LWIKHI 18
18
Grwanya le kwabhɔ́wo bɛn ɔ́nmɔn phɔ yandran obhu
1Lómánji, Jezwi bhu yandran lókɔn se yíchwɛmán, sa anchɛ́ nkɔn khɔ́ lóphɔ yɛ́n salé ákakhúnbrɛn, nkɔn la Yankan, ló nkɔn phɔ olé gbɔn:
2– Ló ńtɔ sa: ákhúbhɛ́ bɛn hromɛn, kwabhɔ́wo bɛn bháne. Kwabhɔ́wo lókɔn ɔn, ánnɛn só Yankan, ló ánnɛn ji lephan ɛkɛ. 3Bhie grwanya bɛn lɔ bha lókhúbhɛ́ brɛ lókɔn hromɛn, annó kwabhɔ́wo lókɔn yé ákakhúnbrɛn, ló ánkranmán nkɛ sa nkɛ bhɔ́ kwa yali se: “Tɛmɛ nkɛ primán mɛ́n le mɛ́n mɛsawo ɔ́nmɔn thethé bhwe bɛn se.” 4Lócí-áan kwabhɔ́wo lókɔn le pɔ salé áká lóbhwe lókɔn mɛ́n, lókhɛ́n ántɔ sé mɛ́n bɛn nbrɛn sa: “Khankhan mímí khɔ́ mɛn nɛ́n só Yankan, saji mɛn nɛ́n ji lephan ɛkɛ lɔ a, 5lótɛ khɛ́n grwanya lókɔn élri mɛn gbre bánban, lóhɛ́nthé mán mɔ́ kwa yali se, ochɛ́sé ákakhúnbrɛn, annɛ́n cu man nri mɛn gbre npɔhɔ́n.”
6Ló Hwánthe cu tɔ sa:
– Tɛmɛ ɔ́ndi njɛlé yé kwabhɔ́wo phromɛn lókɔn bhwe atɔ! 7Ló Yankan, néphan ńsan ali mɛ́n hwannɛ́n khɛ́n elúkhwɛ́ che ńcrɔ́n le mréci, wú ánman nɛ́n mɔ́ kwa bhwá sé nkɔn? Wú anman nɛ́n man dɔnmán nkɔn mɔ́n gbraa? 8Mɛɛ́n kranmán hɔ́n: ánman mɔ́ kwa apriman gbraa sé nkɔn. Lókhɛ́n lóka Lephan Mi bha sáji bhá théji krɛn ɔn, wú ánman gɛ néphan ebhú mímí?
Fariziɛn sɛ le la-nphodówo ɔ́nmɔn phɔ yandran obhu
9Jezwi bhu yandran lókɔn se néphan khɛ́n ebhú salé Yankan hɛ́nmɛn, wo-ɛ nɔn wo li néphan apriman, lóhɛ́nthé wo sa néphan nánkhɛ mɛ:
10– Ló mɛ́n nkɛé: néphan mɔn lo Yankan-khúthé éla Yankan; bɛn li Fariziɛn sɛ, lókhɛ́n lójɔ li la-nphodówo. 11Fariziɛn sɛ ti ya njɛ-áan, ló ántɔ sa: “O Yankan, mɛn ná hɛ nansi, lónian mɛn khɛ́n mɛn nɛn khɔ néphan fe lókɔn hɛ́nthé, néphan lókɔn khɛ́n ali sídomán, ali néphan phromɛn phromɛn le gbakhremán. Mɛn ná hɛ nansi, lónian mɛn khɛ́n mɛn nɛn khɔ la-nphodówo lókɔn hɛ́nthé. 12Ácído brɛ thethé, mɛɛ́n jimɛ́n ńcíbhí mɔn, mɛɛ́n muri mɛn yí khúnbrɛn khɛ́n mɛn pɛ ńdɔn wɔ́, ló mɛn mó lóphɛ́nta bɛn sé hɛ lóhrómɛn.” 13Lóka khúnbrɛn lókɔn ɔn, la-nphodówo ti ya njɛ-áan, ńhɔ bhwa lé jurigba ya, ánchrwa mɔ́n thɛ́n ló ántɔ sa: “O Yankan, mɛn ni newo, lóhɛ́nthé tɛmɛ ɛwú mɛn phɔ nfɛkhu kpɛ.” 14Ló Jezwi cu tɔ sa, mɛɛ́n kranmán hɔ́n, sɛ lókɔn thán athandi eló mɛ́n hwan, ńgɛ Yankan nfɛkhuwú, lókhɛ́n fariziɛn sɛ ékɛ, léliló. Átɛsalé lephan khɛ́n ehɔ́n mɛ́n nbrɛn jetho, óbha hɔ́n-ɛn bháthé, khɛ́n mɛ́n anhɔ́n mɛ́n nbrɛn máthé ɔn, óbha hɔ́n-ɛn jetho.
