Yirile 16

Mánɛw ní gbàrisɛɛyi kéele

1A Isirayɛli ye syɛ́ɛnmi myɛ yìri Eliimi ma n kári n sáà nan Sɛn fìími tára na. Tɛ́ɛgi bee i nyɛ Eliimi ní Sinayii nyanbelegi nínge ni. Pe yiri lè Ezyipiti tári ni, yeziin wógi canya kɛɛ ní kagunɔ wóʔo na pe nan tɛ́ɛgi bee na. 2Lǎli bee ni a Isirayɛli syɛ́ɛnmi myɛ i Mowizi ní Aarɔn sànʔá fìími tára ni. 3Isirayɛli ye maa gi joo be ma níì jo: «Yawe ga maa wolo kpóo yaà Ezyipiti tári ni lǎli ni wolo da pye yaà lè káari kòdɔlɔyɔ taana wodɛ́ɛnbéle ní, ní wɔ́ɔ i yaliiri taagi ni líi ni tíngi lè páan, koro ki a dée pɔ́rɔ wolo ma, fwɔɔ a yele wolo kɔ́ri n pan fìimɛ tári naa ma bi ba syɛɛnnɛʔɛmi naa myɛ kpóo nɛɛ kateegi kɔ́yɔ ni.»

4 # Zyan 6:31 A Yawe gi joo Mowizi ma níì jo: «Wéle, mii a ra yaliiri yìrigí nyɛ̀ʔɛni na bàā ŋuu naa yele ma àmɛɛ zàʔá nyɛ lè. Syɛ́ɛnbèle a ra yirigi bàā di koli canʔa o canʔa bi yɛlɛ ní be lìiganmi ní. Mii a be sɛʔɛ wéle koro ga pye bi gi cán kapye pe a ra táanri mii làlwaw na, wàlá kapye pe a ra táanri wi na í. 5Canya kɔrɔni wógi na, yaliiree pe a koli bi sámaga lè, ti a pye gi tɛɛyɛ siin.»

6A Mowizi ní Aarɔn gi joo Isirayɛli syɛ́ɛnbèle myɛ ma níì be pye: «Ki ga pye cângwɔɔgi nyɔ́ɔ na, yele a gi cán bi cán Yawe wi yele yirige Ezyipiti tári ni. 7Nyǐngi nyɔ́ɔ na, yele a Yawe nìjangbɔɔri nyaa. Níì cán àmɛɛ yele da ni Yawe sànʔá lè, wi n di lóʔo. Bɛ̀lɛ́ be nyɛ wolo, yele si i wolo sànʔá?» 8A Mowizi jo: «Cângwɔʔɔ ma Yawe a kaara kaan yele ma yele í káa si ba yaliire kaan yele ma nyǐngi nyɔ́ɔ na yele í lìi bi tín páan! Amɛɛ yele Yawe sànʔá lè, wi n di lóʔo. Bɛ̀lɛ́ be nyɛ wolo? Wolo ban yele sànʔá í, Yawe yele sànʔá.»

9A Mowizi gi joo Aarɔn ma níì wi pye: «Ki joo Isirayɛli syɛ́ɛnmi myɛ ma mí bi pye: ‹Ki n yɛlɛ ye nùuni Yawe na, níì cán wi n yele sànʔari lóʔo.› »

10Lǎli ni Aarɔn joo ní Isirayɛli ye syɛ́ɛnmi myɛ ní lè, pe maa kàri ni syée fìími tára kabaan na. Wéle, a Yawe nìjangbɔɔri tiyɛɛ dɛ̀ɛn fàfaangi ni. 11A Yawe gi joo Mowizi ma níì wi pye: 12«Mii n Isirayɛli ye sànʔari lóʔo. Ki joo be ma mí be pye: ‹Cângwɔɔgi nyɔ́ɔ na yele a kaara káa. Ki ga pye nyɛ̀ʔɛna nyǐngi nyɔ́ɔ na, yele a tín yaliiri na. Kánmi bee na yele a gi cán bi cán mii wi nyɛ Yawe yele Kolocɔlɔw.› »

