MATHIE 13
13
Yídwánwo bɛn phɔ yandran obhu
(Ɔ́n wú Mák 4.1-9; Ɔ́n wú Lwik 8.4-8)
1Lócí lókɔn, Jezwi chan bháthó thándi, ló ńno chre duphé mɛ́n ánnie néphan yí. 2Ápasá bhróbhrobhé bhúrɛhɛ́n mɛ́n phɔ, wo thú wo thubhɔ hɛ́nthé, ńka hran bɛn mɛn ló ńchethé, khɛ́n ápasá-ɛ ya dumɛ́n. 3Ńkhɔ yandran mɛn tɔ bhwe búdúbúdú sé wo, ló ńtɔ sa:
– Sɛ bɛn lo éha nyámí. 4Lóka ankú nyámí khwá mɛ́n gɔn, lótɛ fe khwa ásitó njɛ: ńkɔ́cran bha, ló wo chwan li. 5Lódɔnbɛn kwa ńmú hrómɛn si ńthu le thubhɔ, áchɛ́se ále mɔn lɔ khɛ́n ále, ńthu ale thubhɔ lóne hɛ́nthé. 6Ńyóka ka elé, áhɔn ńbi chɛ́-nchɛ́ khɛ́n ale ebhá, ló áwɛ, lómɛ́lu ale lo thé hɛ́nthé. 7Ńyámí dɔnbɛn hɛn ńthó hrómɛn. Ńthó bi lókɔn le bha tho, ló ásrɛn ńbi chɛ́-nchɛ́ bhwá ale ebhá. 8Khɛ́n ńyámí dɔnbɛn-ɛ khwa áyíta bhwábhwá tho, ló ásomí: fe somí ya, fe somí mɔ-bhwaliá, ló fe lɔ somí áphɛn le áwɔ́.
9Ló Jezwi cu tɔ sa:
– Lephan kasé ɛpɛ njɛ, tɛmɛ ɛyé mwámwá!
Áyí achɛ khɛ́n Jezwi ekhɔ́ yandran mɛn tɔ bhwe
(Ɔ́n wú Mák 4.10-12; Ɔ́n wú Lwik 8.9-10)
10Lótɛ yíchwɛmán tigbali Jezwi, ló wo ébhi nkɛ sa:
– Bítɛ khɛ́n ɛkhɔ́ yandran mɛn tɔ bhwe sé wo ɛ?
11Ló ńkránman nkɔn sa:
– Hɔ́n ɔn, ɔ́n yɛn Átho Bhringbi khúbhɛ́ hrómɛn bhwe ahrɔman tre, khɛ́n wo-ɛ, wo le yɛn. 12Átɛsalé lephan apɛ yí ɔn, wo bhá cu se, ló mɛ́n yí bha thúbhɔ. Khɛ́n lephan alepɛ yíɛkɛ, lóbhrií lókɔn nwɛ́ ńpɛ, lólɔ wo bhá thándo yɛn. 13Lóyí achɛ khɛ́n mɛn khɔ yandran mɛn tɔ bhwe se wo é: átɛsalé wo nɛ́n yí khɛ́n wo le wú, wo di njɛlé khɛ́n wo le yé bhwe, ló wo le yé lóthé lɔ. 14Lónɔn Yankan bhwe khɛ́n Ezayi tɔ se wo, lóyí khúnbrɛn bha tɛ́ símɛ́n sa:
“Hɔ́n njɛ bha yé bhwe,
khɛ́n ɔ́n ma le yé lóthé;
hɔ́n mɛbhí bha nɛ́n yí,
khɛ́n ɔ́n ma lé wú lóyí hɔ́n enɛ́n.
15Átɛsalé aféchwe lókɔn thɛ́n khɔnman,
wo khwɛn yí thrwa wo njɛ,
wo bhu mɛ pɛ,
ochɛ́sé wo mɛbhí ole wú yí,
ló wo njɛ ole yé bhwe,
wo bhweyɛ́n olɔ,
ló wo lé sa hɛ́nmɛn nrwɛn mɛn,
khɛ́n mɛn tɛ́ wo phɔ jan.”
16Khɛ́n hɔ́n-ɛ áphɔ khwa hɔ́n lé: hɔ́n mɛbhí wú yí, ló hɔ́n njɛ lɔ yé bhwe! 17Mímí mɛɛ́n kranmán hɔ́n: bhwetɔ́trémán le Yankan-gbemán búdúbúdú ɔ́nmɔn pɔ salé wo wú hɔ́n yí hɔ́n ewú, khɛ́n wo le wu, saji wo pɔ salé wo yé ábhwe hɔ́n eyé, khɛ́n wo le ye.
