LWIKHI 22
22
Athemánhɔn énɛn Jezwi wɛ́n si
(Ɔ́n wú Mat 26.1-5; Ɔ́n wú Mák 14.1-2; Ɔ́n wú Jan 11.45-53)
1Fɛ́thi óche Phákhe khɛ́n óle há mányan kpánhɔn hromɛn ɔn, ágbali phɔ. 2Nphahamán-óthemánhɔn le bidíyɛ́nmán ɔ́nmɔn énɛn Jezwi wɛ́n si, khɛ́n wo esó aféchwe.
Judasi dɛn ya sa mɛ́n man hɔ́n Jezwi sé athemánhɔn
(Ɔ́n wú Mat 26.14-16; Ɔ́n wú Mák 14.10-11)
3Lótɛ Abhɔsɛ́mɔ́n ka Judasi óche Iskariɔthi hromɛn, Judasi lókɔn ɔn, mɛ́n lɔ ńma yíchwɛmán áwɔ́-mɔnmán hrómɛn. 4Ló lósi ánman khɔ́ hɔ́n Jezwi sé nphahamán-óthemánhɔn le Yankan-nkhú bómán-óthemánhɔn ɔ́nmɔn ɔn, ńno ánsri lóphɔ bhwe. 5Áníman wo kpɛ́ɛ́n, ló wo tɔtre salé wo bhá se jɛtɛn. 6Judasi dɛn, ló lósi ánman khɔ́ hɔ́n Jezwi sé nkɔn, khɛ́n ápasá bha le yé, ánnɛn lómɛ́si.
Jezwi chɛ wo lo cɔ Phákhe nɛn tɛ́tré
(Ɔ́n wú Mat 26.17-25; Ɔ́n wú Mák 14.12-21; Ɔ́n wú Jan 13.21-30)
7Fɛ́thi olí khɛ́n óle há mányan kpánhɔn hromɛn cí si, lóka nɔn owɛ́n ngbankhran miɔn ha npha lí Phákhe nɛn. 8Lótɛ Jezwi chɛ Piɛ le Jan mɔn yí ló ńtɔ sa:
– Ɔ́n no cɔ Phákhe tɛ́tre lo lé.
9Ló wo bhi nkɛ sa:
– Bánne nɔn ɛpɔ salé lo lo cɔ lóyí tɛ́tré ɛ?
10Ló ńkránman nkɔn sa:
– Ɔ́ndi njɛlé a: lóka hɔ́n elɛ́ ákhúbhɛ́ hrómɛn ɔn, ɔ́n ma ywɛnlí sɛ bɛn athe ńdubhwe ebhá. Ɔ́n gɛ thá ɔ́nmɔn lɛ́ ábháthó si ánno, 11ló ɔ́n kranmán ábháthó-óthe sa: “Yíliéwo ébhi hɛ lée: lókhúthé bɛn hromɛn nɔn mɛn le mɛn yíchwɛmán ɔ́nmɔn obhá lí Phákhe nɛn ɛ?” 12Ló ánman nie hɔ́n ákhúthé khóo bɛn abha nkhú tho, ńyákhru khúnbrɛn bha lóhrómɛn. Lóne nɔn ɔ́n ma cɔ ńnɛn yí khúnbrɛn tɛ́tré.
13Wo lo, ló Jezwi bhwe tɛɛ atɔ, wo priman gɛ lóyí khúnbrɛn, ló wo cɔ Phákhe nɛn tɛtre.
Ńnɛn créncré
(Ɔ́n wú Mat 26.26-30; Ɔ́n wú Mák 14.22-26; 1Khor 11.23-25)
14Lóka ácí si, Jezwi le Krisi-mranchɛ́mán ɔ́nmɔn khwa nɛn mɛ́n, 15ló ńkránman nkɔn sa:
– Énimán mɛn salé mɛn le hɔ́n ɔ́nmɔn olí Phákhe nɛn lókɔn phú, khɛ́n lómánji áyí odri mɛn phɔ! 16Lóhɛ́nthé, mɛɛ́n kranmán hɔ́n salé, chán ɔɔ mɛɛ́n cú ní nɛn lókɔn, ábha lí ácí khɛ́n lóyí khúnbrɛn bha tɛ́ símɛ́n Yankan Bhringbi khúbhɛ́.
