LWIKHI 23

Wo hɔn Jezwi lo Piláthi hɛ́nmɛn

(Ɔ́n wú Mat 27.1-2,11-14; Ɔ́n wú Mák 15.1-5; Ɔ́n wú Jan 18.28-38)

1Néphan khúnbrɛn khɛ́n abhurɛhɛ́n chánfe, ló wo hɔn Jezwi lo Piláthi yé. 2Wo ephɛ́ bhwe há nkɛ tho, ló wo étɔ sa:

– Lephan lókɔn élɔ lo ékhúbhɛ́nɛ́n hɛ́nphe, lóbhwetɔ́ lókɔn tho nɔn lo hɔn-ɛn: ánkranmán néphan lée nkɔn le sɔ́n la-npho sé ákhúbhɛ́-óthe bhrɔ́khó, saji mɛ́n nɔn mɛ́n ni Krisi, ló mɛ́n ni bhringbi.

3Ló Piláthi bhi nkɛ lée:

– Wú hɛ nɔn ɛli Jwifunɛ́n bhringbi?

Ló Jezwi krɛnmɛn sa:

– Ɛtɔ phu é.

4Lótɛ Piláthi kranman nphahamán-óthemánhɔn le ápasá ɔ́nmɔn sa:

– Mɛn nɛ́n wú mɛ́n yí ńtɛ yan, khɛ́n man mó mɔ-ɛ pɔn.

5Khɛ́n ápasá siya lótho étɔ wo sɛ́npɛ́ khúnbrɛn mɛn salé:

– Ńkhɔ mɛ́n yílie hromɛn anchɛ́ aféchwe oswan. Galile nɔn ńchan mɔ lóyítɛ́ lókɔn hɛ́n kábrɛ kábrɛ mán di Jude gotho khúnbrɛn, ló ncɛ́n, ńdi krɛn.

Wo hɔn Jezwi bha Erɔde hɛ́nmɛn

6 Piláthi ka aye bhwe lókɔn, ló ánmi nkɔn sa:

– Lephan lókɔn ɔn, wú Galile sɛ?

7Mɛ́n ka ńyɛn salé Jezwi chan Erɔde si ali khúbhɛ́ ɔn, lótɛ ńchɛ ohɔn nkɛ lo se Erɔde. Lóka lókɔn, Erɔde lɔ bha Jeruzalɛ́mɛn khúbhɛ́. 8Erɔde ka awu Jezwi, átɛ áphɔhá khóo se, nkɛ phɔ bhwe ńphrɛ ye hɛ́nthé. Lócí-áan, Erɔde énɛn awú Jezwi, ńmu salé nkɛ bhá tɛ́ hɛ́nmɛntányí bɛn se anwú. 9Ńmi Jezwi bhwe búdúbúdú khɛ́n Jezwi le kɛ mɛ́n. 10Nphahamán-óthemánhɔn le bidíyɛ́nmán ɔ́nmɔn lɔ ya lóne ephɛ́ bhwe há Jezwi tho. 11Erɔde le mɛ́n ngbumán ɔ́nmɔn ephí Jezwi, wo éha nkɛ lia, wo hɔn ntráliɛ́ nánnan bhwábhwá bɛn sɔ nkɛ, ló wo hɔn nkɛ saji lo se Piláthi. 12Lócí, Erɔde le Piláthi ɔ́nmɔn le pɔ́, khɛ́n lócí brɛ lókɔn, wo ya lóne wo epɔ́.

Wo bhɔ Jezwi pɔn sa wo bhá wɛ́n nkɛ

(Ɔ́n wú Mat 27.15-26; Ɔ́n wú Mák 15.6-15; Ɔ́n wú Jan 18.39—19.16)

13 Piláthi bhurɛ nphahamán-óthemánhɔn, khúbhɛ́límán le aféchwe ɔ́nmɔn hɛ́n, 14ló ńkránman nkɔn sa:

– Khɔ́ ɔ́n hɔn lephan lókɔn bha se mɛn, ló hɔ́n nkɛé ánnɔ néphan hɛ́nphe. Ɔ́n wu a! Hɔ́n nbrɛn hɛ́nmɛn, mɛn mi bhwe khúnbrɛn, mɛn nɛ́n wú salé hɔ́n bhwe khúnbrɛn lókɔn hɔ́n étɔ hɛ tho, ńtɛ lóyí. 15Erɔde lɔ le wú salé nkɛ li pɔn, lóhɛ́nthé nɔn ńchɛ nkɛ saji bha gɛ lo. Khankhan mímí, áyí khúnbrɛn lókɔn khɛ́n hɔ́n étɔ salé lephan lókɔn tɛ, lée sáán owɛ́n ɔn, ńnɛn tɛ lóyí a. 16Lóhɛ́nthé mán chɛ́ wo bhrɛ mɛ́, ló man yɔ́-ɛ nká.

[ 17Phákhe fɛ́thi khúnbrɛn, áyɔn se salé Piláthi dimán khúthékáwo bɛn sé wo.]