Ńyámí-dwánwo phɔ yandran obhu, Jezwi élɛ lóthé
(Ɔ́n wú Mák 4.13-20; Ɔ́n wú Lwik 8.11-15)
18– Ɔ́ndi njɛlé yé nyámí-dwánwo phɔ yandran thé. 19Néphan eyé Yankan Bhringbi khúbhɛ́ phɔ bhwe wo étɔ khɛ́n ále yé lóthé ɔn, wo tɛsa ásitó jɛ́ njɛ si ńyámí khwa a: lóka Logbo bha, ankhwɛ́n ábhwe oha abha wo thɛ́n hrómɛn yɛn. 20Dɔnbɛn tɛsa ńmú hrómɛn si ńyámí khwa, wo lókɔn ɔn, wo yé ábhwe otɔ lóyámɛ́n, ló wo do áphɔhá mɛn. 21Lókhɛ́n wo lé dɛn ágɛlé tré wo hromɛn, wo lé hɔ́n pɛ ló sikhɔ́n. Lóhɛ́nthé, lóka áyíkhúphɔ le ágbrelí ɔ́nmɔn bha, Yankan bhwetɔ́ lókɔn hɛ́nthé, lóyámɛ́n, wo yɔ́ wo mímíbhú ká áliá. 22Néphan fe lɔ do nyámí akhwa ńthó hrómɛn: wo lókɔn ɔn, wo nɔn wo li néphan eyé ábhwe otɔ, khɛ́n áthéji mɛpɔ́bhá phɔ mwanhɛ́n bhu, le áthéji jayí wrɛ́ ali yí ákhrɛ lephan ɔ́nmɔn srɛn ábhwe wo ye, áchɛ́ wo bhwe lé gɛ sómí brɛ. 23Khɛ́n néphan fe-ɛ do nyámí akhwa áyíta bhwábhwá tho. Wo lókɔn ɔn, wo nɔn wo li néphan eyé ábhwe otɔ, wo yé lóthé, ló wo sómí. Fe sómí ya, dɔnbɛn sómí mɔ-bhwaliá, ló fe lɔ sómí áphɛn le áwɔ́.
Ńbie phromɛn bɛn phɔ yandran obhu
24Jezwi cu bhu yandran nankhɛ bɛn se wo npɔ, ló mɛ́n nkɛé:
– Átho Bhringbi khúbhɛ́ yí akhɔ nɔn ali salé: Sɛ bɛn ha nyámí bhwá mɛ́n gɔn. 25Mréci bɛn, lóka ńná khwa néphan khúnbrɛn, lónɔn mɛ́n mɛsawo bha, ló ńha ńbie phromɛn khrɛ ble hromɛn, ló ńmósi no. 26Lóka ble le, khɛ́n ásan, lótɛ ńbie phromɛn lɔ le. 27Ló nɛnkhwɛ́nmán lo ékranmán ábithe nthe sa: “Hwánthe, khɔ́ ńyámí bhwá nɔn ɛha hɛ gɔn o: ńthé bánne nɔn ńbie phromɛn lókɔn-ɛ chan?” 28Ló ńkránman nkɔn sa: “Mɛsawo bɛn nɔn atɛ yí yábhɛ lókɔn.” Lótɛ nɛnkhwɛ́nmán ébhi nkɛ lée: “Wú ɛpɔ salé lo lo fi ńbie phromɛn lókɔn yɛn?” 29Lókhɛ́n ńtɔ sa: “Chɛchɛ, kpɛnɛn ɔ́n nó ńbie phromɛn fi, khɛ́n ɔ́n kpá fi ble lɔ. 30Tɛmɛ ɔ́n yɔ́ lókhúnbrɛn khwá ogrɛ lé ɔ́nmɔn lo, kábrɛ kábrɛ osé nyámí bhú cí, lóka lókɔn nɔn, mán kranmán júmánmán khɛ́n abhú nyámí lée: ‘Ɔ́n thwási fi ńbie phromɛn yɛn khɛ́n, ló ɔ́n jrwa nkɔ́mɛn nkɔ́mɛn sé ohá tɛn. Lómánji khɛ́n ɔ́n khwɛ́n ble bha há kɔ hromɛn.’ ”
Mutáde mí phɔ yandran obhu
(Ɔ́n wú Mák 4.30-32; Ɔ́n wú Lwik 13.18-19)
31Jezwi cu bhu yandran nankhɛ bɛn se wo, ló mɛ́n nkɛé:
– Átho Bhringbi khúbhɛ́ khɔ nyámí bɛn óche mutáde, khɛ́n sɛ bɛn bho bha ha mɛ́n gɔn. 32Ńyámí lókɔn ɔn, átɛ mri brɛn ńyámí khúnbrɛn, khɛ́n lóka ále ɔn, ácu bánbrɛn ńyá khúnbrɛn, ájrɛn áyá khóo, áchɛ́se ńkɔ́cran bha than wo nkhú tre lóncɛn tho.
