MATHIE 12

Jezwi le saba ɔ́nmɔn

(Ɔ́n wú Mák 2.23-28; Ɔ́n wú Lwik 6.1-5)

1Ámɔn kpɛ́bɛn, ló saba cí bɛn, Jezwi bhurikhɔ ble gɔn bɛn ehɛ́n. Áko ehɔ́n mɛ́n yíchwɛmán, ló wo bhu ble pɛ wo étha. 2Fariziɛnnɛ́n ka awu lóyí, ló wo kranman Jezwi sa:

– Wu a, áyí lo bidí le se mɔ́nsi otɛ́ saba ci, lónɔn hɛ yíchwɛmán etɛ́!

3Ló Jezwi kranman nkɔn sa:

– Cíbɛn, Davi bɛn nbrɛn le mɛ́n hwannɛ́n abha mɛ́n phɔ ɔ́nmɔn ka áko ehɔ́n, wo yí wo tɛ lócí lókɔn ɔn, wú ɔ́n ne kan lóhrɔ́? 4Ńka Yankan-khúthé, ló kpánhɔn okhwɛn ha npha se Yankan, mɛ́n le mɛ́n hwannɛ́n ɔ́nmɔn wo khwɛn tha. Khɔ́ wo le gɛ mɔ́nsi wó tha kpánhɔn lókɔn a, kasé áleli nphahamán míbrɛ pán lo bidí se mɔ́nsi lée otha. 5Saji, wú ɔ́n ne kan Moyízi bidí hrɔ́ hrómɛn salé, nphahamán abha Yankan-khúthé elí júmán saba cí, wo lɔ, wo lé ji saba bidí, lótɛ khɛ́n óle bhɔ́ wo pɔn? 6Lóhɛ́nthé nɔn achɛ mɛɛ́n kranmán hɔ́n salé, áyí abha krɛn ɔn, ábanbrɛn Yankan-nkhú! 7Kasé álí ɔ́n yɛ́n Yankan hrɔ́ hrómɛn bhwe thé mímí nbrɛn, ábhwe lókɔn khɛ́n étɔlé: “Mɛn pɔ áyíbhwátɛ́ brɛn ńbranmán okhwɛ́n ha npha ɔn,” ka néphan lókɔn ale tɛ yíɛkɛ, ɔ́n ma lé bhɔ́ wo pɔn. 8Átɛsalé Lephan Mi li saba óthe.

Sɛ khɛ́n ńmɔ́n khu

(Ɔ́n wú Mák 3.1-6; Ɔ́n wú Lwik 6.6-11)

9Jezwi chan lóne lo, ló ńno wo hɛ́nbhúrɛ si. 10Sɛ bɛn ńmɔ́n khu lɔ bha lóne. Néphan abha lóne énɛn lósi wo bhá khɔ́ phɛ́ bhwe há Jezwi tho, lóhɛ́nthé wo bhi nkɛ sa:

– Wú lo bidí se mɔ́nsi sa otɛ́ lephan phɔ jan saba cí?

11Ló Jezwi kranman nkɔn sa:

– Hɔ́n hrómɛn, kasé lephan bɛn pɛ mɛ́n gbankhran brɛ, khɛ́n saba cí, gbankhran lókɔn ka nɔn jwan bɛn hromɛn ɔn, wú anman nɛ́n hɔ́n nkɛ yɛn lóhrómɛn? 12Khɔ́ lephan yɔn brɛn gbankhran! Lóhɛ́nthé nɔn lo bidí se mɔ́nsi salé saba cí, otɛ́ lephan mwá.

13Lótɛ Jezwi kranman sɛ lókɔn sa:

– Tia mɔ́n.

Sɛ lókɔn tia mɔ́n, lópán mɛ́n mɔ́n tɛ mwa. 14Lótɛ Fariziɛnnɛ́n bhósi lo, ló lósi wo bhá khɔ́ wɛ́n Jezwi ɔn, wo ésri lóphɔ bhwe.

