Yirile 22

1Pe ga kàyuuw cò a wi i yarigaa kabagi yébilige ni si yùu, á be wi kpúmɔn n kpóo, wi kpóoli kéele a córo wi kpóofɔw ma kolomɔ kéele í. 2Ki si ga pye cángi maa folo n kwɔ́ɔ, wi kpóofɔw a kolomɔ taa wi kpóoli kéele na. Kàyuuo n yɛlɛ wi wi yayuugi sàra. Yarigaa ga pye ki ga taa wi ma í, pe a wi pára bi yárigi bee sàra.

3Yárigee wi yùu lè, ki ga pye nɔ̀ɔ yoo, jòfani yoo, byà wàlá sikaà yoo, á gi sèʔê nyaa wi ma woweʔe ní wi a gi tɛɛyɛ siin sàra.

Bi kolo wàa ma wi yariga kéele na

4«Wàa ga wi yaweere yaʔa a di sáà wàa séʔe wàlá wi ɛrɛzɛn séʔe lìi, wi a wi ségi yalicànra wàlá wi ɛrɛzɛn ségi ɛrɛzɛncàɔn kaan ségi fɔ́lɔ ma.

5Wàa ga ni wúuro tiipiire sórogi, á náagi cò n fala n sáà wàa bilepwɔɔgéle, wàlá bilenaa-sìnlaaɔ séʔe sórigo, náagi levɔlɔ n yɛlɛ wi gi sàra.

6Wàa ga wáli, wàlá yariraa kaan wi syɛɛnnyɛnnɛ ma a wi tɛ́ʔɛ, ti ga yùu syɔ́ɔnw bee kpaʔa ni, kàyuuw ga taa n cò, wi a gi tɛɛyɛ siin sàra. 7Kàyuuw ga pye wi ga taa n cò í, kpáagi fɔ́lɔ n yɛlɛ wi sa yére Kolocɔlɔɔ#22:7 Sa yére Kolocɔlɔɔ yɛ́ʔɛ ma: Syɛ́ɛnri naa kɔ́rɔ a wɔ́ɔ gbǎn pye: Kútiijoobèle yɛ́ʔɛ ma. yɛ́ʔɛ ma si kàli bi gi tɛ̀ɛn woro kɔ́lɔ ga nan woro syɛɛnnyɛnw yáriga na í. 8Námara ga pye yarigaa kéele na, nɔ̀ɔ yoo, jòfani yoo, byà wàlá sikaà yoo, burogo kéele na yoo, wàlá yapuunugo kéele na yoo, bele siin pe ga jo lè poro wóʔo gii, pe siinw n yɛlɛ bi sa yére Kolocɔlɔɔ yɛ́ʔɛ ma. Kolocɔlɔɔ ga sáà kolomɔ kaan wee ma lè,#22:8 Syɛ́ɛnri naa kɔ́rɔ a wɔ́ɔ gbǎn pye: Kútiijoobèle ga sáà kolomɔ kaan wee ma lè. syɔ́ɔnw bee a yárigi bee tɛɛyɛ siin sàra.

9Syɔɔn ga jòfani wàlá nɔ̀ɔ, wàlá byà, wàlá sikaà, wàlá yaweele o yaweele félege kàlifáa wi syɛɛnnyɛnnɛ ma níì jo waa li kɔ̀rɔsíi, yaweeli ga kùu, wàlá li yasɛɛgaa ga kabi, koro ga jáa a be li cò n fala, syɔɔn ga níì li nyaa í, 10kàliga n yɛlɛ gi pye Yawe mɛ́ɛgi na, pe siinw nínge ni bi gi tɛ̀ɛn yaweeli kɔ̀rɔsiifɔlɔ ga wi kɔ́gi taʔa wi syɛɛnnyɛnw yaweele na í, yaweeli fɔ́lɔ a fɔ̀lɔ kàligi bee na, wee si a ní yarigaa sàra í. 11Kàjáa pe ga yaweeli yùu wi ma, wi a gi sàra li kàfɔw ma. 12Kapye yaweegaa gi li cò n káa, wi a pan ní wogáa-gòroli ní, koro a pye séera. Wi a yarigaa sàra wojo-mí-káali kéele na í.

13Wàa ga yaweʔe nyɛ́ɛri wi syɛɛnnyɛnnɛ ma bi sa báara, ki yasɛɛgaa ga sáà kabi, wàlá a gi kùu ki kàfɔw kàdoʔo na, syɔ́ɔnw bee a gi sàra. 14Yaweegi fɔ́lɔ si ga pye yaà ní wi ní, syɔ́ɔnw bee a gi sàra í. Ki si ga pye wi maa yaweegi láa sàra na bi sa báara wii, sàraw na pe da bɛ̀ɛ lè, wee bee a gi yɛlɛ.