Mányan phɔ yandran obhu
(Ɔ́n wú Lwik 13.20-21)
33Jezwi cu bhu yandran nankhɛ bɛn se wo, ló mɛ́n nkɛé:
– Átho Bhringbi khúbhɛ́ tɛsa mányan khɛ́n bhie bho khrɛ nbɛdɛ hromɛn hɔ, átré kábrɛ kábrɛ áchɛ́ nbɛdɛ khúnbrɛn yán phú.
Lósi Jezwi khɔ́ tɔ bhwe yandran mɛn
(Ɔ́n wú Mák 4.33-34)
34 Yandran mɛn nɔn Jezwi khɔ tɔ bhwe khúnbrɛn lókɔn se ápasá. Ńnɛn yɔ yandran ka ntɔ bhwe se wo, 35ochɛ́sé bhwetɔ́tréwo bhwe atɔtre ɔn, lóyí khúnbrɛn otɛ́ símɛ́n, lónɔn ali sa:
“Man khɔ́ yandran mɛn tɔ bhwe sé wo,
ochɛ́sé áthéji cí-áan wo chan tɛ,
áyí khúnbrɛn khɛ́n ahrɔman tre,
mɛn tɔ lóbhwe sé wo yé.”
Ńbie phromɛn phɔ yandran obhu, Jezwi élɛ lóthé
36Lómánji, Jezwi se ápasá mɔ́nsi, ló ńno bháthó. Mɛ́n yíchwɛmán tigbɛli, ló wo étɔ sa:
– Ńbie phromɛn khɛ́n abha ńgɔn ɔn, tɛmɛ ɛlɛ lóphɔ yandran thé sé lo yé. 37Ló Jezwi étɔ sé wo sa:
– Lephan khɛ́n éha nyámí bhwá nɔn ali Lephan Mi. 38Áthéji nɔn ali ńgɔn, ńyámí bhwá nɔn ali Yankan Bhringbi khúbhɛ́ miɔ́, ló ńbie phromɛn nɔn ali Logbo hwannɛ́n. 39Logbo nɔn ali mɛsawo khɛ́n aha ńbie phromɛn, ńyámí bhú nɔn ali áthéji ka ábha bhɔ́, ló júmánmán ábhú nyámí nɔn ali Yankan-mranchɛ́mán. 40Lósi okhɔ́ fi ńbie phromɛn há tɛn, áthéji ka ábha bhɔ́, lóyí yábhɛ brɛ tɛɛ ebhá tɛ́ é: 41Lephan Mi bha chɛ́ mɛ́n Yankan-mranchɛ́mán bhá, ló néphan khúnbrɛn khɛ́n echɛ́ wo jɔn hálé ńne hrómɛn, le néphan etɛ́ yíléle, wo bha khwɛ́n nkɔn yɛn mɛ́n Bhringbi khúbhɛ́, 42ló wo bhá khwɛ́n nkɔn fɔ́nkhwá átɛn atre ethɔ́n mránmran hromɛn, lóne nɔn wo bhá thɔ́n hɛ́ndu, ló wo bhá chrui nɔ́thá. 43Ló néphan khɛ́n éji Yankan, wo The Bhringbi khúbhɛ́, wo bhá dri sa ácɛ́nmɛ. Ló lephan kasé ɛpɛ njɛ, tɛmɛ ɛyé ábhwe lókɔn mwámwá!
Ajayí ahrɔman tre phɔ yandran obhu
44– Átho Bhringbi khúbhɛ́ tɛsa ajayí bɛn ahrɔman tre bithe, khɛ́n lephan bɛn franman, lókhɛ́n ńcu hɔn hrɔman a. Áphɔhá khóo gɛ, áchɛ́se mɛ́n yí khúnbrɛn tɛɛ ńpɛ, ńkhwɛn phɛni, ló ńsáji man phɛ ábithe lókɔn.