Nɛnkhwɛ́nwo khɛ́n Yankan san

15Jezwi ka aye lóbhwe, ńchan lóne féne, néphan búdúbúdú lɔ gɛ thá ɔ́nmɔn lo, ló ńtɛ lɔ́phɔmán khúnbrɛn phɔ jan. 16Khɛ́n mɛ́n lephan yábhɛ ńni, ńdi wo bi mɛ́n khrákhrá mɛn salé, nkɔn lé tɔ lóbhwe sé lephan brɛ oyé. 17Ńtɛ nɛn, ochɛ́sé ábhwe khɛ́n bhwetɔ́tréwo Ezayi tɔ ɔn, lóyí otɛ́ símɛ́n. Lóbhwe nɔn ali sa:

18“Yankan nkɛé, nɛn mɛn nɛnkhwɛ́nwo

mɛn san o,

mɛ́n nɔn mɛn pɔ, ló mɛn mo mɛn phɔhá yí

khúnbrɛn tre mɛ́n tho.

Man chɛ́ mɛn Nánnánmi bha ká mɛ́n phɔ,

ló ánman tɔ mɛn kwabhɔ́ bhwe

sé aféchwe.

19Anman nɛ́n gɛ lephan brɛ ɔ́nmɔn talí bhwe,

ló anman nɛ́n núkhwɛ́ bhrɔ́ɔ́.

Anman nɛ́n ya sitó

tɔ bhwe búdúbúdú.

20Anman nɛ́n hɔ́n ńgochro abhletre mú

ló khanniɛn ále fí mwámwá,

anman nɛ́n tɛ́ nɔ́n.

Ánman tɛ́ nɛn kábrɛ kábrɛ, ábha chɛ́

áyítɛ́ príman mɔ́n bha dipha.

21Ló aféchwe khúnbrɛn bha bhó wo mwasrui

tré mɛ́n tho.”

Ábhwe néphan ephɛ́ há Jezwi tho, Jezwi étɔ lóbhwe

(Ɔ́n wú Mák 3.22-30; Ɔ́n wú Lwik 11.14-23)

22Wo hɔn lephan bɛn bha se Jezwi. Lephan lókɔn ɔn, nánnánmi phromɛn bha mɛ́n phɔ, lóhɛ́nthé mɛ́n mɛbhí phu, ló ánnɛ́n gɛ tɔ bhwe. Jezwi tɛ mɛ́n phɔ jan, áchɛ́se thénthé ántɔ bhwe, ló anwú yí. 23Lóbhwe etán ápasá khúnbrɛn hɛ́nmɛn, ló wo étɔ sa:

– Wú léli Davi Mi?

24Khɛ́n Fariziɛnnɛ́n ka aye ábhwe nkɔn étɔ, ló wo tɔ sa:

– Lephan lókɔn ɔn, Bɛzebu ali nánnánmi phromɛn phromɛnhɔn-óthe nɔn ase sɛ́npɛ́ ńmo ántranmán nánnánmihɔn lókɔn!

25Khɛ́n Jezwi yɛn nkɔn hɛ́nphe nkɔn ebhú, ló ántɔ sa:

– Bhringbi khúbhɛ́ khúnbrɛn tɛɛ khɛ́n néphan ya wo bɛn nbrɛn hrómɛn ekhú tha ɔn, ále gɛ gɛlé tré, ábhɔ́. Lóyábhɛ brɛ, kasé khɔ ákhúbhɛ́ bɛn o, khɔ ámándo bɛn o, khɛ́n néphan ya wo bɛn nbrɛn hrómɛn éswan ɔn, ále gɛ tré mɔ́n. 26Kasé Abhɔsɛ́mɔ́n ethú Abhɔsɛ́mɔ́n thá, átɛsa ńgɛ mɛ́n bɛn nbrɛn ɔ́nmɔn ánswan, lóyábhɛ nɛn ɔn, kalósi mɛ́n bhringbi khúbhɛ́ bha khɔ́ gɛlé tré ɔ́nmɔn lo e? 27Khɔ́ hɔ́n étɔlé Bɛzebu nɔn esé mɛn sɛ́npɛ́, lónɔn mɛɛ́n tranmán nánnánmi phromɛn phromɛnhɔn. Ló kasé áli nɛn ɔn, ńthé hɔ́n gbemán-ɛ, abɛn nɔn ásé wo sɛ́npɛ́ khɛ́n wo tranmán nkɔn ɛ? Hɔ́n gbemán nbrɛn étɔlé ɔ́n ni pɔn! 28Mímí, Yankan Nánnánmi nɔn mɛn mo mɛɛ́n tranmán nánnánmi phromɛn phromɛnhɔn, lóthé nɔn ali salé Yankan Bhringbi khúbhɛ́ bha ka hɔ́n thethé.