Kolocɔlɔɔ làlwa kérigèle kèle

15 # Làlw 22:28-29 «Nànwaa ga nàngeele sinján pìcaawaa lɛɛlɛ n sínɛ ní wi ní, wee wi lè wàa ga kɔ́ɔ̀ wi cò í, nǎnw bee a wi cèpɔri-lɔ́ri kaan wii si wi láa wi cɔɔ̀. 16Pìcaaw tóo si ga cée níì jo woro a wi kaan wi ma í, wálinyɔɔgi be kaangi nàngeele sinján pìcaabèle na lè, wi a gee bee kaan.

17 # Làlw 18:10-11 Mɔ a kɔ́ dɛ̀ɛjaa yaʔa sìi na í.

18 # Lev 18:23; 20:15-16; Làlw 27:21 Syɔ́ɔnwee faala wi ga sínɛ ní yaweʔe ní lè, pe a wi kpóo wii.

19 # Làlw 17:2-7 Syɔ́ɔnwee wi sáriga wóo lè kolocɔlɔbèle pèle nikwɔɔlɔ ma, kapye Yawe nibin ma ban í, pe a wi kálagi bi yirige yaà.

20 # Yir 23:9; Lev 19:33-34; Làlw 24:17-18; 27:19 Mɔ a kɔ́ nibɔɔn nɔ̀ʔɔrɔ í, mɔ a kɔ́ mɔ fangi gbàn wi na í. Níì cán yele maa wɔ́ɔ̀ pye nibɔɔnnɔ Ezyipiti tári ni. 21Yele a kɔ́ wɔʔɔgɔ taʔa lɔgucaa, wàlá círio na í. 22Mɔ ga ni be wɔʔɔ, á be yákpogèle wáa mii kurugo, mii a tɔ̀nɔ́ be yákpowáari lóʔo. 23Mii fundanʔari a cò naà, mii si yele kpóo ní ŋɔsée ní, yele cébèle si kàri lɔgucaala, yele pìíbèle si wɔ́ɔ pye círibéle.

24 # Lev 25:35-38; Làlw 15:7-11; 23:19-20 Mii syɛ́ɛnbèle bele be nyɛ lè yele ni fɔ̌ngi fɔ̀ɔlɔ, mɔ ga wáli fwɔ́ɔlɔ le pe wàa na, mɔ a kɔ́ gi pye àmɛɛ fwɔɔlebèle bele gi kpéʔele lè í. Mɔ a kɔ́ wi kɔ́ri wi tɔ̀nɔ taʔa mɔ ma í.

25 # Làlw 24:10-13 Mɔ ga mɔ syɛɛnnyɛnnɛ búrogbɔʔɔ syɔɔ n tɛ́ʔɛ yarigaa sìndɛʔɛ ni, ki n yɛlɛ mɔ í gi lúrugo kaan wi ma sáni cángi í jée lè. 26Níì cán koro nibin gi nyɛ wi ma làgogi sìndɛʔɛ ni, ní wɔ́ɔ i nyɛ wi búrogbɔɔgi gee wi nii wi céri na lè. Nyàʔá ní mɔ jo wi wiyɛɛ dɔ́n yébiligi ni? Wi ga wi yákpoli wáa mii kurugo, mii a lóʔo wi ma, níì cán mii i nyinimɛ taagi.

27 # Kap 23:5 Mɔ a kɔ́ dánga syɛ́ɛnrɛ joo wáa mii Kolocɔlɔɔ na í. Mɔ a kɔ́ syɛɛnpeere joo bi wáa mɔ syɛ́ɛnbèle fànʔafɔbile na í.

28Mɔ a kɔ́ mɔn ní mɔ yalenyɛngi, ní mɔ sinlogi yakanʔa ní í.

Mɔ nanbiiselili kaan mii ma. 29Mɔ a wɔ́ɔ gi kpéʔele sèjira ní mɔ yaweekpologèle, ní mɔ yaweeyiligèle nànbiiseligéle ní. Li a canya kɔrɔsiin kwɔ́ɔ li nɔ́ɔw taana. Ki ga pye canya kɔrɔtaanri wógi na, mɔ a li kaan mii ma.

30 # Lev 17:15 Yele a pye syɛɛncanbéle mii ma. Yele a kɔ́ yacogo yaweekaagorolaa faala káara káa í. Ki n yɛlɛ yaa dee bee wábagi pɔ́nbèle ma.

Currently Selected:

Yirile 22: CB10

Highlight

Copy