Áwábhɛ phɔ yandran obhu
45– Átho Bhringbi khúbhɛ́ cu tɛsa jɛphɛ́wo bɛn khɛ́n énɛn áwábhɛ bhwábhwá bɛn aphɛ́ a. 46Ló kasé ńgɛ lóbhwábhwá khóo bɛn, ankhwɛ́n mɛ́n yí khúnbrɛn ńpɛ phɛ́ní, ló anphɛ́ áwábhɛ lókɔn.
Sawá phɔ yandran obhu
47– Átho Bhringbi khúbhɛ́ cu tɛsa ńfɛ́n bɛn oka duphé hrómɛn khɛ́n ahɔn ncɔn yábhɛ yábhɛ khúnbrɛn a. 48Lóka ńfɛ́n lókɔn si, dukúmán tí bha ká dumɛ́n, ló wó ca lóhrómɛn ncɔn: wo khwɛ́n ncɔn mímí há láka mɛn, lókhɛ́n ńcɔn phromɛn phromɛn, wo khwɛ́n fɔ́nkhwá bu. 49Áthéji ka ábha bhɔ́, lóyí yábhɛ brɛ tɛɛ ebhá tɛ́ é, lónɔn ali salé: Yankan-mranchɛ́mán bha bhá, wo bhá ca yíbhwátɛ́mán yɛn yíléletɛ́mán hrómɛn, 50ló wo bhá khwɛ́n nkɔn fɔ́nkhwá átɛn atre ethɔ́n mránmran hromɛn. Lóne nɔn wo bhá thɔ́n hɛ́ndu, ló wo bhá chrui nɔ́ thá.
Ajayí pɔ́-npɔ́ le ajayí nɔ́nɔ́
51– Ló Jezwi ébhi wo sa, wú ɔ́n ye ábhwe khúnbrɛn lókɔn?
– Ló wo nkɛé ee, wo ye.
52Ló ńkránman nkɔn sa:
– Lóhɛ́nthé, bidíyɛ́nwo khúnbrɛn khɛ́n ajrɛn Átho Bhringbi khúbhɛ́ hrómɛn yíchwɛ́wo ɔn, ńtɛsa ábháthó-óthe bɛn khɛ́n mɛ́n jayí chán áyí pɔ́-npɔ́ le áyí nɔ́nɔ́ ɔ́nmɔn hrómɛn.
Nazarɛ́thi khúbhɛ́nɛ́n le bhu Jezwi mímí
(Ɔ́n wú Mák 6.1-6; Ɔ́n wú Lwik 4.16-30)
53Lóka Jezwi tɔ yandran phɔ bhwe khúnbrɛn lókɔn phu, ńchan lóne no 54ákhúbhɛ́ si wo gbɛ. Ánnie yí lóne khúbhɛ́ hɛ́nbhúrɛ si, ló mɛ́n yí lókɔn ánnie, etán néphan khúnbrɛn hɛ́nmɛn, ló wo étɔ sa:
– Bánne nɔn mɛ́n bhweyɛ́n lókɔn chan ɛ? Ló kalósi ńkhɔ antɛ́ mɛ́n hɛ́nmɛntányí yábhɛ lókɔn é? 55Wú léli mɛ́n the li ńyámɛ́nanlíwo? Wú léli mɛ́n man li Mari? Wú léli mɛ́n hɔnsɛ́nhɔn li Jakhi, Joze, Jude le Simɔn? 56Wú mɛ́n hɔnmiáhɔn le bha lo hromɛn? Ló bánne nɔn mɛ́n sɛ́npɛ́ khúnbrɛn lókɔn chan ɛ?
57Lóyí khúnbrɛn lókɔn hɛ́nthé nɔn achɛ wo lé bhú nkɛ mímí. Ló Jezwi kranman nkɔn sa:
– Bhwetɔ́tréwo ɔn, ási khúnbrɛn néphan ji nkɛ phú, khɛ́n mɛ́n nbrɛn khúbhɛ́ si wo ho-e le mɛ́n mándo hrómɛn ɔ́nmɔn nɔn néphan lé ji.
58Ló lóne ɔn, Jezwi le tɛ hɛ́nmɛntányí thúbhɔ, wo mímíbhú wo le pɛ hɛ́nthé.
Currently Selected:
MATHIE 13: ENT96
Highlight
Share
Copy
Want to have your highlights saved across all your devices? Sign up or sign in
Ebrié New Testament © Bible Society of Côte D'Ivoire, 1996.
