmi kánma cán, níì cán yele maa wɔ́ɔ̀ pye nibɔɔnnɔ Ezyipiti tári ni.

Ŋɔ́ndaali yɛ́ɛlɛ ní ŋɔ́ndaali canʔa kéele

10 # Lev 25:1-7 «Yɛ̀ʔɛlɛ kɔrɔni fúngo ni, mɔ a ra lùguri lúru mɔ tári na, si wɔ́ɔ ra di lée. 11Kàjáa yɛ̀ʔɛlɛ kɔrɔsiin wóli na, mɔ a tári yaʔa ti ŋɔ́n daa, mɔ a kɔ́ di fála í. Bele be nyɛ lè fɔ̀rɔgɔfɔbèle yele ni, poro ní sìnbirigi yaweere a ra wogorodi líi. Gee bee wonijanga mɔ a wɔ́ɔ kpéʔele ní mɔ ɛrɛzɛn ségi, ní mɔ olivye tíiri ní.

12 # Yir 20:10-11; 31:15; 34:21; 35:2; Lev 23:3; Làlw 5:13-14 Mɔ a mɔ fáliw kpéʔele canya kɔrɔni fúngo ni, kàjáa can-kɔrɔsiin wógi na, mɔ a mɔ fáliw yaʔa koro ga pye mɔ niyi, ní mɔ jofanibèle í ŋɔ́n daa. Mɔ púlocew pyà, ní mɔ nibɔnw n yɛlɛ bi ŋɔ́n daa.

13Kérigèle gele myɛ mii joo yele ma lè, ki n yɛlɛ yaa ge kɔ̀rɔsíi. Yele a ní kɔ́ sɔ̀ngi taa kolocɔlɔwaa faala mɛ́ʔɛ na bàā yiri í. Ki ga yɛlɛ syɔɔn faala í kɔ́ pe wàa mɛ́ʔɛ lóʔo mɔ nyɔ́ɔgi na í.

Fɛ́tiibèle be yɛlɛ bàā kpéʔele lè Isirayɛli ni

(34:18-26; Làlw 16:1-17)

14«Ki n yɛlɛ maa fɛ́tii tɛ́ɛyɛ taanri kpéʔele mii kpɔ̀ʔɔrɔli kéele na yɛɛlɛ o yɛɛlɛ. 15#Yir 12:14-20; Lev 23:6-8; Cór 28:17-25 Mɔ a ra levé fun búruw séri kpéʔele. Levé Fun búruw mɔ a ra líi canya kɔrɔsiin fúngo ni, làridɛ̀ɛ́nni ni, Abiibi yégi ni bi yɛlɛ ní gi ní àmɛɛ mii gi joo n gbàn mɔ ma lè. Níì cán yégi bee ni mɔ yiri Ezyipiti ni. Syɔɔn a kɔ́ pan ba yére ní kɔwaayi ní mii yɛ́ʔɛ ma í. 16#Lev 23:15-21,39-43; Cór 28:26-31 Ki n yɛlɛ mi yaliiseliri fɛ́tii canʔa kéele cò. Wi a pye lǎli ni yele ga tɛ́nɛ̀ yaliiseliri láa lè. Mi wɔ́ɔ yaliilaari fɛ́tii canʔa kéele cò. Gee bee a pye yɛɛgbaraw na, lǎli ni mɔ ga mɔ séyi yaliire láa n kwɔ́ɔ lè. 17Yɛɛlɛ o yɛɛlɛ mɔ syɛɛnfelegi nànbēle myɛ a kpóʔoro mii yɛ́ʔɛ ma tɔlɔyɔ taanri, mii wee wi lè Kàfɔw Yawe.

18Mɔ a kɔ́ mii sárigaw sìsyaan wòlo ní levé búru ní í. Mii sériw yaweele be kɔni lè li sǐnmi ga yɛlɛ bi tɛ́ʔɛ bi syɔ́ɔn í. 19#Yir 34:26; Làlw 14:21; 26:2 Ki n yɛlɛ maa maa ní mɔ ségi yaliifɔnrɔ yaliiselire ní mii kpáagi ma, mii wee wi lè Yawe mɔ Kolocɔlɔw. Mɔ a kɔ́ kapiige sɔʔɔ ki nɔɔ̀ yíremɛ ní í.