17Lótɛ ńhɔn yábhɔ́, ńna Yankan nansi, ló ńtɔ sa:
– Ɔ́n hɔ́n, lo hɔ́n khúnbrɛn ɔ́n nán opí hɔ́n. 18Mímí mɛɛ́n kranmán hɔ́n, adɔn ncɛ́n élo, man nɛ́n cu nán divɛn npɔhɔ́n, kábrɛ kábrɛ ábha di ácí khɛ́n Yankan Bhringbi khúbhɛ́ bha bhá.
19Lómánji, ńmo kpánhɔn, lóka ńna Yankan nansi, ńthwɛ se nkɔn, ló ńtɔ sa:
– Lókɔn nɔn ali mɛn nánmí [khɛ́n wo bho se hɔ́n. Ɔ́n tha, ló mɛn bhwe odi hɔ́n mwanhɛ́n.
20Lóyábhɛ brɛ, lóka wo li nɛn phu, ńhɔn áyábhɔ́ se wo, ló ńtɔ sa:
– Áyábhɔ́ lókɔn nɔn ali akprɔbha pɔ́pɔ́ Yankan si se hɔ́n, mɛn nká akhwalé hrómɛn.] 21Khɛ́n ɔ́n wu a: lephan aphɛ mɛn li nɔn agɛ mɛn ɔ́nmɔn chre krɛn nɛn mɛ́n! 22Lephan Mi bha khú sa lósi Yankan khɔ tɔ lóbhwe tre; khɛ́n áli muswe se lephan ábha phɛ́ nkɛ lí!
23Ló wo ya wo thethé wo énɛn lephan ábha tɛ́ áyí yábhɛ lókɔn.
Lephan khɛ́n abanbrɛn mɛ́n jɔn
24 Yíchwɛmán étalí bhwe mɛ́n khrákhrá mɛn, wo énɛn wo yɛ́n lephan ábha lí lephan khó wo hromɛn. 25Ló Jezwi kranman nkɔn sa:
– Aféchwe-óthemánhɔn tre wo lé, ló néphan apɛ wo chɛ́ nkɔn che wo “Yíbhwátɛ́mán”. 26Khɛ́n hɔ́n ékɛ léli lóyábhɛ nɛn. Hɔ́n ékɛ-ɛ nɔn ali salé, lephan abanbrɛn mɛ́n jɔn, anhɔ́n mɛɛ́n nbrɛn jrɛn yípɔ bhri, ló mɛ́n khɛ́n ńtre mɛ́n jɔn lé, ansaya khwɛn nkɔn hɛ́nmɛn nɛn. 27Ɔ́n wu a, abɛn nɔn abanbrɛn mɛ́n jɔn ɛ? Wú mɛ́n ńchre tábrɛ mɛ́n lée nka mɛ́n ánkhwɛn nɛn? Nkɛé mɛ́n ńchre tábrɛ mɛ́n, wú léliló? Áyɔn! mɛn-ɛ mɛn ma hɔ́n thethé sa lephan ékhwɛn hɔ́n hɛ́nmɛn nɛn. 28Mɛn yíkhúphɔ hromɛn, ɔ́n ma mɛn phɔ ákakhúnbrɛn. 29Lósi yábhɛ brɛ khɛ́n Nthe lɔ bho Yankan Bhringbi khúbhɛ́ se mɛn ɔn, lóyábhɛ brɛ nɔn mɛn lɔ, mán mó sé hɔ́n: 30mɛn Bhringbi khúbhɛ́, ɔ́n ma gɛ mɛn ɔ́nmɔn lí nɛn, ɔ́n ma gɛ mɛn ɔ́nmɔn nán ndu mɛn tábrɛ mɛ́n, ɔ́n ma chré ńmringbilímán nyákhru tho, ló ɔ́n ma bhɔ́ Izraɛ mándo áwɔ́-mɔn kwa.
