MATHIE 17

Jezwi hɛ́nmɛn jrɛn

(Ɔ́n wú Mák 9.2-13; Ɔ́n wú Lwik 9.28-36)

1Ńcíbhí khwá mánji, lótɛ Jezwi do Piɛ, Jakhi le mɛ́n hɔnsɛ́n Jan ɔ́nmɔn ha phɔ, mɛ́n le nkɔn ɔ́nmɔn tɛɛ wo lo ábhóbhó piénpié bɛn tho, 2ló ńya nkɔn hɛ́nmɛn tɛɛ jrɛn. Mɛ́n hɛ́nmɛn édri sa ácɛ́nmɛ, ló mɛ́n ntráliɛ́ phwa phúnphú sa áyéfí a. 3Lópán yíchwɛmán bhwaliá wu Moyízi le Eli nɔn agɛ Jezwi ɔ́nmɔn ya étɔ bhwe. 4Ló Piɛ ékranmán Jezwi sa:

– Hwánthe, ńmwá obha krɛn. Kasé ɛpɔ mɛn mán mú ádɛgɔn-nkhú bhwaliá, hɛ kɛ bɛn, Moyízi kɛ bɛn le Eli kɛ bɛn.

5Lóka wo ya wo étɔ bhwe ntɔ́nyán, lótɛ mɔngú mɔngú bɛn édri kpránkpran bha mrwɛn wo, ló átɔ́ bɛn chan mɔngú mɔngú lókɔn hromɛn étɔ sa:

– Mɛ́n lókɔn nɔn ńni mɛn Bhi a mɛn pɔ, ló mɛ́n tho nɔn mɛn mo mɛn phɔhá khúnbrɛn tre, tɛmɛ ɔ́n yé mɛ́n bhwe!

6Yíchwɛmán ka aye átɔ́ lókɔn, ákhwíthá ka wo hrómɛn, ló wo hɔ bhwalé la. 7Jezwi tigbali wo, ńpa wo pɛ, ló ńtɔ sa:

– Ɔ́n chánfe, ɔ́n ne sókhú.

8Lóka wo je mɛ tho, wo le cu wu lephan nankhɛ, kasé áleli Jezwi míbrɛ. 9Lóka wo chan ábhóbhó tho wo édiathé, lótɛ Jezwi di wo bi sa:

– Ɔ́n ne tɔ ńmɛlrɛ lókɔn bhwe sé lephan nankhɛ brɛ oyé, kábrɛ kábrɛ odi lóka Lephan Mi ochán khúnɔn mɛn fe.

10Ló yíchwɛmán ébhi Jezwi sa:

– Bítɛ khɛ́n bidíyɛ́nmán étɔlé áyɔn se sa Eli ophrɛ thwási bhá khɛ́n ɛ?

11Ló ńkránman nkɔn sa:

– Khankhan mímí, áyɔn se salé Eli ophrɛ thwási bhá, ló ancɔ áyí khúnbrɛn tɛ́tré. 12Lótɛ khɛ́n mɛɛ́n kranmán hɔ́n salé: Eli phrɛ bha, khɛ́n néphan le yɛn nkɛ, ló wo yí akhu wo mwa ɔn, lónɔn wo tɛ nkɛ. Lósi yábhɛ brɛ Lephan Mi lɔ bha khɔ́ lí gbre wo mɔ́n mɛn é.

13Ló yíchwɛmán yɛn salé Jan-Nduhɛ́nháwo bhwe nɔn nkɛ étɔ sé wo yé.

Jezwi tɛ yípɔ bɛn ńfúkpo bha phɔ phɔ jan

(Ɔ́n wú Mák 9.14-29; Ɔ́n wú Lwik 9.37-43a)

14Lóka wo di ápasá si aya, lephan bɛn tigbali Jezwi, ńmɔ ntráhɛ́nlé nkɛ hɛ́nmɛn 15ló ántɔ sa:

– Hwánthe, wu mɛn mi nfɛkhu kpɛ. Ńfúkpo bha mɛ́n phɔ, ló áyí édri phɔ, ákáfe anhálé átɛn hromɛn, ló ákáfe anhálé ńdu hrómɛn. 16Mɛn do-e man se hɛ yíchwɛmán, khɛ́n wo le gɛ tɛ nkɛ phɔ jan.