Nyɔɔfaliya ní tamagéle sáni be kári lè

20«Wéle, mii a nyɛ̀ʔɛni tundunwaa tun wi kíni mɔ yɛ́ɛgi na bàā mɔ kɔ̀rɔsíi kólogi na, si kári sa nan ní mɔ ní tɛ́ɛgi na gee mii sámaga n yaʔa lè. 21Ki n yɛlɛ mi miyɛɛ cǒmi cán wi yɛʔɛ̀ ma, máā lúro wi ma. Mɔ a kɔ́ wi cée í. Níì cán wi a fɔ̀lɔ́ ra mɔ sinloʔomi kùsulugo syoo í. Ncan mii mɛ́ɛgi i nyɛ wi na. 22Mɔ si ga ni lúro wi ma, ní i gi kpéʔele gee myɛ mii joo mɔ ma lè, lǎli bee ni mii a pye mɔ nigoobèle nígoo, si wɔ́ɔ pye mɔ kasiitun-nyɛ́nbèle kàsiitun-nyɛ́nnɛ. 23Mii nyɛ̀ʔɛni tunduɔn a kári ní mɔ ní sa lége Amɔri ye tári, ní Hɛti ye wóri, ní Perezi ye wóri ni, n fàra Kanaan yé, ní Hɛvi ye ní Yebusi ye wóri na. Mii a bele bee myɛ kálagi péw. 24Mɔ a kɔ́ ra tuun be kolocɔlɔbèle yɛ́ʔɛ ma í wàlá bàā be kpɔ̀ʔɔrɔ́ í. Mɔ a kɔ́ ra syɛɛnfeleyi bee kakpéʔelegéle tɛ́ɛlɛ í. Mɔ a be kolocɔlɔbèle kpúmɔn cáan, mí be yasungaangèle jabagi. 25Yele a ra Yawe yele Kolocɔlɔw kpɔ̀ʔɔrɔ́. Wi a dùbaw taʔa mɔ yaliiri ní mɔ logbaagi na. Mii a yáami nɛnɛ bi léeli mɔ tɛ́ɛgi na. 26Cɔlɔɔ fícɛnnɛ a tée kálagi mɔ tári ni í, cenaa-sìnzeeo a wɔ́ɔ pye yaà í. Mii a gi yaʔa yele í ra leegi gbanʔama.

27Mii a mii fyáakpɔɔri yaʔa di kíni mɔ yɛ́ɛgi na. Syɛɛnfeleyee tɛ́ʔɛ ma mɔ syée lè, mii a yee bee myɛ yaʔa yaa fɛ̀ɛgí mɔ na. Mii a mɔ nigoobèle myɛ yaʔa be kàdoʔo kaan bàā fé mɔ na. 28Mii a zèrenaàjiriye#23:28 zèrenaàjiriye tórigo mɔ yɛ́ʔɛ ma: Mɔ ga lóʔo tɛ́ɛgi naa ni, mii a zèrenaàjiriye tórigo mɔ yɛ́ʔɛ ma, ki kɔ́rɔw a gbǎn pye fàngwɔɔree Kolocɔlɔɔ a yaʔa di nan Isirayɛli ye nigoobèle myɛ na lè, toro na wi nyɛ. tórigo mɔ yɛ́ʔɛ ma, yee bee a sa Hɛvi ye ní Kanaan ye, ní Hɛti ye nɛnɛ bi léeli mɔ na. 29Mii a be nɛnɛ bi yirige yaà mɔ yɛ́ʔɛ ma yɛɛlɛ nibin ni í, koro ga pye tári a kɔ́ kòro wowaara ní, sìnbirigi yaweere si nɛʔɛ bi yìri mɔ kurugo í. 30Mii a ra be nɛnɛ cɛɛri cɛɛri yele yɛ́ʔɛ ma bi taa yele í ba nɛʔɛ si gbǎn tári syɔɔ taa. 31Mii a mɔ láʔagologi yaʔa gi séli Nyɛnɛri solomɔ lɔ́ʔɔ na si kári sa láʔa Filisitini tári solomɔ lɔ́ʔɔ#23:31 Filisitini tári solomɔ lɔ́ʔɔ: Mɔ ga lóʔo Filisitini tári solomɔ lɔ́ʔɔ, Sólomi Lòkpɔʔɔ wonijanga na be nyɛ. na, si ní láa yaà fìími tára na bi kári sa nan Ufurati cábigi na. Níì cán mii a tári syɛ̀ɛnnɛ le mɔ kɔ́yi ni, mɔ a be nɛnɛ yirige yaà miyɛɛ yɛ́ʔɛ ma. 32Mɔ a kɔ́ joogaanna kpéʔele ní be ní í, wàlá ní be kolocɔlɔbèle ní í. 33Pe ga yɛlɛ be tɛ́ɛn mɔ tári ni í, jàngó pe a kɔ́ mɔ kàriga mɔ í da kapeegèle kpéʔele mii na í. Níì cán mɔ a kɔ́ ba ra be kolocɔlɔbèle kpɔ̀ʔɔrɔ́, gee bee si a pye mɔ na karinyanga.»

Currently Selected:

Yirile 23: CB10

Highlight

Copy