18Khɛ́n wo khúnbrɛn wo grɛ wo elúkhwɛ́ tɔ sa:

– Ɛwɛ́n sɛ lókɔn! Khɛ́n ɛdimán Barabási sé lo!

19(Ákhúbhɛ́ bɛn cí néphan ekú ápasá di ɔn, Barabási khɔ lóhrómɛn wɛn lephan bɛn, lóhɛ́nthé nɔn okɛ khúthé.)

20Lónian mɛn khɛ́n Piláthi énɛn salé sáán andimán Jezwi, lóhɛ́nthé nɔn ńcu ma ántɔ bhwe sé ápasá, 21khɛ́n wo elúkhwɛ́ krɛnmɛn lée:

– Ɛchɛ́ nkɛ há áyábhletre phɔ! Ɛchɛ́ nkɛ há áyábhletre phɔ!

22Ńdɔn bhwaliá hrómɛn, Piláthi bho bhwetɔ́, ló ńmi nkɔn sa:

– Yán ébí nbrɛn ńtɛ ɛ? Mɛn nɛ́n wú lóyíléle ńtɛ khɛ́n ádi mɛ́n wɛ́n! Lóhɛ́nthé mán chɛ́ obhrɛ mɛ́, ló man yɔ́-ɛ ká.

23Lótɛ khɛ́n wo elúkhwɛ́ mɛ́n khrákhrá mɛn lée ochɛ́ Jezwi há áyábhletre phɔ. Ló wo lukhwɛ́ tɔ lóbhwe nɛn kábrɛ kábrɛ wo gɛ hɛ́nmɛn: 24Piláthi dɛn, ló lóyí wo énɛn ɔn, ńtɛ se nkɔn. 25Lephan khɛ́n wo énɛn salé andiman ɔn, ńdiman nkɛ. Mɛ́n lókɔn, ńni lephan awɛn lephan bɛn ápasá di hromɛn, ló ńhɔn Jezwi se wo, sa wo yí akhu wo mwa wo tɛ́ nkɛ.

Wo chɛ Jezwi ha áyábhletre phɔ

(Ɔ́n wú Mat 27.32-44; Ɔ́n wú Mák 15.21-32; Ɔ́n wú Jan 19.17-27)

26Lóka wo hɔn Jezwi ɔ́nmɔn wo élo, wo ywɛnli Sirɛnɛn khúbhɛ́ sɛ bɛn óche Simɔn achan bithe ebhá. Wo khwa nkɛ tho, wo hɔn áyábhletre ka nkɛ bhwa, ló ńhɔn ma Jezwi mánji ánno.

27Néphan npasá búdúbúdú gɛ Jezwi thá ɔ́nmɔn élo. Mɛ́n hɛ́nthé ńmie abha wo hromɛn ethɔ́n hɛ́ndu, ló wo éjɔ phɔ. 28Jezwi saya enɛ́n nkɔn ló ántɔ sa:

– Jeruzalɛ́mɛn mie, mɛn hɛ́nthé ɔ́n ne thɔ́n hɛ́ndu! Khɛ́n tɛmɛ ɔ́n thɔ́n há hɔ́n bɛn nbrɛn le hɔ́n miɔn ɔ́nmɔn tho! 29Lée ácí ebhá, ló lócí lókɔn ɔn, wo bhá tɔ sa: “Ńmie khɛ́n abha le wú áhó mɛbhí, ńmie aka ho bhrɔ́ɔ́ le ńmie khɛ́n aka hɔn wo yɛn se yípɔ brɛ yɛn ɔn, áphɔ khwa wo lé!” 30Néphan bha kranmán móbhó khónkhó lée: “Ɔ́n thwɛ mrwɛn lo tho!” ló wo bhá kranmán lo chɛ́-nchɛ́ lée: “Ɔ́n se lo hrɔmán hɔ́n thé kpɛ!” 31Khɔ́ áyá pɔ́-ɛ nɔn wo etɛ́ dandan yábhɛ nɛn o, ákha áyá wrɛ́?

32Wo khwɛn ńsɛ mɔn nánkhɛ ali yíléletɛ́mán lɔ ɔ́nmɔn lo, sa wo grɛ wɛ́n nkɔn le Jezwi ɔ́nmɔn. 33Lóka wo di ási óche “Hɛ́nphe nchwe”, lóne nɔn wo chɛ Jezwi ha áyábhletre phɔ, ló wo chɛ yíléletɛ́mán mɔn lókɔn lɔ ha áyábhletre phɔ, bɛn ya Jezwi liémɔn si, lójɔ ya mɛ́n mránkhu si, 34ló Jezwi tɔ sa:

– Nthe, néphan lókɔn yí etɛ́, wo lé wú lóbrɛ, tɛmɛ ɛyɔ́phɔ́ wo.

Wo khwɛn nkɛ ntráliɛ́ ti ngbamán, ló wo lwa. 35Aféchwe npasá ya lóne, ló wo enɛ́n. Jwifunɛ́n-óthemánhɔn ephí nkɛ, ló wo étɔ sa:

Ńdo néphan nankhɛ nka, kasé ńni Mesi, lephan khɛ́n Yankan san, tɛmɛ ando mɛ́n bɛn nbrɛn lɔ ká!