29Lephan apɛ sɛ́npɛ́, kasé lephan ɛ́nɛn ɛlo khwɛ́n mɛ́n yí sído ɔn, áyɔn sa ɛphrɛ gɛ nkɛ mɛ́ kálé khɛ́n. Kasé ɛle tɛ nɛn, ɛbha lé gɛ ká mɛ́n khúthé khɛ́n ɛ́bha khwɛ́n mɛ́n yí khúnbrɛn sído bhrɔ́ɔ́.

30Lephan ale bha mɛn phɔ, ńgɛ mɛn mɔn ánswan. Ló mɛ́n ánnɛn gɛ mɛn ɔ́nmɔn murɛ yí hɛ́n, mɛ́n-ɛ ankhwɛ́n chranmánlé. 31Lóhɛ́nthé nɔn, mɛɛ́n kranmán hɔ́n gbée salé: ńne khúnbrɛn khɛ́n néphan bha tɛ́ le ábhwe phromɛn phromɛn khúnbrɛn khɛ́n wo bhá tɔ ɔn, óbha yɔ́phɔ́ wo, khɛ́n lephan tɛɛ ábha tɔ bhwe phromɛn phromɛn há Nánnánmi Créncré tho ɔn, lephan lókɔn, mɛ́n obha lé yɔ́phɔ-ɛ bhrɔ́ɔ́. 32Lephan ábha tɔ bhwe phromɛn há Lephan Mi tho, óbha yɔ́phɔ-ɛ. Khɛ́n mɛ́n ánman tɔ bhwe phromɛn há Nánnánmi Créncré tho, ncɛ́n cí lɔ obha le yɔ́phɔ-ɛ, saji ácí abha hɛ́nmɛn ebhá lɔ, obha le yɔ́phɔ-ɛ.

Áyá le mɛ́n mí ansó

(Ɔ́n wú Lwik 6.43-45)

33– Lephan kasé ɛ́nɛn ɛpɛ nyámí bhwá, áyɔn sa ɛpɛ áyá bhwá. Lephan kasé ɛpɛ áyá phromɛn, ɛbha pɛ nyámí phromɛn. Átɛsalé áyá mɛ́n mí ansó, lóphɔ nɔn okhɔ́ yɛn. 34Ńmɛmán hóthóbhɛ́ gbemán! Khɔ́ hɔ́n nbrɛn nɔn ɔ́n ni néphan phromɛn, ńthé kalósi ɔ́n ma gɛ khɔ́ tɔ bhwe bhwá e? Átɛsalé ábhwe abha ńthɛ́n hrómɛn nɔn ńmɛ́n lɔ tɔ ká. 35Lephan bhwá, áyíbhwá abha mɛ́n jayí bhwá hrómɛn nɔn anmó. Lephan phromɛn lɔ, áyí phromɛn abha mɛ́n jayí phromɛn hromɛn nɔn anmó. 36Mɛɛ́n kranmán hɔ́n gbée salé: ákwabhɔ́ cí, ábhwe phromɛn phromɛn khúnbrɛn khɛ́n néphan tɔ ɔn, wo bhá lɛ lóphɔ mɛ́n. 37Átɛsalé lephan hɛ bhwe ɛtɔ ɔn, lóphɔ nɔn wo bhá khɔ́ bhɔ́ hɛ kwa, lónɔn kasé ɛli pɔn o, kasé ɛle li pɔn o, wo bhá wú.

Néphan énɛn hɛ́nmɛntányí bɛn awu

(Ɔ́n wú Mák 8.11-12; Ɔ́n wú Lwik 11.29-32)

38Ló ábidíyɛ́nmán fe le Fariziɛnnɛ́n fe ɔ́nmɔn ékranmán Jezwi sa:

– Yíliéwo, lo énɛn salé ɛtɛ́ hɛ́nmɛntányí bɛn sé lo wú.