13A ki ga pye cângwɔɔgi nyɔ́ɔ na, a gbàrisɛɛyɛ pan n baa tɛɛkòrogi tɔ́n. Koro nyǐndaligi nyɛ̀ʔɛ nyɔ́ɔ na, a kásaga baa too gbàgbabiga n tɛɛkòrogi màʔa n kpàra. 14A kásagi bee gbàgbabiga ga láʔa, a yariraa pye woyilire ní fìími tára na, ti maa tɔ̀nɔ n yìlige ní i nyɛ wogólokoloro ní. Ti maa pye tári na àmɛɛ zěsolo-yìlimɛ nyɛ lè. 15#1Kor 10:3 A Isirayɛli ye i di wéle, ní i gi nyuu peyɛɛ ma níì jo: «Nyàʔá gi gee naa?» Níì cán pe da di félegi cán í. A Mowizi be pye: «Yaliiree Yawe kaan yele ma yele í da líi lè, toro dii. 16Gee si Yawe joo n gbàn lè, koro gi nyɛ gee naa, wi n jo: ‹Yele myɛ nibin nibin n yɛlɛ bàā di koli bi yɛlɛ ní ye lìiganmi ní. Omɛɛri#16:16 Omɛɛri: Omɛɛri nibin i nyɛ lítiribéle sicɛrɛ félege. nyɛ́nnɛ nibin li yɛlɛ bi koli syɔɔn o syɔɔn nyúngo na, bi yɛlɛ ní syɛ́ɛnbèle nyɔ́ɔ ní. Syɔɔn o syɔɔn n yɛlɛ bàā di koli bi yɛlɛ ní syɛ́ɛnbèle nyɔ́ɔ ní pe nyɛ wi fànikpaagi ni lè.› »

17A Isirayɛli syɛ́ɛnbèle wɔ́ɔ̀ gi kpéʔele kánmi bee na. Pèle maa koli saʔa, á pèle koli cɛɛri. 18#2Kor 8:15 Koro kàdoʔo ma a pe ba ni di tímana omɛɛriw ni, a gi pye bele pe da saʔa koli lè, pe woraa ga kòro í, bele si pe da koli lè cɛɛri, poro wóri ga kólogo í. Pe myɛ maa di koli n yɛlɛ ní be lìiganmi ní.

Kajoogèle kèle mánɛw kéele na

19A Mowizi be pye: «Wàa faala ga yɛlɛ wi tàa tɛ́ʔɛ di syɔ́ɔn í.»

20Kàjáa be pèle ga Mowizi syɛ́ɛnri córo í, níì pe woraa yaʔa a di syɔ́ɔn. A fyɛ́ɛnri jée di ni, a di i níma. A Mowizi fúngi tanʔa gbanʔama syɛ́ɛnbèle bee kurugo. 21A be i di koli kánmi bee na nyɛ̀ʔɛ nyɔ́ɔ o nyɛ̀ʔɛ nyɔ́ɔ na pe myɛ nibin nibin ni yɛlɛgi ní be lìiganmi ní. Cángi ga wári, ti n nyan.

22A ki ga pye canya kɔrɔni wógi na, a be koli ki tɛɛyɛ siin-ziin, omɛɛri nyɛ̀nnɛ siin-ziin syɔɔn o syɔɔn nyúngo na. A syɛ́ɛnmi kùndigibéle myɛ pan n baa koro joo Mowizi ma. 23#Sél 20:8-11A wi be pye: «Gee bee si Yawe da joo. Wi n jo nyɛ̀ʔɛna i nyɛ cânŋɔndaʔa, ki lè Yawe cândɛnɛjǎngi. Dee yele caa bi kála lè, ye dee bee kála. Dee yele caa bi sɔʔɔ lè, ye dee bee sɔʔɔ. Dee si ti ga kòro lè, ye toro myɛ tɛ́ʔɛ nyɛ̀ʔɛna yɛ́ʔɛ na.»