36Lóka wo tigbali nkɛ, wo hɔn ńdɛkɔn wo esé nkɛ, 37ló wo étɔ sa:

– Kasé ɛli Jwifunɛ́n bhringbi, tɛmɛ ɛdo hɛ nbrɛn nká!

38Áyí wo lrɛ tre mɛ́n hɛ́n tho nɔn ali lée: “Mɛ́n lókɔn, ńni Jwifunɛ́n bhringbi.”

39Néphan wo chɛ ha áyábhletre phɔ, bɛn etá Jezwi, ló ántɔ sa:

– Wú léli Mesi le hɛ? Do hɛ nbrɛn ka, ló ɛdo lo lɔ ká a!

40Khɛ́n lójɔ égbrɛ nkɛ, ló ántɔ sa:

– Wú ɛ́le só Yankan, hɛ khɛ́n wo élri hɛ lógbre yábhɛ brɛ? 41Lo ékɛ wo etɛ́ lo ɔn, ápríman, áyɔn, áyíléle khɛ́n lo tɛ ɔn, lóphɔ pɛnsɔ́n nɔn lo égɛ; khɛ́n mɛ́n-ɛ khɔ́ ńnɛn tɛ yíléle ɛkɛ a!

42Lómánji, ńkránman Jezwi sa:

– Jezwi, lóka ɛ́bha lí bhringbi ɔn, tɛmɛ mɛn bhwe odi hɛ mwanhɛ́n.

43Ló Jezwi krɛnmɛn sa:

– Mímí mɛɛ́n kranmán hɛ: ncɛ́n ɛ́bha gɛ mɛn ɔ́nmɔn ló pharadi.

Jezwi khu

(Ɔ́n wú Mat 27.45-56; Ɔ́n wú Mák 15.33-41; Ɔ́n wú Jan 19.28-30)

44-45Ácɛ́nmɛ ka aya bháca, áyé ébhie, dubhlékhu do ákhúbhɛ́ hrómɛn si khúnbrɛn, kábrɛ kábrɛ ádi ńjuka wáchɛn bhwaliá. Ádɛgɔn wo bu tre Yankan-khúthé, lóthethé di nran. 46Jezwi lukhwɛ́ khrákhrá bɛn ló ántɔ sa:

– Nthe, mɛn hɔ́n mɛn nánnánmi há hɛ mɔ́n mɛn.

Lóka mɛ́n mɛ́n ka, lópán ńkhu. 47Rɔ́mɛn khúbhɛ́nɛ́n ngbumán-óthe wu lóyí atɛ, ánnri Yankan hwa, ló ántɔ sa:

– Mímí lephan lókɔn li lephan apriman!

48Néphan abha npasá mɛn khúnbrɛn wu lóyí atɛ, wo saji wo élo, ló áphɔgbɔ́n mɛn, wo échrwa mɔ́n thɛ́n. 49Jezwi jɔn bhwá khúnbrɛn le ńmie ɔ́nmɔn khɛ́n achan Galile bha éyɛli ti ya nthwéthwemɛn-áan ewú lóyí.

Wo hɔn Jezwi ka álínɔn mɛn

(Ɔ́n wú Mat 27.57-61; Ɔ́n wú Mák 15.42-47; Ɔ́n wú Jan 19.38-42)

50-51Sɛ bɛn bháne óche Jozɛfu, ńchan Jwifunɛ́n khúbhɛ́ bɛn óche Arimate. Sɛ lókɔn, mɛ́n bhwe yɔn, ńni lephan apriman, ló ńsrui Yankan Bhringbi khúbhɛ́ mwa. Ńma Kwabhɔ́mán khónkhó gbe hrómɛn, khɛ́n nɛ́n pɔ mɛ́n jɔn si akhɔ bhɔ kwa, le wo yí wo tɛ ɔ́nmɔn. 52Ńno sa mɔ́nsi Piláthi yé, sa anhɔ́n Jezwi nánmí ɔ́nmɔn no. 53Ńhɔn nkɛ chan áyábhletre phɔ diathé, ńmo kandanman khrɔ́khrɔ́ mrwɛn nkɛ, ló ńhɔn nkɛ mo álínɔn bɛn obɔn abha ńmú hrómɛn, álínɔn lókɔn, oka bho lephan brɛ lóhrómɛn. 54Vandredi nɔn lóyí tɛ, ló saba lɔ bhɔhɛ́n.

55Ńmie khɛ́n achan Galile gɛ Jezwi thá ɔ́nmɔn lo, lo gɛ Jozɛfu, ló wo wu álínɔn, le lósi okhɔ hɔn Jezwi la. 56Lómánji, wo saji lo bháthó, ló wo écɔ ńnɔ́n le ńnɔ́ndu ɔ́nmɔn tɛ́tré, sa wo khwɛ́n lo ku Jezwi phɔ. Khɛ́n saba cí, wo chre fíkhwa, sa ló ábidí ha tre.

Currently Selected:

LWIKHI 23: ENT96

Highlight

Copy