39Ló Jezwi kranman nkɔn sa:

– Thénthé khúbhɛ́nɛ́n phromɛn phromɛn lókɔn khɛ́n ále lí mɛ́nbrɛ Yankan phɔ, énɛn hɛ́nmɛntányí bɛn awú. Khɛ́n obha le tɛ́ hɛ́nmɛntányí brɛ sé wo wú, kasé áleli bhwetɔ́tréwo Jonasi phɔ hɛ́nmɛntányí brɛ lókɔn khɛ́n wo wu. 40Lósi Jonasi khɔ bha ácɔn hromɛn ńcrɔ́n cí le ńmréci cí bhwaliá ɔn, lóyábhɛ brɛ, Lephan Mi lɔ bha bhá áyíta hromɛn ńcrɔ́n cí le ńmréci cí bhwaliá é. 41Ákwabhɔ́ cí, Ninive khúbhɛ́nɛ́n bha fe, ló wo bhá phɛ́ bhwe há thénthé khúbhɛ́nɛ́n tho, átɛsalé Ninive khúbhɛ́nɛ́n ka aye Yankan bhwe khɛ́n Jonasi tɔ se wo ɔn, wo jrɛn wo yítɛ́. Khɛ́n lephan aya krɛn, khɔ́ ńbanbrɛn Jonasi! 42Ákwabhɔ́ cí, Seba khúbhɛ́ bhringbi bhie bha ya thénthé khúbhɛ́nɛ́n hɛ́nmɛn, ló ánman phɛ́ bhwe há nkɔn tho, átɛsalé ńchan nthwéthwemɛn-áan ma, ló ńman ye Salomɔn bhweyɛ́n bhwe atɔ. Khɛ́n lephan aya krɛn, khɔ́ ńbanbrɛn Salomɔn!

Nánnánmi phromɛn ka asaji bha

(Ɔ́n wú Lwik 11.24-26)

43– Lóka nánnánmi phromɛn bɛn chan lephan phɔ thandi, ánno jekhali nɛn ási awɛ ló anchré fikhwá. Kasé ánnɛn gɛ, 44ántɔ mɛ́n hrómɛn mɛn sa: “Man sáji nó mɛn nkhú hrómɛn si mɛn chan thandi.” Ánsáji nó lóne, anwú sa ńkhú lókɔn ka nwrɛ́, wo fi lóhrómɛn, ló wo cɔ tɛ mwámwá ka. 45Lótɛ ánsáji no do nánnánmi phromɛn phromɛn khwache nankhɛ khɛ́n ayan brɛn mɛ́n nbrɛn há phɔ ɔ́nmɔn má, ló wo khúnbrɛn wo sáji bha chre lóne. Áchɛ́sé lephan lókɔn ɔn, áncu ní lephanle brɛn lócí lephan yábhɛ ńni. Lóyí yábhɛ tɛɛ ebhá tɛ́ thénthé khúbhɛ́nɛ́n phromɛn lɔ é.

Jezwi mɛ́n man, le Jezwi mɛ́n hɔnsɛ́nhɔn

(Ɔ́n wú Mák 3.31-35; Ɔ́n wú Lwik 8.19-21)

46Jezwi bhwe tɛɛ aya étɔ sé ápasá, lópán mɛ́n man le mɛ́n hɔnsɛ́nhɔn ɔ́nmɔn bha, ló wo ya ngbophro wo énɛn wo tɔ bhwe sé nkɛ yé. 47Lótɛ lephan bɛn kranman Jezwi lée:

– Wú a, hɛ man le hɛ hɔnsɛ́nhɔn ɔ́nmɔn nɔn aya ngbophro énɛn atɔ bhwe sé hɛ yé.

48Ló Jezwi bhi lephan lókɔn sa:

– Abɛn li mɛn man ɛ? Ló bánnɛ́n li mɛn hɔnsɛ́nhɔn ɛ?

49Lómánji ńmo mɔ́n tɔ mɛ́n yíchwɛmán, ló ántɔ sa:

– Ɔ́n wu a: mɛn man le mɛn hɔnsɛ́nhɔn ɔ́nmɔn nɔn akhwa krɛn. 50Átɛsalé lephan khɛ́n etɛ́ mɛn Nthe abha tho thɛ́npɔ́ yí, lephan lókɔn ɔn, mɛ́n nɔn ńni mɛn hɔnsɛ́n, mɛn hɔnmia le mɛn man.

Currently Selected:

MATHIE 12: ENT96

Highlight

Copy