Jezwi nkɛé, Piɛ bha samɛ́n lée nkɛ le yɛn
(Ɔ́n wú Mat 26.31-35; Ɔ́n wú Mák 14.27-31; Ɔ́n wú Jan 13.36-38)
31Hwánthe kranman Simɔn sa:
– Simɔn, Simɔn! Ye a: Abhɔsɛ́mɔ́n sa mɔ́nsi salé ankhwɛ́n hɔ́n jika, sa lósi okhɔ́ faká yo, khɛ́n okhwɛn mɛ́ yɛn. 32Khɛ́n mɛɛ́n na Yankan sé hɛ, ochɛ́sé hɛ mímíbhú ogɛlé. Lóka khɛ́n ɛ́bha yɔ́ hɛ nbrɛn sé mɛn phú, ɛwúsi khɔ́ há hɛ hɔnsɛ́nhɔn sɛ́npɛ́ phɔ.
33Ló Piɛ tɔ sa:
– Hwánthe, mɛn dɛn ya sa mán gɛ hɛ ɔ́nmɔn nó ákhúthéká gɔn, ló mɛn gɛ hɛ ɔ́nmɔn khú.
34Khɛ́n Jezwi krɛnmɛn sa:
– Piɛ, mɛɛ́n kranmán hɛ gbée salé, ncɛ́n, kɔsɔ bha le thɔ́n lɔ khɛ́n, ńdɔn bhwaliá, ɛ́bha tɔ mɛ́n khrákhrá mɛn lée ɛle yɛn mɛn.
Jɛtɛn, nzrɔ le khókhríyan
35Lómánji, Jezwi bhi yíchwɛmán sa:
– Lóka mɛn chɛ́ hɔ́n yí, khɛ́n mɛn tɔlé ɔ́n ne sranmán jɛtɛn, nzrɔ le ngbawa ɔ́nmɔn ɔn, wú áyíbɛn mian hɔ́n?
– Ló wo nkɛé, álepɛ yíɛkɛ amian lo.
36Ló ńkránman nkɔn sa:
– Khɛ́n thénthé, kasé lephan ɛpɛ jɛtɛn tɛmɛ ɛbhó ká phɔ, lephan ɛpɛ nzrɔ, ɛtɛ́ lóyábhɛ brɛ, khɛ́n lephan alepɛ khókhríyan, anhɔ́n mɛ́n khókhóthu phɛ́ní, ló anphɛ́ bɛn. 37Ló mɛɛ́n kranmán hɔ́n gbée salé, Yankan hrɔ́ hrómɛn ɔn, wo tɔ mɛn phɔ bhwe tre salé: “Okan nkɛ ka yíléletɛ́mán hrómɛn.” Mímí, mɛn phɔ bhwe lókɔn khɛ́n wo lrɛ tre ɔn, lóyí ebhá tɛ́ símɛ́n.
38Ló yíchwɛmán étɔ sa:
– Hwánthe, nɛn khókhríyan mɔn o.
– Khɛ́n ńkránman nkɔn lée, átre yɔn.
Jezwi éla Yankan Olive-nyá bhóbhó tho
(Ɔ́n wú Mat 26.36-46; Ɔ́n wú Mák 14.32-42)
39Jezwi thandi, ńno Olive-nyá bhóbhó tho, sa ló ńmáne antɛ́ wɔ́wɔ a, ló mɛ́n yíchwɛmán gɛ thá ɔ́nmɔn lo. 40Mɛ́n ka ńdi lóne, ló ńkránman nkɔn sa:
– Ɔ́n na Yankan, ló ochɛ́sé ɔ́n ne hálé ásúwú hrómɛn.
41Lótɛ ńyɔ wo khwalé no ɔɔ, ńdi ási lephan gɛ kú bhú di, ńmɔ ntráhɛ́nlé ánna Yankan, 42ló ántɔ sa:
– Nthe kasé ɛpɔ, tɛmɛ ɛhɔ́n áyíkhúphɔ yábhɔ́ lókɔn yɛn mɛn tho. Léli salé mɛn yí mɛn pɔ nɔn ɛ́bha tɛ́, lókhɛ́n tɛmɛ ɛtɛ́ hɛ thɛ́n yí apɔ.