Jezwi bhɔ miɔ́ chɛ́-nchɛ́ ndu
(Ɔ́n wú Mat 19.13-15; Ɔ́n wú Mák 10.13-16)
15Néphan khwɛn miɔ́ chɛ́-nchɛ́ bha esé Jezwi sa anmó mɔ́n tré nkɔn tho. Lóka yíchwɛmán wu wo, ló wo égbrɛ nkɔn. 16Lókhɛ́n Jezwi che miɔ́ bha, ló ántɔ sa:
– Ɔ́n ne thú wo thá, átɛsalé néphan khɛ́n atɛsa ńmiɔ́ chɛ́-nchɛ́ lókɔn ɔn, wo nɔn Yankan Bhringbi khúbhɛ́ li wo ékɛ. 17Mímí mɛɛ́n kranmán hɔ́n: lephan khɛ́n abha le dɛn do Yankan Bhringbi khúbhɛ́ sa yípɔ bhri ɔn, lephan lókɔn, anman nɛ́n ká lóne.
Lephan khɛ́n ali bhringbi
(Ɔ́n wú Mat 19.16-30; Ɔ́n wú Mák 10.17-31)
18Ló Jwifunɛ́n-óthe bɛn bhi Jezwi sa:
– Yíliéwo bhwá, ébí nɔn ayɔn se salé mɛn tɛ́ khɛ́n mɛn gɛ ńmɛpɔ́bhá álephú ɛ?
19Ló Jezwi krɛnmɛn sa:
– Bítɛ khɛ́n ɛ́che mɛn lephan bhwá ɛ? Nkɛé Yankan brɛ li lephan bhwá? 20Wú ɛyɛn ábidí? Ábidí étɔlé: “Ɛle bhɔ́ phɛ́n, ɛle wɛ́n lephan, ɛlé si sído, ɛle lí nkpakprá há lephan tho, ɛji hɛ the le hɛ man ɔ́nmɔn.”
21Lótɛ lephan lókɔn tɔ sa:
– Mɛn chan mɛn mri mɛn-áan ji ábidí khúnbrɛn lókɔn.
22Lóka Jezwi ye lephan lókɔn bhwe atɔ, lótɛ ńkránman nkɛ sa:
– Ákha áyí nánkhɛ bɛn ayɔn se salé ɛtɛ́, lónɔn ali salé: ɛkhwɛ́n hɛ yí khúnbrɛn ɛpɛ phɛ́lí, ɛkhwɛ́n lójɛtɛn pɔ́ gbremán, lótɛ ɛ́bha pɛ ajayí tré átho; lómánji ɛbhá, ló ɛgɛ mɛn thá.
23Khɛ́n Jezwi bhwe atɔ ɔn, etɛ́ lephan lókɔn thɛ́n gbrelí kpɛ́ɛ́n, lósi akhɔ tɛ ɔn, ńni bhringbi banban. 24Lóka Jezwi wu salé ábhwe lókɔn élri nkɛ gbre, lótɛ ántɔ sa:
– Yankan Bhringbi khúbhɛ́ hrómɛn ká bha khɔnman sé néphan ali bhringbi. 25Frímú khókho-ngbɔwo khɔ́ ábha khɔ́ ákwɛ́ nɔn mɛn thándi ɔn, lólɔ khɔnman, khɛ́n lephan ali bhringbi si ábha khɔ́ ká Yankan Bhringbi khúbhɛ́-ɛ nɔn akhɔnman banban.
26Lótɛ néphan khɛ́n eyé Jezwi bhwe étɔ salé:
– Ló kasé áli nɛn, abɛn nɔn Yankan bha swa ɛ?
27Lóso Jezwi kranman nkɔn sa:
– Áyí khɛ́n akhɔnman se néphanmiɔn, Yankan yé áleli yíɛkɛ.