24A be tàa tɛ́ʔɛ, a di syɔ́ɔn àmɛɛ Mowizi da gi joo n gbàn lè. Nùngo ga pye di na í. Fyɛɛnrɛ ga jée di ni í. 25A Mowizi jo: «Ye toro lìi níjanʔa, níì cán níjanʔa wi nyɛ cândɛnɛgi, Yawe kpɔ̀ʔɔrɔli kéele na. Yele a yafyɛn taa sìnbirigi ni níjanʔa í. 26Yele a ra di koli canya kɔrɔni fúngo ni, kàjáa canya kɔrɔsiin wógi na, gi lè cândɛnɛgi, di tàa a nyaa yaà í.»

27A ki ga pye canya kɔrɔsiin wógi na, a Isirayɛli syɛ́ɛnbèle pèle yiri tɛɛkòrogi ni bi sa tàa koli, kàjáa pe ga tàa taa í. 28Lǎli bee ni a Yawe gi joo Mowizi ma níì wi pye: «Làlìí ni yele a láʔa nya mii tundunri, ní mii làlwabèle céele na? 29Ye wéle, Yawe n cândɛnɛgi kaan yele ma, gee bee na wi canya siin yaliire kaangi yele ma canya kɔrɔni wógi na. Ye myɛ n yɛlɛ bi kòro ye tɛ́ɛyɛ ni. Syɔɔn faala ga yɛlɛ bi yiri wi tɛʔɛ ni can-kɔrɔsiin wógi na í.» 30A syɛ́ɛnbèle ŋɔ́n n daa canya kɔrɔsiin wógi na.

31 # Cór 11:7-8 A Isirayɛli kpáagi wòolo yaliiri bee mɛ́ʔɛ le ni di yiri mánɛ. Ti maa supyaà wíri, ní i nyɛ woviire ní, di tàánmi si i nyɛ àmɛɛ sárigā kagbalaga wómɔ nyɛ lè.

32A Mowizi jo: «Gee Yawe joo n gbàn lè koro gi nyɛ gee naa, wi n jo: ‹Ki n yɛlɛ mánɛ omɛɛri nyɛ́nnɛ í kɔn bi yaʔa yele nyɛ̀ʔɛna yirigèle wòolo kéele na jàngó yaliiri mii kaan yele ma fìími tára ni, lǎli ni mii yele yirige Ezyipiti tári ni lè, pe ba dee bee nyaa.› » 33#Heb 9:4 A Mowizi gi joo Aarɔn ma níì wi pye: «Ki n yɛlɛ mi kòdɔɔlɔ láa, mí mánɛ omɛɛri-nyɛ́nnɛ le li ni mi tɛ́ʔɛ Yawe yɛ́ʔɛ ma jàngó wi kɔn bi yaʔa yele nyɛ̀ʔɛna yirigèle wòolo kéele na.» 34A Aarɔn wi tɛ́ʔɛ Séeraw tɛ́ʔɛ yɛ́ʔɛ ma jàngó wi kɔn bi yaʔa bi yɛlɛ ní syɛ́ɛnri ní, dee Yawe da joo n gbàn Mowizi ma lè.

35 # Zyoz 5:12 A Isirayɛli ye mánɛw lìi yɛ̀ʔɛlɛ togoye siin fúngo ni sáni be nan tári na, dee ni syɛ̀ɛnnɛ nyɛ lè. Pe maa ni mánɛw líi fwɔɔ n taa n sáà jée Kanaan tári ni.

36Omɛɛri-nyɛ̀nnɛ kɛɛ ge nyɛ efa-nyɛ́nnɛ nibin.

Currently Selected:

Yirile 16: CB10

Highlight

Copy