[ 43Lótɛ Yankan-mranchɛ́wo bɛn chantho bha ékhɔnmán nkɛ phɔ. 44Ábhwephé gɛ Jezwi, áchɛ́se ánna Yankan sɛ́npɛ́ mɛn. Mɛ́n súsú tɛsa ńká a, ló édialé yítathé.]
45Lóka ńna Yankan phu, ńsáji man gɛ yíchwɛmán, khɛ́n ábhwephé tɛ ná khwá wo, 46ló ánmi nkɔn sa:
– Bítɛ khɛ́n hɔ́n eláná ɛ? Ɔ́n chanfe ɔ́n na Yankan, ochɛ́sé ɔ́n ne hálé ásúwú hrómɛn.
Wo hɔn Jezwi
(Ɔ́n wú Mat 26.47-56; Ɔ́n wú Mák 14.43-50; Ɔ́n wú Jan 18.3-11)
47Mɛ́n bhwe tɛɛ ńya ántɔ ntɔ́nyán, lótɛ ápasá gogo dɔnbɛn thandi. Judasi ali yíchwɛmán hrómɛn lephan bɛn nɔn ado wo ɔ́nmɔn bha. Ńti gbali Jezwi, ló ńdɔn nkɛ mɛ́n. 48Khɛ́n Jezwi bhi nkɛ sa:
– Judasi, wú mɛ́ndɔ́n hrómɛn nɔn ɛ́bha khɔ́ hɔ́n Lephan Mi phɛ́lí?
49Jezwi yíchwɛmán ka awu lóyí ebhá tɛ́, lótɛ wo bhi nkɛ sa:
– Hwánthe, wú ochi wo khókhríyan mɛn?
50Ló wo hromɛn lephan bɛn jan nphaháwo bhrɔ́khó hwan nɛnkhwɛ́nwo liémɔn njɛ. 51Lókhɛ́n Jezwi tɔ sa:
– Ɔ́n yɔn kalé, ɔ́n ne tɛ́.
Ńpa nɛnkhwɛ́nwo lókɔn njɛ pɛ, ló ńmo thu. 52Ló Jezwi kranman nphahamán-óthemánhɔn, Yankan-nkhú bómán-óthemánhɔn le mrɔ́khómán abha ehɔ́n-ɛn ɔ́nmɔn sa:
– Wú áyɔn salé ɔ́n khwɛ́n khókhríyan le ńyá ɔ́nmɔn há mɔ́n mɛn bhá, sa mɛn ni khokhroháwo bɛn a? 53Mɛn le hɔ́n ɔ́nmɔn obha Yankan-khúthé ácí khúnbrɛn, ló ɔ́n ne hɔ́n mɛn. Khɛ́n áka lókɔn obha lóhrómɛn ɔn, áli hɔ́n le dubhlékhu sɛ́npɛ́ ɔ́nmɔn ékɛ.
Piɛ ésamɛ́n lée mɛ́n nɛn yɛn Jezwi
(Ɔ́n wú Mat 26.57-58,69-75; Ɔ́n wú Mák 14.53-54,66-72; Ɔ́n wú Jan 18.12-18,25-27)
54Wo khwa Jezwi tho, ló wo hɔn nkɛ ɔ́nmɔn lo nphaháwo bhrɔ́khó hwan. Piɛ bha wo mánji ebhá. 55Wo phu tɛn ka ngbophro thethé, ló néphan akhwa tɛn njɛ ɔn, Piɛ gɛ nkɔn ɔ́nmɔn chre lóne . 56Nɛnkhwɛ́nya bɛn wu nkɛ chré nkɛ chre tɛn njɛ, ńsa hɛ́nmɛn tre nɛ́n nkɛ kɔ́nkɔ́nkɔ́n, ló ántɔ sa:
– Sɛ lókɔn lɔ bha nkɛ phɔ!
57Khɛ́n Piɛ nkɛé:
– Bhie bhwá, mɛn nɛn yɛn lephan lókɔn.