28Ló Piɛ kranman Jezwi sa:
– Wu a, lo-ɛ, lo yɔ lo yí khúnbrɛn khwa bha lo égɛ hɛ thá.
29Khɛ́n Jezwi kranman nkɔn lée:
– Mímí mɛɛ́n kranmán hɔ́n: kasé lephan, ɛyɔ hɛ bháthó, hɛ bhia, hɛ hɔnsɛ́nhɔn, hɛ man, hɛ the le hɛ miɔn ɔ́nmɔn khwa, Yankan Bhringbi khúbhɛ́ hɛ́nthé, 30thénthé ka lókɔn hromɛn, ɛ́bha gɛ yí bhɔ́tho lí ndɔn ya brɛn ló ɛyɔ khwa. Lómánji, ɛ́bha gɛ mɛpɔ́bhá álephú ácí abha hɛ́nmɛn.
Ńdɔn bhwaliá hrómɛn, Jezwi étɔ mɛ́n khú le mɛ́n khúnɔn mɛn chánfe ɔ́nmɔn bhwe
(Ɔ́n wú Mat 20.17-19; Ɔ́n wú Mák 10.32-34)
31Jezwi do yíchwɛmán áwɔ́-mɔn ha phɔ, ló ńkránman nkɔn sa:
– Ɔ́n wu a, Jeruzalɛ́mɛn nɔn lo élo o. Bhwetɔ́trémán bhwe tɛɛ aha hrɔ́ mɛn tre Lephan Mi phɔ ɔn, lóne nɔn lóyí khúnbrɛn bha tɛ́ símɛ́n. 32Wo bhá hɔ́n nkɛ sé néphan ale yɛn Yankan bha há nkɛ lia, wo bhá tá nkɛ, ló wo bhá phui mísɛ́-ndu hɛ́nmɛn. 33Wo bhá bhrɛ mɛ́, ló wo bhá wɛn. Khɛ́n lóka ácí si ńcíbhí bhwaliá, ánman chán khúnɔn mɛn fe.
34Lókhɛ́n yíchwɛmán le yɛ́n lóbhwe lókɔn thé, lóthé tɛsa áyí ahrɔman, ló wo le yɛ́n áyí Jezwi étɔ lóphɔ bhwe.
Jezwi tɛ mɛphuwo bɛn phɔ jan
(Ɔ́n wú Mat 20.29-34; Ɔ́n wú Mák 10.46-52)
35Jezwi bha ɔɔ égbalí Jerikho. Mɛphuwo bɛn chre ásitó njɛ esá yí. 36Anyé sa ápasá dɔnbɛn ehɛ́n, ló ánnɛn anyɛ́n lóyí etɛ́. 37Ló néphan khɛ́n ehɛ́n ékrɛnmɛn lée, Jezwi Nazarɛ́thi sɛ nɔn ehɛ́n. 38Lótɛ annúkhwɛ́ ntɔ sa:
– Jezwi Davi Mi, wu mɛn nfɛkhu kpɛ!
39Khɛ́n néphan abha hɛ́nmɛn ethú nkɛ thá. Lóka wo ékranmán nkɛ lée nkɛ témélé ɔn, lóka lókɔn nɔn annúkhwɛ́ kránmɛn ntɔ sa:
– Davi Mi, wu mɛn nfɛkhu kpɛ!
40Jezwi dɔnya, ló ńchɛ wo sa wo do nkɛ bha se. Lóka mɛphuwo di nkɛ njɛ, ló Jezwi bhi nkɛ sa:
41– Ébí nɔn ɛ́nɛn salé mɛn tɛ́ sé hɛ ɛ?
Ló mɛphuwo tɔ sa:
– Hwánthe, tɛmɛ ɛtɛ́ mɛn cu wú yí npɔ kpɛ.
42Ló Jezwi krɛnmɛn sa:
– Tɛmɛ ɛwú yí! Hɛ mímíbhú chɛ hɛ phɔ jan.
43Lóyámɛ́n, anwú yí, ló ńgɛ Jezwi thá ánnri Yankan hwa ɔ́nmɔn no. Ápasá khúnbrɛn wu lóyí lókɔn, ló wo lɔ wo élri Yankan hwa.
Currently Selected:
LWIKHI 18: ENT96
Highlight
Share
Copy
Want to have your highlights saved across all your devices? Sign up or sign in
Ebrié New Testament © Bible Society of Côte D'Ivoire, 1996.
