Yirile 17

Masa ní Meriba lǒgi kéele

(Cór 20:2-13)

1A Isirayɛli syɛ́ɛnmi myɛ pínɛ n yiri Sɛn fìími tára ni ni syée n yɛlɛ ní Yawe syɛ́ɛnri ní wi joo n gbàn lè pe gàríw kéele na. A be sáà be fànikpaayi kóri Erefidimi ma. Lɔ̀ʔɔ ga taa yaà syɛ́ɛnbèle ma pe gbaa í. 2A syɛ́ɛnbèle kàsii cò ní Mowizi ní níì jo: «Ye lɔ̀ʔɔ kaan wolo ma wolo í gbaa.» A Mowizi be pye: «Nyàʔá na yele túngu ní mii ní? Nyàʔá na yele Yawe pingi ni wéle?» 3A lògbaalaagi tɔ̀nɔ n wári syɛ́ɛnbèle na yaà, a be i Mowizi sànʔá. Ní kɔ́ɔ̀ wi yari: «Nyàʔá na mɔ wolo kɔ́ri n yirige Ezyipiti ni bi ba wolo, ní wolo pìíbèle, ní wolo yaweeri kpóo lògbaalaagi kɔ́yɔ ni?»

4A Mowizi yákpoli wáa Yawe kurugo níì jo: «Nyàʔá mii a kpéʔele syɛ́ɛnbèle naa ma? Cɛɛri ga níì pye pe a mii wábagi ní kàdɛnɛrɛ ní.» 5A Yawe Mowizi yari: «Isirayɛli wolɛɛbèle pèle kɔ́ri mi fàra miyɛɛ na mi kíni syɛ́ɛnbèle yɛ́ʔɛ na, kàgbeeli ní mɔ da Niili cábigi kpúmɔn lè, mí loro cò mɔ kɔ́gi ni maa syée. 6Wéle, mii a sa yére yaà mɔ yɛ́ʔɛ ma Horebi fálagi na. Mi sa fálagi kpúmɔn, lɔ̀ʔɔ a yiri gi ni, syɛ́ɛnbèle a gbaa.» A Mowizi gi kpéʔele kánmi bee na Isirayɛli wolɛɛbèle nyɛ́nɛ na.

7A wi tɛ́ɛgi bee mɛ́ʔɛ le ni gi yiri Masa ní Meriba,#17:7 Masa ní Meriba: Mɔ ga lóʔo Masa ní Meriba, ki kɔ́rɔw wi nyɛ pyewelege ní kàsii. Isirayɛli ye kàsiiw kéele na, ní àmɛɛ pe da Yawe pye n wéle lè níì jo: «A Yawe i nyɛ lé wolo níngi ni láà, ba fwɔɔ wi o nyɛ wolo níngi ni í?»

Amalɛki ye n baa too Isirayɛli ye na

8A Amalɛki ye pan bi ba too Isirayɛli ye na Erefidimi ma. 9A Mowizi gi joo Zyozuwe ma níì wi pye: «Nǎnbèle pèle nyɛ́nɛ mi wòlo wo ma mi yiri mi sa kapɛɛnni kpúmɔn ní Amalɛki ye ní. Nyɛ̀ʔɛna mii a sa yére dǎndamagi ǹjoʔo ni ní Kolocɔlɔɔ kàgbeeli ní mii kɔ́gi ni.»

10Gee Mowizi da joo Zyozuwe ma lè, a wi gi kpéʔele kánmi bee na ní sa ni kapɛɛnni kpúmɔn ní Amalɛki ye ní. A Mowizi, ní Aarɔn, ní Huri lúgu dǎndamagi ǹjoʔo ni. 11Mowizi ga kɔ́gi yìrige lǎli ni lè, Isirayɛli ye n fànʔa taa. Wi si ga kɔ́gi tìrige lǎli ni lè, Amalɛki ye n fànʔa taa. 12Kàjáa Mowizi kɔ́yi si maa kɔ́ baa líbe wi na. A be kàdɛnɛgɛ láa n tɛ́ʔɛ wi láari ni, á wi tɛ́ɛn gi na. A Aarɔn ní Huri wi kɔ́yi tɔʔɔ n yìrige. Wàa maa pye kàbangee na, wee si i nyɛ gee na. A wi kɔ́yi fànʔa taa n yére fwɔɔ n taa n baa nan cânjeeri na. 13A Zyozuwe tɔ̀nɔ n fànʔa taa Amalɛki ní wi kapɛɛnkpumɔnbèle na ní ŋɔséew ní.

14 # Làlw 25:17-19; 1Sam 15:2-9 A Yawe gi joo Mowizi ma níì wi pye: «Ki n yɛlɛ mi gee naa sɛ́bɛ sɛ́bɛw ni ki pye sɔ̀ngudaara kéele, mi gi joo mi tɛ̀ɛn Zyozuwe na, mí wi pye mii n jo mii a ba Amalɛki syɛɛnfelegi kwɔ́ɔ bi yirige péw dulunyanw ni, syɔɔn faala a ní be kéeli sɔ̀ngí taa í.» 15A Mowizi sáriga-wòlo-yafanʔa faan níì gi mɛ́ɛgi le ni gi yiri: Yawe wi nyɛ mii káfaliw. 16Wi n jo: «Amɛɛ Amalɛki ye soro n be kɔ́yi yìrige Yawe fàngoli kánma na lè, Yawe a ra kapɛɛnni kpúmɔn ní be yìrigèle wòolo myɛ ní#17:16 Syɛ́ɛnri naa kɔ́rɔ a wɔ́ɔ gbǎn pye: Amɛɛ kɔ́gi yìrige lè Yawe fàngoli kàbaan na, Yawe a ra kapɛɛnni kpúmɔn ní Amalɛki yìrigèle wòolo myɛ ní..»

Currently Selected:

Yirile 17: CB10

Highlight

Copy