58Ámɔn kpɛ́bɛn, lótɛ lephan nankhɛ bɛn lɔ wui, ló ántɔ sa:
– Hɛ lɔ, ɛli néphan lókɔn hromɛn lephan bɛn!
Khɛ́n Piɛ kranman lephan lókɔn sa:
– Chɛchɛ, mɛn nɛn ma wo hromɛn.
59Ámɔn ɔɔ, ácu li wáchɛn brɛn, lótɛ lephan nankhɛ cu tɔ mɛ́n khrákhrá mɛn sa:
– Mímí nbrɛn, lephan lókɔn lɔ bha wo hromɛn, átɛsalé ńchan Galile.
60Khɛ́n Piɛ étɔ sa:
– Mɛn nɛ́n yɛ́n hɛ bhwe brɛ lókɔn ɛ́tɔ.
Mɛ́n bhwe tɛɛ ántɔ lóka lókɔn hromɛn, lópán kɔsɔ bɛn thɔn. 61Hwánthe saya, ló ńmo mɛbhí tre annɛ́n Piɛ kɔ́nkɔ́nkɔ́n. Ló Hwánthe bhwe khɛ́n aphrɛ krɛnmɛn ɔn, ádi mwanhɛ́n, lónɔn ali salé: “Ncɛ́n, kɔsɔ bha lé thɔ́n, lókhɛ́n ɛ́bhá tɔ ńmɛ́n khrákhrá mɛn ńdɔn bhwaliá, salé ɛle yɛn mɛn.” 62Piɛ thandi, ló ńsɔ hɛ́ndu khrákhrá tɛn anthɔ́n.
Wo ta Jezwi, ló wo chrwa nkɛ
(Ɔ́n wú Mat 26.67-68; Ɔ́n wú Mák 14.65)
63Néphan ébo Jezwi lɔ saya éha nkɛ lia, ló wo échrwa nkɛ. 64Wo hɔn yí mrwɛn nkɛ hɛ́nmɛn, ló wo ébhi nkɛ sa:
– Abɛn bhe hɛ yí ɛ? Tɔ obhá a!
65Ló wo ta nkɛ mwámwá nbrɛn.
Wo hɔn Jezwi bha Kwabhɔ́mán khónkhó hɛ́nmɛn
(Ɔ́n wú Mat 26.59-66; Ɔ́n wú Mák 14.55-64; Ɔ́n wú Jan 18.19-24)
66Lóka ácí ci, Jwifunɛ́n mrɔ́khómán, nphahamán-óthemánhɔn le bidíyɛ́nmán ɔ́nmɔn bhúrɛhɛ́n. Wo hɔn Jezwi bha Kwabhɔ́mán khónkhó hɛ́nmɛn, 67ló wo ébhi nkɛ sa:
– Kasé mímí nbrɛn ɛli Mesi? Ɛtɔ obhá.
Ló ńkránman nkɔn sa:
– Kasé mɛn tɔ se hɔ́n lɔ, ɔ́n ma lé bhú mɛn mímí, 68ló kasé mɛɛ́n ya lótho mi hɔ́n bhwe bɛn lɔ, ɔ́n ma lé ká mɛn mɛ́n. 69Khɛ́n achan ncɛ́n élo, Lephan Mi bha chré Yankan sɛ́npɛ́wo liémɔn si.
70Lótɛ wo khúnbrɛn wo bhi nkɛ sa:
– Ló ɛli Yankan Mi?
Ló ńkránman nkɔn sa:
– Lótɛ nɔn hɔ́n étɔ o; mɛn ni Yankan Mi.
71Ló wo tɔ sa:
– Lo le cu nɛn ndalefɛlímán npɔhɔ́n! Lósi akhɔ tɛ ɔn, lo njɛ ye ábhwe achan mɛ́n bɛn nbrɛn míthé thándi!
Currently Selected:
LWIKHI 22: ENT96
Highlight
Share
Copy
Want to have your highlights saved across all your devices? Sign up or sign in
Ebrié New Testament © Bible Society of Côte D'Ivoire, 1996.