17Ló Jezwi lukhwɛ́ tɔ sa:

– Néphan phromɛn phromɛn alepɛ mímíbhú! Mán gɛ hɔ́n ɔ́nmɔn chré kábrɛ kábrɛ ábha di cíbɛn-áan khɛ́n ɛ? Mán cu do hɔ́n pɛ kábrɛ kábrɛ ábha di cíbɛn-áan khɛ́n ɛ? Ɔ́n hɔn yípɔ bha sé mɛn krɛn.

18Jezwi tɔ bhwe mɛ́n khrákhrá mɛn se nánnánmi phromɛn lókɔn, lótɛ ńchan yípɔ phɔ thandi, ló lóyámɛ́n, yípɔ phɔ jan.

19Lóka ákha Jezwi le yíchwɛmán ɔ́nmɔn ánchán, lótɛ wo tigbali nkɛ, ló wo ébhi nkɛ sa:

– Bítɛ khɛ́n lo-ɛ, lo le gɛ tranman nánnánmi phromɛn lókɔn?

20Ló Jezwi kranman nkɔn sa:

– Hɔ́n mímíbhú ale thubhɔ hɛ́nthé. Mímí mɛɛ́n kranmán hɔ́n: kasé ɔ́n pɛ mímíbhú tɛsa mutáde mí, ɔ́n ma gɛ kranmán ábhóbhó lókɔn lée: “Chan krɛn fi lo tré kwan,” ló mɛ́n lɔ ánman no tré lóne. Álepɛ yí ɔ́n ma lé gɛ tɛ́. [ 21Lókhɛ́n nánnánmi yábhɛ lókɔn ɔn, yankanla le ńmɛ́nji ɔ́nmɔn mɛn nɔn ógɛ khɔ́ trɛnmɛn.]

Jezwi cu étɔ mɛ́n khú le mɛ́n khúnɔn mɛn chánfe ɔ́nmɔn bhwe

(Ɔ́n wú Mák 9.30-32; Ɔ́n wú Lwik 9.43b-45)

22Cíbɛn Galile gotho, yíchwɛmán khúnbrɛn bhúrɛhɛ́n sibrɛ, ló Jezwi ékranmán nkɔn sa:

– Wo bhá hɔ́n Lephan Mi phɛ́lí néphanmiɔn yé. 23Wo bhá wɛ́n nkɛ; khɛ́n ńcíbhí bhwaliá, ánman chán khúnɔn mɛn fe.

Yíchwɛmán ka aye bhwe lókɔn, lótɛ wo phɔ khúnbrɛn gbɔn.

La-npho osɔ́n Yankan-khúthé

24Lóka Jezwi le mɛ́n yíchwɛmán ɔ́nmɔn di Kapɛnaúmɛn, lótɛ la-nphodómán abha Yankan-khúthé ébhi Piɛ sa:

– Wú hɔ́n hwánthe lɔ sɔ́n Yankan-khúthé la-npho?

25– Ló Piɛ nkɛé, mɛ́n lɔ ansɔ́n.

Lóka Piɛ ka bháthó, Jezwi bho bhwetɔ́, ló ánmi nkɛ sa:

– Simɔn, ébí hɛ́nphe nɔn ɛbhú ábhwe lókɔn phɔ ɛ? Bannɛ́n nɔn ágɛ sɔ́n la-npho le áyíbɔn nankhɛ ɔ́nmɔn sé áthéji mringbilímán ɛ? Wú ákhúbhɛ́nɛ́n lée nka ńthékhunɛ́n?

26– Ló Piɛ tɔ sa, nkɛé ńthékhunɛ́n nɔn ágɛ sɔ́n la-npho.

– Ló Jezwi tɔ sa, mímí ákhúbhɛ́nɛ́n-ɛ lé gɛ sɔ́n la-npho a. 27Lókhɛ́n ole tɛ́ áphɔkhú sé néphan lókɔn. Lóhɛ́nthé tɛmɛ ɛló duphé mɛ́n lo ka gwe. Ácɔn khɛ́n ɛ́bha lili hɔ́n, ɛphwan mɛ́n míthé ló ɛ́bha gɛ fránkhi brɛ, fránkhi lókɔn, ádi mɛn le hɛ ɔ́nmɔn la-npho pɛnsɔ́n, ló ɛbhó bha sɔ́n lo mɔ́nmɔn la-npho sé wo.

Currently Selected:

MATHIE 17: ENT96

Highlight

Copy